Danɩɛl
Danɩɛl rɩ́rʋ́ naŋnɔ́ŋsɛ Babɩlɔ́ɔ́nɛ mɛ́ mɩnɛ́ wɩ́ɛ́
1
1 Ziida kuóro Zʋwakimi kuorí dí bɩŋsɛ botoro nyúú mí ní Babɩlɔ́ɔ́nɛ kuóro Nebikanezaare ko tɔ́ Zerizalɛmɛ hé rʋ́ʋ́ yóú. 2 Nyuutɩna pí Zʋwakimi hé Nebikanezaare nɛ́sɛ mɛ́, ʋ yóó dúú, ká wólli pá Wɩɩsɛ jaa cɩksɛ náŋa. Nebikanezaare kéŋ nɩkɛ́sɛ ná kaa mʋ́ Babɩlɔ́ɔ́nɛ, ká ka Wɩɩsɛ jaa cɩksɛ ná ʋ há pɛ́ɛ́, kaa zʋ́ʋ́ bílú wɩŋsa jaa mɛ́. 3 Kuóro Nebikanezaare bʋ́lʋ́ tʋtʋnna nɔhɔ̃́ Asɩpanazɛ rɩ́ a bʋ́lʋ́ tʋɔsɛ Ɩzɩrayɛl nɩɛ ná sɩɛrʋ heŋbiwafɛlɛ ná há lɛ́ kuóro jaa, ɛ́rá má ɓɩɛ́ tɩ́náwa bɛlɛ sɩɛrʋ. 4 Ɛ́ heŋbiwafɛlɛ wɩ mɔhɛ̃́ rɩ́wɔ́ tɛŋ ká dɩ́kɔsɔ mʋɔ́ wuu, ɓa mɔhɔ̃́ rɩ́wɔ́ a háŋpʋ́ɔ́la, a ká zɩmɛ́ wuu duó rɩ́ wɩ́zɩmɛ, a wólli wɩ́ɛ́ aá caksɛ náŋá mɛ́. A makɛ rɩ́wɔ́ wólli kuójaa sɩɛrʋ tʋ́tʋ́ŋ. Ɓa sɩ́ gʋ́nnɩ́wɔ́ Kaldee nɩɛ liŋó pʋ́ŋsɛ́ rɩ́rʋ́ karmɛ́. 5 Ká Kuóro sɩɛ́ bʋl rɩ kál wuu ʋ haá dúú ná, ɓa nɛ́ ɓa sɩ́ lɔkɛ a pɔ́wɔ́ rɩ́wɔ́ dí, ʋ haá nyɔ́ dɩvɛ́ŋ ná, ʋ nɛ́ ɓa sɩ́ ɔ́ŋsɛ pɔ́wɔ́ rɩ́wɔ́ nyɔ́. Ɓa mɔhɔ̃́ rɩ́wɔ́ kármɩ́wɔ́ bɩŋsɛ botoro ní, ká rɩ́wɔ́ sɩɛ́ zɩŋ púlú tʋtʋmɛ́ ná.» 6 Ziida jɩmʋ́l sɩɛrʋ nɩɛ ná ɓa há tʋɔsɛ nɛ́ ká Danɩɛl, Hananiya, Mɩkayɛl, rɩ́ Azarɩya. 7 Kuóro tʋtʋnna nɔhɔ̃́ ná hé yɩfɛlɛ a pɔ́wɔ́. Ʋ pá Danɩɛl yɩr Bɛltɩsazarɛ, a pá Hananiya yɩr Sadɩrakɛ, á pá Mɩkayɛl yɩr Mɛsakɛ, ká pá Azariya má yɩr Abednego. 8 Danɩɛl há wɩ có rʋ́ʋ́ zʋ́ busunnúa, ʋ vɛ́ kuóro ɓɩdííle ná díí, a vɔ́ʋ́ dɩvɛ́ŋ má nyɔɛ, rʋʋ́ há zʋ́ busunnú. Ká bʋl kuóro tʋtʋnna nɔhɔ̃́ rɩ́, a bʋlʋ́ sʋ́ʋ́ mɛ́ fɩkʋ́ rʋ́ʋ́ díwó a zʋ́ busunnu. 9 Ɛ́ nɛ́ Wɩɩsɛ a kuóro tʋtʋnna nɔhɔ̃́ ná saŋ Danɩɛl sʋlɛ́ ná arɩ́ sawér. 