Wɩ́cʋɔlɩjɩzeno sɩɛrʋ jɩwiisi wɩ́ɛ́
42
1Ɛ har mɛ́, báálɔ báá keníŋ tíŋ wuolzeno dánnʋɔ ná há caasɛ wɩɩsɛ dɩzʋʋlɩ́ rɩ́ cɔɔ a kaníŋ zʋ́ jɩɩsɛ ná há mɩŋ wuolo ná sɩɛrʋ a caasɛ wɩɩsɛ dɩzʋʋlɩ́ jaa ná. 2 Jaa ná há mɩŋ wɩɩsɛ dɩzʋʋlɩ́ rɩ́ cɔɔ gbesi fa ká mɛɛtɩr zɔlɔ nɛ́, ká jɛ́l má a mɛɛtɩr mɛɛsɛllɛ rɩ́ fí. 3 Wuoljɛlɔ rɩ́ wuolwie ná pɛkɛ jɛ́l fa ká mɛɛtɩr mɛɛrɛ nɛ́. Ɛ jaa fa ká jɩɩsɛ botoro ní a sullí naŋá, ʋ rɩ́ pɛkɛ ná há mɩŋ wɩ́cʋɔlɩjaa wuolo ná sɩɛrʋ cɛ caasɛ naŋá. 4 Wuolwie sɩɛrʋ jɩɩsɛ ná sɩ́ɛ́, pɛkɛ fa mɩŋ róŋ ʋ jɛ́l a mɛɛtɩr fí; kɔʋ́ gbesi a mɛɛtɩr zɔlɔ. Dánnʋɔ fa mɩŋ wɩɩsɛ dɩzʋʋlɩ́ rɩ́ cɔɔ aá zʋ́ ráŋ. 5 Nyúúri tuko ná mɛ́, jɩɩsɛ ná fa muuro kíŋkáŋ. Bee wɩ́ɛ́, pɛksɛ fa kanɔ ʋ sɩɛrʋ, a kɩllɛ sɩ́sɩɛnnɩwa arɩ́ mʋ́l tuko ná. 6 Ɓa fa sɔ jɩɩsɛ botoro ní sulli naŋá mɛ́, amá ɓa wɩ dalɩŋe hé, a nɛ́ wuolli zeŋe ná mí ɓa há hé daliŋe ɛ. Ɛ nɛ́ tɛ́ nyúúri jɩɩsɛ ná wɩ zeŋsi a nɛ́ sɩ́sɩ́ɛ́nʋ́wa rɩ́ mʋ́l rɩ́ tuko jɩɩsɛ ná. 7 Wuolwie ná, zeŋ ná mɛ́ ɓa há sɔ́ jɩwiisi ná ɓarɛ́ gbesi ká mɛɛtɩr mɛɛsɛllɛ rɩ́ fí. 8 Jɩɩsɛ ná tɩɩ gbesi ká mɛɛtɩr mɛɛsɛllɛ rɩ́ fí ní. Ká, jɩɩsɛ ná naŋá ɓa há sɔɛ́ ɓarɛ́ wɩ́cʋɔlɩjɩzeno zeŋ ná, é gbesi fa a mɛɛtɩr zɔlɔ nɛ. 9 Dánnʋɔ nɔ́ŋɔ fa mɩŋ jɩɩsɛ ná mʋ́l rɩ́ a bɩrɛ caasɛ wɩɩsɛ dɩpomɩ́ rɩ́; ɓa tíŋ ɛ dánnʋɔ nɛ́ aa zʋ́ wuoljɛlɔ. 