Sɛdɩrɛ tuzeno sɩ́ŋsʋɔlɔ wɩ́ɛ́
31
1Bɩ́ŋsɛ fí rɩ́ oro nyúú mɩ́, caŋsɛ botoro dʋ́ŋdʋʋ̃́ tapʋl, Nyuutɩna Wɩɩsɛ lɩŋó bʋlɩ́ŋ rɩ́ bʋlɛ́: 2 Báálɔ bio, bʋl Ezipiti kuóro Faarɔŋ, rɩ́rʋ́ nɩkana ná rɩ́, bʋlɛ́: Ɩ é nɩpɩŋó, ɩ nɩ́ɩ́sɛ nɔ́ŋɔ nɛ́ ká áŋ rɛ́>> 3 Asiiri nɩhɛ̃́ Lɩbaŋ sɛdɩrɛ tuu nɩ́: Ʋ hílli wero kíŋkaŋ a ká fɩ́ɛ́l. Ʋ ká tuzeŋ rɩ́, ʋ gbesi kɛ́ tunni a zɛ́ nyúúrí ɓóŋɓóŋ. 4 Ʋ fa mɩŋ pallɛ pɛksɛ butuonni nyinaasɛ dɩhɩ̃́ nɛ́. Ɛ nyii cɩ́lo ɔɔ ʋ wa kíŋkáŋ kɩllɛ baka tunni ná wuu, há mɩnʋ́ láká. 5 Ɛ nɛ́ tɛ́, ʋ isi kɩllɛ baka tuuni ná naŋá, a ká hílli ɓɩkana; ká ʋ nálursi jɛrɛ lá dɩhɩ̃ wuu. Bee wɩ́ɛ́ nyii fa perú werí. 6 Ɛ tuu hílli mɩ́ nɛ́ baka díwíísi wuu faá cɛ́wɔ́ dɛllɛ, ballɔ wuu ja rʋ́ lʋ́l, ʋ ko lʋlʋ́ mʋ́l nɛ́, ká dunie dukana nɩɛ má ko kenú fɩ́ɛ́l mɛ́ aá fɩɛ́lɛ. 7 Ʋ fa ká tuzeŋ rɩ́, a ká hílli ɓɩkana, kɔ́ʋ́ nálúrsi má zʋ tié werí. Ʋ fa cɩ́ dɩhɩ̃ ná há pɛ́ nyii. 8 Wɩɩsɛ záádɛ́ sɩɛrʋ, sɛdɩrɛ tuuni ná há mɩ́ŋ róŋ, tuu oro wuu too, a kɩllɩ́. Ʋ hílli rɩ́rʋ́ nálursi fa kɛ tunni ná wuu há mɩŋ róŋ. Ʋ paarɛ tʋlɛ wer fa kɩ́wɔ́ wuu nɩ́. 9 Wɩɩsɛ záádɛ́ ná sɩɛrʋ, ʋ hílli kanɛ rɩ́wɔ́ wer nɛ́ fa kɛ́ tunni ná naŋá. Ɛ wɩ́ɛ́ nɛ́ tɛ́, tunni ná naŋá fa cɩ́nʋ́ mɛ́. 10 Ɛ nɛ́ tɛ́, Nyuutɩna Wɩɩsɛ sɛ́: Ɩ wɛɛ fa kɛ naŋá ná wuu nɩ́, ɩ nálúrsi fa zʋ mɩŋ tunni mʋ́ʋ́la, ɛ nɛ́ tɛ́ ɩɩ nyʋkɩ tɩɩ. 11 Ɛ wɩ́ɛ́ nɛ́ tɛ́, ŋ kirí tá, a pií hé duowa ná sɩɛnnɛ há haákɔ nɛ́ŋsa mɛ́, rɩ́wɔ́ bɛ́ŋsɩ́. 