Wɩcʋɔlɛjɩzeno bɩrsɔɛ tɛ́ŋ péró
1
1 Pɛrsɛ tɩ́náwa kuóro Dariyusi Kuorí díí bɩŋsɛ bɛllɛ nyúú mí, ʋ caŋsɛ balgo, dʋŋdʋ̃́ʋ̃́ tápʋl nɛ́, Nyuutɩna Wɩɩsɛ há ká dóé wuu tɩ́na, tʋ́mʋ́ wɩ́laabʋllɔ Aaze, rʋ́ʋ́ kánʋ́ wɩ́bʋlɛ mʋ́ pá Salsɩɛl bio Zorobabɛl há ká gʋvɛrnɩɛrɛ Zida mɛ́, ʋ rɩ́ Yoyadakɛ bio Zozuwe há ká vʋk'ɔɔsɔ nɔhɔ̃́. 2 Nó ná Nyuutɩna Wɩɩsɛ, dóé wuu tɩna há sɛ́: «Nɩɛ nyáŋ sɩ́ rɩ́ŋ jɩzeno bɩrsɔɛ tɛ́ŋ ha wɩ péré». 3 Ɛ́ nʋ́ʋ́ tʋŋ wɩ́laabʋllɔ Aaze ʋ mʋ́ bɔ́sɩ́wɔ́ a bʋlɛ́: 4 «Tɛ́ŋ sɩɛ́ péró ní rɩ́ɩ́wa é sɔ́ɩ́wa jɩwere, a bɩ́rmɩ́wɔ́ wérí a zʋ aá pɛ́, káŋ é Jɩzeno yɛ́rkɛ? 5 Nyuutɩna Wɩɩsɛ há ká dóé wuu tɩ́na sɩɛ́ sɛ́: «Ɩ́ sɩɛ́ bɩɩnɛ wérí a néíwa há kúé nɛ ɛ́. 6 Ɩ́ dú ɓɩɛ kɩ́ŋkáŋ, ká kʋsɛ mʋɔɔ. Ɩ́ɩ́ dí ká waá vɔkɛ. Ɩ́ɩ́ nyɔ ká nyinyʋɔ́sɛ ha kánɩ́ɩ́wa. Ɩ́ɩ́ tɔ́ gɛnnɛ, ká waarʋ ha kánɩ́ɩ́wa. Tʋtʋnnɔ lɔ́ʋ́ túme, a pii (anɛ ʋ há píé hé) hé lɔkɔ́ há lúre sɩɛrʋ. 7 Ɛ́ nɛ́ ŋ é Nyuutɩna Wɩɩsɛ há ká dóé wuu tɩ́na, baa bʋlpɛ́íwa :« Ɩ́ sɩɛ́ bɩɩnɛ wérí a néíwa mála há nɩhɩ̃́ ɛ́. 8 Ɩ́ zɛ́ paalɔ, a ja daasɛ ko, a bɩrsɔ́ŋ jɩzeno. Ʋ ɛ́ sɩ́ tɔ́rɩ́ŋ sɩɛrʋ, ká rɩ́ɩ́wa píŋsíŋ. Ŋ é Nyuutina Wɩɩsɛ nɛ́ bʋ́lɛ́. 9 Ɩ́ɩ́ ka yɩɛla rɩɩ́wa baksɛ ɓɩɛ kánɔ́, ká ɩ́ mʋ́ kʋsɛ, ɓa wɛ óŋ wuu mɔhɛ̃́. Ɩ́ɩ́ ka mʋɔ́ɔ́ ná má ko, ŋ pʋʋsɛ poo hé, (ŋ a poo lú) ɓa wuu pɩsɛ. Ŋ é Nyuutɩna Wɩɩsɛ há ká dóé wuu tɩ́na nɛ́ bʋ́lɛ́: Bee wɩ́ɛ́ rɛ́ tɛ ɛ́? Ŋ Jɩzeno ná há yɛ́rkɛ́, ká ɩ́ oro wuu de zɩ́zɩ́mʋ́ tɩɩ jaa wɩ́ɛ́ nɛ́ tɛ́. 10 Ɛ́ nɛ́ tɛ duóŋ wɩ kúé, tíé nyúú óŋ wuu wɩ ɔ́sɛ́ (tíé wɩ hál wuu lóé) 11 Ŋ lóó hɩlɔ cɛ́ ɩ́ tɔ́ɔ́ mɛ́, pallɛ daha, a zɔ́kɩ́wa biléwa, ɩ́ vinyiwa, ɩ́ ólívi tuuni, à rɩ́rɩ́wa oŋparɛ́ náŋá. Nibííne rɩ́ pʋsɛ tɩŋ ɛ́ wɩ́ɛ́ a nà wɩɩla, ká ɩ́ tʋtʋmɛ́ wuu tá yɔ́ɔ́.» 12 Ɛ́ nɛ́ Salsɩɛl bio Zorobabɛl rɩ́ vʋk'ɔɔsɔ nɔhɔ Yoyadakɛ bio Zozuwe, arɩ́ nɩkáánɛ ná wuu, saŋ a zesi Nyuutɩna Wɩɩsɛ, ɓa Wɩɩsɛ wɩ́bʋlɛ́ ná ʋ wɩ́laabʋllɔ Aaze há bʋ́lɛ́ pɔ́wɔ́. Aaze tʋ́ŋ tʋmɛ́ ná Nyuutɩna Wɩɩsɛ há píé cɩ́ɩ́nʋ́, ɛ́ nɛ́ nɩɛ ná wuu sɩɛ́ zɩŋ rɩ́ Nyuutɩna Wɩɩsɛ kéŋ tíŋ. 13 Ká Nyuutɩna Wɩɩsɛ wɩ́laabʋllɔ (nɩtʋmɩ́) Aaze baa bʋlpɔ́wɔ́ bʋlɛ́ rɩ́ Nyuutɩna Wɩɩsɛ sɛ́ :«Ŋ mɩ́nɩ́ɩ́wa har» Nyuutɩna Wɩɩsɛ nɛ́ bʋ́lɛ́.» 14 Ká Nyuutɩna Wɩɩsɛ sɩ́ɛ́ pi kajáŋa sabɩɩna hé Salsɩɛl bio Zorobabel há ká gʋvɛrnɛrɛ a mɩŋ Zida mɛ́, sɩɛrʋ, a pii hé Yoyadakɛ bio Zozuwe há ká vʋk'ɔɔsa nɔhɔ̃́ sɩɛrʋ, a pii hé nɩkáánɛ ná má wuu sɩɛrʋ. Ɓa wuu isi ko, aá tʋŋ Nyuutɩna Wɩɩsɛ, ɓa Wɩɩsɛ, há ká dóé wuu tɩ́na, jaa ná bɩrsɔɛ tʋtʋmɛ́, 15 kuóro Dariyusi Kuorí díí bɩŋsɛ bɛllɛ nyúú mí, caŋsɛ balgo, tápʋlɛ mɛrɛ́ rɩ́ baná kal nɛ́.