Nyii háá bulé há lɛ́ wɩ́cʋɔlɩjaa mɛ́
47
1 Ʋ báá kanɩ́ŋ mʋ́ wɩ́cʋɔlɩjɩzeno dánnʋzʋʋlɩ́ ná mɛ́; ŋ ná nyii há poŋ jaa ná dánnʋɔ mɛ́ wɩpomɩ́ rɩ́ cɔ́ɔ́ a pálɛ háá lɛ́. Jaa ná dánnʋɔ fa caasɛ wɩ́pomɩ́ rɩ́, ká nyii ná pal tutuwí neduu rɩ́ a caasɛ koro ná wɩ́pomɩ́ rɩ́ cɔ́ɔ́. 2 Ɛ har mɛ́, ʋ ɔɔ ŋ tɩ́ŋ dánnʋɔ ná há caasɛ wɩpomɩ́ nágʋɔ a lɛ́ va kíl jaa ná hari wuu a ko peri dánnʋɔ ná há caasɛ wɩpomɩ́ rɩ́ cɔ́ɔ́. Nyii ná fa palɛ tuwi dánnʋɔ ná neduu rɩ́ nɛ́. 3 Báálɔ ná há lɛ́ wɩpomɩ́ rɩ́ cɔ́ɔ́ ko lɛ́, ʋ fa keŋ ŋmɛ́máŋsɛ gbesi há ká mɛɛtɩ́r bʋ́ɩ́ ʋ nɛ́sɛ mɛ́. Ʋ ɔɔ ŋ zʋ́ nyii ná daarɛ cɔ́ɔ́ nɔ́ŋɔ, ŋ há zʋɛ́ daarɛ nyii ná fa mɔ́ŋ nabaŋa nɛ́. 4 Ʋ báá maŋsɛ nyíí ná lúŋ mɛɛtɩr bʋ́ɩ́, ka a ŋ zʋ́ daarɛ; nyii ná fa zɩnɔ́ períŋ neɓɩɩne. Ʋ báá maŋsɛ nyii ná lúŋ mɛɛtɩ́r bʋɩ́, ká a ŋ zʋ́ daarɛ, ŋ há zʋɛ́ nyii ná fa zɩnɔ́ períŋ tɩŋa. 5 Ʋ báá bɩrɛ maŋsɛ nyii ná lúŋ mɛɛtɩ́r bʋɩ́; ʋ mʋ́l neé mɩ́ é bɩrmɛ́ fuo há sué ŋ wɩ́ wó zʋ aá daarɛ ʋ nɛ́ toó hákɛ. 6 Ɛ nɛ́ ʋ bʋlɩ́ŋ rɩ́ bʋlɛ́: Báálɔ bio ŋ noú rɩ́>> Ká bɩrɛ kanɩ́ŋ va ko fuo ná nʋɔ. 7 Ʋ há kenɩ́ŋ ko róŋ, ŋ ná fuo ná nʋʋsɛ wuu mɩ́ tuuni ɓɩkana. 8 Ʋ bʋlɩ́ŋ rɩ́ bʋlɛ́: Fuo ná nyii tɩ́ŋ tɔ́ɔ́ wɩpomɩ́ rɩ́ cɔ́ɔ́ a pal aá tuwi Araba, rɩ́wɔ́ daarɛ mʋ́ mʋʋ sɩɛrʋ. Rɩ́wɔ́ nɛ́ palɛ mʋ́ zʋ́ mʋʋ, mʋʋ nyii ná wuu sɩ́ a paar. 9 Fuo ná nyii há peri róŋ ná wuu, óŋhiẽsi ná wuu há sɩ́ nyɔ ɛ nyii sɩ́ ná tɛ́ŋfɩɛ́l. Mʋʋ má sɩ́ sú rɩ́ naŋwʋllɛ; beé wɩ́ɛ́ nyii ná bɩrmɛ́ mʋʋ nyii ná. Róŋ ná wuu ʋ nyii há sɩ́ pal perí wer sɩ́ mɩŋ ráŋ. 10 Ɛ wɩ́ɛ́, naŋwʋ́ɓʋ́ʋ́ra sɩ́ sú fuo ná nʋɔ. Ɓa sɩ́ jɛrɛ fiilewa a pɔ́ Ɛŋgedi mɩ́ ka kaa mʋ́ peri Ɛŋ-Egilayim. Ʋ sɩɛrʋ, ɓa sɩ́ ná naŋwʋ́llɛ duo wuu a kɩ́llɛ mʋʋ zeno sɩɛrʋ naŋwʋ́llɛ. 11 Amá, mʋʋ laká fuonni ná naŋá nyii wa bɩrsɛ, yɛsɛ há sɩ́ mɩ́ŋ róŋ. 12 Fuo ná nʋɔ wuu, tunɔnɩ́ duo wuu nɛ́ sɩ́ nyʋ róŋ. Ɓa paarʋ wa hɩ́l ná, ka ɓa wɩ nɔnɔ mɩ́ɩ́ ɓɩllɛ. Ɓa sɩ́ɩ́ nɔ́ŋ cana canawa, bee wɩ́ɛ́ nyii ná há pɔ́wɔ́ hiẽso lɛ Wɩɩsɛ dɩmɩnɩ́ nɛ́ ko waalɩ́wɔ́. Ɓa nɔnɔ sɩ́ a ɓɩdííle, ká rɩ́wɔ́ paarʋ vɩvaarɛ nɩɛ.Tɔ́ɔ́ súsúbʋɔnnɛ wɩ́ɛ́
