Wɩɩsɛ vʋk'ɔɔsɔ Mɛlɩsɩsɛdɛkɛ wɩ́ɛ́
7
1 Mɛlɩsɩsɛdɛkɛ* ná sɩɛ́ fa ká Salɛmɛ* kuóro ní, a a Wɩɩsɛ ná há kɛ onni wuu vʋk'ɔɔsɔ má.
Abɩrahaŋ* fa há mʋ́ɛ́ yo lal, a dí tɔ́nɛ náŋa kuóre ká bɩrɛ aá ko, ɛ́ Mɛlɩsɩsɛdɛkɛ nɛ́ cémú, a hé bárka pɔ́ʋ́.
2 Ʋ nɛ́ sɩɛ́ Abɩrahaŋ lɩ́sɛ ɓɩɛ ná wuu, ʋ há yó lal la, fí nyúú kere,* a pɔ́ʋ́.
Ʋ yɩr Mɛlɩsɩsɛdɛkɛ ná mʋ́l nɛ́ ká:
«Taŋá kuóro»; ʋ nɛ́ ha ká, Salɛmɛ kuóro má, ʋ má mʋ́l nɛ́ ká:
«Tɛŋfɩ́ɛ́l kuóro».
3 Ʋ wɩ áná kené, ʋ wɩ maá kené, nɛ́ŋ wʋ́ʋ́ duo ɛ̃, a wʋ́ʋ́ tɛ́ŋ lʋlɩ́ rɩ́rʋ́ tɛ́ŋ sʋwɩ́ má ɛ̃.
Ʋ nɩhɩ̃́ Wɩɩsɛ Bio ní, a a Wɩɩsɛ vʋk'ɔ́ɔ́sʋ́, a kaá mʋ́ wuu.
4 Ɩ́ ná ɛ́ báálɔ há píŋó mɔ ɛ́!
Á naabál Abɩrahaŋ tɩɩ lɩ́sɛ ɓɩɛ ná ʋ há yó lal la, ɓa fí nyúú kere, a pɔ́ʋ́ nɛ́.
5 Wɩɩsɛ kíŋse* sɩɛrʋ, ŋmɛ́nɔ mɩ́nɔ́, a pá Levi* jɩmʋ́l nɩɛ ná há ká Wɩɩsɛ vʋk'ɔɔsa,* rɩ́wɔ́ la Ɩzɩrayɛl duo* nɩɛ há kɔ́wɔ́ maábináŋa, onni fí nyúú kere; ká ɓa rɩ́wɔ́ wuu ní ká Abɩrahaŋ duo nɩɛ.
6 Amá Mɛlɩsɩsɛdɛkɛ yɩr to Levi jɩmʋ́l nɩɛ yɩra sɩɛrʋ, ká ʋ la Abɩrahaŋ onni fí nyúú kere, a cɩ́ ráŋ mɛ́ sʋl Wɩɩsɛ bárka pɔ́ʋ́; ká Wɩɩsɛ má fa tá nʋʋsɛ pá Abɩrahaŋ rɛ́.
7 Tɩ́ŋtɔ́ɛ́ sɩɛ́ to ráŋ, nɔhɔ̃́ nɛ́ sʋ́l Wɩɩsɛ bárka aá pá heŋbie.
8 Levi jɩmʋ́l nɩɛ ná háá la fí nyúú kere ná, ɓa éé sʋ́sʋ́ rɛ́, ká Mɛlɩsɩsɛdɛkɛ é, Wɩɩsɛ Kɛnɔ makɛ́ mɛ́, ʋ haá híẽ́sú rí, arɩ́ zaa wuu.
9 Á sɩɛ́ wúóló ráá bʋlɛ́ Levi ní háá la fí nyúú ker ná, ʋ má pá Mɛlɩsɩsɛdɛkɛ fí nyúú ker* rí, a tɩ́ŋʋ́ naabál Abɩrahaŋ die há lɩ́sɛ́ pɔ́ʋ́ ɛ́ wɩ́ɛ́.
10 Ʋ mʋ́l nɛ́ ká, ɓa fa ha wɩ Levi lʋ́lɛ́, ʋ fa mɩ́nʋ́ naabál Abɩrahaŋ tɛŋ mɛ́ nɛ́, tɛ́ŋ ná mɛ́ Mɛlɩsɩsɛdɛkɛ há cémú ɛ́.
