Zeezi laadííre náŋá sarɩ́ya díí
6
1 Rɩɩ́wa sɩɛrʋ oro kúó ka nɛsɛ rɩ́rʋ́ nɔ́ŋɔ, ʋʋ́ káá mʋ́ nɩɛ ná há wɩ Wɩɩsɛ lɛ́ɛ́ dí sɩ́ɛ́ nɛ́, rɩ́ɩ́ bʋl, káá sɩ́ káá mʋ́ Wɩɩsɛ nɩɛ rɩ́?
2 Ɩ́ wɩ ɛ̃ rɩ́ Wɩɩsɛ nɩɛ nɩ́ɩ́ á rɩ́wɔ́ dí dúníé nɩɛ sarɩ́ya?
Rɩɩ́wa nɛ́ sɩɛ́ á rɩ́ɩ́wa ko dí dúníé nɩɛ sarɩ́ya, ɩ́ tɩɩ wɩ́wɩɛla nɛ́ sɩɛ́ ɩ́ wʋ́ɔ́ wuó zɩŋ?
3 Ɩ́ zɩŋ ráá nɩ́ɩ́ á ráá dí malɩ́kawa* sarɩ́ya; dúníé nyúú wɩ́ɛ́ nɛ́ sɩɛ́ ráá sɩ́ wóllú?
4 Ká, rɩ dúníé nyúú wɩ́ɛ́ kúó hé nɛsɛ ɩ́ pɛ́kɛ, ɩ́ kaá ja sarɩ́yadííre ná há wɩ sɛ́ kené, wɩcʋɔla púl* mí!
5 Ʋ ɛ́ to hɩɩ̃sɛ́ a pɛ́ɩ́wa?
Wɩ́zɩ́nnʋ́ balá má tóíwa sɩɛrʋ, a wóllú maábináŋa pɛ́kɛ zʋ, aá ɔsɛ wɩ́ɩ́?
6 Ká rɩ maábináŋa bɛllɛ ná náŋá ɩ́ sɩɛrʋ, nɔ́ŋɔ ka ɛ́ wɩ́ɩ́ isi mʋ́ nɩɛ ná há wɩ Wɩɩsɛ lɛ́ɛ́ dí rɩ́, a bʋl aá zɔ́kʋ́ nanáárɩ́nɔ́ŋɔ ná yɩr.
7 Ɩ́ há dé pa náŋá mʋ́ sarɩ́yadííre sɩ́ɛ́ ná má tɩɩ, ɩ́ ɓalɛ dɩhɩ̃́ nɛ́ ɛ́.
Ɩ́ wɩ nɩlɔ́rɔ mʋɔ́ wuu wuó nyammɛ?
Beé rí tɛ ɩ́ wɩ có rɩ ɓa vɩ́rɩ́wa?
8 Ká ɩ́ nɛ́ bɩrɛ aá lɔ́rɛ náŋá, aá vɩrɛ náŋá; ɩ́ maábináŋa rɩ́ má nɛ́, ɩ́ tʋ́tʋŋ ɛ́.
9 Ɩ́ wɩ ɛ̃ rɩ́ gologolo nɩbííne wɩ ker kené Wɩɩsɛ kuótɔ́ɔ́ sɩɛrʋ?
Ɩ́ sɩ́ɩ́wa tɩɩ nyɩ́sʋ́:
nɩlaama, veŋɓaara, nɩcɔrma, báála ná há gɩ́rɛ́ aá pɩ́ náŋá, rɩ́ háála ná há gɩ́rɛ́ aá pɩ́ náŋá,
10 gaara, sɩ́ɩ́tɩ́náwa, sɩnyɔɔra, nɩtʋksa, kaafórdííre, ɓa wɩ ker kené Wɩɩsɛ kuótɔ́ɔ́ sɩɛrʋ.
11 Ɩ́ sɩɛrʋ nɩɛ náŋa sɩɛ́ fa ká ɛ́ nɛ́.
