Botoro nyúú mí wɩ́náálɛ: Báálɔ há sú gɛpuwɩɛlɩ́wie gɛrɔ
10
1 Pɛrsɛ kuóro Sirisi kuorí dí bɩŋsɛ botoro nyúú mí, Danɩɛl ná ɓa háá yɩrɛ Bɛltazaarɛ nɛ Wɩɩsɛ liŋó. Ɛ́ liŋó sɩɛ́ fa ká táŋa rɛ́, aá bʋl wɩ́halazeŋsi wɩ́ɛ́. Danɩɛl há nɛ́ ɛ́ liŋó, ʋ jɔ́ʋ́ a zɩ́mʋ́ mʋ́l a tɩŋ wɩ́náálɛ mɛ́.2 Ɛ́ tɛ́ŋ mɛ́, ŋ é Danɩɛl a tápʋ́lɛ mɛrɛ́ rɩ́ oro sazɔkɔ́ sɩɛrʋ. 3 Ŋ wɩ ɓɩdíwérí díé, ŋ wɩ namɩ́ɛ́ díé, a wɩ dɩvɛ́ŋ má nyɔ́ɛ́, ká vɛ́ŋ nyúpʋsɛ má tá, a kaa já tápʋlɛ́ mɛrɛ́ rɩ́ oro ná. 4 Dʋ́ŋdʋʋ̃́ cana tápʋlɛ mɛrɛ́ rɩ́ baná kal, rɩŋ fa mɩŋ Tiigɩrɛ fozeno nʋɔ. 5 Róŋ ní ŋ bel ná nɛrɔ há sú gɛpúwɩɛlɩ́wie gɛrɔ, a vɔwɛ Ufaazɛ salmɛ báltɛ ʋ tɩŋa mɛ́. 6 Ʋ tɛŋ fa nɩhɩ̃́ dɔ́wɩ́tʋlɩ́ nɛ́, kɔ́ʋ́ sɩ́paanɛ́ tʋ́tʋl a nɛ nyiiló. Ʋ sɩ́ɛ́ tʋlɛ́ nɩhɩ̃́ níŋkáŋtɔrɔ nɛ́, kɔ́ʋ́ naasɛ rɩ́rʋ́ vaŋsɛ má tʋ́tʋ́l a nɛ kɔmɔ́ cʋɔrɩ́. Ʋ liŋó nɩhɩ̃́ nɩkaná liŋsi ní. 7 Ŋ é Danɩɛl dʋŋɔ nɛ́ fa ná ɛ́ nɩbííno, ká nɩɛ ná há kílíŋ wɩ óŋ wuu néé ká héwíŋ dʋŋɔ nɛ́ káŋwɔ́, ɓa fa féŋsi. 8 Ká táŋ dʋŋɔ róŋ, ŋ bíbel ɛ́ oŋbermi. Ŋ dóé ko tenni, ŋ sɩ́ɛ́ bɔl ká pi aá biri, ŋ tɛŋ polé wuu pii gbɛ́llɛ. 9 Ɛ́ nɛ́ káŋ nɛ́ báálɔ ná háá bʋl wɩ́ɛ́. Ŋ há nʋ́ʋ́ liŋó ná ɛ́, ŋ váklɔ́ a ɓal a kánɩ́ŋ sɩ́ɛ́ cú tíé, a pílli. 10 Ɛ́ nɛ́ nɛ́sɛ ko tɩ́kɩ́ŋ mɛ́, a ŋ isi ɓírmíŋ neɓííne mí, a cíkíŋ nɛ́ŋsa tíé mí, káá váklɛ. 11 Ká báálɔ ná bʋlíŋ rɩ́ bʋlɛ́: “Danɩɛl, Wɩɩsɛ cóí, hé dóé, a zɩŋ wɩ́ɛ́ nyáŋ mʋ́ʋ́la, ŋ há sɩ́ bʋl a pɛ́ɩ́. Isí cɩ́nɩ́ dɩcɩnɛ́, beé wɩ́ɛ́, ɩ rɩ́ɩ́ nɛ́ ɓa tʋ́mɩ́ŋ mʋ́l né mí.” Ŋ há nɛ ɛ́, ŋ ísó cɛ́ daha kaá váklɛ. 12 Ʋ baa bʋlɩ́ŋ rɩ́ bʋlɛ́: “Danɩɛl, sɩ́ ló rɩ́ héwɩ́ŋ kánɩ́! Ɩ múúrí tɩɩ Wɩɩsɛ sɩ́ɛ́, a sʋl zɩmɛ́ rɩ́ɩ́ fa zɩŋ wɩ́ɛ́ ná mʋ́ʋ́la. Wɩɩsɛ sɩɛ́ nɩ́ɩ́ wɩ́sʋlɔ́ rɛ́ dʋ́ŋdʋ́ʋ̃́ tápʋ́l mɛ́, ɛ́ nɛ́ ŋ ká liŋó ko rɩ́ŋ pɛ́ɩ́. 13 Amá malɩ́ka ná háá pɔ́ Pɛrsɛ dɩtɩ́llɛ mɛ́, isó cɩ́nɩ́ŋ mɛ́ tápʋlɛ́ mɛrɛ́ arɩ́ oro. Malɩ́kawa nɔhɔ̃́ Mɩsɛl nɛ́ pɛ́ŋ mɛ́. Ɛ́ mɛ́ nɛ́ ŋ sɩɛ́ káánɛ Pɛrsɛ kuóre laka. 14 Ɛ́ wɩ́ɛ́ mʋ́l né mí, ŋ́ ko rɩ́ŋ bʋl pɛ́ɩ́ rɩ́ɩ́ zɩŋ wɩ́ɛ́ ná cíé há sɩ́ pérí nɩɛ ná, beé wɩ́ɛ́ ná wɩ́náálɛ nɔ́ŋɔ báá haá bʋl ɛ́ tɛ́ŋ wɩ́ɛ́.”