Zeezi ká Wɩɩsɛ vʋk'ɔɔsɔ nɛ́, anɛ Mɛlɩsɩsɛdɛkɛ
11 Wɩɩsɛ kíŋse ná tɩ́ɛ́kɛ́ Levi jɩmʋ́l nɩɛ vʋk'ɔsɔ́ ná mɛ́ nɛ́.
Rɩ ɓa tʋtʋmɛ́ ná sɩɛ́ fa wólló a rɩ́ nɩɛ wɩ́ɛ́ wuu cɛ́rɛ wérí rí, ʋ báá fa wɩ mɔhɛ̃́ rɩ́ Wɩɩsɛ vʋk'ɔɔsɔ nɔ́ŋɔ, ko anɛ Mɛlɩsɩsɛdɛkɛ, ká sɩ́ Aarɔŋ* nɛ́ nɛ́.
12 Rɩ Wɩɩsɛ vʋk'ɔsɔ́ ná duo níí bɩ́rsɛ́ é, Wɩɩsɛ kíŋse má mɔhɔ̃́ rɩ́wɔ́ bɩ́rsɛ nɛ́.
13 Á Nyuutɩna Zeezi wɩ́ɛ́ nɛ́ ɓa bʋ́bʋl ɛ́, ʋ má lɛ́ jɩmʋ́l oro rí.
Ɛ́ jɩmʋ́l nɩɛ sɩɛrʋ, nɛ́ŋ oro wuu ha wɩ koro sɩ́ɛ́ cɩ́nɛ́, a ɔsɛ vʋk pá Wɩɩsɛ.
14 Ʋ ká nyaamɩ́, á Nyuutɩna Zeezi lɛ Ziida* jɩmʋ́l nɩɛ sɩɛrʋ nɛ́.
Moyizi sɩɛ́ há bʋ́l Wɩɩsɛ vʋk'ɔɔsa wɩ́ɛ́, ʋ wɩ ɛ́ jɩmʋ́l nɩɛ ráŋ héé.
15 Wɩ́ɩ́ ná sɩɛ́ há tɛ, ɛ́ wɩ́ɛ́ ɔsɛ a taŋá nɛ́ ká:
Wɩɩsɛ vʋk'ɔɔsɔ nɔ́ŋɔ má báá há kúé, anɛ Mɛlɩsɩsɛdɛkɛ.
16 Ʋ wɩ nɩbííne nɩtɩnnɛ wádawa mɛ́ nɛ́ tɩ́ŋɛ́, a a Wɩɩsɛ vʋk'ɔɔsɔ, amá a tɩ́ŋʋ́ mɩɩsɛ ná há waá tenni mí ní.
17 Anɛ ɛ́ ɓa há pʋ́ŋsɛ Wɩɩsɛ Kɛnɔ sɩɛrʋ bʋ́lʋ́ wɩ́ɛ́ bʋlɛ́:
«Ɩ ká Wɩɩsɛ vʋk'ɔɔsɔ nɛ́,
a kaá mʋ́ wuu, anɛ Mɛlɩsɩsɛdɛkɛ.»
18 Ɛ́ wɩ́ɛ́, wádabɩnɛ́wa ná dʋ́sɔ́, bee wɩ́ɛ́ ɓa wɩ dóé kené, ɓa wɩ wɩ́ɩ́ wuó ɔsɛ.
19 (Wɩɩsɛ kíŋse ná wɩ ɛ́ɛ́ nɛ́ŋ oro wuu wɩ́ɛ́ cɛ́rɛ wérí.)
Amá mʋ́l néé mí, á ná yɩɛla ná wér há kɛ Wɩɩsɛ kíŋse ná.
Ɛ́ yɩɛla yɩr mɛ́ nɛ́, á wólli Wɩɩsɛ píperi.
20 Wɩɩsɛ sɩɛ́ wɩ ɛ́ ɛ́ɛ́ yɔ́ɔ́, ʋ bíl ŋmɔ́ɔ́ rɛ́, ɛ́ wɩ́ɛ́ mɛ́.
Nɩɛ ná ɓa há lɩ́sɛ ɓa bɩrmɛ Wɩɩsɛ vʋk'ɔɔsa, Wɩɩsɛ wɩ ŋmɔ́ɔ́ bílé ɓa wɩ́ɛ́.
