Zeezi ní kɛ Moyizi
3
1 Ŋ maábináŋa, Wɩɩsɛ nɛ́ tɩ́ɩ́wa, ʋ nɛ́ yɩ́rɩ́wa, anɛ ʋ há yɩ́rɛ nɩɛ náŋa má ɛ́.
Ɛ́ wɩ́ɛ́, ɩ́ kɩ́ɛ́lɛ Wɩɩsɛ nɩtʋmɩ́ Zeezi, ʋ nɛ́ ká Wɩɩsɛ vʋk'ɔɔsɔ nɔhɔ̃́, á yardá mɩ́nʋ́ mɛ́ nɛ́, á bʋ́bʋ́lʋ́ wɩ́ɛ́.
2 Wɩɩsɛ lɩ́sʋ́ nɛ́, rʋ́ʋ́ tʋŋ ɛ́ tʋtʋmɩ́, ʋ sɩɛ́ tʋ́mʋ́ rɩ́ taŋá anɛ Moyizi* má há tʋ́mɛ́ rɩ́ taŋá ɛ́, a pá Wɩɩsɛ nɩɛ.
3 Nɛrɔ ná há sɔ́ jaa nɛ́ lá yɩr aá kɩ́llɛ jaa ná tɩɩ.
Ɛ́ wɩ́ɛ́, Zeezi ní mɔhɛ̃́ rʋ́ʋ́ ná píŋ ɓɩzeno, a kɩ́llɛ Moyizi.
4 Jaa é wuu toó, rɩ nɛ́ŋ ra wʋ́ʋ́ sɔ́ɛ́.
Onni ná má wuu há mɩ́nɔ́, Wɩɩsɛ nɛ́ ɔ́wɔ́.
5 Moyizi sɩɛ́ há ká tʋtʋ́nnʋ́, ʋ tʋ́mɔ́ arɩ́ taŋá, Wɩɩsɛ nɩɛ sɩɛrʋ; Wɩɩsɛ háá á rʋ́ʋ́ bʋl wɩ́ɛ́ ná, ʋ tɛ́wɔ́ sɩɛ́da.
6 Amá Kirisi é há ká Bio, taŋá mɩ́nʋ́ mɛ́, anɛ bio háá bélú jaa rɩ́ taŋá ɛ́.
Á nɛ́ sɩɛ́ kɔ́ʋ́ jaa, raá nɛ́ kéŋ baŋcɩpɩrɩ́ arɩ́ yɩɛla ná wɩ́ɛ́ á háá nyʋ́kɛ́, [a ka wérí mʋ́ gírsi.]
Wɩɩsɛ sɩ́ pɔ́ʋ́ nɩɛ fɩɛla
7 Ɛ́ wɩ́ɛ́, anɛ ɛ́ Wɩɩsɛ Sabɩɩna há sɛ́:
«Zaa, rɩɩ́wa nɛ́ nɛ́ Wɩɩsɛ liŋó,
8 Ɩ́ sɩ́ɩ́wa baŋcɩllɛ dúórú,
anɛ ɩ́ naabálwa die há ísé cɩ́ Wɩɩsɛ mɛ́,
a díŋú ɛ́ kal, a tʋŋ ɛ́ gɩrbétéke sɩɛrʋ.»
9 Wɩɩsɛ sɩɛ́ sɛ́:
«Ráŋ nɛ́ ɩ́ naabálwa díŋíŋ, a mɩ́lɩ́ŋ rɩ́wɔ́ ná;
ɓa sɩɛ́ néŋ há tʋ́ŋ ɛ́, bɩŋsɛ mɛɛ́sɛllɛ pɛ́kɛ.
10 Ɛ́ nɛ́ tɛ, ŋ cɔ́ɛ́ wɩ́wɔ́, ŋ sɛ́:
‹Ɓa sɩɛnnɛ ɔ́sɔ́ yéŋŋi rí, aá mʋ́ wuu.
Ɓa waá ja rɩ́wɔ́ zɩ́mɩ́ŋ nʋɔ wɩ́ɛ́, a sɩɛ́ tɩŋ nɛ́.›
11 Ɛ́ nɛ́ ŋ ŋmɩ́ɛ́sɛ, ŋ cɔwɩɩlɔ́ sɩɛrʋ a bʋlɛ́:
‹Ɓa wɩ́ŋ fɩɛla sɩɛrʋ́ zʋ́ʋ́ ná.› »
12 Ŋ maábináŋa, ɩ́ sɩɛ́ pɔ́ɩ́wa tɩɩ mɛ́, rɩ́ɩ́wa sɩɛrʋ oro wuu sɩ́ sabɩŋtɔk rɩ́ dɩlhɔɔ kánʋ́, rɩ́ ɛ́ yíkú rʋ́ʋ́ bɩ́rʋ́ har yakɛ Wɩɩsɛ ná há wómmó.
13 Ɩ́ taŋa dúdúóri náŋá naasɛ́, tápʋ́l wuu, a pɔ́ zaa mɛ́, ká sɩ́ cíé dɛ́llʋ́, a makɛ rɩ́ wɩ́bɔma sɩ́ɩ́wa oro wuu nyɩ́sɩ́ hé dɩlwaánɛ sɩɛrʋ.
14 Yardá ná á há kené púle mí wuu, raá nɛ́ kenú wérí rɩ́ɩ́ mʋ́ʋ́ gírsi, á rɩ́ Kirisi wuu sɩ́ a balá, anɛ nɩɛ náŋa rɩ́rʋ́ há ká balá ɛ́;
15 anɛ ɛ́ ɓa há bʋ́lɛ́ mʋ́l néé mí:
«Zaa, rɩɩ́wa nɛ́ nɛ́ Wɩɩsɛ liŋó,
ɩ́ sɩ́ɩ́wa baŋcɩllɛ dúórú,
anɛ ɩ́ naabálwa die há ísé cɩ́nʋ́ mɛ́ ɛ́.»
16 Áŋwa rɩ́ fa nɛ́ Wɩɩsɛ liŋó ká sɩɛ́ isi cɩ́nʋ́ mɛ́ ɛ́?
Nɩɛ ná wuu há tɩ́ŋ Moyizi mí lɛ Ezipiti* mí, rá wɩ ɛ́ ɛ́ɛ́ rɛ́?
17 Áŋwa nyúú rí, Wɩɩsɛ cɔ́ɛ́ fa wɛ bɩŋsɛ mɛɛ́sɛllɛ?
Nɩɛ ná há ɛ́ɛ́ zɔkɛ a sʋsɛ gɩrbétéke mí nyúú rá, ʋ cɔ́ɛ́ wɛ rɛ́?
18 Áŋwa mɛ́ rɩ́ Wɩɩsɛ fa ŋmɩ́ɛ́sɛ hé a bʋlɛ́:
«Ɓa wɩ́ŋ fɩɛla sɩɛrʋ́ zʋ́ʋ́ ná?»
Nɩɛ ná há vɔ́ʋ́ nʋɔ tɩŋɛ́ rá rɛ́?
19 Á sɩ́ɛ́ nóó rɩ ɓa há á dɩlhɔɔ ná nɛ́ tɛ, ɓa wɩ wóllé zʋ Wɩɩsɛ fɩɛla ná sɩɛrʋ.