Nyuutɩna Wɩɩsɛ gaasɛ wɩ́ɛ́ Ezipiti tɔ́ɔ́ nɩɛ nyúú
29
1Bɩŋsɛ fí nyúú mí, caŋsɛ fí nyúú mɩ́, tapʋlɛ fí kal, Nyuutɩna Wɩɩsɛ bʋlɩ́ŋ rɩ́ bʋlɛ́: 2 «Báálɔ bio, bɩrɩ́ sɩ́ɛ́ hé Ezipiti kuóro Faarɔŋ, arɩ́ Ezipiti nɩɛ wuu rɩ́, a bʋlɩ́ŋ nʋɔ wɩ́ɛ́ pɔ́wɔ́. 3 Bʋl pɔ́wɔ́ bʋlɛ́: Nyuutɩna Wɩɩsɛ sɛ́: Ɩ é Faarɔŋ, Ezipiti kuóro ŋ cɩ́nɩ́ mɛ́ rɛ́. Ɩ sɩ́ ká dɩragɔŋ (dʋŋ) a pɛ Nɩl nyii sɩɛrʋ. A ŋmɔwɩ́ báŋcɩla mɛ́ bʋlɛ́: “Nɩl fuo káŋ dʋŋɔ́ tɩllɛ nɛ́; ŋ nɛ́ luú.” 4 Sɩɛ́ ná, hɔɔ lɔkɛ́ nɛ́ ŋ sɩ́ ká lɔkɩ́ paŋá mɛ́, a pɔsɩ́ rɩ́ Nɩl fuo naŋwʋllɛ ná wuu ká lɛ́ tá gɩ́ŋgɩŋí. 5 Ŋ sɩ́ kanɩ́, a kɛsɩ́ fuonni ná naŋwʋllɛ ná wuu a yó tá gírbétéké mɩ́. Ɩ sɩ́ sʋwɛ rɩ́ namɩɛ sʋɔrɛ ɓɛsɛ baka tié wuu, rɩ́ balla arɩ́ diíwiisi ko dí. 6 Ŋ sɩ́ a rɩ́wɔ́ saŋɛ́ ná ɓa fa há saŋ Ɩzɩrayɛl mɩ́, sɩ́ nyʋɔrɛ kanʋ́ a nɛ́ mʋnyɔɔ. Ɛ nɛ́, Ezipiti nɩɛ sɩ́ zɩ́ŋ rɩ́ŋ nɛ́ ká Nyuutɩna Wɩɩsɛ. 7 Ɓa wuu fa tɩɛkɩ́ mɩ́ nɛ́, ɛ nɛ́ ɩ vaŋsɛ ko yʋɔrɛ. Ɩ nɛ́ fa kawɔ́ doé, ɛ nɛ́ ɩ ko gúl, ká ɓa ɓallɛ lɩsɛ tɩŋsɛ. 8 Ɛ nɛ́ tɛ́, Nyuutɩna Wɩɩsɛ sɛ́: Tokowí nɛ́ sɩ́ ɓʋ́ʋ́sɩ́ tɔ́ɔ́ báála rɩ́ pʋsɛ wuu. 9 Ká rɩ́ Ezipiti tɔ́ɔ́ bɩrmɛ́ wiile tɔ́ɔ́ (tɔ́ɓoó). Nɩɛ sɩ́ tɩ́ŋ ɛ mɛ́, zɩŋ rɩ́ŋ nɛ́ ká Dɩtennitoo. Bee wɩ́ɛ́, ʋ ŋmɔwʋ́ báŋcɩla mɛ́ bʋlɛ́: Nɩl fuo káŋ dʋŋɔ́ tɩllɛ, ŋ nɛ́ luú! 10 Ɛ nɛ́ tɛ́, ŋ isi dahá cɩnɩ́ rɩ́rɩ́ fuonni ná mɛ́, rɩ́ŋ a rɩ́ Ezipiti tɔ́ɔ́ bɩrmɛ́ zɔkrʋ́ rɩ́ wiile tɔ́ɔ́. A dé pɔ́ Mɩgɩdɔlɛ tɔ́ɔ́ mɛ́, rɩ́ Sɩɛnɛ tɔ́ɔ́ mɛ́, ka kaa mʋ́ yakɛ Etiopi súsúbʋɔnnɛ mɛ́. 11 Nɩbɩŋ wʋɔ a rʋ́ʋ́ mɩŋ róŋ, pʋna wʋɔ a rʋ́ mɩ́ŋ ráŋ. A kaa ja bɩŋsɛ mɛɛsɛllɛ nɛŋ há wʋɔ a rʋ́ mɩ́ŋ ɛ tɔ́ɔ́ sɩɛnnɛ. 