Danɩɛl wɩsʋlɔ́ wɩ́ɛ́
9
AAAAAAAAAA 1 Dʋ́ŋdʋ́ʋ̃́ bɩna na, Dariyusi há ká Asuerisi bio, a lɛ Medi, ha dí Babɩlɔ́ɔ́nɛ kuorí, 2 ʋ kuorí dʋ́ŋdʋ́ʋ̃́ bɩna mɛ́ nɛ́, ŋ é Danɩɛl karmɛ Wɩɩsɛ kɛnnɛ; a nɛ Nyuutɩna Wɩɩsɛ wɩ́bʋlɛ́ ná mʋ́l, ʋ fa há bʋ́lɛ́ pɔ́ʋ́ wɩ́laabʋllɔ Zeremi, a mʋ́ tɩɩnɛ Zerizalɛmɛ há sɩ́ a tɔ́ɓó, a kaá ja bɩŋsɛ mɛɛ́sɩbotoro rɩ́ fí (70) wɩ́ɛ́. 3 Ŋ há ná ɛ́, ŋ vɔwɛ nʋɔ, a pa sazɔkɔ gɛnnɛ sú, a bʋ́kɩ́ŋ nyúú rɩ́ tapʋmmɔ, a sɩɛ́ mʋ́ Nyuutɩna Wɩɩsɛ sɩ́ɛ́, a dú nɛ́sɛ, a sʋ́lʋ́. 4 Ŋ lá sɩɛ́ sʋl Nyuutɩna Wɩɩsɛ, ŋ Wɩɩsɛ wɩ́bɔma suúri wɩ́ɛ́ a bʋlɛ́:«Óó Nyuutɩna, Wɩɩsɛ há zénó, a mɔ́ rɩ́wɔ́ fɩ́fɛ́ɩ́; ɩ mákɩ́ nʋtʋmɛ arɩ́rɩ́ nɩcɩ́tɩkɔ́ a pá nɩɛ ná há cóí, kaá tɩ́ŋɩ́ kɩ́ŋse ná. 5 Á tʋ́ŋ dɩlhɔ́ɔ́, á tʋŋ wɩ́bɔmɔ, á nɛ́ tɛ zɔkrʋ, á bɩ́r rá har tɛ́ɩ́, á vɛ́ɩ́ wɩ́makɛ́ rɩ́rɩ́ kiŋse tɩŋɛ́. 6 Á vɔ́ɔ́, á wɩ́ɩ́ tʋtʋnna ná há kɛ́ɩ́ wɩ́laabʋlla nʋɔ wɩ́ɛ́ ná ɓa há bʋlɛ́ párá kuóre, á nyúútɩ́náwa, a naabálwa arɩ́ jamáŋ ná wuu sáŋɛ́. 7 Nyuutɩna, ɩ é kéŋ taŋá! Á é Zerizalɛmɛ nɩɛ, Ziida nɩɛ, rɩ́ Ɩzɩrayɛl nɩɛ wuu, arɩ́wɔ́ ná wuu há ɛ́ɛ́ zɔkɩ́ mɛ́, ɩ a ɓa pɩsɛ a mʋ́ mɩŋ tɔ́nnɛ dɩtɛ́sɩ́wa rɩ́ dɩbole, zaa, hɩɩ̃sɛ kéŋ rá wuu, á curi nyúú ɩ sɩ́ɛ́, beé wɩ́ɛ́ ɓa wɩ́'állɛ tó tékétéké ɩ sɩ́ɛ́ mɛ́. 8 Óo Nyuutɩna Wɩɩsɛ, arɩ́rá naabálwa rɩ́rá kuóre rɩ́rá sɩdííre hɩ̃́ɩ̃́sɛ kéŋ rá, beé wɩ́ɛ́ á wɩ́ɩ́ nʋɔ sáŋɛ́. 9 Amá, Nyuutɩna, á Wɩɩsɛ ɩ susufar sɩɛrʋ, ɩ hé rá suúri, beé wɩ́ɛ́ a tʋ́ŋ dɩlhɔ́ɔ́ ɩ mɛ́. 