Bʋllɛ nyúú mí wɩ́náálɛ: Peɓala rɩ́ bʋŋgboko
8
1 Kuóro Baltazaarɛ kuorí bɩŋsɛ botoro nyúú mí ní, ŋ é Danɩɛl báá ná wɩ́náálɛ nɔ́ŋɔ, ʋ ná har mɛ́. 2 Nóú ná ŋ há néé: Ŋ wɩ́náálɛ sɩɛrʋ, ŋ nóú rɩŋ fa mɩ́ŋ Ɩlamɛ pʋ́rvɛ́ŋsɛ kuótɔ́ɔ́ Suzi mí, Ulayi fuo nʋɔ. 3 Tɛ́ŋ ná mɛ́ ŋ háá belé, ŋ ná peɓala há kéŋ nyɩ́lgbórú bɛllɛ, a cɛ́ polo ná nʋɔ; ámá nɔŋɔ gbési fa kɛ nɔŋɔ, ʋ ná há tɩŋ har nyʋ́ nɛ́ fá gbese. 4 Ɛ́ nɛ́ káŋ ná peɓala ná, ʋ kenú nyɩ́sɛ aá yɩ́ɩ́sɛ wɩɩsɛ dɩzʋʋlɩ́ rɩ́, rɩ́ wɩɩsɛ dɩpomí nɛ́gʋ́ɔ́ rɩ́, arɩ́ wɩɩsɛ dɩpomí néduu rɩ́ cɔ́ɔ́, ká pʋna wuu toó a wóllú; nɛ́ŋ má toó aá fórú nɛ́sɛ mɛ́. Ʋ fa há cóú ná nʋ́ʋ́ ɩ́'a, kɔ́ʋ́ dóé súsúúri.5 Ŋ há mɩŋ ráŋ aá bɩɩnɛ ɛ́ wɩ́ɛ́, rɩŋ báá ná bʋŋgboko há kéŋ nyɩ́lpérí ʋ sɩ́ɛ́ pɛ́kɛ rʋʋ lɛ́ wɩɩsɛ dɩzʋʋlɩ́ rɩ́ cɔ́ɔ́, a fa kíl tíé wuu kɔ́ʋ́ naa wɩ tíé tɩ́kɛ́. 6 Ʋ mʋ́ peɓala ná ŋ fa há né polo nʋɔ rʋʋ kéŋ nyɩ́sɛ bɛllɛ, a nyɩɩrɛ a mʋ́ʋ́ mɛ́ rɩ́rʋ́ dóé wuu. 7 Ŋ nóú rʋʋ pérí peɓala ná, arɩ́ cɔɔwɩɩlɔ́, a yákʋ́, a bónnú nyɩ́sɛ ná bɛllɛ, ká peɓala ná wɩ dóé kené rʋ́ʋ́ yoo lɔ́ʋ́ tɩɩ. Ʋ púú yo tíé, a nʋ́ɔ́sʋ́ ká nɛ́ŋ má tóó aá lɔ́ʋ́ ʋ nɛ́sɛ mɛ́. 8 Ɛ́ bʋŋgboko há wɛ́ɛ́ kɩ́ŋkáŋ, ʋ dóé ɔ́sɛ́ súúri kɩ́ŋkáŋ, ʋ nyɩ́lzeno ná bóró ká nyɩ́lpéré baná baa nyʋ́ ɛ́ dɩhɩ̃́, oro wuu caasɛ tɔ́ɔ́ lʋ́lɔ́ŋɛ rɩ́. 9 Ɛ́ nɛ́ ká, ŋ ná ɓa sɩɛrʋ nɔŋɔ há nyʋ́ nyɩ́lwie, ɛ́ nyɩ́lwie wá kɩ́ŋkáŋ a caasɛ wɩɩsɛ dɩpomí néduu, rɩ́ wɩɩsɛ dɩpomí rɩ́, arɩ́ tɔ́wero rɩ́. 10 Ʋ isi cɛ́ bána nyúú onni mí, a pɔ́sɩ́wɔ́ ɓɩkaná, rɩ́ caŋwʋllɛ má ɓɩkana a yo tíé, a nʋ́ɔ́sɩ́wɔ́. 11 Ɛ́ nyɩ́la ísó cɛ́ bána nyúú onni nyúútɩ́na má tɩɩ mɛ́, a a ɓa báá wɩ tápʋ́l wuu vʋ́k ná ɔ́sɛ́ aá pɔ́ʋ́, ká a ʋ dɩmɩnɩ́ zʋ́ busunnu. 12 Ʋ dí dóé bána nyúú onni nyúú, a zɔkɛ kál wuu vʋka ná ɓa háá ɔsɛ́, a ká táŋa bɩ́rmɛ nyɩ́ɛ́rʋ. Nyɩ́la ná yo taŋá tá tíé, kɔ́ʋ́ wɩ́'állɛ wuu cɛ́rɛ a pɔ́ʋ́.
