Wɩɩsɛ píŋ ná Ezekiyɛl há la sɩ́ɛ́ a ná
1
1 Ezekiyɛl bɩŋsɛ mɛrɛ́ rɩ́ fí nyúú mí, cáŋsɛ baná mɛ́, tapʋ́lɛ bɔmmʋɔ kal, ŋ fa mɩŋ lalnɩ́kɛsɛ sɩɛrʋ nɛ́, Kebarɛ polo nʋɔ. Bána wuri, kaŋ ná Wɩɩsɛ sabɩɩna wɩ́ɛ́. 2 Ɓa há kéŋ Kuóro Zʋɔkimi kaá mʋ́ yomi Babɩlɔnɛ mɛ́ bɩŋsɛ bɔmmʋɔ nyúú mí, cana tapʋlɛ bɔmmʋɔ kal, 3 Nyuutɩna Wɩɩsɛ liŋó bʋ́l vʋ́k'ɔɔsɔ Buzi bio Ezekiyɛl rɩ́, Babɩlɔnɛ tɔ́ɔ́ mɛ́, Kebarɛ polo nʋɔ. Róŋ nɩ́ Nyuutɩna sabɩɩna dóé tuwú nyúú. 4 Ŋ há belé, ŋ ná Poozeno há lɛ́ wɩɩsɛ dɩ́zʋʋlɩ́ nɛ́gʋɔ rɩ́, a yikí duóbána há keŋ pʋmmɔ, aa ko. Ʋ sɩɛrʋ wuu fa dee tʋ́l nɩŋ nɩ́. 5 Ʋ sɩsɩɛnnʋwa ŋ ná onni baná, ɓa sɩ́ɛ́ há nɩhɛ̃́ nibííne. 6 Ɓa oro wuu fa keŋ sɩ́ɛ́ banáwa, rɩ́ kɩ́ŋkeru banáwa. 7 Ɓa naŋdaasɛ fa ka terkewa, ka ɓa nacɛ́sɛ má nɛ̃ nɔwie nacɩksɛ nɛ́ aá tʋ́l anɛ́ kɔmɔ cʋɔrɩ́. 8 Ɓa oro wuu kɩŋkeru ná baná mʋ́l, nɩbííno nɛ́sɛ nɛ́ fa mɩŋ róŋ. Nɛŋsa ná baná, rɩ́wɔ́ sɩ́ɛ́, arɩ́wɔ́ kɩŋkeru wuu nɛ́ cɛ́ cáásɛ naŋá. 9 Ɓa kɩŋkeru nʋʋsɛ mʋ́ tɩkɛ naŋá mɛ́, ɓa nɛ́ isé rɩ́wɔ́ va oro wuu cáásʋ́ sɩ́ɛ́ terké. 10 Oŋwómme ná baná, oro wuu sɩpaanɛ nɩhɛ̃ nɩbííno sɩpaanɛ nɛ́. Ɓa baná ná oro wuu fa keŋ kɩŋkána sɩpaanɛ neduú rɩ́, nɔɓalla sɩpaanɛ nɛ́gʋɔ rɩ́, arɩ́ kiési sɩpaanɛ ʋ hari. 11 Ɓa sɩ́paanɛ nɛ́ nyɛ́. Ɓa oro wuu kɩŋkeru bɛllɛ cáásɛ nyúúrí a mʋ́ tɩ́kɛ́ naŋá mɛ́, ká ka bɛllɛ ná naŋá tɔ́wɔ́ tɩɩ mɛ́. 12 Oro wuu cáásʋ́ sɩ́ɛ́ aá mʋ́. Ɓa oro wuu mʋ́ ráŋ ná poo há kénʋ́ aá mʋ́ nɛ́; ká ɓa oro wuu ʋ tɩɩ kené aá bɩrɛ. 13 Óŋwommé ná fa de nɛ̃ nɩŋhala haá tʋlɛ nɛ́. Ɛ nɩŋhala fa mɩŋwɔ́ sɩsɩɛnnɛwa nɛ́, ʋ pʋmmɔ lɩ waalɛ́ dɩhɩ̃́ wuu, ká nɩŋɓɛdʋŋsɛ lɩlʋʋ́ mɛ́. 14 Óŋwommé ná mʋ́ɩ́ rɩ́wɔ́ bɩrɛ kué, lʋmɔ́, a nɛ́ duófɩllɔ. 