Fɩɛ́lɛ tapʋl, rɩ́ caŋfɛlɛ dí wɩ́ɛ́
46
1 Ɛ nɛ́ Nyuutɩna Wɩɩsɛ sɛ́: Wuolwie dánnʋɔ ná há caasɛ wɩpomɩ́ rɩ́ cɔ́ɔ́ sɩ́ tɔ́ɔ́ cɛ́ a kaa ja tapʋlɛ balgo ná tenne. Fɩɛ́lɛ tapʋl nɛ́ mɔhɛ̃ rɩ́ɩ́wa wurú, ʋ ká caŋfɛlɛ má dʋ́ŋdʋʋ̃ kal lɩɩ nɛ́ ɛ. 2 Kuóro sɩ́ zʋ́ wuolzeno ná sɩɛrʋ a ko cɛ́ záwará dánnʋɔ ná mɛ́. Ʋ sɩ́ cɛ́ róŋ nɩ́, ká vʋ́k'ɔɔsa ɔsɛ vʋ́k'físi rɩ́ tɛ́ŋfɩɛ́l vʋ́k ʋ yɩr mɛ́. Ɛ har mɛ́, dánnʋɔ ná mɛ́, kuóro ná sɩ́ tuɓírmú néɓɩ́ŋ a cʋɔlɛ Wɩɩsɛ, ká lɛ́. Ʋ gbaanɛ nɛ́ rɩ́wɔ́ sɩɛ́ ká dánnʋɔ ná tɔ́ɔ́. 3 Fɩɛ́lɛ tapʋl, rɩ́ caŋfɛlɛ tapʋl, tɔ́ɔ́ ná nɩɛ wuu sɩ́ ko dánnʋɔ ná mɛ́, a cʋɔlɛ Nyuutɩna Wɩɩsɛ. 4 Ɛ fɩɛ́lɛ tapʋl, kuóro sɩ́ ɓʋ́ʋ́sɛ pewiisi balgo há wɩ kɔsɔ kene, arɩ́ peɓala má há wɩ kɔsɔ kene, a ɔsɛ vʋ́k'físi pá Nyuutɩna Wɩɩsɛ. 5 Ʋ sɩ́ súúri mɩŋ kilo mɛɛrɛ rɩ́ fí peɓala wuu mɩ́, a súúri mɩ́ŋ kilo ɛ ʋ há có pewiisi ná oro wuu mɩ́. Ʋ sɩ́ hé nʋʋ líítír balgo nɩ́ mɩ́ŋ kílo mɛɛrɛ rɩ́ fí ná mɛ́ a ŋmʋ́sɛ, a pi ɔsɛ vʋ́k ná. 6 Caŋfɛlɛ kal, ʋ sɩ́ ɓʋ́ nɔɓʋɔl há wɩ kɔsɔ kene, rɩ́ pewiisi balgo, arɩ́ peɓala há wɩ kɔsɔ kene a ɔsɛ vʋ́k. 7 Ʋ sɩ́ súúri mɩ́ŋ kilo mɛɛrɛ rɩ́ fí nɔɓala wuu mí, rɩ́ peɓala wuu mɩ́; ká pewie wuu mɩ́, ʋ súúri mɩŋ kilo ɛ há cɛrɛ́. Nʋʋ líítír balgo nɩ́ rʋ́ pi hé mɩ́ŋ kilo mɛɛrɛ rɩ́ fí ná mɛ a ŋmʋ́sɛ a ɔsɛ vʋ́k ná. 8 Rɩ́ kuóro ná tɩ́ŋ záwara na dánnʋɔ ná zʋ́, ʋ mɔhɔ̃ rʋ́ bɩrɛ tɩ́ŋ róŋ nɩ́ lɛ́. 