Bɛlɛ rɩ́wɔ́ ánáwa kéne
6
1 Ʋ mɔhɔ̃́ rɩ́ bɛlɛ tɩ́ŋwɔ́ ánáwa rɩ́wɔ́ maáwa nʋʋsɛ; ʋ ɛ́ nɛ́ cɛ́rɛ́, Nyuutɩna Zeezi ŋmɛ́nɔ mɛ́.
2 Zílí áná arɩ́rɩ́ maá; Wɩɩsɛ kíŋse sɩɛrʋ, dʋ́ŋdʋ́ʋ̃́ kíso ná há kéŋ nʋtálɔ nɛ́ ɛ́;
3 ɛ́ nʋtálɔ nɛ́ ká, rɩ́ɩ́ ná wér, ká dí tɔ́ɔ́ má vɔkɛ.
4 Ɩ́ má, bɛlɛ ánáwa rɩ́ maáwa, ɩ́ sɩ́ á rɩ́ɩ́wa bɛlɛ cɔ́ɛ́ wɩ́wɩ́ɩ́wa nyúú.
Amá ɩ́ bélwó mí, a cáánɩ́wɔ́, a tʋ́rwɔ́, Nyuutɩna Zeezi ŋmɛ́nɔ mɛ́.
Yósi rɩ́wɔ́ tɩ́náwa kéne
5 Yósi, ʋ mɔhɔ̃́ rɩ́ɩ́wa má tɩ́ŋɩ́wa nyúútɩ́náwa nʋʋsɛ, tíé nyúú rɛɛ́, a zízílwó ká fɩ́fɔ́wɔ́, a tʋŋ aá pɔ́wɔ́ arɩ́ taŋá, anɛ ɩ́ há tʋ́mɛ́ aá pá Kirisi.
6 Ɩ́ sɩ́ ló rʋ́ʋ́ a ɓa há tɩ́ŋɛ́ aá bélíwa nɛ́, rɩ́ɩ́wa tʋ́tʋŋ wérí, amá ʋ mɔhɔ̃́ rɩ́ɩ́wa tʋŋ rɩ́rɩ́wa sɩɛrʋ wuu, anɛ ɩ́ ká Kirisi yósi ní, aá tʋŋ Wɩɩsɛ cólle.
7 Ɩ́ tʋŋ pɛ́ɩ́wa nyúútɩ́náwa rɩ́ satɔrɔ́, anɛ Nyuutɩna Zeezi tɩɩ nɛ́ ɩ́ tʋŋ aá pá, nɩbííne rá.
8 Ɩ́ zɩŋ rɩ́ nɛrɔ wuu, rɩɩ ká yómo, rɩɩ tɩ́ɩ́ tɩɩ, rɩɩ á wérí, Nyuutɩna Zeezi sɩ́ túmí.
9 Ɩ́ má yósi tɩ́náwa, ɩ́ kánɩ́wa yósi wérí, ɩ́ sɩ́wɔ́ fɩ́ɩ́sʋ́.
Ɩ́ zɩŋ rɩ́ɩ́wa rɩ́rɩ́wa yósi ná wuu Nyuutɩna nɛ́ balá, a mɩŋ bána nyúú.
Ʋ é rí, nɩɛ wuu ká balá nɛ́, ʋ wɩ nɩɛ́ caksɛ.
Ɛrɛ́ rɛ́ á sɩ́ yoo dí Sɩtaanɛ?
10 Ŋ hatɩ́ŋnɛ́ wɩ́ɩ́ ŋ háá á rɩ́ŋ bʋl pɛ́ɩ́wa nɛ́ ká:
Ɩ́ lo rɩ́ɩ́wa dóé lɛ Nyuutɩna Wɩɩsɛ, bee wɩ́ɛ́ ʋ dóé ní zené kɩ́ŋkáŋ.
11 Ɩ́ pa Wɩɩsɛ lalyóórícɩksɛ ná wuu a cákɩ́wa tɩɩ, a ka wérí, a makɛ rɩ Sɩtaanɛ* já rʋ́ʋ́ púú lɩ́ŋ mɛ́ yóíwa, rʋ́ʋ́ gúl.
12 Á rɩ́ nɩbííne ra wɩ náŋá yo, amá á rɩ́ dúníé né há bɔ́mɔ́ kuóre níí yo náŋá, ʋ dóé tɩ́náwa rɩ́rʋ́ tíŋ tɩ́náwa,* rɩ́rʋ́ bɩbara ná há mɩŋ dúníé bíno sɩɛrʋ arɩ́ bána nyúú.