15 Ŋ há bél óŋwommé ná cúrútútú, ɓa oro wuu fa kéŋ naa há nɛhɛ̃ lɔɔlɛ naa a tuwi aá tɩkɛ tié. 16 Naasɛ ná faa tʋ́lʋ́ a nɛ́ dɔ́wɩ́were ná ɓa há yɩrɛ firzoriti. Ɓa wuu baná fa nɩhɛ̃́ naŋá, anɛ́ ɓa lɛ́sɛ naŋá. 17 Ɓa tɩ́ŋwɔ́ cɔ́rɛ ná baná aa va kaa wáá bɩrɛ. 18 Ɓa naasɛ baná ná záŋtɛwa fa gbeso werí, a ka hewɩŋ. Záŋtɛwa lʋ́ŋlɔŋsɛ baná ná wuu mɩ́ sɩ́ɛ́ cɔ́ ráŋ. Ká sɩ́ɛ́ mɩŋwɔ́ kilo wuu. 19 Rɩ́ óŋwommé ná nɩ́ɩ́ valɛ́, naasɛ ná má tɩ́ŋwɔ́ mɛ́; rɩ́wɔ́ nɛ́ ise aá zɛ́ bána, naasɛ ná má tɩ́ŋ zɛ́. 20 Ɓaá mʋ́ ráŋ ná poo há kéŋwó aá mʋ nɛ́, naasɛ ná má tɩ́ŋwɔ́ mɛ́ aá mʋ́. Bee wɩ́ɛ́, oŋwomme ná doé nɛ́ keŋ naasɛ ná aá bɩrɛ. 21 Ɛ́ wɩ́ɛ́, tɛ́ŋ wuu mí, rɩ́ oŋwomme níí valɛ́, rɩ́ɩ́ ɓa cɩ́nɔ́, rɩ́ɩ́ ɓa iso fil zɛ́ bána rɩ́; naasɛ ná má tɩ́ŋwɔ́ mɛ́. Bee wɩ́ɛ́, oŋwommé ná dóé nɛ́ kéŋwó aa va.22 Oŋwommé ná nyúúrí óŋ rɩ́ zaaríwó mí aá tʋ́l cuoli anɛ́ nyiilo. 23 Oŋzaari ná mʋ́l, oŋwommé ná oro wuu kíŋkeru bɛllɛ tɩɛnnɔ terke, a mʋ́ aá tɩkɛ naŋá ɓɩɛ mɛ́. Ka bɛllɛ ná naŋá má tɔ́wɔ́ tɛŋ mɛ́. 24 Rɩ́ ɓa nɛ́ ise rɩ́wɔ́ fíl, ŋŋ́ nɩ́wɔ́ kíŋkeru dɔ́mɛ́. Ɓa dɔmɛ́ ná nɩhɛ̃́ a nɛ́ mʋʋ nyii dɔmɛ́ nɛ́, ɛ́rá má bɩbar há ɓɛɛ, kʋɔllɛ zeno nɛ́ dɔmɛ́ anɛ́ lalyoórikáná dɔmɛ́. Óŋwommé ná nɛ́ ko cɛ́, ɓa kaŋwɔ́ kíŋkeru yʋɔkɛ nɛ́. 25 óŋzaaro ná há mɩŋwɔ́ nyúúrí dɔmɛ́ lɩ ráŋ. Rɩ́ óŋwommé ná nɛ́ kué cɛ́ ɓa káŋwɔ́ kɩ́ŋkeru yʋɔkɛ nɛ́. 26 Zaaro ná há mɩ́ŋwɔ́ nyúúrí, dɔwɩwero ɓa haá yɩrɛ safiiri há nɩhɛ̃ kuóɓasa fa sakɛ ráŋ; ká ɛ́ kuóɓasa nyúúrí omo há nɩhɛ̃ nɩbííno nɛ́ ké ráŋ. 27 Ɛ omo há nɩhɛ̃ nɩbííno a pɔ́ tɩŋá ká kaá zɩnʋ́ nyúúri faá tʋ́lʋ́ anɛ́ kɔmɔ, ká níŋ mɩ́nʋ́ kilo wuu. Ʋ tiérí nɩhɛ̃ nɩŋ a tʋ́l a kilú wuu. 28 Pʋmmɔ ná fa há kilú nɩhɛ̃́ duósii há mɩ́ŋ duóbásɛ sɩɛrʋ duóŋ tɩnɛ́ mɛ́ nɛ́. Ʋ tʋlɛ́ nɩhɛ̃ Nyuutɩna Wɩɩsɛ píŋ ní. Ŋ há noú, ŋ ɓalɔ a kaníŋ sɩ́ɛ́ cú tié. Ɛ́ har mɛ́, ŋ nɛ̃́ liŋó há bʋlɩ́ŋ rɩ́.