Ɓa ɓá zeŋbi pá Ezipiti kuóro
32
1 Bɩ́ŋsɛ fí rɩ́ bɛllɛ nyúú mɩ́, caŋsɛ fí rɩ́ bɛllɛ nyúú mɩ́, dʋ́ŋdʋʋ̃́ tapʋl, Nyuutɩna Wɩɩsɛ lɩŋó bʋlɩ́ŋ rɩ́ bʋlɛ́: 2 Báálɔ bio, ɓá zeŋbí né pá Ezipiti kuóro Faarɔŋ! Bʋl pɔʋ́ bʋlɛ́: Ɩ é Faarɔŋ, ɩ há bɩɩnɛ rɩ́ ká kɩ́ŋkaŋkeŋ nɩ́ a mɩ́ŋ duowa sɩɛrʋ;ɩ fa nɩhɛ̃ nyʋʋ há mɩ́ŋ mʋʋ sɩɛrʋ nɛ́,
a ká fuonni nyii aá guuli,
ká kanʋ́ naasɛ aá kɔrɛ fuonni ná nyii ná wuu. 3 Ɛ wɩ́ɛ́, Nyuutɩna Wɩɩsɛ sɛ́: Tɛ́ŋ ná mɛ́ nɩkana há sɩ́ ciki naŋá mɛ́, ŋ sɩ́ hé bára kanɩ́, rɩ́wɔ́ vɔsɩ́ rɩ́wɔ́ ɓɛ́ŋsɛ. 4 Ɩ lɛlɔ sɩ́ kaanɛ baka mɛ́, rɩ́ diíwiisi wuu, arɩ́ tié nyúú balla wuu ko didi. 5 Ɩ lɛlɔ sɩ́ sʋɔrɛ pallɛ nyúnni, ká rʋ́ naŋkulewa pal tuwi sú polli. 6 Ɩ cɛ́l sɩ́ ɓɛsɛ tɔ́ɔ́ ná tié wuu, a cɛ́ róŋ ɓɛsɛ pallɛ nyúnni, arɩ́ polnaasɛ sɩɛrʋ. 7 Ɩ tapʋl sʋwɩ, ŋ sɩ́ a rɩ́ bána birí, rɩ́ caŋwʋllɛ baá sɩ́ yieru, rɩ́ wɩpomɩ bɩri, ká rɩ́ cana má baá sɩ pʋmmɔ kanʋ́. 8 Ŋ sɩ́ tɩŋɩ́ wɩ́ɛ́ a, rɩ́ bána nyúú onni (wɩɩsɛ, cana, rɩ́ caŋwʋllɛ) baá sɩ́ pʋmmɔ kanʋ́, ká rɩ́ tɔ́ɔ́ ná mɩŋ bino mɩ́. Ŋ é Nyuutɩna Wɩɩsɛ nɛ́ bʋlɛ́. 9 Dukana há sɩ́ nɩ̃ɩ̃ zɔkɛ wɩ́ɛ́, ɓa baŋcɩ́llɛ sɩ́ fukli. Tɔ́hʋɔra ɩ há wɩ́wɔ́ ɩ̃́ má tɩɩ nɩɛ baŋcɩllɛ sɩ́ fukli. 10 Kal ná ŋ há a rɩ́ŋ zɔkɩ́, duowa ɓɩkana nɛ́ sɩ́ mɩŋ sazɔkɔ mɛ́, ká, ŋ há sɩ́ pukíŋ tokowí ɓa kuóre mɩ́, ɓa sɩ́ vɩvaklɛ hewɩ́ŋ. Bee wɩ́ɛ́, ɛ kal ɓa oro wuu sɩ́ fá aá ja waana. 11 Bee wɩ́ɛ́, ŋ é Nyuutɩna Wɩɩsɛ nɛ́ bʋlɛ́: Babɩlɔɔnɛ kuóro tokowí nɛ́ sɩ́ ɓʋ́ɩ́. 12 Ʋ lalyóóríbɩbará ná sɩɛnnɛ há haakɔ nɛ́ sɩ́ ko ɓʋ́ʋ́sɩ́ nɩkana. Ɓa sɩ́ ko zɔkɛ Ezipiti wuu, a ɓʋ́ʋ́sʋ́ nɩɛ wuu a makɛ rʋ́ nyʋ́kɔ ná nyɔʋ́ nyúú mɩ́. 