Ɩ bɩrko Nyuutɩna Wɩɩsɛ rɩ́
2
1 Wɩ hɩɩ̃sɛ ɛ̃ nibííne, ɩ́ hé náŋá mɛ́, a bɩɩnɛ wérí, a bɩrjɛ́ɩ́wa tɩɩ, 2 ká rɩ Nyuutɩna Wɩɩsɛ tápʋl ná zɩŋ peri, rʋ́ʋ́ díú cɔwɩɩlɩzeno ná ɩ́ nyúú, a kanɩ́wa pɩsɛ anɛ nyɔ́míŋ poo haá kaa pɩsɛ ɛ́; 3 Tíé nyúú nɩɛ ná há múúríwó tɩɩ, aá tɩŋ Wɩɩsɛ wɩ́máŋsɛ, ɩ́ bɩrko Nyuutɩna Wɩɩsɛ rɩ́; ɩ́ múúríwa tɩɩ aá va taŋá sɩɛrʋ. Nɛ́ŋ wɩ wɩ́ɩ́ ɛ̃, ɩ́ sɩ́ lúlɛ, Nyuutɩna Wɩɩsɛ cɔwɩɩlɔ́ tapʋl ná mɛ́.Wɩɩsɛ gáásɛ wɩ́ɛ́ tɔ́ɔ́nyúúrí tɔ́nɛ nɩɛ nyúú
4 Ɓa sɩ́ vɛ Gaza tɔ́ɔ́ a tá, ká zɔkɛ Asɩkalɔŋ tɔ́ɔ́. Wɔhɔ cɩ́ɩ́ka nɛ́ rɩ́wɔ́ lɩ́sɛ Asɩdɔɔdɛ tɔ́ɔ́ nɩɛ, ká zɔkɛ Ekrɔŋ tɔ́ɔ́ wuu. 5 Wɩɩla sɩ́ péríwa, ɩ́ é nɩɛ ná há ké mʋʋ nʋɔ, ɩ́ é Kereti tɔ́ɔ́ nɩɛ, Nyuutɩna Wɩɩsɛ saríya ná sɩ́ túwíwa nyúú. Ʋ sɛ́: Ɩ Kanaŋ há ká Filisiti nɩɛ tɔ́ɔ́, ŋ sɩ́ zɔ́kɩ́, ká ɓʋ́ʋ́sɩ́ nɩɛ wuu. 6 Tɔ́nɛ ná wuu há mɩŋ mʋʋ nʋɔ, ɓa sɩ́ bɩrmɛ pʋsɛ dɩnʋɔlɩ́, rɩ́ penʋɔla kiri piẽse zʋ aá nʋɔlɛ, a ciki petuni ráŋ. 7 Zida nɩkáánɛ nɛ́ sɩ́ ko tɩ́llɛ ɛ́ dihɩ́ wuu; Ɓa sɩ́ káŋwɔ́ piese lɩɩ nʋɔlɛ ráŋ, ká rɩ tɔ́ɔ́ bíró, rɩ́wɔ́ mʋ́ cɔ Asɩkalɔŋ jɩɩsɛ mɛ́. Beewɩ́ɛ́ Nyuutɩna Wɩɩsɛ, ɓa Wɩɩsɛ sɩ́ ko sáŋwɔ́ mɛ́, a a rɩ́wɔ́ cíé a wérí.
