Wɩɩsɛ pɩ́ŋ sɩ́ bɩrɛ kóú jaa sɩɛrʋ
43
1 Ʋ baá ɔɔ ŋ tɩ́ŋ wɩ́pomɩ́ rɩ́ dánnʋɔ ná a zʋ́ jaa ná. 2 Ŋ há zʋ́ jaa ná sɩɛrʋ, ŋ ná Ɩzɩrayɛl Wɩɩsɛ píŋ ná há lɛ́ wɩpomɩ́ rɩ́ cɔ́ɔ́ aá ko. Ʋ kué dɔmɛ́ dé nɩhɛ̃ nyii kana dɔmɛ nɛ́. Ʋ píŋ fa cúoli tié wuu ní. 3 Wɩ́múúlináálɔ ná ŋ fa há múúle ná, ʋ rɩ́ tɔ́ɔ́ ná zɔkɛ wɩmúúlináálɔ ná, ɓa rɩ́ wɩ́múúlináálɛ ná ŋ fa há né Kebarɛ fuo nʋɔ; wuu fa nɩhɛ̃ naŋá. Ŋ há néwó ɛ, ŋ ɓalɔ́ kanɩ́ŋ sɩ́ɛ́ cú tié. 4 Nyuutɩna Wɩɩsɛ pɩ́ŋ tɩ́ŋ wɩ́pomɩ́ rɩ́ cɔ́ɔ́ dánnʋɔ ná nɛ́ zʋ́ jaa ná sɩɛrʋ. 5 Ɛ nɛ́, Nyuutɩna Wɩɩsɛ sabɩɩna ko lɩsɩ́ŋ jaa ná mɛ́, a kanɩ́ŋ mʋ́ wuolwie ná sɩɛrʋ. Wɩɩsɛ píŋ fa de cúóli jaa ná sɩɛrʋ. 6 Káŋ nɛ̃́ nɛrɔ há mɩŋ jaa sɩɛrʋ kaa bʋlɩ́ŋ rɩ́ lɩŋó, ká nɛrɔ nɔ́ŋɔ má ko cɩ́nɩ́ŋ laká. 7 A bʋlɩ́ŋ rɩ́ bʋlɛ́: Báálɔ bio, dɩhɩ̃ né nɛ́ káŋ kuóɓasa dɩbilí, ŋ naasɛ dɩsakɩ́ (dɩfɩɛ́lɩ). Ŋ sɩ́ ko mɩŋ Ɩzɩrayɛlɛ bɛlɛ sɩ́sɩ́ɛ́nʋ́wa tɛ́ŋ wuu mɩ́. Ɩzɩrayɛl kuóre, rɩ́wɔ́ jamáŋ báá wɩ́ venni ɓáárɛ, ka hú kuóre sʋsɛ dʋ́ŋduóme nyúnni rɩ́ zɔkɩ́ŋ yɩwero ná. 8 Kuóre sɔ́wɔ́ jaa, ʋ dánnʋɔ rɩ́rɩ́ŋ jaa ná dánnʋɔ ná, ʋ dánnʋɔ daasɛ, arɩ́rɩ́ŋ má jaa ná dánnʋɔ daasɛ wuu ká óŋ balá. Zeŋ balá nɛ́ fa mɩŋrá pɛkɛ. Ɓa tʋ́ŋ wɩ́tɩɛnnɛ a zɔkɩ́ŋ yɩwero ná; ɛ nɛ́ tɛ́ ŋ ló ŋ cɔwɩɩlɔ́ tuwiwó nyúú. 9 Ɛ wɩ́ɛ, mʋ́l neé mɩ́ Ɩzɩrayɛl nɩɛ mɔhɔ̃ rɩ́wɔ́ tá venni ɓáárɛ, a pá kuóre ná há sʋsɛ lɛlɛ kaá lɩɩ́wa sɩɛrʋ; a makɛ rɩ́ŋ ko mɩŋwɔ́ sɩ́sɩ́ɛ́nʋ́wa a kaá mʋ wuu. 10 Ɩ é báálɔ bio, maŋsɛ wɩ́cʋɔlɩjaa ná nɩ́ɩ́sɔ́ pá Ɩzɩrayɛl nɩɛ ná. A makɛ rɩ́wɔ́ zɩ́ŋ ɛ ná jaa ná há sɔɛ́. Ʋ ɛ, ɓa wɩ́zɔ́kɛ ná hɩ̃ɩ̃sɛ sɩ́ kaŋwɔ́. 