10
1 Wɩɩsɛ kíŋse* ná Moyizi há pʋ́ŋsɛ, ɓa ká oŋwere ná háá kué cuunó ní, ɓa tɩɩ tɩɩ rá.
Ɛ́ wɩ́ɛ́, ɓa wɩ wuó a rɩ́ nɩɛ wɩ́ɛ́ cɛ́rɛ, a sɩ́ busunnu kánʋ́ Wɩɩsɛ sɩ́ɛ́, a tɩŋ pʋsɛ ná tɩɩ tɩɩ ɓa há ɓʋ́ʋ́sɛ́ aá pá Wɩɩsɛ, bɩná rɩ́ bɩná wuu ná mɛ́.
2 Rɩ pʋsɛ ná ɓʋ́ʋ́sɛ pá Wɩɩsɛ, fa wo nɩɛ ná háá tʋŋ ɛ́ wɩ́zɔkɛ́ aá mʋ́ʋ́rɛ naasɩ́ balá dʋŋɔ rɛ́, ɓa báá fa wʋ́ɔ́ wɩ́bɔma wɩ́ɛ́ bɩɩnɛ, káá báá sɩ́ pʋsɛ má ɓʋ́ʋ́sʋ́.
3 Amá ɛ́ pʋsɛ ɓʋ́ʋ́sɛ bɩná wuu, ʋ́ʋ́ liisi nɩɛ wɩ́bɔma wɩ́ɛ́ nɛ́, bɩná wuu.
4 Ká nɛsɛ rɩ́ bʋnnɛ cɛ́l, sɩɛ́ wɩ nɩbííne wɩ́bɔma wuó lɩ́sɛ.
5 Ɛ́ nɛ́ tɛ, tɛ́ŋ ná mɛ́ Kirisi háá já rʋ́ʋ́ ko dúníé, ʋ bʋl Wɩɩsɛ rɩ́ bʋlɛ́:
«Pʋsɛ ná ɓa há ɓʋ́ʋ́sɛ́ aá pɛ́ɩ́, ɩ waá ja;
pállɛ ná má ɓa háá pɛ́ɩ́, ɩ wʋ́ɔ́ máá ja.
Amá tɛŋ ná ɩ há ɛ́ɛ́ páŋ nɛ́, ɩ jɩ́ja.
6 Pʋsɛ ná ɓa há ɓʋ́ʋ́sɛ́ a nyɩkɛ ɓa físi aá pɛ́ɩ́,
arɩ́ pʋsɛ ná náŋa ɓa há kɛ́sɛ́ ɔsɛ vʋka aá pɛ́ɩ́,
wɩ́bɔma yɩr mɛ́, ɩ sɩɛrʋ wʋ́ɔ́ oro wuu tɔ́rɛ́.
7 Ɛ́ nɛ́ tɛ ŋ sɛ́:
‹Wɩɩsɛ, néŋ ní,
ŋ kúó rɩ́ŋ tʋ́mɩ́ cólle ní,
anɛ ɛ́ ɓa há bʋ́lɩ́ŋ wɩ́ɛ́ Wɩɩsɛ Kɛnɔ sɩɛrʋ› »
8 Kirisi lá sɩ́ɛ́ bʋlɛ́:
«Pʋsɛ ná ɓa há ɓʋ́ʋ́sɛ́ aá pɛ́ɩ́, ɩ waá ja; pállɛ ná má ɓa háá pɛ́ɩ́, ɩ wʋ́ɔ́ máá ja.
Pʋsɛ ná ɓa há ɓʋ́ʋ́sɛ́ a nyɩkɛ ɓa físi aá pɛ́ɩ́, arɩ́ ɓa ná ɓa há kɛ́sɛ́ ɔsɛ vʋka aá pɛ́ɩ́ wɩ́bɔma yɩr mɛ́, ɩ sɩɛrʋ wʋ́ɔ́ má oro wuu tɔ́rɛ́.»
