Danɩɛl dʋ́ŋdʋ́ʋ̃́ wɩ́náálɛ́: Balla baná wɩ́ɛ́
7
1 Babɩlɔ́ɔ́nɛ kuóro Baltazaarɛ kuorí dí dʋ́ŋdʋ́ʋ̃́ bɩna mɛ́, Danɩɛl pɩ́nʋ́ basa mɛ́ a duosi, a ná wɩ́ɛ́ ʋ sabɩɩna mɛ́, a pʋ́ŋsɛ duose ná hé kɛnɔ mɛ́. Nóú wɩ́náálɛ ná púle. 2 Danɩɛl sɛ́: «Ŋ tɩtáŋ wɩ́náálɛ́ ná sɩɛrʋ, ŋ ná poo há dɔ́mɛ́ lɩ dúníé kɩ́ŋkere baná a ko híkli Mʋzeno nyii. 3 Ŋ ná ballɩzeŋsi baná há lɩ mʋʋ ná sɩɛrʋ a ko aá lɛ́, oro wuu rɩ́rʋ́ nɩ́ɩ́sɔ. 4 Dʋ́ŋdʋʋ̃́ ballɔ ná ŋ há néé nɩhɩ̃́ kɩ́ŋkáná nɛ́, ká taŋá ká kiesí kɩŋkeru. Ŋ bélé mí, ŋ nóú rɩ ɓa cúnnú kɩŋkeru ná, kɔ́ʋ́ isi cɩ́nʋ́ har naasɛ ná bɛllɛ nyúú anɛ nɩbííno, ká ɓa pí nɩbííno sabɩɩna hóú mí. 5 Bʋllɛ nyúú mí ballɔ ná ŋ há néé, nɩhɩ̃́ ballɔ ná ɓa háá yɩrɛ úrsi aní, há isé cɩ́ cɔ́ɔ́ balá mɛ́, ká saŋbíé heŋgbele botoro mɩ́nʋ́ nyɩla pɛ́kɛ, ʋ nʋɔ sɩɛrʋ. Ɛ́ nɛ́ liŋó bʋlʋ́ rɩ́ a bʋlɛ́: “Isi a dí namɩŋsa ɓɩkana.” 6 Ʋ ɛ́ har mɛ́, ŋ báá ná ballɔ nɔ́ŋɔ há nɩhɩ̃́ ɓee, diíwie kɩŋkeru baná mɩ́nʋ́ degune mí, arɩ́ nyunni baná, ká ɓa pɔ́ʋ́ tíŋ rʋ́ʋ́ yoo dí dóé. 7 Ŋ báá háá belé, ŋ tɩ́taŋ wɩ́náálɛ́ ná sɩɛrʋ, ŋ báá ná baná nyúú ballɔ há kéŋ héwíŋ, aá fúkli baŋcɩla. Ʋ dóé kɔ́ʋ́ dʋŋɔ rɛ́. Ʋ kéŋ hɔ́ɔ́ nyɩla há zéŋso, ʋ kaá cɔ́nnɛ balla ná ʋ há kɛ́sɛ́ aá dí, ká nʋɔ́sɩ́wɔ́ ná ʋ há waá dí aá pʋnnɛ. Ɛ́ ballɔ rɩ́ botoro ná naŋá fa to balá, ʋ kéŋ nyɩ́sɛ fí ní. 8 Ŋ há mɩŋ nyɩ́sɛ ná bélé mí, ŋ ná nyɩ́lwie há nyʋ́ nyɩ́sɛ ná náŋa pɛ́kɛ, ká fí ná sɩɛrʋ botoro naŋá cunni. Ɛ́ nyɩ́la fa kéŋ sɩ́ɛ́ rɩ́ nʋɔ anɛ nɩbííno, aá bʋl nyʋkwɩ́ɛ́.»Wɩɩsɛ saríya díí wɩ́ɛ́
9 «Ŋ belé mí, ŋ báá ná kuóɓaŋsa há bílé, bánɩ́ɩ́na ko kéŋwó daha. Ʋ gɛnnɛ pʋmmɩ́ nɩhɩ̃́ gepúkʋ́l nɛ́, kɔ́ʋ́ nyúpʋ́sɛ pɩ́ɩ́rɛ́ de nɛ pelɔ́ŋpʋmmɔ. Ʋ kuóɓasa ná tɩɩ, a tuwi yákʋ́ naasɛ mɛ́, wuu fa de tʋ́tʋ́l anɛ níŋ tʋ́lɛ́ nɛ́. 10 Káŋ ná níŋvaa háá díé aá pál anɛ fuo ʋ sɩ́ɛ́, ká nɩɛ káŋ há péri bʋ́ɩ́ bʋ́ɩ́wa ɛ́ rɛ́ɛ́, ɛ́ ráá má bʋɩ́ bʋ́ɩ́wa bʋ́ɩ́zɔwanawa ko kíl kuóɓasa ná rɩ́wɔ́ tʋŋ pɔ́ʋ́. Ɛ́ nɛ́ saríyadííre ké a wúnni kɛnnɛ rɩ́wɔ́ dí saríya.