13 Ŋ sɩ́ a rʋ́ pʋsɛ ná há nyɔ nyii Nil fuo mɩ́, wuu sʋsɛ, ká rɩ́ nɛrɔ, ɛrá má pʋna, báá sɩ́ ráŋ mɩnʋ rɩ́ kʋkɔrɛ nyii 14 Ŋ sɩ́ a rɩ́ Ezipiti fuonni nyii hʋ̃ʋ̃sɛ, ká kaanɛ mʋɔ aá pál a nɛ́ nʋʋ há pál ɛ. Ŋ é Nyuutɩna Wɩɩsɛ nɛ́ bʋlɛ́. 15 Ŋ sɩ́ zɔkɛ Ezipiti tɔ́ɔ́ sɩɛrʋ onni wuu mɩɛmɩɛ, a ɓʋ́ʋ́sʋ́ nɩɛ wuu, ká rʋ́ bɩrmɛ́ gɩrbétéké. Ɛ nɛ́ sɩɛ́, rɩ́wɔ́ zɩŋ rɩ́ŋ nɛ́ ká Nyuutɩna Wɩɩsɛ. 16 Zeŋbí né ní, rɩ́ duowa tolé ɓá pá Ezipiti rɩ́rʋ́ nɩkana ná. Ŋ é Nyuutɩna Wɩɩsɛ nɛ́ bʋlɛ́. 17 Bɩŋsɛ fí rɩ́ bɛllɛ nyúú mɩ́, cana tapʋlɛ fí rɩ́ bɔmmʋɔ kal, Nyuutɩna Wɩɩsɛ bʋlɩ́ŋ rɩ́ bʋlɛ́: 18 Nɩbiino bio, wi Ezipiti nɩkana ná wɩ́ɛ́, anɛ́ ʋ rɩ́rʋ́ tolé (rɩ́rʋ́ tɔ́nɛ nɩɛ) tuwí lɛ́lɛ́tɔ́ɔ́; ɓa rɩ́wɔ́ wer ná wuu ɓa tuwí lɛ́lɛtɔ́ɔ́, arɩ́wɔ́ ná há sʋsɛ mʋ́ lɛ́lɛ́tɔ́ɔ́. 19 Ɩ bɩɩnɔ rɩ́ kɛ́ naŋá ná rɛ́>> Sɩɛ́ zɩŋ, pɛkɛnnɛ tɩnáwa ná tokowí há ɓʋ́ʋ́sɛ, ɓa sɩ́ huí má ɓa lɛlbúllí sɩɛrʋ nɛ́! 20 Tokowí nɛ́ sɩ́ ɓʋ́ʋ́sɛ Ezipiti nɩkana ná; a nɛ́ tokowí há ɓʋ́ʋ́sɛ nɩɛ ná naŋá ɛ! 21 Lɛ́lɛ́tɔ́ɔ́ mɛ́, lalyóríbɩbará, rɩ́ nɩhɩɛ̃sɛ sɩ́ caasi bʋlɛ́. Pɛkɛnnɛ tɩnáwa ná tokowí há ɓʋ́ʋ́sɛ sɩ́ tuwí suuríra mɛ́. 22 Ná Asiiri kuóro rɩ́rʋ́ lalyoóre, mɩŋ nɩɛ ná tokowí há ɓʋ́ʋ́sɛ lɛlbúllí pɛksɛ. 23 Ɓa lɛlbúllí mɩŋ tíé mʋ́l nɛ́, kuóro lɛlbúl laká. Ɓa é nɩɛ ná wuu fa walmɛ́ dunie, tokowí ɓʋ́ʋ́sɩ́wɔ́. 