Nʋtʋŋbɩnɛ́ rɩ́ nʋtʋŋfɛlɔ busunnu mʋ́ʋ́rɛ wɩ́ɛ́
9
1 Dʋ́ŋdʋ́ʋ̃́ nʋtʋmɛ ná Wɩɩsɛ há bílé, ʋ fa kénú ŋmɛ́ŋsɛ rɛ́, a ka Wɩɩsɛ dɩmɩnɩ́* má tíé nyúú rɛɛ́, ɓaá cʋɔlɛ Wɩɩsɛ ráŋ.
2 Táŋtɛ* ná ɓa há cíké, ʋ kéŋ dɩhɛ̃́ bɛllɛ nɛ́:
jɩgbaarɔ́ rɩ́ sɩ́ɛ́rɩ́.
Jɩgbaarɔ́ ná nɛ́ ɓaá yɩ́rɛ Wɩɩsɛ dɩmɩnɩ́*; ráŋ nɛ́ ɓa bil cáŋsɛ,* a bil táábɩl, a sakɛ dɩpɛ́ŋwa ráŋ aá pá Wɩɩsɛ.
3 Ká sɩ́ɛ́rɩ́ ná ɓa há pí patɩ́ɩ́sazeno* nɔ́ŋɔ kɛ́rɛ, ɓaá yɩ́rɛ ráŋ Wɩɩsɛ sɩ́ɛ́.*
4 Ɛ́ dɩhɩ̃́, salmɛ koro* mɩŋ ráŋ, ɓa nyɩkɛ tulaaléwa ʋ daha, aá pá Wɩɩsɛ.
Nʋtʋmɛ dáka* má fa mɩŋ ráŋ, ɓa pi salmɛ tɔ́ʋ́ wuu mí.
Ɛ́ dáka sɩɛrʋ, salmɛ gbaŋa mɩŋ ráŋ, máánɛ* mɩ́nʋ́ sɩɛrʋ; Aarɔŋ* deŋtuke ná há tɔ́wɛ́ paarʋ, ʋ má mɩŋ ráŋ, arɩ́ dɔ́wɩ́pɛ́rsɛ ná daha, Wɩɩsɛ fa há pʋ́ŋsɛ nʋtʋmɛ wɩ́máŋsɛ ná.
5 Dáka ná nyúú, ɓa má oŋtʋlɛ́, anɛ Wɩɩsɛ malɩ́kawa a cíksi, ɓa kiŋkeru fɩ́ɛ́l tɔ́ ráŋ ná, ɓa háá tá cɛ́l aá sʋl wɩ́zɔkɛ́ suúri, Wɩɩsɛ rɩ́.
Mʋ́l néé mí, ŋ wʋ́ɔ́ wɩ́ɛ́ wuó bʋl kúnúnú.
6 Rɩ onni ná wuu ní bílwó bilé, tɛ́ŋ wuu mí, Wɩɩsɛ vʋk'ɔɔsa* zʋ jɩgbaarɔ́ ná, aá tʋ́ŋwɔ́ tʋtʋmɛ́.
7 Ká sɩ́ɛ́rɩ́ ná é, Wɩɩsɛ vʋk'ɔɔsa nɔhɔ̃́ dʋŋɔ nɩ́ɩ́ zʋ ráŋ, bɩná wuu, naasɩ́ balá; ʋ má sɩɛ́ ka cɛ́l nɛ́ zʋ, a pá Wɩɩsɛ, a sʋ́lʋ́ wɩ́zɔkɛ́ suúri, a sʋl jamáŋ má há wɩ ɛ̃, ká a wɩ́ɛ́ ná zɔkɛ suúri, Wɩɩsɛ rɩ́.
8 Wɩɩsɛ Sabɩɩna já rʋ́ʋ́ tɩŋ wɩ́ɛ́ nyáŋ mɛ́, a makɛ párá, ráá zɩŋ rɩ́ Wɩɩsɛ táŋtɛ jaa ná mɩnɛ́ mɛ́, ŋmɛ́nɔ toó rɩ́ nɩɛ zʋ Wɩɩsɛ sɩ́ɛ́.*
9 Wɩ́ɛ́ nyáŋ wuu ká zaa wɩ́ɛ́ cuunó ní.
Ɓaá já rɩ́wɔ́ makɛ, rɩ satɔ́ɔ́rpállɛ rɩ́ vʋka ɔsɛ pá Wɩɩsɛ wɩ wuó a, rɩ́ nɛrɔ ná háá tʋŋ ɛ́, rʋ́ʋ́ sɩɛrʋ a wérí, Wɩɩsɛ sɩ́ɛ́ mɛ́.
10 Ɓa taŋá máŋsɛ nɩɛ ɓɩdííle rɩ́ nyɔɔlɔ́ arɩ́ kusúŋ sɩɛrʋ tɩɩ sɛsɛ́, há ká ɛ́ nɛ́.