Wɩɩɛ gáásɛ wɩ́ɛ́ tɔ́ŋbʋɔla (tɔ́ɔ́ mʋ́bʋɔ nɩɛ) nyúú
8 Wɩɩsɛ sɛ́: «Mʋwabɛ nɩɛ há tʋ́ksɩ́ŋ nɩɛ, arɩ́ Amɔŋ duo nɩɛ há lɔ́rɩ́ŋ nɩɛ ɛ́, ŋ nɩ́ɔ́ rɛ́. Ɓa tʋ́ksɩ́ŋ nɩɛ wérí ká lɔ́wɔ́ tíé súúríwó ɓɩnɔ mɛ́, ɓa tíé jɛ́llɛ. 9 Ɛ́ wɩ́ɛ́, ŋ é Nyuutɩna Wɩɩsɛ há wómmó yɩr mɛ́, ká a Ɩzɩrayɛl nɩɛ Wɩɩsɛ, ŋ liŋó ní nyɛ: «Ŋ sɩ́ zɔkɛ Mʋwabɛ duo nɩɛ anɛ Sodomi nɩɛ ŋ há zɔkɛ ɛ́, a zɔkɛ Amɔŋ duo nɩɛ, anɛ Gomɔrɛ nɩɛ ŋ há zɔ́kɛ́ ɛ́. Ɓa tíé sɩ́ a tíhɩlɩ́ a kaá mʋ́ wuu, rɩ́ sɔrʋ arɩ́ yɛsɛ dʋŋɔ nɛ́ nyʋ́ʋ́ daha. Ŋ nɩɛ ná há káánɛ sɩ́ mʋ́ lɔ́wɔ́ tíé arɩ́ dóé, ká tɩ́llɩ́wɔ́ onni wuu. Nyuutɩna Wɩɩsɛ ná há kɛ́ onni wuu, doé wuu tɩna Wɩɩsɛ nɛ bʋ́l ɛ́. 10 Ɓa nyʋkɔ ná yɩr mɛ́, nyɛ nɛ́ ríŋ pii tʋ́ŋwɔ́ mɛ́. Bee wɩ́ɛ́ ɓa tʋ́ksɩ́ŋ é Nyuutɩna Wɩɩsɛ há kɛ onni wuu nɩɛ; a lɔ́wɔ́ tíé súúríwó ɓɩnɔ mɛ́ ʋ a ɓɩjɛ́lɛ́. 11 Nyuutɩna Wɩɩsɛ sɩ́ a ɓɩhɔ́ɔ́ ɓa nyúú, ʋ sɩ zɔkɛ tíé nyuu onni ná wuu nibiine háá ɓaarɛ́. Duowa ná wuu dɩhɩ̃́ɛ́ há bóló nɩɛ sɩ́ cʋ́ɔ́lʋ, ɓa oro wuu tíé mí.
Wɩɩsɛ gáásɛ wɩ́ɛ́ tɔ́ɔ́ lɩ́lɔ́ŋsɛ ná wuu bɛllɛ nɩɛ nyúú
12 Ʋ sɛ́: «Ɩ́ má Etiyopi nɩɛ, ŋ tókowí sɩ́ ɓʋ́ʋ́sɩ́wa lal mɛ́.» 13 Nyuutɩna sɩ́ tʋŋ ɛ́ tɩɩ tɩɩ a caasɛ wɩɩsɛ dɩpomí nɛgʋɔ nɩɛ ma nyuu, a zɔkɛ Asiiri tɔ́ɔ́. Ʋ sɩ́ zɔkɛ Ninivi tíé rʋ́ʋ́ bɩrmɛ tíhɩlɩ́ anɛ gɩr bétéké. 14 Piẽse rɩ́ nɛsɛ sɩ́ zʋ aá pɩ́nʋ́ sɩɛrʋ, pʋsɛ duówuu sɩ́ pɩ́pɛ́ ráŋ: kulúku rɩ́ sáálɩ́ŋbɛsɛ́ (werkuó) sɩ́ zʋ aá cɔ́ʋ́ nafarsɛ (korsi) daha. Ɓa sɩ́ nɩ́nɛ̃ diíwiisi kʋɔlɛ tókórówa mɛ́. A pɔ́ ɛ́ tɔ́ɔ́ dánnʋɔ mɛ́ ká mʋ́ yakɛ, ʋ wuu ká zɔ́krʋ nɛ́ bee wɩ́ɛ́ sɛɛdɩrɛ dole dʋŋɔ nɛ́ nyɩ́ɩ́sɛ́. 15 Ɩ́ ná wɩ́ɩ́ ná háá a rʋ́ peri tɔ́zeno Ninivi. Ʋ nɩɛ háá nyʋ́kɛ́ a bɩnɛ rɩ wɩ́ɩ́ tó, ká bʋlɛ́ ɓa nɛ́ kɛ tɔ́nɛ wuu nɩɛ. Ninivi sɩ́ɛ́ ténnó, ʋ jɩɩsɛ wuu ɓallɛ; ɓa bɩ́rmɛ zɩɓoru, pʋsɛ zʋ aá pɛ́. Rɩ nɛrɔ wuu kúó aá daarɛ ɛ́ tɔ́ɔ́ laka, ʋʋ́ fuoli ní káá mɩ́sɛ nɛ́sɛ́.