11 «Káŋ baa ha bíbel, beé wɩ́ɛ́, nyɩ́lwie ná faá kɔ kʋɔlɛ, aá bʋl nyʋ́kwɩɛ. Ŋ belé ná tɛ́ŋ mɛ́, ɓa ɓʋ́ baná nyúú ballɔ; a cónnú wuu a píí yoo hé níŋváá sɩɛrʋ. 12 Ká ɓa la balla ná náŋa dóé, ká rɩ́wɔ́ há wólli hiẽsi a kaá ja tɛ́ŋ ná ɓa há bílwó mí.
13 Ʋ ɛ́ har mɛ́, ŋ baa béló a ná omo há nɩhɩ̃́ nɩbííno rʋ́ʋ́ lɛ baná nyúú rí, duóbasɛ sɩɛrʋ a ko tuwi, aá ko bánɩ́ɩ́na ná rɩ́, ɛ́ nɛ́ ɓa kánʋ́ túpérú. 14 Ɓa pi dóé, píŋ, arɩ́ kuorí a pɔ́ʋ́, a makɛ rɩ́ tɔ́ɔ́ wuu duó nɩɛ, duó wuu nɩɛ, arɩ́ líŋsi wuu nɩɛ wólli tʋŋ pɔ́ʋ́.
Beé wɩ́ɛ́, ʋ tíŋ ká tíŋ dɩŋɛ́ ná há wáá dáárɛ nɛ́,
ʋ kuorí ká kuorí ná há wáá zɔkɛ nɛ́.
Dʋ́ŋdʋʋ̃́ wɩ́náálɛ ná mʋ́lɩ́sɔ́
15 «Wɩ́náálɛ nyáŋ wuu, ŋ é Danɩɛl há néé, ŋ sɩɛrʋ zɔ́kɔ́ kɩ́ŋkáŋ, beé wɩ́ɛ́ ɓa fa kéŋ héwíŋ. 16 Ɛ́ nɛ́ ŋ tuuperi nɩɛ ná fa há cɩ ráŋ nɔ́ŋɔ laka a bɔ́sʋ́ bʋlɛ́: «Ɓɩɛ nyáŋ wuu mʋ́ʋ́la nɛ́ ká beé rí?» Ɛ́ nɛ́ ʋ bʋ́lɩ́ŋ rɩ́, a lɩ́sɩ́wɔ́ mʋ́ʋ́la a páŋ a bʋ́lɛ́: 17 «Ballɩzeŋse ná baná ká kuóre baná há sɩ́ isi lá dúníé kuorí ní. 18 Ɓa har mɛ́, Wɩɩsɛ ná há kɛ onni wuu, sɩ́ pi kuorí pɔ́ʋ́ nɩɛ, rɩ́wɔ́ tɩ́llʋ́ a kaá mʋ́ wuu, toko too.» 19 Ɛ́ nɛ́ ŋ baa ɔsɛ bɔ́sʋ́, aá ja rɩ́ŋ zɩŋ baná nyúú mí ballɔ ná há wɩ botoro ná náŋa nɩhɛ̃́ mʋ́l. Beé wɩ́ɛ́, ʋ fa cáásɔ ká héwíŋ, ʋ nyɩla ká hɔ́ɔ́ nɛ́, kɔ́ʋ́ nénídafɩllɛ má a kɔ́mɔ́, ʋ kaá conni balla ná ʋ há kɛ́sɛ́ aá dí, ká nʋɔsɛ káánɛ ná ʋ há waá dí aá pʋ́nnɛ. 