Ezekɩɛl ná heŋgbele wʋ́ɔ́kɛ
37
1 Nyuutɩna Wɩɩsɛ sabɩɩna tuwíŋ nyúú, a píŋ ká mʋ́ pollo butuo zeno há luŋó há su heŋgbele wʋ́ɔ́kɛ sɩɛrʋ. 2 Ʋ kení gʋɔrɛ kíl butuo ná nʋɔ wuu nɩ́. Ŋ noú rɩ́ heŋgbele wʋ́ɔ́kɛ ná fa kanɔ kíŋkáŋ a su pollo ná. 3 Ɛ nɛ́ ʋ bɔsɩ́ŋ bʋlɛ́: Báálɔ bio, heŋgbele wʋ́ɔ́kɛ nyáŋ ɩ há neé sɩ́ wólli bɩrmɛ nɩwómme> Ɛ nɛ́ ŋ sɛ́: Nyuutɩna Wɩɩsɛ ɩ dʋŋɔ́ nɛ́ ʋ̃ʋ̃! 4 Ʋ bʋlɩ́ŋ rɩ́ bʋlɛ́: Láŋ nʋɔ wɩ́ɛ́ bʋl pá heŋgbele wʋ́ɔ́kɛ nyáŋ! Bʋl pɔ́wɔ́ bʋlɛ́: Heŋgbele wʋ́ɔ́kɛ ɩ́ zesi Nyuutɩna Wɩɩsɛ liŋó! 5 Nyuutɩna Wɩɩsɛ bʋl heŋgbele wʋ́ɔ́kɛ ná rɩ́ bʋlɛ́: Ŋ sɩ́ pʋʋsɛ hiẽso poo (sabɩɩna) heíwa mɛ́, rɩ́ɩ́wa bɩrhiẽsi. 6 Ŋ sɩ́ a rɩ́ tɛŋŋmɛ́sɛ́ mɩ́nɩ́wa mɛ́, rɩ́ namɩɛ nyʋ́ tɔ́ɩ́wa mɛ́, ká a rɩ́ tɛŋkɛnɔ má nyʋ́ tɔ́ɩ́wa mɛ́. Ŋ sɩ́ pʋʋsɛ hiẽso poo (sabɩɩna) héíwa mɛ́ rɩ́ɩ́wa bɩrhiẽsi. Ɛ́ mɛ́ nɛ́ rɩ́ɩ́wa zɩ́ŋ rɩ́ŋ nɛ́ ká Nyuutɩna Wɩɩsɛ. 7 Ɛ nɛ́ ŋ ɓɩɛ́na la Nyuutɩna Wɩɩsɛ nʋɔ wɩ́ɛ́ ná ʋ fa há bʋlɩ́ŋ rɩ́, a bʋl. Tɛ́ŋ ná mɛ́ ŋ há lá Wɩɩsɛ nʋɔ wɩ́ɛ́ aá bʋl ɛ́, dɩhɩ̃ dɔmɔ, ká heŋgbele tu aá pérí naŋá. 8 Ŋ há belé, ŋ ná pólé (tɛŋ ŋmɛ́sɛ́) há ko cɔ́ heŋgbele ná mɛ́; namɩɛ nyʋ́nyʋ́ ká tɛŋkɛnɔ má nyʋ́ tɔ́wɔ́ mɛ́. Amá hiẽso sabɩɩna fa há towó mɩ́. 9 Ɛ nɛ́ ʋ bʋlɩ́ŋ rɩ́ bʋlɛ́: Báálɔ bio láŋ nʋɔ bʋl sabɩɩna rɩ́! Bʋlʋ́ rɩ́ bʋlɛ́: Nyuutɩna Wɩɩsɛ sɛ́: Hiẽso sabɩɩna Nyuutɩna Wɩɩsɛ yɩrɛ mɛ́, lɛ́ dunie kíŋkersi baná ná ko zʋ́ nɩsʋsɛ nyáŋ rɩ́wɔ́ bɩrɛ a nɩwómme! 