21 Amá Zeezi é lɩ́sɛ mɛ́, Wɩɩsɛ ŋmɩ́ɛ́sɔ́ bʋ́lʋ́ rɩ́ bʋlɛ́:
«Nyuutɩna Wɩɩsɛ ŋmɩ́ɛ́sɔ́, ʋ wʋ́ʋ́ nʋɔ har bɩrɛ:
‹Ɩ ká Wɩɩsɛ vʋk'ɔɔsɔ nɛ́, a kaá mʋ́ wuu.› »
22 A tɩŋ ɛ́ wɩ́ɛ́, Zeezi ní ha ká nɛrɔ ná há zʋ́rá rɩ́ Wɩɩsɛ pɛ́kɛ, a a nʋtʋmɛ* ná há wéró kɩ́llɛ ɓɩbɩnɛ́, a wɩ wuó giri, mɩ́ŋrá rɩ́ Wɩɩsɛ pɛ́kɛ.
23 Wɩ́ɩ́ ná nɔ́ŋɔ há mɩ́nɔ́ nɛ́ ká, Wɩɩsɛ vʋk'ɔɔsa ná náŋa fa káŋ, bee wɩ́ɛ́ sʋʋ wɩ sáŋɛ́, oro wuu tʋŋ aá dáánɛ.
24 Amá Zeezi é waá sʋwɛ, ʋ vʋk'ɔsɔ́ wɩ tokó kené.
25 Ɛ́ wɩ́ɛ́, nɩɛ ná há tɩ́ŋʋ́ mɛ́ ko Wɩɩsɛ rɩ́, ʋ wówó la aá tá wérí, bee wɩ́ɛ́ ʋ há wómmó, ʋ mɩ́nɔ́ tɛ́ŋ wuu mí, a sʋl Wɩɩsɛ aá pɔ́wɔ́.
26 Zeezi ní ɓɩɛ́na fa ká Wɩɩsɛ vʋk'ɔɔsɔ nɔhɔ̃́ ná, há wórá aá ɔsɛ.
Ʋ wɩ busunnu mʋ́ɔ́ má kené, ʋ wɩ dɩzɔkɩ́ kené, ʋ wɩ wɩ́bɔ́ŋ kené; ʋ lɩ́sʋ́ tɩɩ wɩ́bɔŋ'aara sɩɛrʋ, Wɩɩsɛ cúólú ʋ zɩ́ nyúú rí, a kɩ́llɛ bána.
27 Wɩɩsɛ vʋk'ɔɔsa* nɩhɩɛ̃́sɛ ná é, fa mɔhɔ̃́ rɩ́wɔ́ ɓʋ́ʋ́sɛ pʋsɛ nɛ́ kál wuu, ɓa tɩɩ wɩ́bɔma wɩ́ɛ́ kɛ́rɛ́, ká zɩŋ ɓʋ́ʋ́sɛ pʋsɛ, nɩɛ wɩ́bɔma wɩ́ɛ́.
Amá Zeezi é wɩ mɔhɛ̃́ rʋ́ʋ́ a ɛ́.
Ʋ dé púú tɩɩ nɛ́ a ɔsɛ vʋk naasɩ́ balá léŋ, ká ʋ mɔ.
28 Wɩɩsɛ vʋk'ɔɔsa nɩhɩɛ̃́sɛ ná ɓa há tɩ́ŋ Wɩɩsɛ kíŋse mí a bílwó, ɓa fa ká nɩbííne ní, ɓa wɩ dóé kené.
Amá Wɩɩsɛ ŋmɔ́ɔ́ ná ʋ há bílé, ʋ kíŋse ná har rɩ́ mɛ́, ɛ́ ŋmɔ́ɔ́ mɛ́ nɛ́ ʋ tɩŋ bílú Bio, ʋ a Wɩɩsɛ vʋk'ɔɔsɔ nɔhɔ̃́, ʋ cúólú, ʋ wɩ́ɛ́ wuu cɛ́rɛ ɛ́ ʋ háá jɛɛ́, a de kaá mʋ́ wuu.