9 Tapʋlzeŋsi kal, rɩ́ jamáŋ ná nɛ́ kué rɩ́wɔ́ cʋɔlɛ Nyuutɩna Wɩɩsɛ, ɓa ná há tɩ́ŋ wɩzʋʋlɩ́ rɩ́ cɔ́ɔ́ dánnʋɔ ná zʋ́ mɔhɔ̃ rɩ́wɔ́ bɩrɛ mʋ́ tɩ́ŋ wɩ́pomí nágʋɔ rɩ́ cɔ́ɔ́ dánnʋɔ ná nɛ́ lɛ́; ɓa ná má há tɩ́ŋ wɩpomí nágʋɔ rɩ́ cɔ́ɔ́ dánnʋɔ ná zʋ́, sɩ́ bɩrɛ tɩ́ŋ wɩpomí neduu rɩ́ cɔ́ɔ́ dánnʋɔ nɛ́ lɛ́. Nɛ́ŋ wɩ mɔhɛ̃ rʋ́ tɩ́ŋ dánnʋɔ ná ʋ há tíŋɛ́ zʋ́ a lɛ́, ká dánnʋɔ ná ʋ há tíŋɛ́ lɛ́ ʋ bɩrɛ tɩ́ŋʋ́ nɛ́ zʋ́. 10 Kuóro nɛ́ sɩ́ kaŋwɔ́ aá zʋ, a báá kaŋwɔ́ aá lɛ́. 11 Rʋʋ́ nɛ́ ká caŋsɛ kal, ɛrá má ceŋzeŋse kal, satɔ́ɔ́rɩ́pálɔ mɩ́ŋ ná sɩ́ a kilo mɛɛrɛ rɩ́ fí, rɩ́wɔ́ pi súúri nɔɓala, rɩ́ peɓal wuu mɩ́. Ká rʋ́ já mɩ́ŋ kilo ɛ há cɛrɛ a súúri pewiisi ná oro wuu mɩ́. Nʋʋ líítír balgo ní rɩ́wɔ́ ká ŋmʋ́sɛ mɩ́ŋ kilo mɛɛrɛ rɩ́ fí ná a pi ɔsɛ vʋ́k. 12 Rɩ́ kuóro nɩ́ ja rʋ́ ɔsɛ satɔ́ɔ́rɛ vʋ́k'físi, ɛrá má tɛ́ŋfɩɛ́l vʋ́k a pá Nyuutɩna Wɩɩsɛ; jaa ná dánnʋɔ há caasɛ wɩ́pomɩ́ rɩ́ cɔ́ɔ́ nɛ́ rʋ́ zʋ ɔsɛ. Ʋ sɩ́ ɔsɛ róŋ a nɛ́ fɩɛlɛ tapʋl ʋ há a ɛ. Rʋ́ nɛ́ tenne, ʋ sɩ́ lɛ́ ká rɩ́wɔ́ ká dánnʋɔ ná tɔ́ɔ́. 13 Kal wuu ɩ sɩ́ ka bɩna balá pewie há wɩ kɔsɔ kene a ɔsɛ vʋ́k'físi pá Nyuutɩna Wɩɩsɛ. Ɩ sɩ́ ɔɔ kal wuu cɩ́cʋɔ. 14 Cɩ́cʋɔ wuu ɩ sɩ́ ja mɩ́ŋ kilo bɔmmʋɔ, a súúri nʋʋ líítír bɛllɛ mɛ́ a ŋmʋ́sɛ. Satɔ́ɔ́rɩ́pálɔ né ká Nyuutɩna Wɩɩsɛ wɩ́makɩ́ nɛ́ a mɔhɛ̃ rɩ́wɔ́ ɔɔ tɛ́ŋ wuu mɩ́. 