1
1 Nyuutɩna Wɩɩsɛ púú liŋó pɔ́ʋ́ wɩ́laabʋllɔ Sofoni, rɩ Amɔŋ bio Zozɩyasɛ nɛ́ fa ká Zida dɩtɩ́llɛ kuóro. Sofoni áná yɩr nɛ́ ká Kuusi; Kuusi má áná yɩr nɛ́ ká Gedaliya; Gedaliya má áná yɩr nɛ́ ká Amarɩya; Amarɩya má áná yɩr nɛ́ ká Ezekɩasɛ.
Nyuutɩna Wɩɩsɛ sɩ́ zɔkɛ tíé nyúú onni wuu
2 «ŋ sɩ́ zɔkɛ onni wuu tíé nyúú. Nyuutɩna Wɩɩsɛ nɛ́ bʋ́l ɛ́.
3 Ŋ sɩ́ ɓʋ́ʋ́sɛ nibííne rɩ́ pʋsɛ wuu, a ɓʋ́ʋ́sɛ diíwiisi arɩ́ naŋwʋlɛ́ wuu, Ŋ sɩ́ tɩ́ksɛ saháksɛ́tɩɩna rɩ́wɔ́ saháksɩ́wɩ́ɛ́ wuu. Nibíŋ balá má wɩ tíé nyúú kaanɛ. Nyuutɩna wɩɩsɛ nɛ́ bʋ́l ɛ́.»
Wɩɩsɛ sɩ́ isi cɛ́ Zida rɩ́ Zerizalɛmɛ nɩɛ mɛ́
4 «Ŋ sɩ́ isi cɛ́ Zida rɩ́ Zerizalɛmɛ wuu nɩɛ mɛ́, ŋ sɩ́ a rɩ́ Baalɛ oŋkáánɛ wuu nyɩ́ɩ́kɛ dɩhɩ̃́ né, ká rʋ́ʋ́ vʋk'ɔɔsa má yɩr yʋ́ksɛ. 5 Nɩɛ ná há zɛ́ luŋse daha aá ɓaarɛ cana rɩ́ caŋwʋllɛ, nɩɛ ná má há sɛ́ ɓaá cʋ́ɔ́lɩ́ŋ, kaá ŋmɩ́ɛ́sɛ veno Mɩ́lkɔ́ŋ yɩr mɛ́, ŋ sɩ́ ɓʋ́ʋ́sɩ́wɔ́ wuu. 6 Ŋ é Nyuutɩna Wɩɩsɛ sɩ́ ɓʋ́ʋ́sɛ nɩɛ ná há bɩ́rwɔ́ har tɛ́ŋ, a wɩ́ŋ ja, a wɩ́ŋ cáánɛ máá ja.» 7 Ɩ́ (sikli) tɔ́ɩ́wa nʋʋsɛ Nyuutɩna Wɩɩsɛ sɩ́ɛ́! Beewɩ́ɛ́ ʋ tápʋlkoolí pérí tɛsɩ́ɩ́. Nyuutɩna Wɩɩsɛ ɔ́sɛ́ vʋk, a (la sɩ́ɛ́) záŋ pɩ́ɩ́rʋ́ nɩyɩ́rɛ. 8 Nyuutɩna Wɩɩsɛ sɛ́: «Ŋ vʋk ná kal ɔsɩ́, ŋ sɩ́ cɛ́ (sídííre) kuóre rɩ́ kuóbɛlɛ, arɩ́ nɩɛ ná wuu háá su tɔ́ɔ́ nɔ́ŋɔ nɩɛ (nɩhʋɔra) gɛnnɛ mɛ́. 9 Ɛ́ tápʋl, ŋ sɩ́ cɛ́ (píŋ) nɩɛ na wuu há ɓéré daarɛ Wɩcʋ́ɔ́lɩ́jɩzeno jɩgbaarɔ́ mɛ́ (a mʋ́ zɛ koro), arɩ́ nɩɛ ná háá a bɩbarɩ́, a vɩrɛ nɩɛ, a la kuóɓɩɛ kaa zʋʋ súwó venni jɩɩsɛ. 