13 Ɛ́ wɩ́ɛ́, ɩ́ pa Wɩɩsɛ lalyóórícɩksɛ ná wuu a cákɩ́wa tɩɩ, a makɛ rɩ tápʋlbɔmɔ kúó lɩ́ɩ́wa mɛ́, rɩ́ɩ́wa ka wérí, a wólli cɩ́ dɩŋdɔmɔ mɛ́, rʋ́ʋ́ gúl.
14 Ɩ́ sɩɛ́ ka wérí.
Ɩ́ lo rí taŋá mɩ́nɩ́wa mɛ́, anɛ vɔwɛ́ ɩ́ tɩŋsɛ mɛ́; ɩ́ lo rí tékétéké ní mɩ́nɩ́wa mɛ́, anɛ hɔɔ gɛsuo,* ɩ́ há súé tɔ́ɩ́wa tɩɩ mɛ́.
15 Ɩ́ bʋl Labaarɩwero ná háá pá tɛŋfɩ́ɛ́l wɩ́ɛ́, arɩ́ kajáŋa; rɩɩ́wa nɩ́ɩ́ tʋŋ ɛ́, ʋ nɩhɩ̃́ natɔɔsɛ nɛ́ ɩ́ hé.
16 Tɛ́ŋ wuu mí, ɩ́ lo rí yardá mɩ́nɩ́wa mɛ́ anɛ hɔkɛ́rɛ* ná lalyoore há kené aá kɛ́rwɔ́ sɩ́ɛ́, rɩ́ hɛmɛ sɩ́wɔ́ kɛ́sʋ́.
Ɩ́ má pi yardá kɛ́rɛ Sɩtaanɛ hɛmɛ ná há nɩhɩ̃́ níŋ, a dʋ́sɩ́wɔ́.
17 Wɩɩsɛ há lɛ́ɩ́wa tá ná, ɩ́ lo rʋ́ʋ́ nɛ hɔɔ néŋcúú,* a cúíwa nyúú mí, ká rɩ́ Wɩɩsɛ wɩ́bʋlɛ ná má nɛ tókowí, ɩ́ nɛ́sɛ mɛ́, ʋ Sabɩɩna dóé mí.
18 Ɩ́ tɩŋ Wɩɩsɛ Sabɩɩna mɛ́, aá cʋɔlɛ Wɩɩsɛ tɛ́ŋ wuu mí, aá sʋ́lʋ́, aá jɛ́nnʋ́ wɩ́ɛ́ wuu mí.
Ɩ́ bel wɩsʋlɔ́ ná mɛ́, arɩ́ taŋá, ɩ́ sɩ́ yʋ́ɔ́rʋ́.
Ɩ́ sʋl Wɩɩsɛ aá pá Wɩɩsɛ nɩɛ wuu.
19 Ɩ́ sʋl Wɩɩsɛ páŋ má, rʋ́ʋ́ páŋ baŋcɩpɩrɩ́, ká mákɩ́ŋ, wɩ́ɛ́ ná há mɔhɛ̃́ rɩ́ŋ bʋl, a makɛ rɩ́ŋ wólli bʋl wɩ́féŋsi ná há mɩŋ Labaarɩwero ná mɛ́, a pá nɩɛ.
20 Arɩ́rɩ́ŋ bɩnajaa mɛ́ mɩnɛ́ wuu, ŋ ha dé ká Labaarɩwero bʋ́bʋllɔ nɛ́, a bʋ́lʋ́ wɩ́ɛ́ aá pá nɩɛ.
Ɩ́ sɩɛ́ sʋl Wɩɩsɛ páŋ, rɩ́ Wɩɩsɛ páŋ baŋcɩpɩrɩ́, a makɛ rɩ́ŋ wólli bʋl ɛ́ ná há mɔhɛ̃́ rɩ́ŋ bʋl.
Dɩtenní
21 Ŋ maábinɔ́ŋɔ káŋ nɩcólli Tisiiki, há ká Nyuutɩna Zeezi tʋtʋnnʋtaŋá, ʋ sɩ́ máŋsɩ́ŋ wɩ́ɛ́ wuu pɛ́ɩ́wa, rɩ́ɩ́wa zɩ́mɩ́ŋ há nɩhɩ̃́ ɛ́, a zɩŋ tʋtʋmɩ́ ná má ŋ háá tʋmɛ́.
22 Ŋ dé taalɛ rɛ́, a tʋ́mʋ́ ɩ́ rɩ́, a makɛ rɩ́ɩ́wa zɩ́ŋrá kéne mʋɔsɔ, ká rʋ́ʋ́ pɛ́ dúóríwa naasɛ má.