Ɓa dúóri gbɛrkɔ
3
1 Kal oro, Pɩɛrɛ rɩ́ Zaŋ ísó hé náŋá, aá mʋ́ Wɩcʋɔlɩjɩzeno,* rɩ́wɔ́ cʋɔlɛ gbaanɛ bɩ́ŋbɩlɩ́ botoro wɩcʋɔlɔ́.
2 Ɓa mʋ́ɔ́ rɩ báálɔ oro rí, ɓa vaa pii ko aá bil Wɩcʋɔlɩjɩzeno dánnʋɔ ná ɓa háá yɩ́rɛ, Dannʋwero* mí.
Ɛ́ báálɔ ká gbɛ́rkʋ́ rɛ́; ɓa lʋ́lʋ́ ɛ́ nɛ́.
Tápʋ́l wuu sɩɛ́, ɓaá púú ko bil ráŋ, rʋ́ʋ́ sʋ́sʋl ɓɩɛ, nɩɛ ná háá zʋ Wɩcʋɔlɩjɩzeno ná rɩ́.
3 Ʋ sɩɛ́ há ná Pɩɛrɛ rɩ́ Zaŋ rɩ ɓa kúó rɩ́wɔ́ zʋ, ɛ́ nɛ́ ʋ sʋl ɓɩɛ ɓa dɩhɩ̃́.
4 Ɛ́ nɛ́ Pɩɛrɛ rɩ́ Zaŋ bélú cúrútútú, ká Pɩɛrɛ sɛ́:
«Ɩ́ má bíbélrá.»
5 Báálɔ ná sɩɛ́ bíbélwó rɩ́ yɩɛla, aá bɩɩnɛ rɩ ɓa sɩ́ pɔ́ʋ́ óŋ.
6 Ɛ́ nɛ́ Pɩɛrɛ bʋ́lʋ́ rɩ́ bʋlɛ́:
«Ŋ wɩ wárɛ meéwí kené, ŋ wɩ salmɛ meéwí kené, amá omo ná ŋ há kené ní ŋŋ́ á rɩ́ŋ pɛ́ɩ́:
Nazarɛtɛ Zeezi Kirisi yɩr mɛ́, isi va!»
7 Ká cɔ́ʋ́ néduu mí, a kánʋ́ cúóli.
Mʋ́l ná tɩɩ tɩɩ mɛ́, rɩ gbɛrkɔ ná nacɛ́sɛ rɩ́rʋ́ nabaŋa wuu tɩ́ɛ́nɔ́.
8 Naasɩ́ balá, rʋʋ ísó ɓéri, a cɩ́nʋ́ naasɛ mɛ́, a de vɩ́va.
Ʋ rɩ́ Zeezi nɩtʋmɛ́ ná bɛllɛ hé náŋá mʋ́ zʋ Wɩcʋɔlɩjɩzeno sɩɛrʋ.
Ʋ sɩɛ́ tútuosi, aá ɓénni, káá bɩ Wɩɩsɛ mɛ́.
9 Jamáŋ ná wuu nóú, rʋʋ́ túósú, káá bɩ Wɩɩsɛ mɛ́.
10 Ɓa há kɩ́ɛ́lɛ́ zɩŋ, rɩ́ báálɔ ná há válɛ́ aá ké Wɩcʋɔlɩjɩzeno Dannʋwero ná sɩ́ɛ́, aá sʋl nɛ́, héwíŋ kéŋwó, ɓa hallɛ, tʋtʋmɩ́ ná há tʋ́mʋ́ mɛ́ wɩ́ɛ́.
Pɩɛrɛ bʋ́l Wɩɩsɛ wɩ́ɛ́ Wɩcʋɔlɩjɩzeno sɩɛrʋ
11 Báálɔ ná sɩɛ́ há dé tɩ́ŋ Pɩɛrɛ rɩ́ Zaŋ mɛ́, a wʋ́ɔ́ har bɩrɛ, ʋ ɛ́ máánɛ́ nɩɛ ná wuu nʋʋsɛ, ɓa fá kówó rɩ́, Wɩcʋɔlɩjɩzeno ná záwára sɩɛrʋ.
Ɛ́ záwára nɛ́ ɓaá yɩ́rɛ Salomoŋ záwára.
12 Pɩɛrɛ há ná ɛ́, ɛ́ nɛ́ ʋ bʋl nɩɛ ná rɩ́ bʋlɛ́:
«Ɩzɩrayɛl nɩɛ, beé rí tɛ báálɔ né dúóre máánɩ́wa nʋʋsɛ, ɩ́ bíbélrá nyɛ?
Ɩ́ bɩ́ɩ́nɔ́ raá tɩɩ dóé mí ní yáá, ɛ́ rá má á Wɩɩsɛ cʋɔlɛ́ kɩ́ŋkáŋ mɛ́ nɛ́, á a báálɔ né isi aá va?
13 Wɩɩsɛ ná há ká Abɩrahaŋ* rɩ́ Ɩzakɛ* arɩ́ Zakɔbɛ* Wɩɩsɛ, a árá naabálwa Wɩɩsɛ, ʋ nɛ́ píŋsú tʋtʋnnɔ Zeezi ná, ɩ́ tɩɩ há kené pá Pɩlatɛ* rɩ́rʋ́ nɩɛ, ká bʋlɩ́wa wʋ́ʋ́ ja.