12 Ezipiti tɔ́ɔ́ sɩ́ caasɛ a gɩr pãã a kɩllɛ tɔ́nɛ ná naŋá. (Tɔ́ɔ́ zɔkɛɛ ná wuu sɩɛrʋ Ezipiti zɔkɛ nɛ́ sɩ́ kɩllɩwɔ́ wuu). Ká rʋ́ʋ́ tɔ́nɛ má zɔkɛ kɩllɛ tɔ́nɛ ná naŋá tɔ́nɛ, a kaa ja bɩŋsɛ mɛɛsɛllɛ. Ŋ sɩ́ kirí Ezipiti nɩɛ rɩ́wɔ́ pɩsɛ lɛ́ zʋ mɩ́ duowa sɩɛrʋ tɔ́nɛ mɩ́. 13 Nyuutɩna Wɩɩsɛ sɛ́: Bɩ́ŋsɛ mɛɛsɛllɛ har mɛ́, ŋ sɩ́ a rɩ́ Ezipiti nɩɛ há pɩsɛ zʋ mɩŋ duohʋɔra ná sɩɛrʋ ko hé naŋá mɛ́. 14 Ŋ sɩ́ bɩrɛ ká Ezipiti nɩkɛsɛ ná bɩrɛ kowó tɔ́ɔ́ tɩɩ sɩɛrʋ, Patɩrɔsɛ mɩ́. Ɓa dɩtɩllɛ sɩ́ a ɓɩwie; 15 ʋ sɩ́ a dɩtɩllɛ ná naŋá sɩɛrʋ ɓɩwié, a makɛ rʋ́ʋ́ báá sɩ́ doé dí dɩtɩllɛ ná naŋá nyúú. 16 Ɩzɩrayɛl nɩɛ báá wɩ́wɔ́ yɩɛla pii héwó mɩ́, ɓa rá báá toó nɩɛ ná há sɩ́ ko aá pɛɩ́wa mɛ́. Ɛ nɛ́, rɩ́wɔ́ zɩ́ŋ rɩ́ŋ nɛ́ ká Nyuutɩna Dɩtennitoó Wɩɩsɛ.Kuóro Nebikanezaare sɩ́ yó dí Ezipiti
17 Bɩ́ŋsɛ mɛɛrɛ rɩ́ balpɛ nyúú mɩ́, cana dʋ́ŋdʋʋ̃́ tapʋl, Nyuutɩna Wɩɩsɛ bʋlɩ́ŋ rɩ́ bʋlɛ: 18 Báálɔ bio, ná, Babɩlɔŋnɛ kuóro Nebikanezaare caasɔ a ʋ sóójɩwa tʋ́ŋ tʋtʋduorú Tiiri wɩ́ɛ́; ɓa naŋá cɩ́ɩ́nɛ ɓɩɛ ɓa nyúnni pii ɓɩ́l, ká naŋá má baasɛ cɩksɛ ɓa vaparsɛ murki. Wɩ́ɛ́ ná wuu, ʋ há tʋmɛ́ Tiiri yɩr mɛ́, ʋ rɩ́rʋ́ sóójɩwa wɩ nyʋɔrɛ oro wuu neé ɓa sɩɛrʋ. 19 Ɛ nɛ́ tɛ́, ŋ é Nyuutɩna Wɩɩsɛ sɛ́: Babɩlɔŋnɛ kuóro Nebikanezaare nɛ́ sɩ́ tɩllɛ Ezipiti tɔ́ɔ́. Ʋ sɩ́ tɩllɛ tɔ́ɔ́ ná a piésʋ́ ɓɩɛ wuu kaa cól. Ɛ ɓɩɛ nɛ́ sɩ́ ɔɔ sóójɩwa tume, 20 Ezipiti nɛ́, ŋ sɩ́ pi tumú wɩɩla ná wuu ʋ há neé mʋ́l mɛ́. Bee wɩ́ɛ́, ʋ nɩɛ tʋmɔ́ páŋ. Ŋ é Nyuutɩna Wɩɩsɛ nɛ́ bʋlɛ́: 21 Ɛ tapʋl, ŋ sɩ́ bɩr pá Ɩzɩrayɛl doé, a pɛɩ́ tɩɩ doé rɩ́ wóllí wurí nʋɔ bʋl wɩ́ɛ́ páwɔ́. Ɛ nɛ́ rɩ́wɔ́ zɩ́ŋ, rɩ́ŋ nɛ́ ká Nyuutɩna Wɩɩsɛ.