5
1 Wɩɩsɛ vʋk'ɔɔsa nɔhɔ̃́ é wuu, ɓaá lɩ́sʋ́ nɩbííne sɩɛrʋ nɛ́, a bílú nɩbííne rɩ́ Wɩɩsɛ pɛ́kɛ, wɩ́ɛ́ ɔsɛ́ yɩr mɛ́; ʋ nɛ́ lá nɩɛ zilé aá pá Wɩɩsɛ, a ɓʋ́ʋ́sɛ pʋsɛ aá mʋ́ʋ́rɛ wɩ́bɔma má.
2 Ʋ tɩɩ há ká pʋɔla, ʋ wo wɩráŋ'ɛ̃wa arɩ́ nɩyéŋŋe wɩ́ɛ́ mʋ́ʋ́la aá nɛ.
3 A tɩ́ŋʋ́ tɩɩ pʋɔlɩ́ ná yɩr mɛ́, ʋ mɔhɔ̃́ rʋ́ʋ́ ɔsɛ vʋk ʋ tɩɩ wɩ́bɔma wɩ́ɛ́, ká ɔsɛ vʋk nɩkana ná má wɩ́bɔma wɩ́ɛ́.
4 Nɛrɔ wuu wʋ́ʋ́ tɩɩ wuo lɩ́sɛ aá hé ɛ́ tʋtʋmɩ́ mɛ́.
Wɩɩsɛ nɩ́ɩ́ lɩ́sɛ tɩ́na, a pi ɛ́ tʋtʋmɩ́ pá, anɛ ʋ há lɩ́sɛ Aarɔŋ* ɛ́.
5 Ɛ́ tɩɩ nɛ́, Kirisi má tɩɩ ra wʋ́ʋ́ tɩɩ lɩ́sɛ rʋ́ʋ́ a Wɩɩsɛ vʋk'ɔɔsɔ nɔhɔ̃́, a píŋsú tɩɩ, amá Wɩɩsɛ nɛ́ lɩ́sʋ́, a bʋ́lʋ́ mɛ́ bʋlɛ́:
«Ɩ káŋ Bio ní, ŋ nɛ́ lʋ́lɩ́ zaa.»
6 Wɩɩsɛ Kɛnɔ dɩhɩ̃́ nɔ́ŋɔ má ʋ báá sɛ́:
«Ɩ ká Wɩɩsɛ vʋk'ɔɔsɔ nɛ́, a kaá mʋ́ wuu,
anɛ Mɛlɩsɩsɛdɛkɛ*.»
7 Zeezi dúníé mí mɩnɛ́ tɛ́ŋ mɛ́, ʋ cáásó, a wi sɩ́mɩnnʋ, a cʋɔlɛ Wɩɩsɛ, a jɛnnɛ Wɩɩsɛ, ʋ nɛ́ há ká nɛ́ŋ ná há wóú la aá tá, sʋʋ nɛ́sɛ mɛ́.
Zeezi sɩɛ́ há sáŋɛ́ aá tɩŋ Wɩɩsɛ nʋɔ, Wɩɩsɛ sáŋʋ́ sʋlɛ́.
8 Zeezi ká Wɩɩsɛ Bio má nɛ́, ká ʋ há dí wɩɩla ná, ʋ máŋsɛ Wɩɩsɛ nʋɔ zíle.
9 Ʋ há tɩ́ŋ Wɩɩsɛ nʋɔ wɩ́ɛ́ wuu cesi, ʋ cɛ́rɔ́, rʋ́ʋ́ bɩrmɛ nɩɛ ná wuu háá zíl Wɩɩsɛ nʋɔ, ɓa Laataarɔ, a lɔ́wɔ́ aá tá, a de kaá mʋ́ wuu.
10 Ɛ́ nɛ́ Wɩɩsɛ sʋ́ʋ́ nɛ́ kɔ́ʋ́ vʋk'ɔɔsɔ nɔhɔ̃́, anɛ Mɛlɩsɩsɛdɛkɛ.
Ɩ́ wa Wɩɩsɛ wɩ́ɛ́ mɛ́, ká cɩ́nɩ́wa yardá naa mɛ́
11 Wɩ́ɩ́ néé mí, á kéŋ wɩ́ɛ́ ɓɩkana aá bʋl.
Ɛ́ wɩ́ɛ́ mʋ́ʋ́la makɛ pɛ́ɩ́wa má sɩɛ́ duokí, bee wɩ́ɛ́ ɩ́ dɩlla zímó, wɩ́ɛ́ nɩ́ɩ́ mɛ́.
12 Ká, ɩ́ há nɛ́ Wɩɩsɛ wɩ́ɛ́, ʋ tápʋl to mɔlɛ́; ʋ fa mɔhɔ̃́ rɩ́ɩ́wa nɛ́ kɩ́karmɛ nɩɛ.
Amá ɩ́ ha de jɩ́ja, rɩ́wɔ́ pi Wɩɩsɛ wɩ́bʋlɛ wɩ́ɛ́ ná há ká mʋ́biló wɩ́ɛ́ nɛ́, aá kármɩ́wa.
Ɩ́ ha nɩhɩ̃́ ɩ́l'ɔ́ɔ́sá rɛ́, ɩ́ ha wɩ ɓɩdíduoru wuó dí.
13 Nɛrɔ ná sɩɛ́ ha háá ɔsɛ ɩ́l, ʋ ká bipʋlɛ nɛ́, ʋ wɩ wɩ́bʋlɛ ná háá máŋsɛ tékétéké wɩ́ɛ́ mʋɔsɔ ɛ̃, Wɩɩsɛ sɩ́ɛ́.
14 Nɩhɩɛ̃́sɛ éé dí ɓɩdíduoru ní.
Ɓa valɛ́ sɩɛrʋ, ɓa wɔ́ɔ́, Wɩɩsɛ wɩ́ɛ́ sɩɛrʋ, a ka zɩmɛ́, a wólli wɩ́were arɩ́ wɩ́bɔma caksɛ aá lɩ́sɛ.