11Rɩ́ ɓa wɩ́állɛ ná nɛ́ keŋ hɩ̃ɩ̃sɛ páwɔ́ é, makɛ jaa ná nɩ́ɩ́sɔ páwɔ́. Makɛ jaa ná sɔɛ́ há ka ɛ, ʋ sɩɛrʋ jɩwiisi, ʋ dánnʋʋsɛ, tokorowa, arɩrʋ́ ɓɩɛrɛ há ká ɛ ná. Pʋ́ŋsɛ, ʋ wɩ́bile arɩ́rʋ́ wɩmakɛ a páwɔ́ rɩ́wɔ́ tɩ́tɩ́ŋwɔ́. 12 Jaa ná wɩ́bile nɛ́ ɛ. A pɔ́ nyúúri a ká tuwi yakɛ mʋ́l rɩ́, arɩ́rʋ́ kíŋkere ná wuu ká Wɩɩsɛ tɩllɛ nɛ́. Nyɛ́ nɛ́ maŋsɛ jaa ná wɩ́bile.Koro (vʋ́k'ɔɔsɛkoro) wɩ́ɛ́
13 Ná koro ná mʋɔsɔ́. Ʋ cɔ́ɔ́ wuu perí mʋɔtoó nagʋ́tókó sɩ́ɩ́ mɛɛsɛllɛ rɩ́ fí. Ɓa fa lú butuo kíl koro ná. Butuo ná lúŋ ká nágʋ́tóko sɩ́ɩ́ balá, ká jɛ́l má a nágʋ́tóko sɩ́ɩ́ balá; kɔ́ʋ́ nʋgiilo má a nágʋ́tókó sɩ́ɩ́ balá. Ná koro ná ise mʋɔsɔ́. 14 A pɔ́ʋ́ tié rí ká kaa ko lɛ́ buo ná nʋɔ mɛ́, lúŋ ká nágʋ́tókó sɩ́ɩ́ bɛllɛ nɛ́, kɔʋ́ jɛ́l má nágʋ́tókó sɩ́ɩ́. Ká báá pɔ́ nʋɔ ná mɛ́, ká kaa zɛ́ nyúú ká nágʋ́tókó sɩ́ɩ́ baná, ká jɛ́l má a nágʋ́tókó sɩ́ɩ́. 15 Koro ná fa ká nágʋ́tókó sɩ́ɩ́ baná nɛ́; ká nyɩ́sɛ baná cɔʋ́ lʋ́ŋlɔ́ŋsɛ baná ná mɛ́. 16 Ʋ nyúú giiro ná gbesi fa ká nágʋ́tókó sɩ́ɩ́ fí rɩ́ bɛllɛ, jɛ́l má nágʋ́tókó sɩ́ɩ́ fí rí bɛllɛ. Cɔ́rɛ baná ná wuu fa mɔ́ naŋá. 17 Koro ná, bʋllɛ nyúú giiro ná gbesi ká nágʋ́tókó sɩ́ɩ́ fí rɩ́ baná, ká jɛ́l má a nágʋ́tókó sɩ́ɩ́ fí rí baná. Ʋ cɔ́rɛ ná baná wuu fa mɔ́ naŋá. Nyúú giiro ɓóŋɓóŋ ná kílo ná ká nɛ́cɛɛ́ sɩ́ɩ́, butuo ná kílo ná wuu ká nágʋ́tókó, kɔ́ʋ́ naasɛ ná caasɛ wɩpomɩ rɩ́ cɔ́ɔ́. 