Pɩɛrɛ máŋsʋ́ wɩ́'aalɩ́ ná mʋ́l pá nɩɛ
11
1 Zeezi nɩtʋmɛ́ ná rɩ́rʋ́ hatɩŋna ná há mɩŋ Ziide mí, ɓa nɩ́ɔ́ rɩ nɩɛ ná há to Zuwifiwa má nɛ́ Wɩɩsɛ wɩ́bʋlɛ ná, a laa dí.
2 Pɩɛrɛ sɩɛ́ há bɩ́rɛ́ mʋ́ Zerizalɛmɛ, Zuwifiwa ná há có rɩ nɩɛ ná há to Zuwifiwa cónníwó pɛnɛ,
3 ɓa bɛ́sʋ́ mɛ́ a bʋlɛ́:
«Ɩ zʋ́ nɩɛ ná há wʋ́ɔ́ pɛnɛ cónné jaa, ɩ rɩ́wɔ́ dí ɓɩɛ.»
4 Ɛ́ nɛ́ Pɩɛrɛ sɩɛ́ máŋsɛ wɩ́ɩ́ naasɛ kúnúnú, a pɔ́wɔ́.
5 Ʋ sɛ́:
«Zope mí ní, ŋ isi aá cʋɔlɛ Wɩɩsɛ, a ná wɩ́ɩ́.
Ŋ ná omo oro há nɩhɩ̃́ gɛbasa, rɩ ɓa vɔ́wʋ́ nʋkeŋe baná mɛ́, ká ʋ lɛ bána rɩ́ a ko túwíŋ laka.
6 Ŋ múúlú sɩɛrʋ, a ná tíé nyúú naasɛ baná tɩ́náwa, balla, tíé tútuure, arɩ́ diíwiisi.
7 Ká, ŋ nɛ liŋó oro há bʋ́lɩ́ŋ rɩ́ bʋlɛ́:
‹Pɩɛrɛ, isi a ɓʋ́ʋ́sɛ cɔ́ dí.›
8 «Ɛ́ nɛ́ ŋ sɛ́:
‹Aɩ́, Nyuutɩna, omo ná há kéŋ busunnu, a to páár, ha wɩ́ŋ nʋɔ zʋ́ɛ́ ná.›
9 «Liŋó ná baa bʋ́lɩ́ŋ rɩ́ bʋllɛ nyúú mí bʋlɛ́:
‹Omo ná Wɩɩsɛ há sʋ́ʋ́ ká páár, sɩ́ bʋ́lʋ́ kéŋ busunnu.›
10 Ʋ á ɛ́ nɛ́ naasɩ́ botoro, ká omo ná bɩrzɛ́ bána, a nyɩ́ɩ́kɛ ráŋ.
11 «Mʋ́l ná tɩɩ tɩɩ mɛ́, rɩ báála botoro ɓa há tʋ́ŋwɔ́ ŋ dɩhɩ̃́, nɛ́ lɛ́ Sezaare a ko cɩ́nɩ́ŋ há mɩŋ jaa ná mɛ́ dánnʋɔ.
12 Ɛ́ nɛ́ Wɩɩsɛ Sabɩɩna sɛ́ rɩ́ŋ isi tɩ́ŋwɔ́ mɛ́, a mʋ́, ká sɩ́ káŋsʋ́.
Ɩ́ ná báála nyáŋ balgo, ɓa nɛ́ súúríŋ mí, á wuu mʋ́ zʋ Kɔrnɛ jaa.
13 Ɛ́ báálɔ sɩɛ́ máŋsɛ ɛ́ ná malɩ́ka há zʋ́ʋ́ jaa, a bʋlʋ́ tʋŋ nɛrɔ rʋ́ʋ́ mʋ́ Zope, a yɩ́rɛ Sɩmɔŋ ná há ká Pɩɛrɛ rʋ́ʋ́ ko.
14 Ʋ nɩ́ɩ́ kóó bʋl wɩ́ɛ́ rɩ́ pɛ́ɩ́, rɩ́ɩ́ tɩ́ŋwɔ́ mɛ́ a ná Wɩɩsɛ laatɛ́, ɩ rɩ́rɩ́ jaa nɩɛ wuu.
15 «Ŋ sɩɛ́ há púlé aá bʋl wɩ́ɛ́, Wɩɩsɛ Sabɩɩna túwíwó nyunni mí, anɛ ʋ há túwírá má nyunni mí ɛ́ ná, púle mí.
16 Ɛ́ nɛ́ Nyuutɩna wɩ́ɩ́ né kóŋ nyúú:
‹Zaŋ múŋsí nɩɛ nyii sɩɛrʋ nɛ́, amá ɩ́ é, ɓa sɛ́ múŋsíwa Sabɩɩna sɩɛrʋ.›
17 Ɛ́ wɩ́ɛ́, rɩ Wɩɩsɛ nɛ́ dí zilé pɔ́wɔ́, zilé ná tɩɩ tɩɩ ʋ há díé párá má nɩɛ ná há lá Zeezi wɩ́ɛ́ dí, ŋ sɩɛ́ báá sɩ́ wólli Wɩɩsɛ mɛ́ cɛ́?»