Ɓa ká dúníé né nyúú wɩ́máŋsɛ rɛ́, nɩɛ fa tɩŋ a ko peri wɩ́fɛlɛ bilé.
11 Amá Kirisi há kúé, ʋ ká Wɩɩsɛ vʋk'ɔɔsɔ nɔhɔ̃́ nɛ́, a ka oŋwere ko rʋ́ʋ́ párá.
Ɛ́ har rɩ́ mɛ́, ʋ zɩ́ bána, a zʋ táŋtɛ jaa ná há zénó, a a wérí kɩ́ŋkáŋ má, a kɩ́llɛ tíé nyúú ɓɩnɔ ná.
Ɛ́ táŋtɛ jaa, nɩbííne nɛ́sɛ ra wʋ́ʋ́ cíké, ʋ to dúníé né óŋ.
12 Kirisi sɩɛ́ wɩ bʋŋgboksi rɩ́ nɛsɛ cɛ́l nɛ́ kené zʋ Wɩɩsɛ sɩ́ɛ́,* amá ʋ tɩɩ cɛ́l nɛ́ ʋ kaa zʋ ráŋ, naasɩ́ balá dʋŋɔ, a tɩŋ ɛ́ mɛ́, a lárá tá wɩ́bɔma nɛ́sɛ mɛ́, a kaá mʋ́ wuu.
13 Bʋŋgboksi rɩ́ nɔɓallɛ cɛ́l arɩ́ nɔmafísi tapʋmma nɛ́ fa, ɓaá pi, a mɩ́sɛ nɩɛ ná há zɔ́kɛ́ kíŋse ná, a mʋ́ʋ́rɩ́wɔ́ busunnu.
14 Rɩ nyɛ é ní, Kirisi cɛ́l nɛ́ wommé kɩ́ŋkáŋ wuu!
Bee wɩ́ɛ́ ʋ tɩ́ŋ Wɩɩsɛ Sabɩɩna ná há waá sʋwɛ mɛ́, a púú tɩɩ ɔsɛ vʋk ná há wɩ busunnu mʋɔ́ wuu kené, a pá Wɩɩsɛ.
Ʋ cɛ́l ná nɛ́ sɩ́ mʋ́ʋ́rɩ́rá baŋcɩllɛ wɩ́ɛ́ ná há ká sʋ́ʋ́rɩ́wɩ́ɛ́, kárá wólli tʋŋ pá Wɩɩsɛ ná há waá sʋwɛ.
15 Ná wɩ́ɩ́ ná há tɛ Kirisi ní a záárɔ, a mɩŋ Wɩɩsɛ rɩ́ nɩbííne pɛ́kɛ nʋtʋŋfɛlɔ ná mɛ́, a makɛ rɩ́ Wɩɩsɛ nɩyɩ́rɛ ná liwe ná há waá tenni, Wɩɩsɛ há tá nʋɔ a bʋ́lʋ́ sɩ́ pɔ́wɔ́.
Ɛ́ wúóló aá tɩŋ, bee wɩ́ɛ́ nɛ́ŋ rɩ́ sʋ́wɛ́; a tɩŋ ɛ́ tɩ́na sʋʋ yɩr mɛ́, ɛ́ nɩɛ fa há ɛ́ɛ́ zɔkɛ, dʋ́ŋdʋ́ʋ̃́ nʋtʋmɛ ná tɛ́ŋ mɛ́, ɓa lɔ́wɔ́ tɩɩ, ɓa wɩ́zɔkɛ́ nɛ́sɛ mɛ́.
16 Rɩ nɛrɔ nɛ́ bʋl wɩ́ɩ́, a bʋlɛ́ rʋʋ sʋ́wɔ́, ɓɩ́ŋ nɛ́ tʋ́ʋ́ liwe, ʋ mɔhɔ̃́ rʋ́ʋ́ sʋwɛ nɛ́, ká rɩ́ tɩ́na tɩ́llɛ ɛ́ liwe.
17 Rɩ nɛrɔ ná há bʋ́l* wɩ́ɩ́ ná bil ní ha wɩ sʋ́wɛ́, nɛrɔ ná ʋ há sʋ́ʋ́ nɛ́ tɛ liwe, ʋ wɩ liwe ná wuó dí.
Amá rʋʋ nɛ́ sʋ́wɛ́ é, ʋ wúóló aá dí.
18 Ɛ́ nɛ́ tɛ, dʋ́ŋdʋ́ʋ̃́ nʋtʋmɛ ná Wɩɩsɛ há bílé ʋ rɩ́ nɩbííne pɛ́kɛ, cɛ́l nɛ́ bɩ́sɛ́, a wúri ɛ́ nʋtʋmɛ ŋmɛ́nɔ.
