Wɩɩsɛ ɓaarɛ́ wɩ́cʋɔlɩjɩfɛlɔ ná sɩɛrʋ
44
1 Ɛ nɛ́ ʋ báá kaníŋ mʋ́ Wɩɩsɛ dɩmɩnɩ́, dánnʋzʋʋlɩ́ ná há caasɛ wɩɩsɛ dɩpomɩ́ rɩ́ cɔ́ɔ́. Dánnʋɔ ná fa tɔ́ɔ́. 2 Nyuutɩna Wɩɩsɛ sɩɛ́ bʋlɩ́ŋ rɩ́ bʋlɛ́: Dánnʋɔ ná baa wɩ mɔhɛ̃ rɩ́ɩ́wa wurú, nɛrɔ wuu baa sɩ́ ráŋ tɩ́ŋ zʋ́; bee wɩ́ɛ́, Nyuutɩna Wɩɩsɛ, Ɩzɩrayɛl Wɩɩsɛ tɩ́ŋ róŋ nɩ́ zʋ́. Ɩ́ lo tɔ́ɔ́ cɛ́ ɛɛ. 3 Kuóro dʋŋɔ́ nɛ́ sɩ́ zʋʋ́ ké róŋ a dí ɓɩdiile Nyuutɩna Wɩɩsɛ sɩ́ɛ́. Ʋ sɩ́ tɩ́ŋ zawara dánnʋɔ ná nɛ́ zʋ, a bɩrɛ tɩ́ŋ róŋ nɩ́ lɛ́. 4 Ʋ baa keníŋ tɩ́ŋ wɩpomɩ́ nágʋɔ rɩ́ dannʋɔ a zʋ jaa ná sɩɛrʋ há mɩŋ wɩcʋɔlɩjɩzeno ná sɩ́ɛ́. Ŋ há belé, ŋ ná Nyuutɩna Wɩɩsɛ píŋ há sú jaa ná. 5 Ɛ nɛ́, ŋ ɓal kanɩ́ŋ sɩ́ɛ́ cú tié. Nyuutɩna Wɩɩsɛ sɩɛ́ bʋlɩ́ŋ rɩ́ bʋlɛ́: Báálɔ bio, wurí sɩ́ɛ́ a kɩɛlɛ wɩ́ɛ́ ná werí! Wurí dɩllɛ má zesi wɩ́makɛ rɩ́ wɩ́bilé ná ŋ há sɩ́ maksɛ pɛɩ́ a tɩɩnɛ́ wɩ́cʋɔlɩjɩzeno ná mɛ́. Pɔ́ɩ́ tɩɩ mɛ́ werí a tɩ́ŋ wɩ́ɛ́ ná ɩ há mɔhɛ̃ rɩ́ a ká zɩ́ŋ zʋ́ Wɩɩsɛ dɩmɩnɩ́ ná. 6 Bʋ́l pá Ɩzɩrayɛl nɩɛ nɩbɩɩlɛ (nɩvaalɛ) ná a bʋlɛ́: Nyuutɩna Wɩɩsɛ sɛ́: Ɩzɩrayɛlɛ bɛlɛ ɩ́ tʋtʋ́ŋlɔrɛ́ ná duki nɛ́sɛ! 7 Ɩ́ pɔ́sɛ nɩhʋɔra a ka zʋ́ŋ jaa ná; ɓa ná há cókí tɛŋnamɩɛ́ pɛ́ŋcóki dʋŋɔ́, rɩ́wɔ́ ná sɩɛnnɛ há wɩ bɩrsɛ hé Nyuutɩna rɩ́, ɓa zʋ́ a ŋ jaa ná zʋ́ busunnu. Tɛ́ŋ ná ɩ́ há ko ɔsɛ vʋ́ka, a kaníŋ ɓɩdiilé ker, rɩ́ nʋʋ, arɩ́ cɛ́l ko páŋ; ɩ́ rɩ́wɔ́ nɛ́. Ɩ́ sɩɛ́ tʋ́ŋ ɛ a zɔkɩ́ŋ nʋtʋmɛ́ ná. 8 Ɩ́ tɩɩ vɔ́ɔ́, rɩ́ɩ́wa tʋmɩ́ŋ jaa ná mɛ́ a bel onni ná há káŋ tɩllɛ mɛ́ weri, ká lɩsɛ nɩhʋɔra rɩ́wɔ́ nɛ́ bɩrɛ cɩ́nɩ́wa gbel mɩ́ aá tʋmɩŋ tʋtʋmɛ́ ná ŋ dɩmɩnɩ́ ná. 9 Ɛ wɩ́ɛ́, Nyuutɩna Wɩɩsɛ sɛ́: Nɩhʋɔra ná há cokí tɛŋnamɩɛ́ pɛŋcoki dʋŋɔ́, rɩ́wɔ́ ná sɩɛnnɛ há bɩrsɛ hé Nyuutɩna Wɩɩsɛ rɩ́, wɩ mɔhɛ̃ rɩ́wɔ́ zʋ́ŋ dɩmɩnɩ́ ná. Ʋ có rʋ́ ɛɩ́wa sɩɛrʋ nɛ́ŋ má, ʋ wɩ wó. 10 Levitiwa ná há vɛŋ tá, tɛ́ŋ ná mɛ́ Ɩzɩrayɛl nɩɛ má há vɛŋ tá; ká bɩrɛ mʋ aá ɓaarɛ venni, ɓa nɛ́ sɩ́ dí ɓa wɩ́állɛ ná wɩɩla. 