Amá á Wɩɩsɛ Sabɩɩna dóé mí, ʋ tɩ́ŋ Nyuutɩna Zeezi Kirisi yɩr mɛ́, a mʋ́ʋ́rɩ́wa, ɩ́ ɔ́ʋ́ nɩɛ, a a nɩtékétékéwa Wɩɩsɛ sɩ́ɛ́ mɛ́.
Ɩ́ píŋsi Wɩɩsɛ arɩ́rɩ́wa tɛnnɛ
12 Ɩ́ náŋa sɛ́:
«Á há có wɩ́ɩ́ ná wuu ní á wólli aá a.»
Ɛ́ ká taŋá rɛ́, amá ɓa wuu ra wɩ́ɩ́wa mɩ́ɩ́ sáŋ; ŋ wo wɩ́ɩ́ wuu aá a, amá ŋ waá sáŋ bɩrmɛ wɩ́ɩ́ wuu yómo.
13 Ɩ́ báá sɛ́:
«Ɓɩdííle mɩ́nɔ́ luoru wɩ́ɛ́ nɛ́, luoru má mɩ́nɔ́ ɓɩdííle wɩ́ɛ́ nɛ́.»
Taŋá rɛ́, amá Wɩɩsɛ sɩ́ zɔ́kwɔ́ wuu.
Wɩɩsɛ wɩ́rá tɛŋ ɛ́ɛ́ nɩlánnʋ wɩ́ɛ́ nɛ́, amá ʋ ɔ́ʋ́, rɩ́ nɩbííno kaa tʋŋ aá pá Nyuutɩna nɛ́, ká rɩ́ Nyuutɩna tɩ́llʋ́.
14 Ká Wɩɩsɛ ná há íllírá Nyuutɩna sʋʋ mɛ́, ʋ sɩ́ íllírá má sʋʋ mɛ́, ʋ dóé ná mɛ́.
15 Ɩ́ wɩ ɛ̃ rɩ́ɩ́wa tɛnnɛ ká Kirisi tɛŋ cɔrʋ nɛ́?
Ŋ sɩɛ́ sɩ́ wólli ka Kirisi tɛŋ cɔɔ kaa mʋ́ cɔ́ hácɔrmɔ tɛŋ mɛ́?
16 Aɩ́!
Ɛ́ waá a.
Ɩ́ wɩ ɛ̃ rɩ́ báálɔ ná há pɩ́ hácɔrmɔ, ɓa tɛnnɛ cɔ́ náŋá mɛ́ a bɩrmɛ tɛŋ balá nɛ́?
Ɓa pʋ́ŋsɛ Wɩɩsɛ Kɛnɔ sɩɛrʋ a bʋlɛ́:
«A makɛ rɩ́wɔ́ bɛllɛ ná a nɩbíŋ balá.»
17 Ká nɛrɔ ná há kenú tɩɩ cɔ́ Nyuutɩna mɛ́, ʋ rɩ́ tɩ́na sɩ́ a balá sabɩɩna mɛ́.
18 Ɛ́ wɩ́ɛ́, ɩ́ fá kɛkɛ nɩlánnʋ mɛ́.
Wɩ́bɔmɔ wuu ní rɩ́ nɩbííno a, ʋ wʋ́ʋ́ tɛŋ mɛ́ cɔ́ɛ́, amá rɩ nɩlánnʋ é ní rʋ́ʋ́ tʋŋ, ʋ ɛ́ ká wɩ́bɔ́ŋ rɛ́, aá zɔ́kʋ́ tɛŋ.
19 Ɩ́ wɩ ɩ̃ rɩ́ɩ́wa ká Wɩɩsɛ Sabɩɩna jaá rɛ́?
Wɩɩsɛ há púú Sabɩɩna ná pɛ́ɩ́wa, ʋ mɩ́nɩ́wa mɛ́, ʋ nɛ́ tɩ́ɩ́wa; ɩ́ wɩ́ɩ́wa tɩɩ tɛ.
20 Wɩɩsɛ túŋ kɩzéní rí, ká yɔwɛ lɛ́ɩ́wa.
Ɛ́ wɩ́ɛ́, ɩ́ kánɩ́wa tɛnnɛ, a tʋŋ tʋtʋmɛ́ ná háá píŋsi Wɩɩsɛ.