13 Ɛ́ nɛ́ káŋ nɛ malɩ́ka háá bʋ́l wɩ́ɛ́. Malɩ́ka ná nɔ́ŋɔ bɔ́sʋ́ ná háá bʋl wɩ́ɛ́ a bʋlɛ́: «Wɩ́náálɛ nyáŋ dáánɛ́ ká tɛ́ŋ bɛ́ŋŋmɛ́ nɛ́? Tápʋ́l wuu vʋka ná ɔsɛ́ báá há tóó sɩ́ dáánɛ́ tɛ́ŋ bɛŋŋmɛ́? Taŋá ná há bɩ́rmɛ nyɩ́ɛ́rʋ aá zɔkɛ onni wuu, ʋʋ́ tenni tɛ́ŋ beé rí? Wɩɩsɛ dɩmɩnɩ́ ná arɩ́ bána nyúú onni zɔkɛ́ náá tenni tɛ́ŋ béé rí? 14 Ɛ́ nɛ́ ʋ bʋ́lɩ́ŋ rɩ́ a bʋlɛ́: «A kaá ja gbaanɛwa arɩ́ cɩcʋ́ɔ́wa bʋ́ɩ́wʋllɛ arɩ́ zɔ́ɔ́toro (2300) daarɛ́. Ɛ́ har mɛ́ nɛ́ rɩ́wɔ́ baa bɩrmɛ Wɩɩsɛ dɩmɩnɩ́ ná.»
Bʋllɛ nyúú mí wɩ́náálɛ mʋlɩ́sɔ
15 Ŋ é Danɩɛl, ŋ há ná wɩ́náálɛ né, aá bɩɩnɛ rɩ́ŋ zɩ́mʋ́ mʋ́l, rɩ́ŋ báá ná omo há nɩhɩ̃́ nɩbííno, rʋʋ kúó nyɩ́ɩ́sɩ́ŋ mɛ́. 16 Káŋ nɛ liŋó há lɛ́ Ulayi fuo rɩ́ cɔ́ɔ́, a cáási a bʋlɛ́: «Gabɩrɩyɛl, lɩ́sɛ wɩ́náálɛ né mʋ́l pá báálɔ né.» 17 Ɛ́ nɛ́ Gabɩrɩyɛl tuupéríŋ dɩcɩ́nɛ ná. Ʋ há kúé péríŋ, héwíŋ kéníŋ ŋ ɓal kanɩ́ŋ sɩ́ɛ́ cú tíé, ɛ́ nɛ́ ʋ sɛ́: «Nɩbííno bio, zɩŋ rɩ́ wɩ́náálɛ né, ʋʋ́ bʋl dúníé tenné wɩ́ɛ́ nɛ́.» 18 Ʋ há haá bʋ́lɩ́ŋ rɩ́ ɛ́, ŋ ɓéló ŋ sɩ́ɛ́ cú tɩ́é káŋ pílli. Ɛ́ nɛ́ ʋ ko tɩkɛ mɛ́, a káníŋ cúóli ŋ isi cɛ́ ráŋ ná ŋ fá há cɩ́nɛ́. 