Nyuutɩna Wɩɩsɛ tapʋl, rɩ́ Ezipiti wɩ́ɛ́
30
1Nyuutɩna Wɩɩsɛ bʋlɩ́ŋ rɩ́ bʋlɛ́: 2 Báálɔ bio, láŋ nʋɔ wɩ́ɛ́ bʋl pɔ́wɔ́, bʋlɛ́: Nyuutɩna Wɩɩsɛ sɛ́: Aɩ́! Ɩ́ wiwí tapʋl bɔmɔ neé há kué wɩ́ɛ́! 3 Bee wɩ́ɛ́, Dɩtennitoo tapʋl báá wɩ ból, ʋ peri tɛsɩɩ, ɛ tapʋl sɩ́ a bɩno: Ɛ tapʋl sɩ́ a duowa tapʋl nɛ́. 4 Tokowí sɩ́ ko Ezipiti mɩ́; Etiopi tɔ́ɔ́ sɩ́ a wɩɩla tɔ́ɔ́, nɩɛ sɩ́ sʋsɛ Ezipiti mɩ́, ɓa sɩ́ pɔʋ́ kuóɓɩɛ, ká zɔkɛ tɔ́ɔ́ ná. 5 Etiopi nɩɛ, rɩ́ Puti nɩɛ, rɩ́ Ludi nɩɛ, rɩ́ Kuubɛ nɩɛ, arɩ́ ɓa ná há ká nʋtʋmɛ nɩɛ, tokowí nɛ́ sɩ́ ɓʋ́ʋ́sɩ́wɔ́. 6 Nyuutɩna Wɩɩsɛ sɛ́: Ezipiti dɩtɩɛkɛ sɩ́ ɓallɛ, ká rʋ́ nyʋkɔ nyɔʋ́ nyúú mɩ́. A de pɔ́ Migɩdɔl mɩ́, ká kaá mʋ́ yakɛ Sɩɛnɛ tɔ́ɔ́ mɛ́, tokowí nɛ́ sɩ́ ɓʋ́ʋ́sɩ́wɔ́. Nyuutɩna Wɩɩsɛ nɛ́ bʋlɛ́. 7 Ɓá zɔkɛ́ sɩ́ kɩllɛ tɔ́nɛ ná naŋá, ká rɩ́wɔ́ tɔ́nɛ má a tɔ́ɓoru, a kɩllɛ tɔ́nɛ ná naŋá. 8 Ŋ sɩ́ nyɩkɛ Ezipiti tɔ́ɔ́ nɩŋ, rʋ́ dɩyúóle wuu zɔkɛ. Ɛ tɛ́ŋ mɩ́, ɓá sɩ́ zɩŋ rɩ́ŋ nɛ́ ká Nyuutɩna Wɩɩsɛ. 9 Ɛ tapʋl, ŋ sɩ́ lɩsɛ nɩɛ rɩ́wɔ́ zʋ nyidaborsi a mʋ́ zɔkɛ Etiopi nɩɛ há ké tɛŋfɩɛ́l mɛ́. Ezipiti kal zɔkɩ́ ná, ɓa sɩ́ mɩŋ wɩɩla mɛ́. Bee wɩ́ɛ́, ɛ tapʋl báá wɩ bol! 10 Ɛ wɩ́ɛ́, Nyuutɩna Wɩɩsɛ sɛ́: Ŋ sɩ́ a rɩ́ Babɩlɔŋnɛ kuóro Nebikanezaare tokowí nɛ́ ɓʋ́ʋ́sɛ Ezipiti nɩkana. 11 Ʋ sɩ́ ko, rɩ́rʋ́ nɩɛ ná há keŋ sahɔɔ a kɩllɛ duowa ná naŋá nɩɛ, a zɔkɛ tɔ́ɔ́ ná. Ɓa sɩ́ ko rɩ́ tokowié a ɓʋ́ʋ́sɛ Ezipiti nɩɛ, rɩ́ tɔ́ɔ́ ná sú rɩ́ sʋsɛ. 12 Ŋ sɩ́ a rɩ́ Nɩl fuonaasɛ nyii wuu hʋ́ʋ̃́sɛ, ká rɩ́wɔ́ hɩ́l. Ká pi tɔ́ɔ́ ná hé duhʋɔra sɩɛnnɛ há haakɔ nɛ́sɛ mɛ́, rɩ́wɔ́ zɔkʋ́ ká pɔʋ́ ɓɩɛ. Ŋ é Nyuutɩna Wɩɩsɛ nɛ́ bʋlɛ́. 