4
1 Wɩɩsɛ há tá nʋɔ ná párá bʋlɛ́, ráá sɩ́ zʋ́ʋ́ fɩɛla sɩɛrʋ, ʋ ha wʋ́ʋ́ kíŋŋé.
Á sɩɛ́ pɔ́rá tɩɩ mɛ́, ráá oro wuu sɩ́ ɛ́ fɩɛla mɛ́ gúlú.
2 Wɩɩsɛ Labaarɩwero ná ɓa há bʋ́lɛ́ párá nɛ́, ɓa fa bʋl pɔ́wɔ́ má.
Amá wɩ́ɛ́ ná ɓa há zésé dé ká yɔ́ɔ́ nɛ́, bee wɩ́ɛ́ ɓa nɩ́wɔ́, ká wʋ́ɔ́ lɛ́ɛ́ dí.
3 Á é há lɛ́ɛ́ dí, áá zʋ fɩɛla ná wɩ́ɛ́ Wɩɩsɛ há bʋlɛ́ sɩɛrʋ; ʋ sɛ́:
«Ɛ́ nɛ́ ŋ ŋmɩ́ɛ́sɛ, ŋ cɔwɩɩlɔ́ sɩɛrʋ a bʋlɛ́:
Ɓa wɩ́ŋ fɩɛla sɩɛrʋ́ zʋ́ʋ́ ná.»
A de pɔ́ Wɩɩsɛ há bíl dúníé tenni tɛ́ŋ ná mɛ́, ʋ tʋtʋmɛ́ má ténnó ní, ká ʋ ha bʋl ɛ́.
4 Wɩɩsɛ Kɛnɔ sɩɛrʋ dɩhɩ̃́ nɔ́ŋɔ, ɓa bʋ́l tápʋlɛ balpɛ kal wɩ́ɛ́, a bʋlɛ́:
«Wɩɩsɛ ténnú tʋtʋmɛ́ wuu,
ká fɩɛlɛ tápʋlɛ balpɛ kal.»
5 Ká rɛɛ́wa né Wɩɩsɛ baa bʋlɛ́:
«Ɓa wɩ́ŋ fɩɛla sɩɛrʋ́ zʋ́ʋ́ ná.»
6 Ɛ́ wɩ́ɛ́, nɩɛ náŋa ha wo fɩɛla ná sɩɛrʋ aá zʋ.
Ká, nɩɛ ná há lá sɩ́ɛ́ nɛ ɛ́ Labaarɩwero, ɓa wɩ fɩɛla ná sɩɛrʋ zʋ́ɛ́, bee wɩ́ɛ́ ɓa á dɩlhɔɔ,
7 ɛ́ nɛ́ tɛ, Wɩɩsɛ baa makɛ tápʋl nɔ́ŋɔ, ʋ nɛ́ ká:
«zaa».
Ʋ dáánɔ́, ká ʋ tɩŋ Davidi* mí a bʋl, anɛ ɛ́ ʋ há lá sɩ́ɛ́ bʋl, a bʋlɛ́:
«Zaa, rɩɩ́wa nɛ́ nɛ́ Wɩɩsɛ liŋó,
ɩ́ sɩ́ɩ́wa baŋcɩllɛ dúórú.»
8 Rɩ Zozie* fa pá Ɩzɩrayɛl duo* nɩɛ fɩɛla rɛ́, ɛ́ har rɩ́ mɛ́, Wɩɩsɛ báá fa wɩ tápʋ́l oro wɩ́ɛ́ bʋl.
9 Ɛ́ wɩ́ɛ́, Wɩɩsɛ fɩɛlɛ́ tápʋl* ha mɩ́nɔ́ rɛ́, a pá Wɩɩsɛ nɩɛ.
10 Nɛrɔ ná wuu sɩɛ́ há zʋ́ Wɩɩsɛ fɩɛla ná sɩɛrʋ, ʋ tɩ́na máá fɩ́ɛ́lʋ́ nɛ́, ʋ tʋtʋmɛ́ mɛ́, anɛ Wɩɩsɛ há fɩ́ɛ́lʋ́ tʋtʋmɛ́ mɛ́ ɛ́.
11 Á sɩɛ́ hé dóé, a zʋ ɛ́ fɩɛla sɩɛrʋ, a makɛ rɩ́ nɛ́ŋ wuu sɩ́ dɩlhɔɔ á, rɩ́ɩ́ káánɛ, anɛ Ɩzɩrayɛl duo nɩɛ há á ɛ́.
12 Wɩɩsɛ wɩ́bʋlɛ sɩɛ́ wómmó, ʋ kéŋ dóé má.
Ʋʋ́ dí wérí, a kɩ́llɛ tókowí háá dí nʋʋsɛ bɛllɛ.
Ʋʋ́ de kʋŋ nɩbííno zʋ wérí ní, a cakɛ dʋma rɩ́ sabɩɩna náŋá mɛ́, a cakɛ gule rɩ́ heŋgbenʋ́ʋ́la má náŋá mɛ́; ʋ nɩ́ɩ́ dí nɩbííno sɩɛrʋ wɩ́hɩɛ̃nɛ́ rɩ́rʋ́ wɩ́bɩɩnɛ́ sarɩ́ya.
13 Oŋ'aalɩ́ wuu wɩ Wɩɩsɛ sɩ́ɛ́ mɛ́ wuó féŋsi.
Ɓa wuu ká ɓɩlɩ́ɩ́, a a nyaamɩ́ ʋ sɩ́ɛ́ mɛ́; á sɩɛ́ á ráá bílrá wɩ́'állɛ wuu nʋɔ pɔ́ʋ́ nɛ́.
Zeezi ní kɛ Wɩɩsɛ vʋk'ɔɔsa nɩhɩɛ̃́sɛ wuu
14 Á ka yardá wɩ́ɛ́ ná á háá bʋlɛ́, géŋgéŋ, bee wɩ́ɛ́ á kéŋ Wɩɩsɛ vʋk'ɔɔsa* nɩhɩɛ̃́sɛ wuu nɔhɔ̃́, ʋ nɛ́ ká Wɩɩsɛ Bio Zeezi ná há cáŋ báŋsɛ, a zɩ́ mɩŋ Wɩɩsɛ laka.
15 Vʋk'ɔɔsɔ nɔhɔ̃́ ná á há kené, ʋʋ́ fárá susu á pʋɔlɩ́ sɩɛrʋ.
Ʋ tɩɩ ná díŋe wɩ́ɛ́ wuu mí, anɛ á má háá ná díŋe ɛ́, amá ʋ wɩ wɩ́bɔ́ŋ ɛ́ɛ́.
16 Ɛ́ wɩ́ɛ́, á sɩ́ síkesíke á, á ka yardá, a tuu peri Wɩɩsɛ zilé kuóɓasa ná, a makɛ rʋ́ʋ́ sawér rɩ́rʋ́ zilé ná pérírá, rʋ́ʋ́ fárá búŋse, tɛ́ŋ ná mɛ́ á há fɛ́rɛ́.