Kuóro Baltazarɛ cana dí wɩ́ɛ́
5
1 Kuóro Baltazarɛ kál oro, dí cana ɓɩzeno a pɔ́ʋ́ tʋtʋnnɩhɩ́ɛ̃́sɛ bʋ́ɩ́ (1000), ʋ rɩ́wɔ́ sɩɛ́ hé náŋá mɛ́, ʋ kéwó sɩ́ɛ́ a nyɔ dɩvɛ́ŋ. 2 Tɛ́ŋ ná mɛ́ Baltazarɛ há buke rɩ́ sɩ́ŋ, ʋ sɩ́ rɩ́wɔ́ pa salmɛ sɩ́gbaŋsɛ rɩ́ meéwíé sɩ́gbaŋsɛ ná ʋ áná Nebikanezaare fa há pɛ́ɛ́ Zerizalɛmɛ Wɩɩsɛ jaa ná mɛ́. A makɛ rʋ́ʋ́ rɩ́rʋ́ tʋtʋnnɩhɩ́ɛ̃́sɛ, ʋ háála rɩ́rʋ́ háwíísi kaá nyɔ́ dɩvɛ́ŋ. 3 Ɛ́ nɛ́ ɓa pá salmɛ sɩ́gbaŋsɛ ná ɓa há pɛ́ɛ́ lɩ Zerizalɛmɛ, Wɩɩsɛ jaa sɩɛrʋ, a kaa ko pá kuóro, ʋ rɩ́rʋ́ tʋtʋnnɩhɩ́ɛ̃́sɛ rɩ́rʋ́ háála arɩ́rʋ́ háwíísi wuu kaa ké aá nyɔ. 4 Ɓá wuu há buki sɩ́ŋ, ɓa ísó aá dɛ́nnɩ́wɔ́ salmɛ, rɩ́ meéwí, rɩ́ kɔmɔ́, rɩ́ hɔ́ɔ́, rɩ́ daasɛ, arɩ́ dɔ́wʋɔ́ venni. 5 Ʋ ɛ́ tɛ́ŋ tɩɩ mɛ́, ɓa ná nɩbííno neniwiisi háá pʋ́ŋsɛ kuóro jaa zeŋ mí, caanɔ́ dɩsakɩ́ laka. Kuóro ná ɛ́ neniwiisi rɩ́ ɓa pʋ́ŋsɛ wɩ́ɛ́ ʋ kuójaa zepʋmmɔ ná mɛ́. Kuóro há ná ɛ́, 6 mʋ́l ná tɩɩ mɛ́ rʋʋ sɩ́ɛ́ fɛ́lɔ́, héwíŋ zʋ́ʋ́. Ʋ sabɩɩna fúkli, ʋ caasɛ víváklɛ, ʋ neɓííne ŋmʋ́ŋmɔwɛ náŋá mɛ́. 7 Ɛ́ nɛ́ ʋ cáási kɩ́ŋkáŋ, a bʋlɛ́ rɩ́wɔ́ yɩrɛ Babɩlɔ́ɔ́nɛ zɩmɛ́tɩnáwa, rɩ́ vʋra, arɩ́ muulináára rɩ́wɔ́ ko. Ʋ bʋ́lwɔ́ rɩ́ a bʋlɛ́: «Nɛrɔ ná há sɩ́ zɩŋ pʋ́ŋsɛ né, a lɩ́sʋ́ mʋ́l páŋ, ŋ sɩ́ a rɩ́wɔ́ su kuógɛnnɛ pɔ́ʋ́, a hé salmɛ bɛŋzɛlɛ ʋ báŋ mɛ́, ká rʋ́ʋ́ a dɩtɩ́llɛ ná minísíhɩ̃́ɛ́sɛ botoro ná nɔ́ŋɔ.» 8 Kuóro zɩ́zɩnna ná wuu há kúé, ɓa oro wuu wɩ wólle karmɛ ɛ́ pʋ́ŋsɛ ká lɩ́sʋ́ mʋ́l a pá kuóro. 9 Ɛ́ nɛ́ héwíŋ ɔsɛ zʋ́ Baltazarɛ, ʋ sɩ́ɛ́ fɛ́l; ʋ tʋtʋnnɩhɩ́ɛ̃́sɛ má ɛ́ tɩɩ.Danɩɛl lɩ́sɛ pʋ́ŋsɩbíé ná mʋ́l