Ká Wɩɩsɛ kíŋse ní mákɛ́ ɛ́ wɩ́ɛ́ wuu, ɓaá a má.
9 Bʋllɛ mɛ́, Kirisi báá sɛ́:
«Wɩɩsɛ, néŋ ní, ŋ kúó rɩ́ŋ tʋ́mɩ́ cólle ní.»
Ɛ́ wɩ́ɛ́, Kirisi dʋ́sɛ́ dʋ́ŋdʋ́ʋ̃́ vʋk'ɔsɔ́ tá nɛ́ ɛ́, ká bílú tɩɩ ɓɩnɔ.
10 Zeezi Kirisi sɩɛ́ tʋ́ŋ Wɩɩsɛ cólle, a púú tɛŋ ɔsɛ vʋk naasɩ́ balá dʋŋɔ, a a, á a Wɩɩsɛ nɩɛ.
11 Wɩɩsɛ vʋk'ɔɔsɔ é wuú de cɩ́ dahá nɛ́ kál wuu, aá tʋ́mʋ́ tʋtʋmɛ́, a vaa ɓʋ́ʋ́sɛ pʋsɛ pɩ́pá Wɩɩsɛ, ká ɛ́ pʋsɛ ɓʋ́ʋ́sɛ dé wɩ nɩbííne wɩ́bɔma wuo dʋsɛ aá tá mʋɔ́ má.
12 Amá Kirisi é, vʋk'ɔsɔ́ balá nɛ́ ʋ ɔsɛ, rʋ́ʋ́ dʋsɛ nɩbííne wɩ́bɔma tá ɓóŋ, a kaá mʋ́ wuu, ká sɩɛ́ ké Wɩɩsɛ néduu.
13 Mʋ́l néé mí, ʋʋ́ dɛllɛ kal ná Wɩɩsɛ háá á rʋ́ʋ́ kɛ́sʋ́ dɩŋdɔma hóú nɛ́sɛ mɛ́ nɛ́.
14 Ɛ́ wɩ́ɛ́, ʋ púú tɩɩ pá Wɩɩsɛ naasɩ́ balá nɛ́, ká nɩɛ ná ʋ há ɛ́ɛ́ ɓa a Wɩɩsɛ nɩɛ, ɓa wɩ́ɛ́ wuu cɛ́rɛ, a de kaá mʋ́ wuu.
15 Wɩɩsɛ Sabɩɩna tɩɩ má ká ɛ́ wɩ́ɛ́ dáŋsɩ́ɛ́.
Ɛ́ nɛ́ tɛ, ʋ la sɩ́ɛ́ bʋlɛ́:
16 «Nyuutɩna sɛ́:
Tápʋlɛ nyáŋ har rɩ́ mɛ́,
ná nʋtʋmɛ ná ŋ háá á rɩ́ŋ bil ŋ rɩ́wɔ́ pɛ́kɛ;
ŋ sɩ́ a rɩ́wɔ́ zɩ́mɩ́ŋ wɩ́máŋsɛ,
a píwó héwó baŋcɩllɛ sɩɛrʋ arɩ́wɔ́ nyunni mí.»
17 Ʋ baa súúri bʋlɛ́:
«Ŋ báá wʋ́ɔ́ wɩ́bɔma rɩ́wɔ́ wɩ́zɔkɛ́ wɩ́ɛ́ liisi.»
18 Rɩ Wɩɩsɛ nɛ́ sɩɛ́ hé wɩ́bɔma suúri, ʋ báá wɩ mɔhɛ̃́ rɩ́ nɩɛ ɓʋ́ʋ́sɛ pʋ́sɛ wɩ́bɔma wɩ́ɛ́.
Á cɩ́ŋrá yardá naa mɛ́ wérí
19 Ɛ́ wɩ́ɛ́ ŋ maábináŋa, síkesíke toó, ŋmɛ́nɔ mɩ́nɔ́ a párá, ráá tɩŋ Zeezi vʋk'ɔsɔ́ cɛ́l ná mɛ́, a zʋ Wɩɩsɛ sɩ́ɛ́,* ʋ táŋtɛ* jaa sɩ́ɛ́rɩ́.