11 Wɩcʋɔlɩjɩzeno ná sɩɛrʋ, ɓa tʋtʋmɩ́ nɛ́ ká rɩ́wɔ́ pʋ́pɔ́ŋ dɩmɩnɩ́ ná dánnʋʋsɛ, kaá tʋ́ŋ tʋtʋwɩɛ́la jaa ná sɩɛrʋ. Ɓa nɛ́ sɩ́ ɓʋ́ɓʋ́ʋ́sɛ jamáŋ ná pʋsɛ ɓa há kene ko rɩ́wɔ́ ɔsɛ vʋ́k'físe arɩ́ vʋ́ka ná naŋá. Ɓa nɛ́ sɩ́ tʋ́ŋ aá pá jamáŋ ná. 12 Bee wɩ́ɛ́, ɓa nɛ́ fa lá Ɩzɩrayɛl nɩɛ sɩ́ɛ́ ɓa ɓɩ́ɓaarɛ́ venni, a yikwó hé wɩ́bɔmɔ mɛ́. Ɛ nɛ́ tɛ́, ŋ é Nyuutɩna Wɩɩsɛ sɩ́ bɛŋsɩ́wɔ́ a cɛrwɔ́ wɩ́állɛ ná. 13 Ɓa báá wɩ ŋmɛnɔ kene rɩ́wɔ́ tuupéríŋ a ɔsɛ vʋ́ka páŋ. Ɓa wɩ ŋmɛ́nɔ kene rɩ́wɔ́ zʋ́ŋ dɩmɩnɩ́ ná, arɩ́rɩ́ŋ dʋŋɔ́ dɩmɩnɩ́ ná. Ɓa wɩ́tɩɛnnɛ ná ɓa há ɛɛ, ɓa tɩɩ nɛ́ sɩ́ dí ɛ wɩɩla. 14 Ŋ sɩ́ bilwó wɩ́cʋɔlɩjaa ná tʋtʋmɛ́ wɩ́ɛ́, ɓa nɛ́ sɩ́ mɩŋ róŋ a tʋtʋŋ wɩ́ɛ́ ná há mɔhɛ̃ rɩ́wɔ́ tʋ́ŋ. 15 Amá, tɛ́ŋ ná mɛ́ Ɩzɩrayɛlɛ bɛlɛ há vɛ́ŋ tá; Sadɔkɛ bɛlɛ ná há ká vʋ́k'ɔɔsa é belíŋ dɩmɩnɩ́ ná tʋtʋmɛ́ mɛ́ werí. Ɛ nɛ́ tɛ́ ɓa dʋŋɔ́ nɛ́ wuólo tuupéríŋ a físi nanʋʋnɛ rɩ́ cɛ́l aá páŋ. Nyuutɩna Wɩɩsɛ nɛ́ bʋlɛ́. 16 Ɓa dʋŋɔ́ nɛ́ wóŋ taabil ná tuupérí, ɓa nɛ́ sɩ́ mɩnɩ́ŋ jaa sɩɛrʋ aá tʋ́ŋ tʋtʋmɛ́. 17 Ɓa mɔhɔ̃ rɩ́wɔ́ sú gepúŋmɛɛlɩ́ gɛrɔ nɛ́, ká sɩɛ́ zɩ́ŋ zʋ́ wuolwie ná sɩɛrʋ. Ɓa wɩ mɔhɔ̃ rɩ́wɔ́ sú pelɔ́ŋ gɛrɔ aá tʋ́ŋ wuolwie ná rɩ́ wɩ́cʋɔlɩjaa ná sɩɛrʋ. 18 Ɓa mɔhɔ̃ rɩ́wɔ́ báwɔ́ nyúnni rɩ́ gepúŋmɛɛlɩ́ nyúballɛ, a hé pɛ́nɛ tɩ́ŋtɔ́lɔ́wa. Ká sɩ́ vɔ́wɛ ná há zɩmo pii vɔ́wɩwɔ́ tɩ́ŋsɛ mɛ́; bee wɩ́ɛ́ ʋ sɩ́ a rɩ́wɔ́ súsuóli. 19 Rɩ́wɔ́ nɛ́ lɛ́ wuolwie ná mɛ́ aa zʋ́ wuolzeno ná sɩɛrʋ, jamáŋ ná dɩhɩ̃, ɓa sɩ́ wurki gɛnnɛ ná ɓa há súé tʋ́ŋ, a bil Wɩɩsɛ dɩmɩnɩ́ jɩwiisi ná sɩɛrʋ, ká pá naŋá sú. A makɛ rɩ́ jamáŋ ná há tíkwɔ́ mɛ́. 