Nɛrɔ ná há dú poo ʋ́ʋ́ kʋ́ŋ duopoo ní
8
1 Mu nyɩ́la a bʋl pɔ́wɔ́!Wɩɩla nɛ́ nyɩ́ɩ́rɛ aá ko Nyuutɩna Wɩɩsɛ jaa mɛ́, anɛ ɛ́ kiési há nyɩ́ɩ́rɛ́ aá ko,
bee wɩ́ɛ́, ɓa zɔ́kɩ́ŋ nʋtʋmɛ́ ná,
ká vɛ́ rɩ́wɔ́ tɩ́ŋɩ́ŋ wɩ́bilé ná.
2 Ɓa sɩ́ cáási héŋ mí a bʋlɛ́:
Ŋ Wɩɩsɛ! Amá á é Ɩzɩrayɛl nɩɛ, á ɩɩ̃́ !
3 Ɩzɩrayɛl nɩɛ vɛ́ wérí ɛɛ tá,
dɩŋdɔmɔ sɩ́ kír tɩ́ŋwɔ́ mɛ́.
4 Ɓa wɩ́ŋ bɔ́sɛ́,
ká tɩɩ nɛ́ bɛ́llɛ lɩ́sɩ́wɔ́ kuóre,
arɩ́ sɩ́dííre káŋ wɩ ɛ́ mɛ́ ɛ̃.
Ɓa píwó meéwie arɩ́wɔ́ salmɛ
a cʋ́ɔ́rɛ venni,
ŋmɛ́nɔ ná há sɩ́ caasɛ tɛ́lwɔ́ nɛ́ ɛ́.
5 Samari nɩɛ, ŋ vɛ́ɩ́wa nɔwie tá!
Ŋ cɔ́ɛ́ ísíwa nyúú,
tɛ́ŋ bee mí rí, rɩ́ɩ́wa táŋ mɛ́ aá zɔ́kɛ́?
6 Ɩ́ nɔwie ná lɛ́ Ɩzɩrayɛl nɛ́,
lukro nɛ́ cʋ́ɔ́rʋ́,
ʋ to wɩɩsɛ tɩɩ!
Ɛ́ nɛ́ tɛ, ɓa sɩ́ búksi Samari nɩɛ nɔwie ná búkébúké.
7 Ɓa sɩɛ́ há dú poo,
duopoo ní rɩ́wɔ́ kʋ́ŋ,
ɓa wɩ bilé sikel balá maá ná,
ɓa ná há sɩ́ nyʋ́wɔ́ tɩɩ mɛ́ wɩ nyunni ka,
rɩ́ ɓa nɛ́ kéŋ nyunni má,
nɩhʋɔra nɛ́ sɩ́ díwó.
8 Ɩzɩrayɛl nɩɛ zʋ́ɔ́ líŋ,
duowa sɩɛrʋ,
a bɩrmɛ́ oŋyɔ́ɔ́wa, nɛ́ŋ báá há wʋ́ɔ́ já.
9 Bee wɩ́ɛ́, ɓa mʋ́ Asiiri aá ja sáŋɛ́.
Baka kokúme gʋ́ɔ́rʋ́ dʋŋɔ nɛ́,
amá Ɩfɩrayɩŋ nɩɛ yɛ́lɩ́wɔ́ tɩɩ a pɔ́wɔ́ boŋzome.
10 Arɩ́wɔ́ há yɛ́llɩ́wɔ́ tɩɩ pá duhʋ́ɔ́ra,
mʋ́l néé mí, ŋ sɩ́ a rɩ́wɔ́ hé náŋá mɛ́,
rɩ́wɔ́ dí wɩɩla rɛɛ́ rɩ́ mʋɔ́,
kuóre nɔhɔ̃ há ká Asiiri kuóro nɛ́sɛ mɛ́.
11 Ɩfɩrayɩŋ nɩɛ má korsi ɓɩkana, rɩ́wɔ́ ɔsɛ vʋka,
ɛ́ korsi ɔ́ɔ́ ɓa ɔsɛ aá tʋŋ bɔ́ŋbɔ́ŋ.
12 Rɩ́ŋ nɛ́ pʋ́ŋsɩ́ŋ wɩ́bilé ná sɩɛrʋ wɩ́wɩɛla wuu pɔ́wɔ́ má,
ɓa de nɛ̃ wɩ́hʋɔra nɛ́ ɓa sɩ́ɛ́ mɛ́.
13 Ɓa ɓʋ́ʋ́sɛ pʋsɛ a ɔsɛ vʋka aá páŋ,
káá díwó namɩŋsa:
Nyuutɩna Wɩɩsɛ wʋ́ɔ́ la.
Mʋ́l néé mí, ʋ líísíwó wɩ́bɔma wɩ́ɛ́,
ʋ sɩ́ a rɩ́wɔ́ dí wɩɩla ɓa wɩ́bɔma ná wɩ́ɛ́:
Ɓa sɩ́ bɩr mʋ́ Ezipiti.
14 Ɩzɩrayɛl nɩɛ sʋ́llɩ́wɔ́ mɩ́máárʋ́ wɩ́ɛ́,
ká sɔ kuójɩɩsɛ pɔ́wɔ́ tɩɩ.
Ziida nɩɛ sɔ́ tɔ́sɔ́kɛ́rɛ ɓɩkana.
Ɛ́ nɛ́ tɛ, ŋ sɩ́ hé níŋ ɓa tɔ́nɛ ná mɛ́,
rʋ́ʋ́ díwó jɩwere ná.