10 Hákuóro há nɛ kuóro rɩ́rʋ́ tʋtʋnnɩhɩ́ɛ̃́sɛ búŋse cana ná jaa mɛ́, ʋ mʋ́ɔ́ zʋ́ ráŋ a bʋ́l kuóro rɩ́ bʋlɛ́: «Rɩ́ Kuóro ká mɩgbó! Sɩ́ ló rɩ́ wɩ́ɩ́ né héwíŋ kánɩ́, rɩ́ɩ́ sɩ́ɛ́ fɛ́l. 11 Beé wɩ́ɛ́, ɩ dɩtɩ́llɛ ná mɛ́, bál balá rɛ́ mɩŋ ráŋ a ká wɩŋsa ná há kɔ́wɔ́ dɔŋɔ́ sabɩɩna. Ɩ áná tɛ́ŋ mɛ́, ʋ mákʋ́ sɩ́puró rɩ́rʋ́ zɩmɛ́ rɩ́rʋ́ wɩ́zɩmɛ anɛ wɩŋsa sabɩɩna há mɩŋ nɛrɔ mɛ́. Ɛ́ nɛ́ tɛ ɩ áná kuóro Nebikanezaare fa lɩ́sʋ́, ʋ a tɩɩwa, zɩmɛ́tɩ́nawa, vʋra, arɩ́ muulináára nyúútɩ́na. 12 Sabɩɩna ná há mɩ́nʋ́ mɛ́ kɔ́ʋ́ dʋŋɔ kɩ́ŋkáŋ. Ʋ kéŋ zɩmɛ́, rɩ́ wɩ́zɩmɛ, a wólli duosewa, rɩ́ wɩ́féŋse mʋ́ʋ́la aá lɩ́sɛ, a wólli wɩ́duoru má ɔ́sɛ́. Ɛ́ wɩ́ɛ́, a rɩ́wɔ́ yɩ́rɛ ɛ́ Danɩɛl, ɩ áná há pɔ́ʋ́ yɩr Bɛltɩsazarɛ, rʋ́ʋ́ ko lɩ́sɩ́wɔ́ mʋ́ʋ́la pɛ́ɩ́.»
13 Ɓá há kéŋ Danɩɛl zʋ kuóro sɩ́ɛ́, kuóro bɔ́sʋ́ a bʋlɛ́: «Ɩ nɛ́ ɓɩ́ɛ́na ká Danɩɛl ná, ŋ áná kuóro há kéné lɛ́ Ziida ko? 14 Ŋ nɩ́ɔ́ rɩ Wɩŋsa sabɩɩna mɩ́nɩ́ mɛ́, ɩ ká sɩ́puró rɩ́ wɩ́zɩmɛ arɩ́ zɩmɛ́ kɩ́ŋkáŋ. 15 Ŋ ɔ́ɔ́ zɩmɛ́tɩ́náwa rɩ́ tɩɩwa ko karmɛ pʋ́ŋsɛ nyáŋ, ká lɩ́sɩ́wɔ́ mʋ́ʋ́la páŋ, amá ɓa wɩ wólle lɩ́sɩ́wɔ́ mʋ́ʋ́la páŋ. 16 Ŋ sɩɛ́ nɩ́ɔ́, rɩɩ wo wɩ́féŋse mʋ́ʋ́la aá lɩ́sɛ, kaá ɔsɛ wɩ́ɛ́. Ɛ́ wɩ́ɛ́, rɩ́ɩ́ nɛ́ wólle karmɛ pʋ́ŋsɛ nyáŋ ká lɩ́sɩ́wɔ́ mʋ́ʋ́la rɩ́ɩ́ páŋ, ŋ sɩ́ a rɩ́wɔ́ sú kuógɛnnɛ pɛ́ɩ́, a cɩ́ ráŋ mɛ́ hé salmɛ bɛŋzɛlɛ ɩ báŋ mɛ́ a pɛ́ɩ́, ká rɩ́ɩ́ áŋ dɩtɩ́llɛ minísíhɩ̃́ɛ́sɛ botoro ná nɔ́ŋɔ.»
