Pool bʋ́l Kirisi dagɛsɛ́ daha sʋʋ wɩ́ɛ́
2
1 Ŋ maábináŋa, ŋ há kóíwa rɩ́ rɩ́ŋ bʋl Wɩɩsɛ wɩ́ɛ́ ná pɛ́ɩ́wa, ŋ wɩ nʋŋmɔ́ŋ liŋó ní kené ko, ŋ báá wɩ zɩ́ŋzɩ́nnɩ́wɩ́ɛ́ má bʋ́lɛ́.
2 Ŋ há kúé mɩ́nɩ́wa sɩɛrʋ, ŋ wɩ wɩ́ɩ́ oro wuu wɩ́ɛ́ zɩ́mɛ́, rɩ Zeezi Kirisi dʋŋɔ wɩ́ɛ́ rá; Zeezi Kirisi ná ɓa há ɓásɛ́ dagɛsɛ́ daha.
3 Ɛ́ nɛ́ tɛ, ŋ fa ko mɩ́nɩ́wa sɩɛrʋ a a nɩpʋɔlá, a fɩ́fá héwíŋ, aá cel.
4 Wɩɩsɛ wɩ́bʋlɛ ná ŋ há bʋ́lɛ́ aá pá nɩɛ, a pi wɩ́ɛ́ ná aá karmɛ nɩɛ, nɩbííne wɩ́zɩmɛ rá, ŋ kaa bʋl aá ja nɩɛ sabɩŋsɛ bɩ́rsɛ, amá ɛ́ ná ŋ háá bʋl wɩ́ɛ́, ɛ́ mákɔ́ rɩ Wɩɩsɛ Sabɩɩna* dóé ní mɩ́nɩ́ŋ mɛ́.
5 Ɛ́ wɩ́ɛ́, rɩ́ɩ́wa Zeezi laadí ná sɩ́ nɩbííne wɩ́zɩmɛ wɩ́ɩ́ á, ká taŋa lɛ Wɩɩsɛ dóé ní.
Wɩɩsɛ wɩ́zɩmɛ
6 Wɩ́zɩ́mɛ́ rɛ́ ŋ máŋsɛ aá pá nɩɛ ná há bɩ́ɛ́, Wɩɩsɛ ŋmɛ́nɔ sɩɛrʋ.
Ɛ́ wɩ́zɩmɛ sɩɛ́ to dúníé óŋ, ʋ to nɩɛ ná má zaa há tɛ dúníé kaa ké, ká rɩ́wɔ́ cíé sʋsɛ má wɩ́zɩ́mɛ́.
7 Wɩɩsɛ wɩ́zɩmɛ wɩ́ɛ́ nɛ́ ŋ bʋ́bʋl.
Wɩ́zɩmɛ ná Wɩɩsɛ há bílé, ráá tɩ́ŋʋ́ mɛ́ a ná píŋ, ʋ fa mɩŋ Wɩɩsɛ rɩ́, rʋʋ ha wɩ dúníé ɛ́ɛ́, ká fa féŋsi nɩbííne sɩ́ɛ́ mɛ́.
8 Ɛ́ wɩ́zɩmɛ, dúníé kuóre balá má wʋ́ʋ́ ɛ̃.
Rɩ ɓa fa ʋ́ʋ̃́ rɛ́, ɓa waá sáŋ ka Nyuutɩna ná há kéŋ píŋ, rɩ́ɩ́ ɓásɛ dagɛsɛ́ daha.
9 Amá anɛ ɛ́ há pʋ́ŋsɛ́ Wɩɩsɛ Kɛnɔ sɩɛrʋ bʋlɛ́:
«Wɩ́ɛ́ ná nɩbííno sɩ́ɩ́ há wʋ́ɔ́ néé ná,
ʋ dɩllɛ há wʋ́ɔ́ nɩ́ɛ́ ná,
wɩ́ɛ́ ná ha há wɩ nɩbííno sabɩɩna sɩɛrʋ zʋ́ɛ́ ná,
ɓa nɛ́ Wɩɩsɛ jaa bil nɩɛ ná há cóú mí.»
10 Wɩɩsɛ ɔ́ɔ́ ʋ Sabɩɩna makɛ ɛ́ wɩ́ɛ́ párá é, bee wɩ́ɛ́ Wɩɩsɛ Sabɩɩna* lúksó zɩŋ wɩ́ɩ́ wuu ní, a zɩŋ Wɩɩsɛ wɩ́luŋe má tɩɩ.
11 Nɩbííno há wʋ́ʋ́ nɔ́ŋɔ sɩɛrʋ wɩ́ɛ́ wuó zɩŋ, rʋʋ tɩɩ sabɩɩna rá ɛ́, nɛ́ŋ wɩ Wɩɩsɛ má wɩ́ɛ́ wuó zɩŋ, rɩ Wɩɩsɛ Sabɩɩna dʋŋɔ rá.
12 Ká sabɩɩna ná sɩɛ́ há mɩ́ŋrá mɛ́, ʋ wɩ dúníé lɩ́ɛ́, Wɩɩsɛ Sabɩɩna nɛ́ ʋ pii párá, a makɛ ráá zɩŋ onni ná wuu, Wɩɩsɛ há píé párá, ʋ zilé mí.
13 Ɛ́ wɩ́ɛ́ nɛ́, á bʋl aá pá nɩɛ.
Á sɩɛ́ wɩ nɩbííne wɩ́máŋsɛ zɩmɛ́ nɛ́ kené aá bʋl, Wɩɩsɛ Sabɩɩna há pí zɩmɛ́ ná párá nɛ́, á kaá bʋl.
Ɛ́ nɛ́ á wólli máŋsɛ Wɩɩsɛ Sabɩɩna wɩ́ɛ́, aá pá nɩɛ ná há kéŋ ɛ́ Sabɩɩna.
14 Nɛrɔ ná há wɩ Wɩɩsɛ Sabɩɩna kené, ʋ wɩ ɛ́ Sabɩɩna wɩ́táŋsɛ wuó saŋ, ɓa wuu dé ká gɩŋgáwɩ́ɛ́ nɛ́, ʋ rɩ́; ʋ wʋ́ɔ́ mʋ́ʋ́la wuó nɛ, bee wɩ́ɛ́ Wɩɩsɛ Sabɩɩna nɩ́ɩ́ pɛ́, ɓa wóllíwó aá kɩ́ɛ́lɛ.
15 Nɛrɔ ná há kéŋ Wɩɩsɛ Sabɩɩna, ʋ wo wɩ́ɩ́ wuu ní aá kɩ́ɛ́lɛ, ká nɛ́ŋ toó aá kɩ́ɛ́lʋ́.
16 Anɛ ɛ́ Wɩɩsɛ Kɛnɔ há sɛ́:
«Áŋ rɩ́ ɛ̃ Nyuutɩna háá bɩ́ɩ́nʋ́ ná?
Áŋ rɩ́ wóú aá cáánɛ?»
Ká á é, Kirisi háá bɩ́ɩ́nʋ́ ná nɛ́ mɩ́ŋrá má mɛ́.