15 Kal wuu cɩ́cʋɔ ɓa sɩ́ ɓʋ́ pewie, a súúri mɩ́ŋ rɩ́ nʋʋ ná a ɔsɛ vʋ́k'físi a pá Nyuutɩna Wɩɩsɛ. Kal wuu vʋ́k'ɔɔsɔ nɛ́ ɛ ʋ wa giri. 16 Ɛ wɩ́ɛ́, Nyuutɩna Wɩɩsɛ sɛ́: Rɩ́ kuóro nɛ́ coki tié pɔʋ́ bio nɔ́ŋɔ, ɛ bio má bɛlɛ wó tié ná haá tɩllɛ rɛ́, beé wɩ́ɛ́ ɓa áná liwe ní. 17 Amá rʋʋ́ tʋtʋnnɔ nɛ́ rʋ́ cokú tié ker pɔ́ʋ́, tʋtʋnnɔ ná sɩ́ tɩllʋ́ a kaa tɩ́ŋtɩɩ bɩna nʋɔ. Ɛ har mɛ́, kuóro sɩ́ bɩrɛ lɔʋ́ ɓɩnɔ́. Beé wɩ́ɛ́, ʋ bɛlɛ dʋŋɔ́ nɛ́ woú liwe aa tɩllɛ. 18 Kuóro wɩ mɔhɛ̃ rʋ́ ká ker jamáŋ liwe sɩɛrʋ, ʋ wɩ mɔhɛ̃ rʋ́ vɩ́rɩ́ láwɔ́ ɓɩɛ. A makɛ ŋ jamáŋ ná nɛ́ŋ wuu tɩllʋ́ tié ker. Ʋ tɩɩ liwe sɩɛrʋ nɛ́ ʋ bɛlɛ ká ker. 19 Ɛ har mɛ́, ʋ keníŋ tɩ́ŋ dánnʋɔ ná há caasɛ wɩpomɩ́ nágʋɔ rɩ́ cɔ́ɔ́ a zʋ́ Wɩɩsɛ dɩmɩnɩ́ jɩwiisi ná sɩɛrʋ; róŋ nɩ́ vʋ́k'ɔɔsa tʋtʋŋ. A há zʋɛ́, ʋ makɛ dɩhɩ̃ páŋ jaa ná sɩɛrʋ. Ɛ dɩhɩ̃ caasɛ wɩzʋʋlɩ́ rɩ́ cɔ́ɔ́ nɛ́. 20 Ká sɩɛ́ bʋlɩ́ŋ rɩ́ bʋlɛ: Dɩhɩ̃ né nɩ́ vʋ́k'ɔɔsa sɩ́ cʋ́cɔ́ satɔ́ɔ́rɩ́pállɛ, rɩ́ wɩ́bɔmɔ vʋ́k namɩŋsa. Ɓa wɩ mɔhɛ̃ rɩ́wɔ́ kaŋwɔ́ lɛ́ cɔ́ wuolzeno sɩɛrʋ; jamáŋ há zʋ́ busunnu ɓa wɩ́ɛ́. 21 Ɛ har mɛ́, ʋ báá kenɩ́ŋ lɛ́ wuolzeno sɩɛrʋ, a a ŋ gʋɔrɛ bel wuolo ná lʋ́ŋlɔ́ŋsɛ ná baná. Lʋ́lɔ́ŋsɛ ná oro wuu mɩ́ wuolo mɩ́ŋ róŋ. 22 Wuolli ná baná fa ka wuolwiisi nɩ́, ɓa wuu cɔ́r ná baná fa mɔ́ naŋá. Ɓa gbesi ká mɛɛtɩ́r mɛɛsɛllɛ, ka ɓa jɛ́l má mɛɛtɩ́r mɛɛrɛ rɩ́ fí. 23 Ɓa fa sɔ́ zeŋ kíl wuolli ná baná wuu, ká sɔ́ jɩwiisi ɓarɛ zeŋ ná kíle wuu. 24 Ɛ nɛ́ ʋ bʋlɩ́ŋ rɩ́ bʋlɛ́: Jɩwiisi ná ká ziénni nɩ́ (ziéro), róŋ nɩ́ nɩɛ ná há tʋ́ŋ Wɩɩsɛ jaa ná mɛ́ sɩ́ cɔ́ jamáŋ ná vʋ́ka namɩŋsa.