17 Ɛ́ nɛ́ Danɩɛl bʋl kuóro rí a bʋlɛ́: «Ŋ kuóro, ɓɩ́ɛ́ nyáŋ ɩ há máŋsɛ, píwó pá nɩhúónní ɛ́ rá má, ɩ tɩɩ kánɩ́ ɓɩɛ. Amá, ŋ sɩ́ karmɛ pʋ́ŋsɛ ná ká lɩ́sɩ́wɔ́ mʋ́ʋ́la pɛ́ɩ́. 18 Ŋ kuóro, Wɩɩsɛ ná há kɛ́ onni wuu fá ɔ́ɔ́, ɩ áná Nebikanezaare fa dí kuorí ná há zeno, ʋ kuorí yɩr rɩ́rʋ́ píŋ fa lɩ́ɔ́ a la dúníé wuu. 19 A tɩ́ŋ Wɩɩsɛ há ɛ́ɛ́ ʋ kuorí a zeni ná wɩ́ɛ́, tɔ́nɛ́ wuu nɩɛ, rɩ́ duó wuu nɩɛ, arɩ́ liŋó wuu nɩɛ faá fɔ́ʋ́ aá vaklʋ́ sɩ́ɛ́ mɛ́. Rʋʋ fa có rɩ́wɔ́ ɓʋ́ nɛrɔ, ɓaá ɓʋ́ʋ́ nɛ́, rʋʋ có rɩ nɛrɔ ká mɩɩsɛ, ʋʋ́ ká mɩɩsɛ nɛ́; aá píŋsi nɛrɔ ná ʋ há có rʋ́ʋ́ píŋso, kaá múúri nɛrɔ ná ʋ há có rʋ́ʋ́ múúro. 20 Amá ʋ nyʋ́kʋ́ tɩɩ, a dúórú baŋcɩla. Ɛ́ nɛ́ tɛ Wɩɩsɛ túwú ʋ kuóɓasa daha, ʋ báá wɩ píŋ wuu kené. 21 Ɓa kírú lɩ́sɛ nɩbííne sɩɛrʋ, ʋ sɩɛrʋ nɩ́ɛ́sɛ balla sabɩɩna: a mɩŋ baka kokúsi sɩɛrʋ; ɓaá dɩ́ɛ́sʋ́ rɩ́ nyɔɔ anɛ ɛ́ ɓa háá dɩ́ɛ́sɛ nɛsɛ, ká bána nyɛlɔ́ tuwi aá tɔ́ʋ́ mɛ́. Ʋ mɩŋ ɛ́ wɩ́hála sɩɛrʋ nɛ́, a mʋ́ cɛ́rɛ́ tɛ́ŋ ná mɛ́, ʋ há sáŋɛ́ a zɩŋ rɩ bána Wɩɩsɛ ná há kɛ́ onni wuu nɛ́ tɛ tíé nyúú nɩbííne kuorí, a pi aá pá nɛrɔ ná ʋ há có. 22 Ɩ é Nebikanezaare bio, Bɛltazaare, ɩ fa ɛ̃ wɩ́ɛ́ nyáŋ wuu mí rí, ká wɩ́ɩ́ tɩɩ múúré. 23 Ɩ tʋ́ŋ nyúduo bána Nyuutɩna rɩ́, ɩ há ɛ́ɛ́ ɓa pɔ́ʋ́ jaa nyiŋgbaŋkíŋse ná, a kaa ko ɩ rɩ́rɩ́ mɩnísíwa, rɩ́rɩ́ háála, a rɩ́rɩ́ háwíísi kaá nyɔ sɩ́ŋ. Ɩ báá a wɩ́tɔk nɔ́ŋɔ, aá cʋ́ɔ́lɛ wárɛ, rɩ́ salmɛ, rɩ́ kɔmɔ́, rɩ́ hɔ́ɔ́, rɩ́ daasɛ arɩ́ dɔ́wʋ́ɔ́ venni. Ɛ́ venni wɩ ráŋ ná, a wɩ wɩ́ɛ́ nɛ, a wɩ wɩ́ɩ́ wuu má ɛ̃, ká vɛ́ rɩ́ɩ́ píŋsi Wɩɩsɛ ná há tɩ́ɩ̃́ zaa rɩ́rɩ́ɩ́ cíé wuu hiẽso. 24 Ɛ́ nɛ́ tɛ Wɩɩsɛ a nɛ́sɛ pʋ́ŋsɛ pʋ́ŋsɩbíé nyáŋ. 25 Ná wɩ́ɩ́ ná ʋ há pʋ́ŋsɛ́: Mene, Mene, Tekɛl arɩ́ Parsɛŋ. 26 Ɓa mʋ́ʋ́la nɛ́ ká: “Mene” mʋ́l nɛ́ ká dɩɩsɛ: Wɩɩsɛ dɩ́ɩ́sɩ́ kuorí díí bɩŋsɛ, a césíwó nʋɔ. 27 “Tekɛl” mʋ́l nɛ́ ká kersi: Wɩɩsɛ píí hé oŋkersi mí a kersí, rɩɩ báá wɩ zíŋ; 28 “Parsɛŋ” mʋ́l nɛ́ ká ɓɛɛ: Wɩɩsɛ kéní dɩtɩ́llɛ ná ɓa a pá Pɛrsɛ rɩ́ Medi nɩɛ.»
29 Baltazaarɛ ɔ́ɔ́ ɓa sú kuógɛnnɛ pá Danɩɛl, a cɩ́ ráŋ mɛ́, a hé salmɛ bɛŋzɛlɛ ʋ báŋ a pɔ́ʋ́. Ká búóli, a bʋlɛ́ rɩ́ Danɩɛl kɔ́ʋ́ dɩtɩ́llɛ minísíhɩ̃́ɛ́sɛ ná botoro nɔ́ŋɔ nɛ́.
30 Ʋ ɛ́ kál tɩtáŋ wuu ní ɓa ɓʋ́ Babɩlɔ́ɔ́nɛ kuóro Baltazaarɛ.