13 Nyuutɩna Wɩɩsɛ sɛ́: Ŋ báá sɩ́ a rɩ́wɔ́ zɔkɛ Nofi tɔ́ɔ́ venni, rɩ́wɔ́ wɩŋsa. Kuóro báá wɩ Ezipiti mɩ́ mɩŋ, ká rɩ́ hewɩ́ŋ dʋŋɔ́ nɛ́ sú tɔ́ɔ́ ná. 14 Wɩhala sɩ́ pú Patʋrɔsɛ tɔ́ɔ́, rɩ́ nɩŋ dí Tisɔŋ tɔ́ɔ́, ká rɩ́ŋ díŋ sariya No tɔ́ɔ́ nyúú. 15 Ŋ cɔwɩɩlɔ́ sɩ́ tuwí Sɛŋ nyúú, Ezipiti ballí dídí, ká ɓʋ́ʋ́sɛ No tɔ́ɔ́ nɩkana. 16 Ezipiti mɩ́, ŋ sɩ́ hé nɩŋ róŋ, a hé vúkme Sɛŋ tɔ́ɔ́ mɩ́. Ká a, wahɔ tóŋtóŋ rɩ́ dɩŋdɔma cɔrɛ Nofa zekume ka zʋ zɔkɛ tɔ́ɔ́ ná. 17 Tokowí sɩ́ ɓʋ́ʋ́sɛ Ɔŋ rɩ́ Pi-Bɛsɛtɛ báála, ká rɩ́wɔ́ kɛsɩ́wɔ́ nɩkaana ká mʋ́ yomí sɩɛrʋ. 18 Tapʋl ná ŋ há sɩ́ a rɩ́ Ezipiti doé tenni, ká rʋ́ nyʋkɔ má nyɔ́ʋ́ nyúú mɩ́; ɛ tapʋl, Tafahɛsɛ tɔ́ɔ́ mɛ́ wahɔ wa mɩŋ. Ɛ tapʋl, tɔ́ɔ́ ná sɩ́ a bino dʋŋɔ́; ká rɩ́wɔ́ kɛsʋ́ tolé ká mʋ yomɩ́ sɩɛrʋ. 19 Ŋ sɩ́ dí saríya a cɛ́ Ezipiti mɩ́, a makɛ rɩ́wɔ́ zɩ́ŋ rɩ́ŋ nɛ́ Nyuutɩna Wɩɩsɛ. 20 Bɩ́ŋsɛ fí rɩ́ oro nyúú mɩ́, dʋ́ŋdʋʋ̃́ cana tapʋlɛ balpɛ kal, Nyuutɩna Wɩɩsɛ liŋó bʋlɩ́ŋ rɩ́ bʋlɛ́: 21Báálɔ bio, Ezipiti kuóro Faarɔŋ tíŋ tennó; ká ʋ bɩrmɛ́ pʋɔla aá ja vaarɛ, amá nɛ́ŋ tó há sɩ́ sɛsʋ́ fʋrɛ rʋ́ duori, a wóllí ká tokowí. 22 Ɛ nɛ́ tɛ́, Nyuutɩna Wɩɩsɛ sɛ́: Ŋ cɛ́ Ezipiti kuóro Faarɔŋ mɩ́. Ŋ sɩ́ bonnú váŋsɛ, vaamɔ ná fa há kɔʋ́ doé, rɩ́ vasʋwɩ́ ná. Ʋ báá wɩ tokowí ká. 23 Ŋ sɩ́ kirí Ezipiti nɩɛ rɩ́wɔ́ pɩsɛ zʋ duowa sɩɛrʋ, rɩ́ tɔ́nɛ sɩɛnnɛ. 24 Ŋ sɩ́ pá Babɩlɔŋnɛ kuóro doé, a píŋ tokowí heú nɛ́sɛ mɛ́; rʋ́ ŋmɔwɛ Faarɔŋ vaŋsɛ bonni. Ʋ wɩɩla sɩ́ nɛ́ nɛrɔ há pɩrɛ a ná wɩɩla sʋwɛ nɛ́. 25 Babɩlɔŋnɛ kuóro tɩ́ŋ sɩ́ duki Faarɔŋ tɩ́ŋ rʋ́ báá sɩ́ wólli a wɩ́ɩ́ wuu. Ŋ tɩɩ nɛ́ sɩ́ pɔʋ́ tokowí rʋ́ ká zɔkɛ Ezipiti tɔ́ɔ́. A makɛ rɩ́ nɩɛ zɩŋ rɩ́ŋ nɛ́ ká Nyuutɩna Wɩɩsɛ. 26 Ŋ sɩ́ ŋmɔ́wɛ Ezipiti nɩɛ; rɩ́wɔ́ pɩsɛ zʋ duowa sɩɛrʋ, tɔ́nɛ naŋá mɩ́. Ɛ mɛ́ nɛ́ rɩ́wɔ́ zɩ́ŋ rɩ́ŋ nɛ́ ká Nyuutɩna Wɩɩsɛ.