7
1 Tɛ́ŋ ná mɛ́ ŋ háá ja rɩ́ŋ duóri Ɩzɩrayɛl,ɛ́ tɛ́ŋ mɛ́ nɛ́ Ɩfɩrayɩŋ wɩ́zɔkɛ́ arɩ́ Samari dɩnyɔ́rkɛ nyɩ́nyɩ́ɩ́sɛ,
bee wɩ́ɛ́, ɓaá nyɛ nyɩɛnnɛ nɛ́;
gaara mɩ́ŋwɔ́ jɩɩsɛ mɛ́,
rɩ́ŋ líísíŋ tɩɩ ɓa wɩ́tɩɛnnɛ ná wuu ɓa há ɛ́ɛ́ wɩ́ɛ́;
mʋ́l né mí, ɓa wɩ́'állɛ ná lɛ́rwɔ́.
Ɓa oro wuu wɩ́ŋ sɩ́ɛ́ mɛ́ féŋsé.
Ɓa kéŋ zaŋbawɩ́ɛ́ cɛ́ kuóre mí
3 Ɓa a wɩ́bɔma nɛ́ aá tɔ́rɛ kuóro sɩɛrʋ,
ká nyɛ nyɩɛrʋ má aá pɔrɛ sɩ́dííre tɛŋ.
4 Ɓa wuu ká nɩcɔrma nɛ́,
cɔrmɛ wɩ́ɛ́ dídíwó baŋcɩ́llɛ mɛ́ anɛ dɩ́pɛ́ŋ dɩwasɩ́,
dɩpɛ́ŋwaasɔ há hé níŋ ʋ lʋ́ŋ nɛ́.
Ʋ báá wɩ níŋ ɔsɛ́ aá hé,
a pɔ́ tɛ́ŋ ná mɛ́ ʋ há ŋmʋ́sɛ míŋ,
a kaá jɔ́wɔ́ isé.
5 Á kuóro cana kal,
sɩ́dííre nyɔ́ dɩvɛ́ŋ a baá wʋ́ɔ́ tɩɩ wó,
ká kuóro púú tɩɩ hé nɩlaama sɩɛrʋ.
6 Sɩ́dííre sɩɛnnɛ ná há nɩhɩ̃́ dɩpɛ́ŋ dɩwasɩ́ mɩ́ŋwɔ́ lɩ́ŋgɩrɔ́ ná mɛ́ nɛ́;
ɓa cɔwɩɩlɔ́ pɔrɛ nɛ́ tɩ́taŋ wuu,
ká cɩ́cʋɔ, ʋʋ́ isi anɛ níŋbʋɔ níŋpoo.
7 Sɩ́dííre sɩɛnnɛ lʋmɔ anɛ dɩpɛ́ŋ dɩwasɩ́,
ɓaá ɓʋ́ʋ́sɩ́wɔ́ sɩ́dííre;
ɓa kuóre wuu sʋsʋsɛ:
Ká nɛ́ŋ tówó sɩɛrʋ a yɩ́rɛ aá héŋ mí.
Ɩzɩrayɛl wɩ ɛ̃ rɩ Wɩɩsɛ a yɛ́rɛ pɔ́ʋ́
8 Ɩfɩrayɩŋ nɩɛ píwó tɩɩ hé duowa naŋá sɩɛrʋ,
Ɩfɩrayɩŋ nɩɛ nɩhɛ̃ maasa ɓa há wɩ kené bɩrɛ nɛ́.
9 Duhʋɔra díwó dóé,
ká ɓa wɩ ɛ́ mɛ́ ɛ̃.
Nɩ́nnɛ pérwó,
ká ɓa wɩ ɛ́ mɛ́ ɛ̃.
10 Ɩzɩrayɛl nɩɛ nyʋ́kɔ ká dáŋsɩ́ɛ́ a cɩ́ŋwɔ́ mɛ́;
Ɓa wɩ bɩrɛ ko Nyuutɩna Wɩɩsɛ, ɓa Wɩɩsɛ rɩ́,
arɩ́ ɛ́ má wuu, ɓa wʋ́ʋ́ jɛ́ɛ́.
11 Ɩfɩrayɩŋ nɩɛ nɩhɛ̃́ kuókʋ́ma ná há wɩ wɩ́ɛ́ ɛ̃ nɛ́, a wɩ wɩ́zɩmɛ kené;
ɓa yɩrɔ́ hé Ezipiti mí rʋ́ʋ́ ko sáŋwɔ́ mɛ́,
ɓa mʋ́ Asiiri aá ja sáŋɛ.
12 Amá tɛ́ŋ ná mɛ́ ɓa haá mʋ́ ráŋ,
ŋ sɩ́ yóŋ fííle tɔ́wɔ́ mɛ́,
a kɛ́sɩ́wɔ́ anɛ bána nyúú rí diíwíísi;
Ŋ sɩ́ tʋ́rwɔ́, anɛ ɛ́ ná ŋ fa há lá sɩ́ɛ́ bʋl pɔ́wɔ́ ɓa nɩɛ sɩɛrʋ.
13 Nyúbɔ́ŋ péríwó!
ɓa há fɛ́ɛ́ kɛ́kɩ́ŋ mɛ́ wɩ́ɛ́!
Zɔ́krʋ púwó!
ɓa há ísé cɩ́nɩ́ŋ mɛ́ wɩ́ɛ́!
Káŋ nɛ́ faá já rɩ́ŋ lɔ́wɔ́ a tá,
ká ɓa nyɛ nyɩɛnnɛ aá héŋ mí.
14 Ɓa wɩ búŋsé aá héŋ mí rɩ́wɔ́ sɩɛnnɛ wuu;
amá ɓa há pɩŋwɔ́ gódówa daha aá hĩĩni ɛ́,
aá kʋ́sɩ́wɔ́ tɛ́ŋ kɛnnɛ ɛ́, bile rɩ́ dɩvɛ́ŋfɛlɛ nɛ́ ɓaá ja,
ká ɓa sɩɛnnɛ kɛ́kɩ́ŋ mɛ́.
15 Ŋ nɛ́ fa cáánɩ́wɔ́,
ŋ nɛ́ fa pɔ́wɔ́ dóé;
ɓa nɩhɛ̃́ tuó há zɔ́kɛ́ nɛ́,
tókowí ní sɩ́ ɓʋ́ʋ́sɩ́wɔ́ kuóre,
a tɩ́ŋwɔ́ wɩ́bʋltɩɛnnɛ ná wɩ́ɛ́.
Óŋ ná há tɛ́ rɩ́wɔ́ mɔ́ŋwɔ́ Ezipiti mí ní ɛ́.