20 Ŋ baa bɔ́sʋ́ a bʋlɛ́: Nyɩ́sɛ fí ná há mɩŋ ballɔ ná nyúú mí, mʋ́l nɛ́ beé rí? Ká nyɩ́la ná há nyʋ́ɛ́, ɓa cúnni nyɩ́sɛ ná botoro ʋ sɩ́ɛ́ mɛ́, ʋ má mʋ́l nɛ́ beé rí? Ɛ́ nyɩ́la zéŋ nɛ́ fa kɛ́ náŋa ná wuu, a ká sɩ́ɛ́ rɩ́ nʋɔ aá bʋl nyʋ́kwɩɛ. 21 Ŋ ná ɛ́ nyɩ́la rʋ́ʋ́ yo Wɩɩsɛ nɩɛ, a wóllíwó; 22 a kaá já rɩ bánɩ́ɩ́na ná ko, a lá táŋa a pá Wɩɩsɛ ná kɛ onni wuu nɩɛ. Rɩ tɛ́ŋ makɩ́ ná péri, rɩ Wɩɩsɛ nɩɛ la kuorí ná.
23 Ɛ́ nɛ́ ʋ baa máŋsɛ nyɛ páŋ: «Ballɔ baná nyúú mí ɓɩ́nɔ́ ná ɩ há néé, ká baná nyúú mí dɩ́tɩ́llɛ nɛ́. Ʋ kɔ́ʋ́ dʋŋɔ rɛ́, ʋ sɩ́ dí dúníé wuu, a tɩ́ksɛ óŋ wuu, a zɔ́kʋ́ wuu. 24 Nyɩ́sɛ ná fí ká kuóre fí há sɩ́ isi dí kuorí, aá lá náŋa mɛ́ ɛ́ dɩtɩ́llɛ sɩɛrʋ nɛ́. Amá ɓa har mɛ́, fí rí oro nyúú mí kuóro sɩ́ isi a yoo dí kuóre botoro ká la kuorí. 25 Ʋ sɩ́ bʋ́l wɩ́ɛ́ a tʋksɛ Wɩɩsɛ ná há kɛ onni wuu, a wálmʋ́ nɩɛ, ká bɩɩnɛ Wɩɩsɛ nɩɛ caŋsɛ tápʋlɛ arɩ́wɔ́ wɩ́bile bɩ́rsɛ́. Ʋ sɩ́ dí dóé Wɩɩsɛ nɩɛ nyúú a peri bɩŋsɛ botoro rɩ́ fa. 26 Amá ɓa sɩ́ dí sarɩ́ya a yóú, a lɔ́ʋ́ dɩtɩ́llɛ ká zɔ́kʋ́ ɓóŋ, rʋ́ʋ́ báá sɩ́ mɩ́nʋ́. 27 Ká rɩ́ Wɩɩsɛ ná há kɛ onn wuu nɩɛ tɩ́llɛ tíé dɩtɩ́llɛ wuu kuorí, dóé, rɩ́ píŋ wuu.
Ʋ sɩ́ dí kuorí ná há waá tenni,
ká rɩ́ dúníé tíŋ tɩ́náwa wuu tʋ́ŋ aá pɔ́ʋ́, kaá zílú.»
28 «Wɩ́náálɛ ná dɩgúllí ní nyɛ́. Ŋ é Danɩɛl wɩ́bɩɩnɛ́ ná hé héwíŋ ɓɩzeno a páŋ, ŋ tɛŋ wuu píí yʋ́ɔ́rɛ, káŋ pi ɛ́ wɩ́ɛ́ a bílíŋ sɩɛrʋ.»