15 Tɛ́ŋ ná mɛ́ ʋ háá bʋlɩ́ŋ rɩ́, ŋ sɩ́ɛ́ curi tíé, a ŋ wɩ wóllé bʋl wɩ́ɩ́ wuu. 16 Amá ŋ ná omo há nɩhɩ̃́ nɩbííno, há kúé tɩ́kɩ́ŋ nʋkɛnnɛ mɛ́. Ŋ sɩɛ́ baa wólli wúríŋ nʋɔ, aá bʋl wɩ́ɛ́. Ɛ́ nɛ́ ŋ bʋl nɛrɔ ná fa há cɩ́nɩ́ŋ sɩ́ɛ́ rɩ́, a bʋlɛ́: “Ŋ Nyuutɩna, wɩ́náálɛ ná wɩ́ɛ́, ŋ sɩɛrʋ zɔ́kɔ́, ŋ baá wɩ dóé má tɩɩ kené. 17 Ɛ́ rɛ́ɛ́ rɛ́, ŋ é, nyúútɩna tʋtʋnnɔ né nɔ́ŋɔ,há wɩ hiẽ́só rɩ́ dóé má tɩɩ kené, sɩ́ wólli bʋ́lɩ́ŋ ŋnyúútɩna rɩ́?” 18 Ɛ́ nɛ́ nɛrɔ ná há nɩhɩ̃́ nɩbííno baa ko kɩ́kɛ́lɛ́ a tɩ́kɩ́ŋ mɛ́, a duóríŋ naasɛ, 19 ká bʋ́lɩ́ŋ rɩ́ bʋlɛ́: “Wɩɩsɛ nɩcólli tɩɩ, sɩ́ ló rɩ́ héwíŋ kánɩ́! Rɩ tɛŋfɩ́ɛ́l pérí! Táŋa ɓáŋɩ́ baŋcɩla, a cɩ́ géŋgéŋ! Ʋ háá bʋ́lɩ́ŋ rɩ́ ɛ́, rɩ́ŋ naasɛ dúóró. Ɛ́ nɛ́ ŋ bʋ́lʋ́ rɩ́ a bʋlɛ́: “Ŋ Nyuutɩna, ɩ wóŋ rɩ́ aá bʋl, beé wɩ́ɛ́ ɩ páŋ dóé.” 20 Ɛ́ nɛ́ ʋ bʋ́lɩ́ŋ rɩ́ a bʋlɛ́: «Ɩ ɛ̃́ wɩ́ɩ́ ná ŋ há kéné kóé rí rɛ́? Mʋ́l néé mí, ŋ kóú rɩ́ŋ yo Pɛrsɛ nɔhɔ̃́ nɛ́, rɩ́ŋ nɛ́ sɩɛ́ bɩ́rɛ́cól, Gɩrsɛ nɔhɔ̃́ má sɩ́ ko. 21 Amá ŋŋ́ ja rɩ́ŋ bʋl pɛ́ɩ́, rɩ́ɩ́ zɩŋ wɩ́ɩ́ ná há pʋ́ŋsɛ táŋa kɛnɔ ná mɛ́ nɛ́. Nɛ́ŋ wɩ́ŋ mɛ́ pɛ́ a yo ɛ́ dɩ́ŋdɔma, rʋ́ʋ́ nɛ́ too Ɩzɩrayɛl lalyoore kuóro Mɩsɛl, malɩ́kawa nɔhɔ̃́.