18 Ɓa há nɛ́ ɛ́ wɩ́ɛ́ ko tenni, ɓa pɔ́rɔ́, ká bɩrɛ aá bɩ Wɩɩsɛ mɛ́ a bʋlɛ́:
«Wɩɩsɛ sɩɛ́ lóó, nɩɛ ná há to Zuwifiwa má bɩ́rwɔ́ har tɛ wɩ́bɔmɔ, kɔ́wɔ́ ná hiẽsó rí.»
Wɩcʋɔla pul ná há mɩŋ Aŋtɩɔsɛ mɛ́ wɩ́ɛ́
19 Nɩwálmɔ ná há ísé, Ɩtɩɛnɛ ɓʋ́ɩ́ tɛ́ŋ mɛ́, nɩɛ ná pɩsɛ, náŋa mʋ́ɔ́ lɛ Fenisi, náŋa mʋ́ Siipiri, náŋa má mʋ́ Aŋtɩɔsɛ, a bʋl Wɩɩsɛ wɩ́bʋlɛ aá pá Zuwifiwa* dʋŋɔ.
20 Ɓa náŋa taŋa lɛ́ Siipiri arɩ́ Sɩɩrɛnɛ,* a mʋ́ Aŋtɩɔsɛ nɩɛ ná há ká Gɩrɛkɛwa* má rɩ́, a bʋl Nyuutɩna Zeezi Labaarɩwero ná wɩ́ɛ́ pɔ́wɔ́.
21 Wɩɩsɛ dóé tɩ́ŋwɔ́ mɛ́, nɩɛ ɓɩkana a Nyuutɩna yardá, a bɩ́rsɛ, a lo Wɩɩsɛ mɛ́ aa zɔkɛ́.
22 Ɛ́ wɩ́ɩ́ labáárɛ pérí nɩɛ ná há lá Zeezi wɩ́ɛ́ dí, a mɩŋ Zerizalɛmɛ mɛ́, ɛ́ nɛ́ ɓa tʋŋ Barnabasɛ rʋ́ʋ́ mʋ́ Aŋtɩɔsɛ ná.
23 Ʋ há mʋ́ɛ́ a ná Wɩɩsɛ bárka ɓa sɩ́sɩ́ɛ́nnʋ́wa, ʋ sɩɛrʋ tɔ́rɔ́ wérí.
Ʋ cáánɩ́wɔ́, a bʋl rɩ́wɔ́ ká Nyuutɩna géŋgéŋ, arɩ́wɔ́ sɩɛrʋ wuu, a sɩ́ píí tá.
24 Barnabasɛ ká sawértɩ́ŋ rɛ́; ʋ yardá bɩ́ɔ́, Wɩɩsɛ Sabɩɩna má súú.
Ɛ́ nɛ́ nɩɛ ɓɩkana ko súúríwó mí, aá tɩŋ Nyuutɩna mɛ́.
25 Ká Barnabasɛ sɩɛ́ daarɛ mʋ́ Tarsɛ, aá ja Sool;
26 ʋ mʋ́ɔ́ nóú ráŋ, a kánʋ́ bɩrko Aŋtɩɔsɛ.
Ɓa ké ráŋ bɩŋpírmi, a sáŋ Aŋtɩɔsɛ wɩcʋɔla púl* mí, a kármɩ́wɔ́ nɩkana.
Aŋtɩɔsɛ ná mɛ́ nɛ́, ɓa púl, a ka Zeezi hatɩŋna ná aá yɩ́rɛ Kɩrtɩɛ̃wa.*
27 Ɛ́ tɛ́ŋ mɛ́ sɩɛ́, rɩ Wɩɩsɛ wɩ́laabʋlla lɛ́ Zerizalɛmɛ a ko Aŋtɩɔsɛ.
28 Ɓa sɩɛrʋ nɔ́ŋɔ, ɓaá yɩ́rʋ́ Agabisi, ʋ ísó a tɩŋ Wɩɩsɛ Sabɩɩna dóé mí, a bʋl rɩ́ losu ɓɩzeno sɩ́ zʋ dúníé.
Ɛ́ losu sɩɛ́ ɓɩɛ́na zʋ́ dúníé, rɩ Kulodi ní ká Romi* kuózeno.
29 Ɛ́ nɛ́ karmɩbɛlɛ vʋʋrɛ rɩ́wɔ́ kɩɛsɛ kɩɛsɔ́, nɛ́ŋ má wuu kanɛ́ mʋɔsɔ, rɩ́wɔ́ kaa mʋ́ sáŋwɔ́ maábináŋa ná há mɩŋ Ziide mí.
30 Ɓa pí ɛ́ kɩɛsɔ́ hé Barnabasɛ rɩ́ Sool nɛ́sɛ mɛ́ nɛ́, ɓa kaa mʋ́ pɔ́wɔ́ nɩhɩɛ̃́sɛ.