10 Ɛ nɛ́ ŋ bʋl Nyuutɩna Wɩɩsɛ yɩrɛ mɛ́ bʋlɛ́. Ŋ há bʋl ɛ, hiẽso sabɩɩna ko zʋ́wɔ́, ɓa girki isi cɩ́wɔ́ naasɛ daha. Ɓa fa ka nɩkaŋdɔɔ nɛ́ a a lalyoóre. 11 Ʋ bʋlɩ́ŋ rɩ́ bʋlɛ́: Báálɔ bio, heŋgbele wʋ́ɔ́kɛ nyáŋ ká Ɩzɩrayɛl duo wuu ní. Ɓa fa sɛ́: Á sʋsɔ, á heŋgbele pii wʋ́ɔ́kɛ, á báá wɩ yɩɛ́la kene! 12 Ɛ wɩ́ɛ́, la Wɩɩsɛ nʋɔ wɩ́ɛ́ bʋl! Ɩ sɩ́ bʋl pɔ́wɔ́ bʋlɛ́: Nyuutɩna Wɩɩsɛ sɛ́: Ná, ɩ́ é ŋ jamáŋ, ŋ sɩ́ wúnni lɛlbulli ká rɩ́ɩ́wa isi ko lɛ́. Rɩ́ŋ bɩrɛ kaníwa kaá ko Ɩzɩrayɛl tié. 13 Óó, ŋ nɩɛ ŋ sɩ́ wúnniwa lɛlbulli ka rɩ́ɩ́wa isi ko lɛ́. Ɛ nɛ́ sɩɛ́ rɩ́ɩ́wa zɩ́ŋ rɩ́ŋ nɛ́ ká Nyuutɩna Wɩɩsɛ! 14 Ŋ sabɩɩna sɩ́ túwíwa nyúú, a mɩ́nɩ́wa sɩɛnnɛ mɛ́ a makɛ rɩ́ɩ́wa ká hiẽso. ká rɩ́ŋ kaníwa kaá bɩrɛ mʋɩ́wa tíé rɩ́ɩ́wa ké róŋ. Ɛ nɛ́ rɩ́ɩ́wa zɩ́ŋ rɩ́ŋ nɛ́ ká Nyuutɩna Wɩɩsɛ. Ŋ nɛ́ bʋlɛ́, ŋ sɩɛ́ ɔɔ ná ŋ há bʋlɛ́ nɛ́. Nyuutɩna Wɩɩsɛ nɛ́ bʋlɛ́.Ɩzɩrayɛl dɩ́tɩllɛwa bɛllɛ naŋá mɛ́ hé wɩ́ɛ́ (Ɩzɩrayɛl nʋtʋmɛ́ wɩ́ɛ́)
15 Nyuutɩna Wɩɩsɛ liŋó bʋlɩ́ŋ rɩ́ bʋlɛ́: 16 Ɩ́ é báálɔ bio, ɩ sɩ́ cɔɔ dacɔɔ a pʋ́ŋsɛ wɩ́ɛ́ nyáŋ ʋ daha: Pʋ́ŋsɛ pá Ziida arɩ́ Ɩzɩrayɛl nɩɛ ná wuu há súúrú mɩ́. A báá pi dacɔɔ nɔ́ŋɔ a pʋ́ŋsɛ pá Zozɛfɛ ɛrá má Ɩfɩrayɩŋ, arɩ́ Ɩzɩrayɛl nɩɛ ná wuu há súúríwó mɩ́. 17 Ɩ sɩ́ píwó bɛllɛ ná wuu hé naŋá mɛ́, rɩ́wɔ́ a óŋ bála ɩ nɛ́sɛ mɛ́. 18 Ɩ jamáŋ sɩ́ bɔsɩ́ bʋlɛ, ɩ wɩ́ɩ́ né mʋʋl nɛ́ ká bee rɩ́>> 19 Bʋl pɔ́wɔ́ bʋlɛ́: Nyuutɩna Wɩɩsɛ sɛ́: Zozɛfɛ dacɔɔ ná há mɩŋ Ɩfɩrayɩŋ nɛ́sɛ mɛ́, arɩ́ Ɩzɩrayɛl nɩɛ há suúrú mɩ́, ŋ sɩ́ káŋwɔ́ ko suurí Ziida dacɔɔ ná mɛ́ rɩ́wɔ́ a dacɔɔ balá. Ɓa wuu sɩ́ ko hé naŋá mɛ́ a a nɛ́ŋ balá ŋ nɛ́sɛ mɛ́. 