10 Nyuutɩna Wɩɩɛ nɛ́ bʋ́lɛ́, ʋ sɛ́: «Ɛ́ kal, Zerizalɛmɛ mɛ́, nɩɛ sɩ́ nɛ̃ cááse, dánnʋɔ ná ɓa há yɩ́rɛ naŋwʋlɛ dánnʋɔ mɛ́; ɓa sɩ́ nɛ̃ nɩɛ háá búŋse zɔ́fɛlɔ mɛ́, ká rɩ́ dɔ́mɛ ɓizeno dɩ́dɔ́ŋ dúŋdúóme nyunni; 11 tíérí zʋ́ɔ́ nɩɛ, ɩ́ bubúŋsi, beewɩ́ɛ́ báyɛlɛ́ wuu sɩ sʋsɛ, nɩɛ ná wuu há ká meéwíé báyɛlɛ́ sɩ nyɩ́ɩ́kɛ. 12 Ɛ́ tápʋl, ŋ sɩ́ nyɩkɛ caanɔ́ a wúlli Zerizalɛmɛ, sɩɛrʋ wuu. Nɩɛ ná há mɩŋ fɩɛla mɛ́ a wɩ tʋ́ŋ kene, káá bɩ́ɩ́nɩ́wɔ́ tɩɩ mɛ́ a bʋlɛ́: « Nyuutɩna wɩ wɩ́ɩ́ wuu wóó a; ʋ wɩ wɩ́wérí wóó a, ʋ wɩ wɩ́tɔk má wóó a » 13 Nɩɛ sɩ́ ko pɔ́wɔ́ kuóɓɩɛ ná wuu, ká túwó jɩɩsɛ wuu hé. Ɓa sɩ́ sɔ jɩɩsɛ ká sɩ́wɔ́ zʋ́; ɓa sɩ́ cɔ́ŋsɛ dɩvɛ́ŋ tuuni, ká sɩ́wɔ́ dɩvɛ́ŋ nyɔ́.
Nyuutɩna Wɩɩsɛ tápʋl wɩ́ɛ́
14 Nyuutɩna Wɩɩsɛ tápʋlzeno pérí tɛ́sɩ́ɩ́, ʋ tuósó aá ko rí. Nɩɛ sɩ́ wi bɔ́ŋbɔ́ŋ Nyuutɩna Wɩɩsɛ tápʋl ná kal, nɩɛ ná má tɩɩ há sɛ́ ɓa ká bɩbárá, ɛ́ tápʋl, ɓa sɩ́ yɩ́rɛ bʋlɛ́ rɩ́wɔ́ fáwɔ́ búŋse. 15 Ɛ́ tápʋl sɩ a cɔwɩɩlɔ́ kal, sazɔkɔ́ rɩ́ wɩhála kal, zɔ́krʋ rɩ́ wɩɩla kal, ɛ́ tápʋl sɩ́ a bíno dʋŋɔ, ʋ sɩ a kʋʋlɔ́, ká rɩ́ duóbásɛ tɔ́ dɩhɩ̃́ wuu rʋ́ a bíno. 16 Ɛ́ kal, ɓa sɩ nɛ̃ lal cááse arɩ́ lal nyɩ́sɛ mui, a cɛ́ tɔ́sɔɔkɛ́rɛ rɩ́wɔ́ síŋtírípɔ́ɔ́ra jɩɩsɛ ná há íse mí. 17 Ŋ sɩ a rɩ́ nibiine mɩŋ sazɔkɔ́ sɩɛrʋ, ɓa sɩ vɩ́va anɛ nyʋmma, beewɩ́ɛ́, ɓa ɔɔ zɔkɛ Nyuutɩna Wɩɩsɛ mɛ́. Ɓa sɩ́ɛ́ sɩ ɓɛ́sɩ́wɔ́ cɛ́l anɛ kuŋkulo ká rɩ́wɔ́ yówó namɩŋsa tá anɛ kʋɔra (pupuli). 18 Ɓa salmɛ rɩ́wɔ́ warɛ wʋ́ɔ́ woo la aá tá Nyuutɩna Wɩɩsɛ cɔwɩɩlɔ́ tápʋl ná mɛ́; ʋ cɔwɩɩlɩ́zeno ná há nɩhɩ̃́ níŋ, sɩ di tie wuu duó. Ɛ́ kal sɩ lɔrɛ a pá tíé nyúú nibiine wuu duo.