18 Ɛ nɛ́ ʋ bʋlɩ́ŋ rɩ́ bʋlɛ́: Báálɔ, Nyuutɩna Wɩɩsɛ sɛ́: Rɩ́ koro ná nɛ́ sɔɛ́ tenni, rɩ́ɩ́wa jɩ́já ɔsɛ vʋ́k'físe, a pi cɛ́l waasɛ koro ná: Ná, ɛɛ ná há mɔhɛ̃ rɩ́wɔ́ a. 19 Ɩ sɩ́ ká nɔɓala pá Sadɔkɛ duo sɩɛrʋ Levitiwa ná há ká vʋ́k'ɔɔsa, ŋ lɩsɛ rɩ́wɔ́ tʋtʋmɩ́ŋ tʋtʋmɛ́. Rɩ́wɔ́ ɓʋ ɔsɛ suúri sʋ́lɛ vʋk. Nyuutɩna Wɩɩsɛ nɛ́ bʋlɛ́. 20 Rɩ́wɔ́ nɛ́ ɓʋɛ́, ɩ sɩ́ cakʋ́ cɛ́l ná a takɛ hé koro ná nyɩ́sɛ ná baná mɛ́, ʋ lʋ́ŋlɔ́ŋsɛ baná ná mɛ́, arɩ́rʋ́ kíle ná wuu. Ɛ nɛ́, ɩ sɩ́ a a mʋ́ʋ́rɛ koro ná busunnu rʋ́ áŋ tɩllɛ. 21 Ɩ sɩ́ pi wɩ́bɔmɔ nɔɓala ná, a kaa lɛ́ dɩhɩ̃ ná ɓa há lɩsɛ ɛ wɩ́ɛ́, a nyɩ́kɛ. Ɩ wɩ mɔhɛ̃ rɩ́ ɔɔ Wɩɩsɛ dɩmɩnɩ́ ná. 22 Tapʋlɛ bɛllɛ kal, ɩ sɩ́ ká bʋŋgboko há wɩ kɔsɔ kene, a ɔsɛ suúri sʋlɛ vʋ́k. A mʋ́ʋ́rɛ koro ná busunnu, a nɛ́ ɩ há ɓʋ́ nɔɓala ná tʋ́ŋ. 23 Ɩ nɛ́ ɔsɛ wɩbɔmɔ vʋ́k'ɔsɔ́ ná tenni, ɩ sɩ́ kɛsɛ pʋwɩɛla sɩɛrʋ, nɔɓala há wɩ kɔsɔ kene, arɩ́ peɓala há wɩ kɔsɔ kene. 24 Ɩ sɩ́ kɛsɩ́wɔ́ kaá lɩ́ŋ sɩ́ɛ́, rɩ́ vʋ́k'ɔɔrsa hé yɛsɛ ɓa mɛ́, ka pi ɔsɛ vʋ́k'físe páŋ. 25 Tapʋlɛ balpɛ sɩɛrʋ, kal wuu, ɩ sɩ́ ká bʋŋgboko ɔsɛ wɩbɔmɔ vʋ́k, a ká peɓala rɩ́ nɔɓala há wɩ kɔsɔ kene a a ɛ tɩɩ tɩɩ. Pʋwɩɛla sɩɛrʋ nɛ́, ɩ sɩ́ lɩsɩ́wɔ́. 26 Tapʋlɛ balpɛ ná wuu sɩɛrʋ, ɩ sɩ́ ɔsɛ vʋ́k a mʋ́ʋ́rɛ koro ná busunnu, rʋʋ́ áŋ tɩllɛ. 27 Tapʋlɛ balpɛ ná har mɛ́, tapʋlɛ cori kal, vʋ́k'ɔɔsa sɩ́ púl ɔsɛ koro ná daha ɩ́ vʋ́k'físe, arɩ́rɩ́wa tɛ́ŋfɩɛ́l vʋ́ka a pá Nyuutɩna Wɩɩsɛ. Rɩ́ɩ́wa tʋ́ŋ ɛ ŋ sɩɛrʋ sɩ́ tɔrɩ́wa nyúú. Nyuutɩna Wɩɩsɛ nɛ́ bʋlɛ́.