Pɩlatɛ fa bɩɩnɛ rʋ́ʋ́ púú tá, ɩ́ sɩ́ɩ́wa waá saŋ.
14 Ɩ́ vɛ́ sapʋmmɔtɩ́na, nɛrɔ ná há ká tékétéké, ká sʋl Pɩlatɛ, rʋ́ʋ́ pi nɩɓʋ́ʋ́rɔ nɛ́ tá.
15 Ɛ́ wɩ́ɛ́, ɩ́ ɔ́ɔ́ ɓa ɓʋ́ hiẽsó kuóro, amá Wɩɩsɛ íllú sʋʋ mɛ́; á ká dáŋsɩ́ɛ́wa ɛ́ wɩ́ɩ́ mɛ́.
16 Zeezi yɩr dóé mí, arɩ́ yardá ná á há ɛ́ɛ́ ʋ yɩr ná mɛ́, ɛ́ nɛ́ ɛ́ɛ́, báálɔ né ɩ́ há ʋ́ʋ̃́, ʋ dúóri.
Á sɩ́ɛ́ há á yardá ná arɩ́ Zeezi ní tɛ, báálɔ né nóú tɛŋfɩ́ɛ́l nʋɔ mɛ́, anɛ ɛ́ ɩ́ tɩɩ há kɩ́ɛ́lɛ́ ná.
17 «Ŋ maábináŋa, ŋ sɩɛ́ ɩ́ɔ̃́, ɩ́ rɩ́rɩ́wa nɩhɩɛ̃́sɛ, ɩ́ wɩ wɩ́ɩ́ ɛ̃ sɩɛrʋ nɛ́, ɩ́ a Zeezi ɛ́.
18 Amá Wɩɩsɛ há tɩ́ŋʋ́ wɩ́laabʋlla wuu mí a bʋl wɩ́ɩ́ ná fól wuu, rʋ́ʋ́ Kirisi sɩ́ ná wɩhála, ʋ nɛ́ Wɩɩsɛ tʋŋ.
19 Ɛ́ wɩ́ɛ́, ɩ́ bɩ́rsɛ, a báá sɩ́ áá zɔkɛ Wɩɩsɛ mɛ́, ká ko Wɩɩsɛ rɩ́, rʋ́ʋ́ héíwa wɩ́bɔmɔ suúri.
20 Ɛ́ é, Nyuutɩna sɩ́ pɛ́ɩ́wa fɩɛla, ká tʋŋ Zeezi Kirisi, nɛrɔ ná ʋ fa há lɩ́sɛ́, rʋ́ʋ́ kóíwa yɩr mɛ́.
21 Mʋ́l néé mí, Zeezi Kirisi sɩ́ ké bána nyúú, a kaá ja tɛŋ ná mɛ́ wɩ́ɛ́ wuu há sɩ́ bɩrmɛ wɩ́fɛlɛ.
Wɩɩsɛ wɩ́laabʋlla sapʋmmɔtɩ́náwa ná, fa wáárɔ́ la sɩ́ɛ́ bʋl wɩ́ɩ́ né fól wuu.
22 Moyizi* bʋ́lɔ́ bʋlɛ́:
‹Nyuutɩna ɩ́ Wɩɩsɛ sɩ́ tʋ́mʋ́ wɩ́laabʋllɔ* nɔ́ŋɔ rʋ́ʋ́ kóíwa rɩ́, anɛ ʋ́ há tʋ́mɩ́ŋ nyɛ.
Ʋ sɩ́ ɛ́ɩ́wa duo nɛ́ŋ.
Ɩ́ sɩɛ́ zésú wɩ́bʋlɛ́ wuu.
23 Nɛrɔ ná wuu há sɩ́ vɔ́ʋ́ wɩ́ɛ́ zesé, Wɩɩsɛ sɩ́ lɩ́sʋ́ ʋ nɩɛ sɩɛrʋ tá, rʋ́ʋ́ sʋwɛ!›
24 «Wɩɩsɛ wɩ́laabʋlla ná, a de pɔ́ Samɩɛl* mɛ́, ɓa wuu ní bʋ́l tápʋlɛ nyáŋ wɩ́ɛ́, a la náŋá mɛ́.
25 Nʋɔ ná Wɩɩsɛ há tɩ́ŋʋ́ wɩ́laabʋlla mɛ́ tá, ɩ́ yɩr mɛ́ nɛ́.
Nʋtʋmɛ* ná, Wɩɩsɛ rɩ́rɩ́wa naabálwa há bílé, ɩ kéŋ ker ráŋ, anɛ ɛ́ ʋ há bʋ́l Abɩrahaŋ rɩ́ bʋlɛ́:
‹Ŋ sɩ́ tɩ́ŋɩ́ duo nɩɛ mɛ́,
a hé bárka pá dúníé nɩɛ wuu.›
26 Ɛ́ wɩ́ɛ́, Wɩɩsɛ tʋ́mʋ́ tʋtʋnnɔ Zeezi, ɩ́ yɩr mɛ́ nɛ́ kɛ́rɛ́.
Ʋ tʋ́mʋ́ rʋ́ʋ́ hé bárka pɛ́ɩ́wa, ká lɩ́sɩ́wa oro wuu, ʋ wɩ́bɔmɔ ɛɛ mɛ́.»