10 Ká táŋa bʋl Danɩɛl rɩ́ a bʋlɛ́: «Kuóro tɩɩ nɛ́ makɛ ɓɩdííle ná rɩ́ nyɔ́ɔ́lɔ́ ná ɩ́ há mɔ́hɛ̃́ rɩ́ɩ́wa dí. Rɩ́ɩ́wa nɛ́ sɩɛ́ vɛ́ɛ́, ká rɩ Nyuutɩna ŋ kuóro néíwa rɩ́ɩ́wa kóŋŋó, ká rɩ́ heŋbiwafɛlɛ ná há kɛ́ɩ́wa wonáŋá vʋ́; ʋ wóŋ aá ɓʋ́ ɩ́ wɩ́ɛ́.» 11 Ɛ́ nɛ́ Danɩɛl bʋl sóóji ná, kuóro tʋtʋnna nɔhɔ̃́ há bílú rʋ́ʋ́ bíbel Danɩɛl, Hananiya, rɩ́ Mɩkayɛl arɩ́ Azariya rɩ́ a bʋlɛ́: 12 «Ná, ɩ wúóló aá mɩlɩrá tápʋlɛ fí, a pípárá dɩpaarʋ́ dʋŋɔ ráá dídí arɩ́ nyii dʋŋɔ ráá nyʋnyɔ. 13 Ká tápʋlɛ fí ná har mɛ́, rɩ́ɩ́ kɩ́ɛ́lɩ́rá sɩ́ɛ́ tʋ́lɛ́ rɩ́ heŋbiwafɛlɛ ná náŋa há tɩ́ŋɛ́ dí kuóro ɓɩdííle ná sɩ́ɛ́ tʋ́lɛ́, ʋ ɛ́, ɩ sɩ́ wólli a ɔ́ɔ́ ná há cɛ́rɛ ɩ tʋtʋnna mɛ́. 14 Tʋtʋnnɔ ná ɓɩɛ́na saŋ Danɩɛl rɩ́rʋ́ naŋnɔŋsɛ sʋ́lɛ́, ká mɩlwɔ́ tápʋ́lɛ́ fí. 15 Tápʋlɛ fí ná har mɛ́, ɓa kɩ́ɛ́lɔ́ rɩ́ ɓa sɩ́ɛ́ tʋ́lɛ́ arɩ́wɔ́ vʋ́ɩ́ kɛ heŋbiwafɛlɛ ná há tɩ́ŋɛ́ dí kuóro ɓɩdííle ná. 16 A de pɔ́ ɛ́ mɛ́, sóóji ná ká ɓɩdííle ná rɩ́ dɩvɛ́ŋ ná col, ká pɩ́pɔ́wɔ́ dɩpaarʋ́ dʋŋɔ. 17 Wɩɩsɛ pá ɛ́ heŋbiwafɛlɛ baná wɩ́ɛ́ kɩ́ɛ́lɛ́, wɩ́zɩmɛ, kɛnɔ zɩmɛ́ arɩ́ zɩmɛ́, amá Danɩɛl é fa ha kéŋ wɩ́náálɛ rɩ́ duosewa mʋ́l lɩ́sɛ zɩmɛ́. 18 Kuóro Nebikanezaare tɛ́ŋ makɩ́ ná há péré, ʋ tʋtʋnna nɔhɔ̃́ ná kɛ́sɛ heŋbiwafɛlɛ ná ɓa há tʋ́ɔ́sɛ́, a kaa zʋ́ʋ́ sɩ́ɛ́. 19 Ɓa sɩɛ́ há zʋ́ɛ́, ɓa rɩ́ kuóro ké aá bɛ bɩsɛ, ʋ kɩ́ɛ́lɔ́ ná rɩ Danɩɛl, Hananiya, Mɩkayɛl, arɩ́ Azariya wuu zɩmɛ́ kɛ náŋa ná. Ɛ́ nɛ́ ɓa píwó hé kuóro jaa tʋtʋmɛ́ mɛ́. 20 Kuóro há pí wɩ́ɛ́ bɔ́sɩ́wɔ́, ʋ nóó rɩ ɓa zɩmɛ́ rɩ́wɔ́ wɩ́zɩmɛ kʋ̃́ʋ́ dɩtɩ́llɛ vʋra rɩ́ bátɩɩwa zɩmɛ́ naasɩ́ fí. 21 Danɩɛl tʋ́ŋ kuóro jaa mɛ́ a kaá mʋ́ peri tɛ́ŋ ná mɛ́ kuóro Sirisi há lá kuorí dʋŋdʋ̃ʋ́ bɩna mɛ́.