12 Nɩhʋɔra sɩ́ lɛ́ duowa ná sɩɛnnɛ há haákɔ sɩɛrʋ, a ko cokú yó, rʋ́ hílli bonni tɔ́ɔ́ pallɛ rɩ́ pallɛ buonnɛ mɛ́. Ɛ har mɛ́, dunie nɩɛ ná má wuu fa haá ko pɩ́nʋ́ fɩɛ́l mɛ́, má báá wɩ ráŋ ko. 13 Tuu ná mukur ná daha, baka diíwiisi sɩ́ ko aá pɔ́mʋ́ daha, ká balla má ko pɩnʋ́ hillí ná mʋ́ʋ́la. 14 Ɛ nɛ́ tɛ́, tuu ná wuu há mɩŋ nyii dɩhɩ̃ wa wólli wa lékílékí, kɔ́ʋ́ nálúrsi má sɩ́ tɛrɛ zʋ tuuni mʋ́ʋ́la. Sɛdɩrɛ tuu ná wuu há cɩ́ nyii dɩhɩ̃ wa wólli isí lékílékí. Ɓa wuu sɩ́ sʋsɛ a mʋɔlɛ tié, a nɛ́ ɛ nɩbiine ná há sʋsɛ mʋ́ lɛlɛ tɔ́ɔ́. 15 Ɛ wɩ́ɛ́, Nyuutɩna Wɩɩsɛ sɛ́: Sɛdɩrɛ tuu lɛlɛ tɔ́ɔ́ kal zʋɩ́, ŋ sɩ́ a rɩ́ tuuni mɩ́ŋ wiile mí. Ɛ tɛ́ŋ mɛ́, ŋ sɩ́ tɩŋʋ́ wɩ́ɛ́ a rɩ́ polnaasɛ rɩ́ fuoni nyii hʋ̃ʋ̃sɛ. Ká, Lɩbaŋ tɔ́ɔ́ a bɩno dʋŋɔ́, rɩ́ baka tuuni wuu sʋsɛ hil. 16 Tɛ́ŋ ná mɛ́, ŋ há sɩ́ a rɩ́ tuu né tuwí lɛlɛ tɔ́ɔ́, a nɛ́ ɓa ná há tuwí lɛlɛ tɔ́ɔ́; tɔ́nɛ ná há sɩ́ nɛ̃, sɩ́ vɩvaklɛ hewɩ́ŋ. Ká rɩ́, Ɛdɛŋ záádɛ ná sɩɛrʋ, tié mʋ́l rɩ́ tuuni rɩ́ tuuni ná há keŋ paarɛ weré, arɩ́ Libaŋ tuuni ná wuu há nyɔ́ nyii vɔkɛ sɩ́ jʋ́jʋɔsɛ́. 17 Ʋ é, rɩ́wɔ́, ɓa wuu nɛ́ tuwí lɛlɛ tɔ́ɔ́, a suurí nɩɛ ná tokówí há ɓʋ́ʋ́sɛ mɛ́. Ɓa nɛ́ fa kɔʋ́ doé; ʋ yɩrɛ mɛ́ nɛ́ ɓa keŋ duowa ná sɩɛrʋ. 18 Ɛdɛŋ tuuni sɩɛrʋ, tuu orí rɛ́ fa kení pɩ́ŋ rɩ́rɩ́ gbesi ná nɩ́ɩ́sɔ>> Sɩɛ́ ná, ɩ rɩ́ Ɛdɛŋ tuuni ná, ŋ sɩ́ a rɩ́ɩ́wa tuwí lɛlɛ tɔ́ɔ́. Ɓa sɩ́ huí pɛkɛnnɛ tɩnáwa lɛlbulli sɩɛrʋ nɛ́, a nɛ́ nɩɛ ná tokówí há ɓʋ́ʋ́sɛ. Nyɛ́ nɛ́, ŋ sɩ́ pi tʋ́ŋ Faarɔŋ rɩ́rʋ́ nɩɛ ná mɛ́. Ŋ é Nyuutɩna Wɩɩsɛ nɛ́ bʋlɛ́.