10 Wuolo ná zeŋ ná nʋɔ rɩ́ nɛ́ ɓa hé dánnʋɔ ná. Ká caasɛ wɩɩsɛ dɩpomɩ́ neduu rɩ́ jɩɩsɛ mɩŋ róŋ a caasɛ pɛkɛ ná arɩ́ jaa ná há mɩŋ wɩ́cʋɔlɩjɩzeno ná hari. 11 Ɛ jɩɩsɛ gbesi rɩ́wɔ́ jɛ́l dé mɔ́ jɩɩsɛ ná há mɩŋ wɩɩsɛ dɩzʋʋlɩ nɛgʋɔ rɩ́ cɔɔ ná nɛ́. Ɓa sɔ́ɛ́ rɩ́wɔ́ dɩcɩnɛ́, arɩ́wɔ́ dánnʋʋsɛ wuu ká balá. 12 Wɩpomí rɩ́ cɔɔ jɩɩsɛ ná dánnʋʋsɛ, rɩ́ wɩpomí nagʋɔ jɩɩsɛ ná dánnʋʋsɛ dé mɔ́ naŋá. Wuolo ná pɛkɛ dánnʋɔ fa mɩŋ róŋ, wuolo kɛrɛ ná sɩ́ɛ́ a caasɛ wɩɩsɛ dɩpomɩ́, ɓa tɩ́ŋ róŋ aá zʋ́. 13 Ʋ bʋlɩ́ŋ rɩ́ bʋlɛ́: Wɩpomɩ́ nagʋɔ jɩɩsɛ ná, arɩ́ wɩpomɩ́ neduu jɩɩsɛ ná há ɓarɛ́ wuolo ná zeŋ ná ká Wɩɩsɛ tɩllɛ nɛ́. Ɓa sɩɛrʋ nɛ́ vʋ́k'ɔɔrsa ná há tʋŋ Nyuutɩna Wɩɩsɛ jaa tʋtʋmɛ́ sɩ́ ké aá dí ker ná há ká Nyuutɩna Wɩɩsɛ ker. Ɓa sɩɛrʋ nɛ́ ɓa sɩ́ bíl Wɩɩsɛ onni, satɔ́ɔ́rɩ́pallɛ, wɩbɔmɔ vʋ́k pʋsɛ, arɩ́ súúri sʋlɛ́ vʋ́k pʋsɛ. Bee wɩ́ɛ́, ɛ dɩhɩ̃ nɛ́ ká dɩ́paar. 14 Rɩ́ vʋ́k'ɔɔsa nɛ́ ko zʋ́ jaa ná, ɓa wɩ mɔhɛ̃ rɩ́wɔ́ báá tɩ́ŋ Wɩɩsɛ dɩmɩnɩ́ ná a lɛ́ wuoljɛlɔ. Ɓa sɩ́ wurki vʋ́k'ɔɔsɩ́gɛnnɛ ná a bíl jɩɩsɛ ná mɛ́; ká pá gɛnnɛ naŋá sú a lɛ́ jamaŋ rɩ́. 15 Báálɔ ná há maksɛ wɩ́cʋɔlɩjɩzeno sɩɛrʋ jɩɩsɛ ná ko tenni, ʋ keníŋ tíŋ wɩɩsɛ dɩpomɩ́ caasɛ dánnʋɔ ná; a mʋ́ maksɛ wuolo ná sɩɛrʋ wuu. 16 Ʋ keŋ ŋmɛ́máŋsɛ a maksɛ wɩɩsɛ dɩpomɩ́ rɩ́ cɔɔ́ zeŋ ná, ʋ wuu fa ká mɛɛtɩr zɔmmʋɔ. 17 A báá maksɛ wɩɩsɛ dɩpomɩ́ nagʋɔ rɩ́ cɔ́ɔ́ zeŋ ná, ʋ wuu mɛɛtɩr zɔmmʋɔ. 18 A báá ká ŋmɛ́máŋsɛ maksɛ wɩpomɩ́ neduu rɩ́ cɔɔ́ zeŋ ná, mɛɛtɩr zɔmmʋɔ. 19 A bɩrɛ maksɛ wɩzʋʋlɩ́ rɩ́ cɔ́ɔ́ zeŋ ná, mɛɛtɩr zɔmmʋɔ. 20 Zeŋ ná lʋ́lɔ́ŋsɛ ná baná wuu ní ʋ maksɛ: Ʋ gbesi mɛɛtɩr zɔmmʋɔ, ká jɛ́l má mɛɛtɩr zɔmmʋɔ. Zeŋ ná cakɛ Wɩɩsɛ jaa, rɩ́rʋ́ ná há tóó Wɩɩsɛ jaa naŋá mɛ́.