19 Moyizi lá sɩ́ɛ́ makɛ Wɩɩsɛ wɩ́máŋsɛ ná há mɩŋ kíŋse ná sɩɛrʋ, a pá jamáŋ wuu ní, ká sɩɛ́ pi nɛsɛ rɩ́ bʋŋgboksi cɛ́l arɩ́ nyii, a ja pelɔ́ŋfɛ́lɛ rɩ́ ɩ́zɔ́pɛ* paarʋ, a vɔwɛ, a sɩɛ́ pii líwíwó mí, a mɩ́sɛ hé kíŋse* kɛnɔ ná mɛ́, arɩ́ jamáŋ ná wuu mí,
20 ká bʋlɛ́:
«Cɛ́l ná Wɩɩsɛ há píé bil nʋtʋmɛ ɩ́ rɩ́rʋ́ pɛ́kɛ, rɩ́ɩ́wa tɩ́tɩŋ nɛ́ nyɛ.»
21 Ká Moyizi a ɛ́ cɛ́l tɩɩ, a mɩ́sɛ Wɩɩsɛ táŋtɛ jaa ná rɩ́ onni ná wuu ɓa há kené aá tʋŋ Wɩɩsɛ tʋtʋmɛ́ ráŋ.
22 Taŋá, Wɩɩsɛ kíŋse makɛ́ mɛ́, onni ná ɓa há wɩ cɛ́l kené aá mʋ́ʋ́rɛ busunnu, ɓa wɩ kaŋ; rɩ cɛ́l nɛ́ wɩ bɩ́sɛ́, suúri toó.
Kirisi púú tɩɩ ɔsɛ vʋk nɩbííne wɩ́bɔma yɩr mɛ́
23 Ɛ́ onni wuu ká bána nyúú onni cúŋsi ní, ɛ́ wɩ́ɛ́, ʋ fa mɔhɔ̃́ rɩ́wɔ́ mʋ́ʋ́rɩ́wɔ́ busunnu ɛ́ nɛ́.
Ká bána nyúú onni ná tɩɩ é, vʋk'ɔsɔ́ ná cɛ́l wommí há kɛ pʋsɛ cɛ́l, ʋ nɛ́ wówó busunnu aá mʋ́ʋ́rɛ.
24 Kirisi wɩ Wɩɩsɛ táŋtɛ* jaa ná nɩbííne nɛ́sɛ há cíké, a cesi ɓɩtaŋá tɩɩ ná, nɛ́ zʋ́ɛ́, amá ʋ zʋ́ Wɩɩsɛ dɩmɩnɩ́* tɩɩ nɛ́, bána nyúú, rʋ́ʋ́ cɩ́ Wɩɩsɛ sɩ́ɛ́ mʋ́l néé mí, á yɩr mɛ́.
25 Wɩɩsɛ vʋk'ɔɔsa nɔhɔ̃́ ná é, bɩná wuu ní, ʋ zʋ́zʋ táŋtɛ jaa ná sɩ́ɛ́rɩ́, Wɩɩsɛ sɩ́ɛ́,* arɩ́ pʋsɛ cɛ́l, ʋ tɩɩ cɛ́l rá.
Amá Kirisi é wɩ zʋ́ɛ́ rʋ́ʋ́ púú tɩɩ ɔsɛ vʋk naasɩ́ ɛrɛ́.
26 Rɩ ɛ́ nɛ́, ʋ fa sɩ́ dí wɩɩla naasɩ́ ɛrɛ́, a pɔ́ dúníé ɛɛ mɛ́ wuu.
Amá sɩ́sɛ́nyɛ, ɛ́ wɩ́ɛ́ tɛ́ŋ há ténné, ʋ kúó, naasɩ́ balá, a púú tɩɩ ɔsɛ vʋk, rʋ́ʋ́ dʋsɛ nɩbííne wɩ́bɔma tá.
27 Nɩbííno wuú á rʋ́ʋ́ sʋwɛ naasɩ́ balá nɛ́; (ɛ́ har rɩ́ mɛ́ Wɩɩsɛ sɩ́ dí nɛrɔ wuu sarɩ́ya.)
28 Kirisi má ká ɛ́ nɛ́, ʋ púú tɩɩ ɔsɛ vʋk naasɩ́ balá nɛ́, rʋ́ʋ́ dʋsɛ nɩkana wɩ́bɔma tá.
Ʋ sɩ́ bɩrko, ʋ sɩɛ́ to wɩ́bɔma dʋsɛ wɩ́ɛ́ nɛ́ ʋ kúko, amá ʋʋ́ kó, rɩ́ nɩɛ ná há kéŋwó tɩɩ aá dɛ́llʋ́, rɩ́wɔ́ nɛ́ ná laatɛ́.