10 Ɩ fa bʋlɔ́ párá, rá zizíli wɩ́maŋsɛ ná ɩ há tɩŋɩ́ tʋtʋnna ná há kɛ́ɩ́ wɩ́laabʋlla mɛ́, a bʋl a párá, amá á wɩ́ɩ́ rɩ́ zesé. 11 Ɩzɩrayɛl nɩɛ wuu a dɩlhɔ́ɔ́, a vɛ́ɩ́ wɩ́bilé ná tɩ́ŋɛ́. Ɓa wuu kéŋwó tɩɩ kɛ́kɩ́ mɛ́, rɩ́wɔ́ sɩ́ɩ́ wɩ́makɛ́ ná zesú. Á Wɩɩsɛ, á ɔ́ɔ́ zɔkɩ́ mɛ́. Ɛ́ nɛ́ tɛ bʋra ná há mɩnɩ́ tʋtʋnnɔ Moyisi kíŋse kɛnɔ sɩɛrʋ dírá. 12 Ɩ ɔ́ɔ́, ɩ wɩ́bʋlɛ́ ná ɩ fa há bʋlɛ́ cɩ́ŋrá rɩ́rá sɩdííre mɛ́ nʋɔ sú. Ɩ ɔ́ɔ́ Zerizalɛmɛ mɛ́, á vɔkɛ wɩ́hala ná á há há wʋ́ɔ́ duó néé ná tíé nyúú dɩhɩ̃́ oro wuu. 13 Anɛ ɛ́ Moyisi wɩ́bile kɛnɔ há máŋsɛ bʋra ná wɩ́ɛ́, ɓa wuu dí rá. Ká á wɩ nɛ́sɛ dúé ɩ sɩ́ɛ́ Nyuutɩna Wɩɩsɛ, á Wɩɩsɛ, rɩ́ɩ́ cɔ́ɔ́ɛ́ pɔrɛ, ká vɛ́ rá fa kɛ́kɩ́rá wɩ́bɔma mɛ́. Á wɩ bɩ́ɩ́nɛ, rɩ há sʋ́ʋ́ ná, ɩ́ɩ́ tʋ́mʋ́. 14 Ɛ́ nɛ́ tɛ ɩ ló bʋrawa nyáŋ wuu dí rá. Beé wɩ́ɛ́, Nyuutɩna Wɩɩsɛ, á Wɩɩsɛ ɩ é wɩ́'állɛ wuu ká táŋa, amá á vɛ́ɩ́ wɩ́máŋsɛ tɩ́ŋɛ́.
15 «Nyuutɩna, á Wɩɩsɛ, a kaa ko aá lɛ zaa ɩ yɩr lɩ́ɔ́ weri, a tɩ́ŋ jamáŋ ná ɩ há lɩ́sɛ Ezipiti mí ɩ vádóé mí; ká arɩ́ ɛ́ wuu, á wɩ́ɩ́ nʋɔ sáŋɛ́, ká tʋŋ bɔ́ŋbɔ́ŋ. 16 Nyuutɩna, á wɩ́bɔma arɩ́rá naabálwa wɩ́zɔkɛ́ wɩ́ɛ́ ɔ́ɔ́, duówa ná wuu há kílrá tʋtʋksɛ Zerizalɛmɛ, arɩrɩɩ nɩɛ. Ɛ́ wɩ́ɛ́, Nyuutɩna, a tɩŋɩ́ há ká tékétéké ná yɩr mɛ́, ló rɩ́ɩ́ cɔ́ɔ́ɛ́ pɔrɛ ɩ tɔ́ɔ́ Zerizalɛmɛ, ɩ paalɩwéró ná nyúú. 17 Ɛ́ wɩ́ɛ́ mʋ́l né mí, á Wɩɩsɛ zésíŋ sʋlɛ́ arɩ́rɩ́ŋ jɛ́nnɛ́. Nyuutɩna, ɩ tɩɩ yɩr mɛ́, bélí dɩmɩnɩ́ ná há zɔkɛ́ arɩ́ sawér. 18 Ŋ Wɩɩsɛ, ɓílí dɩllɛ weri a zesi nɛ. Wúrí sɩ́ɛ́, a ná rá tɔ́ɔ́ né há kɛ́ɩ́ tɔ́ɔ́ há zɔkɛ́ ɛ́, a a tɔ́ɓóó. Áá sʋ́lɩ́ rɛ́, bélí cóllizeno ná, á é wɩ́were yɩr mɛ́ rá á kaá sʋ́l. 19 Nyuutɩna, ɓílí dɩllɛ zésírá wɩsʋlɔ́! Nyuutɩna, hé rá suúri! Nyuutɩna, zesi wérí! Ŋ Wɩɩsɛ, ɩ tɩɩ yɩr mɛ́ tʋŋ kɩ́kɛ́lɛ, a lá tɔ́ɔ́ né rɩ́rʋ́ jamáŋ há kɛ́ɩ́ tɩ́llɛ́ a tá.»