20 Zeezi wúri ŋmɛ́nɔ párá; ʋ cáŋ patɩ́ɩ́sazeno* ná zʋ Wɩɩsɛ sɩ́ɛ́.
Ʋ sɩɛ́ ká ŋmɛ́ŋfɛ́lʋ́ rɛ́, aá párá hiẽsó.
Zeezi tɛŋnamɩɛ sʋʋ ná nɛ́ wúri ɛ́ ŋmɛ́nɔ́ párá.
21 Ɛ́ wɩ́ɛ́, á kéŋ Wɩɩsɛ vʋk'ɔɔsɔ nɔhɔ̃́, ʋ bíbel Wɩɩsɛ nɩɛ mɛ́.
22 Á sɩɛ́ tuu peri Wɩɩsɛ, arɩ́ sabɩɩna balá, rɩ́ yardá ná há bɩ́ɛ́, rɩ́ síkesíke sɩ́ mɩ́nʋ́, arɩ́ sɩɛrʋ ná Zeezi cɛ́l há mʋ́ʋ́rɛ wɩ́bɩɩnɛ́ ná há bɔ́mɔ́ tá, rɩ́ tɛŋ ná ʋ há fóé, arɩ́ nyii ná há wɩ busunnu kené.
23 Yɩɛla ná á há kené, á hé dóé, a bʋ́bʋ́lʋ́ wɩ́ɛ́ arɩ́ taŋá, bee wɩ́ɛ́ Wɩɩsɛ wʋ́ʋ́ nʋɔ har bɩrɛ, ʋ há sʋ́ʋ́ sɩ́ ɔ́ʋ́ ná párá, ʋʋ́ á nɛ́.
24 Á bel náŋá mɛ́, a dúóri náŋá naasɛ, a makɛ ráá cólli náŋá, káá a wɩ́were má.
25 Á sɩ́ náŋá mɛ́ héé sɛ́ŋɓɛlɩ́ á, anɛ ɛ́ há ká nɩɛ náŋá wɩ́'aamalɩ́, amá á dúórí náŋá naasɛ, a ɔsɛ fɛ́l sɩ́ɩ́, bee wɩ́ɛ́ ɩ́ nóú rɩ Nyuutɩna Zeezi bɩrkoe pérí tɛ́sɩ́ɩ́.
26 Raá nɛ́ ɛ̃ taŋá ná, ká ha taalɛ aá a wɩ́bɔma, vʋk'ɔsɔ́ nɔ́ŋ báá toó, aá sɛsɛ wɩ́bɔma.
27 Ʋ ná há mɩ́nɔ́ nɛ́ ká:
Ráá fɩ́fá héwíŋ, aá dɛllɛ Wɩɩsɛ sarɩ́ya, arɩ́ níŋváá ná háá á rʋ́ʋ́ dí nɩɛ ná há cɩ́ Wɩɩsɛ mɛ́.
28 Rɩ nɛ́ŋ zɔ́kɛ́ kíŋse ná Wɩɩsɛ ha ɛ́ɛ́ Moyizi pʋ́ŋsɛ, rɩ́ nɩɛ bɛllɛ, botoro a dáŋsɩ́ɛ́wa, ɓaá ɓʋ́ tɩ́na nɛ́, ɓa wʋ́ʋ́ susú fá.
29 Rʋʋ nɛ́ sɩɛ́ ká nyɛ, rɩ nɛ́ŋ rɩ́ bélé guoni Wɩɩsɛ Bio, rɩ́ɩ́ bel rɩ Kirisi cɛ́l ná há bíl nʋtʋmɛ ná wɩ wɩ́ɩ́ wuó ɔsɛ, ká ɛ́ cɛ́l nɛ́ mʋ́ʋ́rʋ́ wɩ́bɔma, rɩ́ɩ́ tʋksɛ Wɩɩsɛ Sabɩɩna ná háá pá bárka, ɩ́ wɩ ɛ̃ rɩ́ ɛ́ tɩ́na nɛ́ sɩ́ caasɛ ná wɩɩla kɩ́ŋkáŋ wuu?