13 Ɛ nɛ́ Nyuutɩna Wɩɩsɛ sɛ́: Ná, tɔ́ɔ́ ná súsúbʋɔnnɛ nʋɔ nɛ́ nyɛ́, ɩ́ sɩ́ pɔ́ ɛ mɛ́, ka kaa ɓa Ɩzɩrayɛl jɩ́mʋʋla ná fí rɩ́ bɛllɛ ná. Zozɛfɛ é kere mɔhɔ̃ rɩ́wɔ́ a bɛllɛ. 14 Ɩ́ sɩ́ naŋá vɩ́rʋ́, ɩ́ hé doé ka ɓá naŋá rɩ́wɔ́ mɔ́ naŋá; a nɛ́ ɛ ŋ há ŋmɩ́ɛ́sɛ pɛɩ́wa naábalwa rɩ́ɩ́wa nɛ́ sɩ́ tɩllɛ tɔ́ɔ́ ná. 15 Ná tɔ́ɔ́ ná súsúbʋɔnnɛ. A pɔ́ wɩpomɩ́ nágʋɔ rɩ́ ka kaa mʋ́ peri mʋzeno, a baá tɩ́ŋ ŋmɛnɔ ná há tɩ́ŋ Hɛtɩlɔŋ ka baá mʋ́ peri Tisɛdadɛ nʋɔ. 16 A báá lɛ́ daarɛ Hamatɛ, Berɔta, rɩ́ Sibirayɩm tɔ́nɛ, há mɩŋ Damasɛ dɩtɩllɛ rɩ́ Hamatɛ dɩtɩllɛ pɛkɛ. A sɩɛ́ lɛ́ tɩ́ŋ Hatɩsɛrɛ-Hatikɔ́ŋ ŋmɛnɔ́ há mɩ́ŋ Horaŋ súsúbʋɔ nʋɔ. 17 Súsúbʋɔ ná sɩ́ pɔ́ mʋʋ mɛ́, rɩ́ Hatisar, rɩ́ Damasɛ súsúbʋɔ mɛ́, rɩ́ Tisafɔ́ŋ wɩpomɩ́ nágʋɔ mɛ́, a sɩɛ́ mʋ yakɛ Hamatɛ súsúbʋɔ mɛ́. Ʋ nyɛ́ nɛ́ ka wɩpomɩ nágʋɔ rɩ́ súsúbʋɔ ná. 18 Wɩpomɩ́ rɩ́ tié súsúbʋɔ má nɛ́ nyɛ́: A pɔ́ Haviráŋ rɩ́ Damasɛ pɛkɛ a kaa mʋ́ lɛ́ Zʋrdɛŋ fuo há mɩ́ŋ Galaadɛ rɩ́ Ɩzɩrayɛl tɔ́ɔ́ pɛkɛ. Ɩ́ sɩ́ pɔ́ wɩpomɩ́ nágʋɔ súsúbʋɔ ná mɛ́, ka maŋsɛ mʋ́ lɛ́ mʋsʋwɩ. Wɩ́pomɩ rɩ́ cɔ́ɔ́ ɓɩnɔ nɛ́ ɛ. 19 Néíwa súsúbʋɔ wɩpomɩ́ neduu; ʋ sɩ́ pɔ́ Tamarɛ mɩ́, a mʋ́ peri Meriba nyii, a sɩɛ́ bɩrɛ mʋ́ Kadɛsɛ a sɩɛ́ mʋ́ perí mʋzeno polcʋ́ɔ́rɛ: Ɩ́ susúbʋɔ ná há mɩ́ŋ mʋʋ wɩpomɩ́ neduu rɩ́ cɔ́ɔ́ nɛ́ ɛ. 20 Néíwa wɩzʋʋlɩ́ rɩ́ cɔ́ɔ́ tié susúbʋɔ: A pɔ́ mʋzeno susúbʋɔ ná mɛ́, a kaa mʋ́ lɛ́ Hamatɛ nʋɔ. Ʋ nɛ́ sɩ́ ɛɩ́wa wɩ́zʋʋlɩ́ rɩ́ cɔ́ɔ́ susúbʋɔ. 21 Ɩ́ sɩ́ ká tɔ́ɔ́ ná ɓá naŋá, ɩ́ ɓá rʋ́ peri Ɩzɩrayɛl jɩ́mʋʋla ná fí rɩ́ bɛllɛ. 22 Ɩ́ yó bie nɩ́ a ka ɓá naŋá. Ɩ́ tɔ́ɔ́ ná mɛ́, nɩhʋɔra ná má há ke róŋ a lʋ́l bɛlɛ, ɓa má mɔhɔ̃ rɩ́wɔ́ ka ɓaalɛ. Ɩ́ giéliwó rɩ́wɔ́ má ka Ɩzɩrayɛl nɩɛ, ɩ́ maábɩnaŋá. Ɓa keŋ tié ker a nɛ́ Ɩzɩrayɛl jɩmʋʋla ná. 23 Nɩhʋɔrɔ há ke jɩmʋ́l ná sɩɛrʋ, ʋ tié ker lɛ́ ráŋ nɛ́. Nyuutɩna Wɩɩsɛ nɛ́ bʋlɛ́.