Bɩŋsɛ mɛɛ́sɩbotoro rɩ́ fí wɩ́ɛ́
20 «Ŋ há mɩŋ wɩ́sʋlɔ́ mɛ, a cesíŋ wɩ́bɔma arɩ́rɩ́ŋ jámáŋ Ɩzɩrayɛl wɩ́bɔma, a jɛnnɛ Nyuutɩna, ŋ Wɩɩsɛ ʋ paalɩwéró ná wɩ́ɛ́. 21 Ŋ wɩ́sʋlɔ́ ná tɛ́ŋ mɛ́, ŋ ná malɩ́ka Gabɩrɩyɛl ná ŋ fa há la sɩ́ɛ́ a ná, ŋ wɩ́muulináálɔ ná mɛ́, ʋ fil rɩ́ dóé a kóŋ rɩ́. Gbaanɛ vʋ́k'ɔsɔ́ tɛ́ŋ mɛ́ nɛ́ fa. 22 Ʋ máŋsɛ wɩ́ɛ́ páŋ a bʋlɛ́: “Danɩɛl, mʋ́l né mí ŋ ko rɩ́ŋ pɛ́ɩ́ wɩ́zɩmɛ́ ní. 23 Ɩ há púlé aá sʋ́l Wɩɩsɛ, ʋ bʋl wɩ́ɩ́ rɛ́, ŋ sɩɛ́ kúó rɩ́ŋ bʋlʋ́ há sʋ́ʋ́ ná nɛ́ a pɛ́ɩ́, beé wɩ́ɛ́ Wɩɩsɛ cóí. Ɛ́ wɩ́ɛ́, zesi nɛ ɛ́ wɩ́ɩ́, a zɩŋ wɩ́náálɛ ná mʋ́l. 24 Bɩŋsɛ mɛɛ́sɩbotoro rɩ́ fí ní,
ɓa fa pɛ́ɩ́ nɩɛ arɩ́ tɔ́ɔ́ ná há ká Wɩɩsɛ tɩ́llɛ,
a makɛ rɩ́ bɔ́ŋbɔ́ŋ tenni, rɩ busunnu báá sɩ́ mɩ́nʋ́,
ká rɩ́wɔ́ ná wɩ́bɔma má suúri, a makɛ rɩ́ Wɩɩsɛ taŋá ná há ká dɩŋɛ́ nyɩɩsɛ,
rɩ wɩ́náálɛ rɩ́ wɩlaabʋlla wɩ́bʋlɛ́ nʋɔ sú, ká rɩ́ Wɩɩsɛ baa ɔsɛ tɩ́llʋ́ dʋŋɔ dɩmɩnɩ́ ná. 25 Ɩ sɩɛ́ mɔhɔ̃́ rɩ́ zɩŋ wɩ́ɩ́ né, a nʋ́ʋ́ mʋ́l: A pɔ́ tɛ́ŋ ná mɛ́ liŋó ná fa há bʋ́l nɩkɛsɛ́ bɩrkóé arɩ Zerizalɛmɛ bɩrsɔ́ɛ́ wɩ́ɛ́, a kaa mʋ́ peri kuóro ná Wɩɩsɛ há sɩ́ lɩsɛ a bíl, ʋ sɩ́ a bɩŋsɛ mɛɛ́sɩbotoro arɩ́ fí. Ɛ́ har mɛ́, bɩŋsɛ mɛɛ́sɩbotoro arɩ́ bɛllɛ pɛ́kɛ, ceŋsi dɩhɩ̃́ arɩ́ butuonni sɩ́ bɩrsɔ́, amá ɛ́ tɛ́ŋ sɩ́ a sazɔkɔ́ tɛ́ŋ. 26 Bɩŋsɛ mɛɛ́sɩ́botoro rɩ́ bɛllɛ ná har mɛ́, ɓa sɩ́ ɓʋ́ Wɩɩsɛ nɩlɩ́sɛ oro, ká rɩ́ nɛ́ŋ sɩ́ mɩ́nʋ́ rɩ́ɩ́ yóú lal. Ʋ har mɛ́ nɛ́ rɩ́ kuóro oro rɩ́rʋ́ lalyoore ko zɔkɛ tɔ́ɔ́ ná rɩ́ Wɩɩsɛ jaa ná wuu; amá Wɩɩsɛ sɩ́ dúú cɔwɩɩlɔ́ ɛ́ kuóro nyúú. Ká rʋ́ zɩŋ sʋwɛ, ʋ sɩ́ yo lal a zɔkɛ zɔ́krʋ́ kɩ́ŋkáŋ a nɛ ɛ́ ɓa há bʋ́lɛ́. 27 Hatɩ́ŋnɛ́ bɩŋsɛ balpɛ ná nʋɔ mɛ́, ʋ sɩ́ fɩkɛ nɩɛ ɓɩkana mɛ́ rɩ́wɔ́ tʋ́mʋ́ ná ɓa há waá já. Bɩŋsɛ botoro rɩ́ fa nʋɔ har mɛ́, ʋ sɩ́ a rɩ́wɔ́ báá sɩ́ vʋka rɩ́ pállɛ ɔ́sɩ́ pá Wɩɩsɛ. Ɛ́ nɩbɔmɔ sɩ́ tʋ́mʋ́ wɩ́tɩɛnnɛ kɩ́kɛ́lɛ́, a kaá jɔ́ʋ́ tɩɩ tɛ́ŋ zɔkɩ́, anɛ ɛ́ há bílú mí.”»