20 Ɓa wɩ mɔhɛ̃ rɩ́wɔ́ piériwo nyúnni ɓóŋ, ɓa mɔhɔ̃ rɩ́wɔ́ buósi nɩ́, ká sɩ́ nyúcuu tá. 21Vʋ́k'ɔɔsɔ oro wuu wɩ mɔhɛ̃ rʋ́ nyɔ́ sɩ́ŋ ka zʋ wuolwie ná sɩɛrʋ. 22 Vʋ́k'ɔɔsa mɔhɔ̃ rɩ́wɔ́ ja Ɩzɩrayɛl duo sɩɛrʋ toló ná há wɩ bál ɛ̃ nɛ́. Ɓa wɩ mɔhɛ̃ rɩ́wɔ́ ja hákirtáálɛ, ɛrá má bál nɔ́ŋɔ yúháálɔ. Ɓa taŋá wó yúháálɔ ná fa há ká vʋ́k'ɔɔsɔ háálɔ é jɩ́já rɛ́. 23 Vʋ́k'ɔɔsa tʋtʋmɩ́ nɛ́ ká rɩ́wɔ́ karmɩ́ŋ jamáŋ ná rɩ́wɔ́ zɩ́ŋ omo ná há káŋ tɩllɛ rɩ́ omo ná há tóŋ tɩllɛ. Rɩ́wɔ́ zɩ́ŋ omo há ká páár, rɩ́ busunnu omo caksɛ naŋá mɛ́. 24 Rɩ́ kapɔsɛ wɩ́ɩ́ nɛ́ mɩŋ nɩɛ pɛkɛ, ɓa nɛ́ mɔhɛ̃ rɩ́wɔ́ dí sariya. Ɓa sɩɛ́ mɔhɔ̃ rɩ́wɔ́ bel ɛ há cɛrɩ́ŋ wɩ́makɛ ná nɛ́ ká dí sariya ná taŋá mɛ́. Ɓa sɩ́ hé doé tɩ́tɩŋɩ́ŋ wɩ́bile, rɩ́rɩ́ŋ wɩ́makɛ ná ŋ caŋsɛ díí mɩ́, a zɩ́zílíŋ fɩɛ́lɛ tapʋla ná má werí. 25 Vʋk'ɔɔsɔ wuu wɩ mɔhɛ̄́ rʋ́ʋ́ tuu pérí nɛrɔ nɔ́ŋɔ lɛlɔ, a zʋ busunnu; ʋ tóú áná, ʋ maá, ʋ bio, ʋ toló, ʋ maábinɔ́ŋɔ, arɩ́rʋ́ natoló ná há há wɩ balá jɛ́ɛ́. Ʋ wówó nyáŋ é lɛlɔ aá peri rí, ʋ rɩ́wɔ́ há ká balá wɩ́ɛ́. 26 Ʋ busunnu sɛsɛ ná har mɛ́, ʋ mɔhɔ̃ rʋ́ a tapʋlɛ balpɛ́ ka zʋ́ Wɩɩsɛ jaa sɩɛrʋ. 27 Kal ná, ʋ há sɩ́ zʋ́ Wɩɩsɛ dɩmɩnɩ́ ná, ʋ sɩ́ lá sɩɛ́ ɔsʋ́ wɩbɔmɔ vʋ́k. Nyuutɩna Wɩɩsɛ nɛ́ bʋlɛ́. 28 Noú ná há ká vʋ́k'ɔɔsa ker: Ŋ é Nyuutɩna Wɩɩsɛ tɩɩ nɛ́ káwɔ́ ker. Ɩzɩrayɛl tié mɩ́ ɓa wɩ óŋtɩllɛ wuu kene róŋ, ŋ é tɩɩ nɛ́ káwɔ́ tɩllɛ. 29 Vʋ́k'ɔɔsa kere nɛ́ ká vʋka ná ɓa há ɔsɛ pá Nyuutɩna Wɩɩsɛ. Wɩ́bɔmɔ vʋ́k, rɩ́ cʋɔla vʋ́k, arɩ́ óŋ ná wuu Ɩzɩrayɛl nɩɛ há pii páŋ ká báá wʋ́ʋ́ wuó ná, ɓa kere nɛ́ ɛ. 30 Ɩ́ oŋbʋʋrɛwa wuu, arɩ́rɩ́wa onni ná wuu ɩ́ há lɩsɛ páŋ, vʋ́k'ɔɔsa ker ní. Ɩ́ sɩ́ lɩsɩ́wa ɓɩdiile óŋbʋʋrɛ pálɔ a makɛ rɩ́ŋ héíwa jɩɩsɛ nyúú barka. 31 Rɩ pʋna sʋ́wʋ́ tɩɩ mɛ́, ɛ́ rá má dííre há díé ká tá, vʋk'ɔɔsɔ wʋ́ʋ́ dí. Rʋʋ́ ka diwie, ɛrá má pʋna, ʋ wʋʋ́ dí.