20 Ló, dacɔr ná ɩ há pʋ́ŋsɩ́wɔ́ daha mɩnɩ́ nɛ́sɛ mɛ́, rɩ́ nɩɛ wuu ná. 21 Bʋl pɔ́wɔ́ bʋlɛ́: Nyuutɩna Wɩɩsɛ sɛ́: Ná, ŋ sɩ́ a rɩ́ Ɩzɩrayɛl nɩɛ lɛ́ duowa ná sɩɛrʋ ɓa há mʋɛ́, a ko hé naŋá mɛ́, a bɩrkáŋwɔ́ kowó tɔ́ɔ́ mɛ́. 22 Ŋ sɩ́ a rɩ́wɔ́ a duo balá nɩɛ, tɔ́ɔ́ ná mɛ́, arɩ́ Ɩzɩrayɛl pallɛ sɩɛrʋ. Kuóro balá nɛ́ sɩ́ ɔwɔ́ wuu kuóro, a makɛ rɩ́wɔ́ báá sɩ́ duowa bɛllɛ a, ɛrá má dɩ́tɩllɛwa bɛllɛ. 23 Ɓa sɩ́ lɩsɩ́wɔ́ tɩɩ venni ɓáárɛ busunnu ná mɛ́, rɩ́ bɔŋbɔŋ arɩ́ wɩ́tɔka ná wuu ɓa haá ɛɛ́ mɛ́. Ká, róŋ ná wuu ɓa há zʋ́ feŋsí, arɩ́ wɩ́bɔma ná ɓa há ɛɛ, ŋ sɩ́ héwó suurí a mʋʋrɩ́wɔ́ busunnu wuu tá. Ɓa sɩ́ áŋ jamáŋ ká rɩ́ŋ má ɔwɔ́ Wɩɩsɛ. 24 Ɓa wuu sɩ́ tʋ́ŋ nʋnʋɔlɔ balá mɛ́, ká rɩ́ŋ tʋtʋnnɔ Davidi nɛ́ ɔwɔ́ kuóro. Ʋ sɩ́ nʋɔ́lɩ́wɔ́ rɩ́wɔ́ valíŋ wɩ́máŋsɛ ná sɩɛrʋ, kaá zízílíŋ kíŋse ná. 25 Ɓa sɩ́ tɩ́llɛ tɔ́ɔ́ ná, ŋ há pié páŋ tʋtʋnnɔ Zakɔbɛ; ɛ tɔ́ɔ́ mɛ́ nɛ́ ɓa naábalwa fa ke. Ɓa rɩ́wɔ́ heŋbolli arɩ́wɔ́ tolé sɩ́ tɩ́llɛ tɔ́ɔ́ ná a ké róŋ a kaá mʋ wuu; ká rɩ́ŋ tʋtʋnnɔ Davidi ɔ́wɔ́ kuóro a kaá mʋ́ wuu. 26 Ŋ sɩ́ bíl tɛŋfɩ́ɛ́l nʋtʋmɛ́ ŋ rɩ́wɔ́ pɛ́kɛ, ɛ́ nʋtʋmɛ́ sɩ́ a nʋtʋmɛ́ dɩŋɛ. Ŋ sɩ́ a rɩ́wɔ́ pul kíŋkáŋ tɔ́ɔ́ ná mɛ́. Ká rɩ́ŋ sɔ́ŋ wɩ́cʋɔlɩjaa ɓa sɩɛrʋ, ʋ mɩ́ŋ róŋ a kaá mʋ́ wuu. 27 Ɓa sɩɛrʋ nɛ́ ŋ wɩ́cʋɔ́lɩjaa ná sɩ́ mɩ́ŋ. Ŋ sɩ́ ɔwɔ́ Wɩɩsɛ ká rɩ́wɔ́ má áŋ nɩɛ, 28 a makɛ rɩ́ duowa ná zɩ́ŋ, rɩ́ŋ nɛ́ ká Nyuutɩna Wɩɩsɛ há mʋʋrɛ́ Ɩzɩrayɛl busunnu. Ŋ wɩ́cʋɔ́lɩjaa ná sɩ́ mɩŋwɔ́ sɩɛrʋ a kaá mʋ wuu.