30 Á ɛ̃ Wɩɩsɛ wérí, ʋ sɛ́:
«Ŋ nɛ́ tɩ́ɩ́wa tɛŋbuoró díí, ŋ nɛ́ tɛ aa túme.»
Ká baa bʋlɛ́:
«Nyuutɩna Wɩɩsɛ sɩ́ dúú nɩɛ sarɩ́ya.»
31 Rɩɩ zʋ́ Wɩɩsɛ ná há wómmó nɛ́sɛ é, ʋ sɩ́ lɔrɛ a pɛ́ɩ́.
32 Ɩ́ líísíwa tɩɩ ná, tésíé mí ɩ́ há ná wɩ́ɩ́ ná, tɛ́ŋ ná mɛ́ ɩ́ há ná Wɩɩsɛ pʋmmɔ ná; ɩ́ fa lówó a ná wɩɩla wérí, ká cɩ́ tɩkɛ.
33 Tɛ́ŋ nɔ́ŋɔ mɛ́, ɓa hɩ́ɩ̃́sɩ́wa, a bɛ́ŋsɩ́wa jamáŋ sɩ́ɛ́, tɛ́ŋ nɔ́ŋɔ má mɛ́, ɩ́ cɩ́nɔ́ tɩkɛ nɩɛ ná ɓa háá ɔ́wɔ́ ɛ́.
34 Nɩɛ ná ɓa há kɛ́sɛ́ tɔ́ bɩnajaa mɛ́, ɩ́ fɔ́wɔ́ susu.
Ɩ́ sáŋɔ́ arɩ́ satɔrɔ́, ɓa lɛ́ɩ́wa ɓɩɛ, bee wɩ́ɛ́ ɩ́ ɩ́ɔ̃́ zɩŋ rɩ́ɩ́wa kéŋ ɓɩɛ ná wér há kɛ óŋ wuu, a waá daarɛ, a kaá mʋ́ wuu.
35 Ɛ́ wɩ́ɛ́, ɩ́ sɩ́ɩ́wa yardá tá, ɩ́ kánɩ́wa yardá wérí, ʋ túme zéŋ.
36 Ʋ mɔhɔ̃́ rɩ́ɩ́wa cɩ́ pɩ́ɩ̃́, a makɛ, rɩɩ́waá tʋ́ŋ Wɩɩsɛ cólle, rɩ́ɩ́wa ná omo ná Wɩɩsɛ há tá nʋɔ bʋ́lʋ́ sɩ́ pɛ́ɩ́wa.
37 Ɓa pʋ́ŋsɔ́ bʋlɛ́:
«Ʋ káánɛ mʋɔ́, mʋɔ́ yɔ́ɔ́ tɩɩ tɩɩ,
ká rɩ́ nɛrɔ ná há mɔhɛ̃́ rʋ́ʋ́ ko,
rʋ́ʋ́ ko, ʋ waá dáánɛ.
38 Wɩɩsɛ sɛ́:
Nɛrɔ ná há ká tékétéké ŋ sɩ́ɛ́ mɛ́,
yardá mɛ́ nɛ́ rʋ́ʋ́ tɩŋ aá hiẽsi.
Amá rʋʋ nɛ́ bɩ́rɛ́ mʋ́ har rɩ́,
ŋ sɩɛrʋ wʋ́ʋ́ nyúú tɔrɛ.»
39 Á é sɩɛ́ to nɩɛ ná há bɩ́rɛ́ mʋ́ har rɩ́ aá yʋ́ksɛ sɩɛrʋ.
Nɩɛ ná há kéŋ Wɩɩsɛ yardá, á mɩ́ŋwɔ́ sɩɛrʋ nɛ́, aá ná laatɛ́.