19 Kɔ́ʋ́ bʋlɩ́ŋ rɩ́ a bʋlɛ́: «Ná wɩ́ɛ́ ná Wɩɩsɛ há sɩ́ tʋŋ ʋ cɔɔwɩɩlɔ tenné mí, a mʋ́ tɩɩnɛ dúníé tenné mí. 20 Peɓala ná ɩ há néé rʋʋ kéŋ nyɩ́sɛ bɛllɛ, ká Medi arɩ́ Pɛrsɛ nɩɛ kuóre ní. 21 Bʋŋgboko ná ká Gɩrɛsɛ kuóro ní; ká nyɩ́lzeno ná há mɩ́nʋ́ sɩ́ɛ́ pɛ́kɛ ká dʋ́ŋdʋ́ʋ̃́ kuóro ní. 22 Nyɩ́sɛ ná baná há nyʋ́ nyɩ́lzeno ná há bóre dɩhɩ̃́, ká kuódɩtɩ́llɛ́ baná há sɩ́ isi lá dʋ́ŋdʋ́ʋ̃́ kuódɩtɩ́llɛ ná. Ɓa táŋa wɩ dóé ká anɛ dʋ́ŋdʋ́ʋ̃́ ɓɩnɔ ná. 23 Tɛ́ŋ ná mɛ́ dɩtɩ́llɛ nyáŋ kuorí há sɩ́ tenni, ká rɩ́ nɩbɔma má tʋ́ŋwɔ́ bɔ́ŋbɔ́ŋ a pérú nʋɔ, ɛ́ tɛ́ŋ mɛ́ kuóro nɔ́ŋɔ há ɛ̃́ nyɩ́ɛ́rɔ wérí sɩ́ isi bʋl nyɛwɩɛ rɩ́ nyʋkwɩɛ a yéŋŋi nɩɛ. 24 Ʋ dóé sɩ́ súúri, amá ʋ tɩɩ dóé mí ráá, rʋ́ʋ́ káá tʋŋ zɔkrʋ kɩ́ŋkáŋ, a ɓʋ́ʋ́sɛ tíŋ tɩ́náwa arɩ́ Wɩɩsɛ nɩɛ, ká rʋ́ wɩ́'állɛ wuu cɛ́rɛ wérí pɔ́ʋ́. 25 A tɩ́ŋʋ́ lɩ́ŋwɩ́ɛ́ mɛ́, ʋ sɩ́ yéŋŋi náŋa, ká tɩ́ŋʋ́ nyʋkɔ́ má mɛ́ a ɓʋ́ʋsɛ nɩɛ ná há bɩ́ɩ́nɛ́ rɩ́ ɓa mɩŋ tɛŋfɩ́ɛ́l mɛ́, a cɛ́ nyúútɩ́náwa nyúútɩ́na mɛ́. Ɛ́ tɛ́ŋ mɛ́ nɛ́ sɩɛ́, ɓa sɩ́ zɔ́kʋ́ amá nɩbíŋ nɛ́sɛ ráá waá a rʋ́ʋ́ zɔ́kʋ́. 26 Gbaanɛwa ná rɩ́ cʋcʋɔwa ná ɩ fá há néé máŋsɛ wɩ́ɛ́ ná há ká táŋa nɛ́. Táŋa pɔ́ rɩ́ɩ́ há bʋl ɛ́ wɩ́náálɛ wɩ́ɛ́ mʋ́l néé mí, beé wɩ́ɛ́, wɩ́ɛ́ ná ʋ háá máŋsɛ, ɓa nʋɔ súí há to mʋ́l né mí.» 27 Ɛ́ tɛ́ŋ mɛ́, nayʋɔrɔ́ arɩ́ pʋɔlɩ́ zʋ́ŋ é Danɩɛl, a dáánɛ tapʋlɛ ɓɩkaná. Káŋ isi a baa púl kuóro jaa tʋtʋmɛ́. Wɩ́náálɛ ná hé héwíŋ páŋ, beé wɩ́ɛ́ ŋ fa wʋ́ʋ́ mʋ́l ɛ̃́.