Zeezi ní ká Wɩɩsɛ nʋtʋŋfɛlɔ vʋk'ɔɔsɔ nɔhɔ̃́
8
1 Wɩ́ɩ́ ná á háá bʋlɛ́ wɩ́nyúú ní nyɛ:
Á ɓɩɛ́na kéŋ Wɩɩsɛ vʋk'ɔɔsɔ nɔhɔ̃́ ná há mɩŋ bána nyúú, a ké Wɩɩsɛ ná dóé há kɛ onni wuu, kuóɓasa néduu.
2 Ʋʋ́ tʋ́mʋ́ tʋtʋmɛ́ Wɩɩsɛ sɩ́ɛ́* nɛ́; Wɩɩsɛ táŋtɛ* jaa tɩɩ nɛ́ ɛ́, ʋ tɩɩ há cíké, nɩbííne ra wɩ cíké.
3 Wɩɩsɛ vʋk'ɔɔsa nɔhɔ̃́ é wuu, ɓa bílú rʋ́ʋ́ la onni ní aá pá Wɩɩsɛ, a ɓʋ́ʋ́sɛ pʋsɛ má aá pɔ́ʋ́.
Ɛ́ wɩ́ɛ́, ʋ mɔhɔ̃́ ráá má Wɩɩsɛ vʋk'ɔɔsɔ nɔhɔ̃́ ná, má pi óŋ pá Wɩɩsɛ.
4 Rʋʋ fa mɩŋ dúníé mí ní, ʋ fa wɩ Wɩɩsɛ vʋk'ɔ́ɔ́sʋ́ a, bee wɩ́ɛ́ náŋa mɩ́nɔ́, a tɩŋ Wɩɩsɛ kíŋse makɛ́ mɛ́, a la onni aá pá Wɩɩsɛ.
5 Ɛ́ nɩɛ fa háá tʋŋ tʋtʋmɩ́ ná, ʋ ká bána nyúú wɩ́tɩɩwa cuunó ní, ɓa cícesi.
Moyizi fa háá já rʋ́ʋ́ ciki Wɩɩsɛ táŋtɛ jaa ná, Wɩɩsɛ fa bʋ́lʋ́ rɩ́ bʋlɛ́:
«Bel wérí, ciki táŋtɛ ná, rʋ́ʋ́ nɛ ɛ́ ná ŋ há mákɛ́ pɛ́ɩ́, paalɔ nyúú.»
6 Ká Kirisi tʋtʋmɩ́ ná nɛ́ kɩ́wɔ́ wuu, a tá tíé; ɛ́ nɛ́ tɛ, Wɩɩsɛ tɩ́ŋʋ́ mɛ́ a bil nʋtʋŋfɛlɔ* ná wér ní há kɛ tésíé ɓɩnɔ, bee wɩ́ɛ́ Wɩɩsɛ há tá nʋɔ bʋlʋ́ sɩ́ a wɩ́ɛ́ ná, ɓa nɛ́ kɛ tésíé nʋtállɛ* ná.
7 Ɛ́ wɩ́ɛ́, rɩ tésíé nʋtʋmɛ ná fa césó rí, Wɩɩsɛ báá fa wɩ bʋllɛ ɓɩnɔ́ bil.
8 Wɩɩsɛ há nóú nɩɛ dɩzɔkɛ́, ɛ́ nɛ́ tɛ, ʋ bʋ́lwɔ́ bʋlɛ́:
«Ɩ́ ná, tápʋlɛ sɩ́ ko,
rɩ́ŋ bil nʋtʋŋfɛlɔ* arɩ́ Ɩzɩrayɛl duo* nɩɛ,
arɩ́ Ziida* jɩmʋ́l nɩɛ.
9 Ɛ́ nʋtʋŋfɛlɔ ŋ háá á rɩ́ŋ bil,
ʋ rɩ́ nʋtʋmɛ ná ŋ fa há lá sɩ́ɛ́ bil arɩ́wɔ́ naabálwa,
tɛ́ŋ ná mɛ́, ŋ há cɔ́wɔ́ nɛ́sɛ mɛ́,
a kaa lɛ Ezipiti* tíé mí, ɓa to balá.
Ɓa tɩɩ há wɩ cɩ́nɛ́ tɩkɛ nʋtʋmɛ ná ŋ há bílé arɩ́wɔ́,
ɛ́ nɛ́ tɛ, ŋ má tɔ́wɔ́ wɩ́ɛ́.
Ŋ é Nyuutɩna Wɩɩsɛ, ŋ nɛ́ bʋl ɛ́.
10 Nʋtʋmɛ ná ŋ háá á rɩ́ŋ bil arɩ́ Ɩzɩrayɛl nɩɛ ɛ́ tɛ́ŋ mɛ́ nɛ́ ká:
Ŋ sɩ́ a rɩ́wɔ́ zɩ́mɩ́ŋ wɩ́máŋsɛ,
a píwó héwó nyunni mí arɩ́wɔ́ baŋcɩllɛ sɩɛrʋ.
Ŋ sɩ́ ɔ́wɔ́ Wɩɩsɛ, ká rɩ́wɔ́ má áŋ nɩɛ.
11 Ʋ báá to rɩ́wɔ́ oro wuu máŋsɩ́ŋ pɔ́ʋ́ nɔ́ŋɔ,
ɛ́ rá má ʋ maábinɔ́ŋɔ, bee wɩ́ɛ́ ɓa wuu sɩ́ zɩ́mɩ́ŋ,
a de kaa pɔ́wɔ́ sɩɛrʋ nɔhɔ̃́ mɛ́,
ká kaa mʋ́ yákwɔ́ sɩɛrʋ ɓɩwie mí.
12 Ŋ sɩ́ héwó wɩ́zɔkɛ́ suúri,
ŋ báá wʋ́ɔ́ wɩ́bɔma wɩ́ɛ́ liisi.»
13 Wɩɩsɛ há bʋ́l nʋtʋŋfɛlɔ né wɩ́ɛ́, dʋ́ŋdʋ́ʋ̃́ ɓɩnɔ ná é ká ɓɩbɩnɛ́ nɛ́.
Ká omo ná há dáánɛ́ a bɩŋ, ʋ cɩ́ yʋ́ksɛ mɛ́ nɛ́.