24 Elaŋ rɩ́rʋ́ lalyoóre fa mɩŋ ráŋ, ʋ sóójɩwa lɛlbúllí fa kilú lɛlbúlle. Pɛkɛnnɛ tɩnáwa ná fa walmɛ́ dunie má tuwí tíé mʋ́l. Ɓa mɩŋ vukme mɛ́ a nɛ́ lɛ́lɛ́tɔ́ɔ́ nɩɛ. 25 Ɓa hú Elaŋ lal nɩsʋsɛ lɛlbúllí sɩɛrʋ nɛ́, ʋ sóójɩwa lɛlbúllí sɩsɩɛnnɩ́wa mɛ́. Lal sɩɛrʋ nɛ́ pɛkɛnnɛ tɩnáwa ná wuu sʋsɛ. Ɓa fa walmɛ́ tíé nyúú nɩɛ werí. Ɛ nɛ́ tɛ́ mʋ́l neé mɩ́, ɓa rɩ́ lɛ́lɛ́tɔ́ɔ́ nɩɛ mɩŋ vʋkmé (wɩɩla) mɛ́. 26 Mɛsɛkɛ, rɩ́ Tubal arɩ́wɔ́ nɩkana má cɩ́wɔ́ lalyoóre lɛlbúllí sɩsɩɛnnɩ́wɔ́. Ɛ pɛkɛnnɛ tɩnáwa wuu sʋsɛ lal mɛ́ nɛ́, bee wɩ́ɛ́, ɓa fa vukmí dunie werí. 27 Ɛ pɛkɛnnɛ tɩnáwa há sʋsɛ ɓa wɩ́wɔ́ hué lalyoóríbibara lɛlbúllí sɩɛrʋ. Lalyoóríbibará ná há sʋsɛ, ɓa mʋ́ lɛ́lɛ́tɔ́ɔ́ arɩ́wɔ́ lalyoórícíksɛ, ɓa píwó tokowié héwó nyúúrí; ká ɓa wɩ́bɔma káánɩ́wɔ́ heŋgbelle mí. Bee wɩ́ɛ́ lalyóóríbara nyáŋ duo mʋ́ lɛ́lɛ́tɔ́ɔ́ rɩ́wɔ́ lalcɩ́ksɛ nɛ́. 28 Ɩ é tɩɩ, zɩ́ŋ rɩ́wɔ́ sɩ́ ŋmɔwɩ́ ɓʋ́ pɛkɛnnɛ sɩɛrʋ, a huí nɩɛ ná tokowí há ɓʋ́ʋ́sɛ lɛlbúllí sɩɛrʋ. 29 Edomitiwa kuóre, rɩ́wɔ́ sɩdííre, fa ká bɩbará rɛ́, ká ɓa píwó lɛ́lɛ hu pɛkɛnnɛ tɩnáwa lɛlbúllí sɩɛrʋ. 30 Wɩɩsɛ dɩpomɩ́ nɛgʋɔ nɩɛ rɩ́ Sɩdɔŋ nɩɛ wuu nɛ́ tuwí lɛ́lɛ́tɔ́ɔ́. Ɓa fa keŋ doé aá vukmi dunie, a má mʋ́l neé mɩ́ ɛ pɛkɛnnɛ tɩnáwa, rɩ́ nɩɛ ná há sʋsɛ lal mɛ́ wuu mɩŋ hɩ̃ɩ̃sɛ mɛ́. Ɓa rɩ́ nɩɛ ná wuu há mɩŋ lɛ́lɛ́tɔ́ɔ́ mɛ́ wɩɩla ká balá. 31 Faarɔŋ há sɩ́ néwó ʋ baŋcɩ́la sɩ́ pɔrɛ mʋɔ ʋ nɩkana ná wɩ́ɛ́. Faarɔŋ arírʋ́ lalyoóré ná wuu, tokowí nɛ́ sɩ́ ɓʋ́ʋ́sɩ́wɔ́. Nyuutɩna Wɩɩsɛ nɛ́ bʋlɛ́. 32 Ŋ pɔʋ́ ŋmɛnɔ ʋ walmɛ́ dunie, amá ɛ har mɛ́ ɓa sɩ́ huú arɩ́ nɩɛ ná tokowí há ɓʋ́ʋ́sɛ pɛkɛnnɛ tɩnáwa lɛ́lbúllí sɩɛrʋ. Faarɔŋ rɩ́rʋ́ nɩkana ná wuu. Nyuutɩna Wɩɩsɛ nɛ́ bʋlɛ́. A révoir a partir du verset 17 à 32