Wɩɩlawa há sɩ́ dí Amɔnɩtiwa wɩ́ɛ́
25
1 Nyuutɩna Wɩɩsɛ bʋlɩ́ŋ rɩ́ bʋlɛ: 2 «Ɩ é báálɔ bio bɩrɩ́ sɩ́ɛ́ caasɛ Amɔnɩtiwa rɩ́, a láŋ nʋɔ wɩ́ɛ́ bʋl a pɔ́wɔ́! 3 Bʋl pɔwɔ́ bʋlɛ́: Ɩ́ é Amɔŋ bɛlɛ, ɩ́ zesi Nyuutɩna Wɩɩsɛ há sʋʋ ná: Ɩ́ dié faa jʋɔsɔ rɛ́, ŋ jaa ná há zʋ busunnu, ɓa há zɔkɛ Ɩzɩrayɛl tɔ́ɔ́ ná wuu, a rɩ́wɔ́ há kɛsɛ Ziida nɩɛ ká mʋ́ yomɩ́ sɩɛrʋ. 4 Ɛ wɩ́ɛ́, nuó ná ŋ há sɩ́ tʋmɩ́wa mɛ́: Nɩgʋ́ɔ́rɛ́ ná há mɩŋ wɩɩsɛ dɩpomɩ́ sɩ́ ko yó lɛɩ́ tɔ́ɔ́ a cíkwó táŋtɛ́wa a ké róŋ. Ɓa nɛ́ sɩ́ tɩllɛ tɔ́ɔ́ ná tunni aá díwó nɔnɔ, ká rɩ́ pʋsɛ ná há mɩ́ŋ róŋ, nɛ́'ɩl ɔwɔ́ tɩllɛ. 5 Ŋ sɩ́ a, ɩ́ tɔ́zeno Raba ná bɩrmɛ́ nyʋ́kmawa (dɩ́nʋɔlɩ́) nyɔ dídí, ká rɩ́ Amɔŋ tɔ́ɔ́ ná wuu má a piẽŋse dɩnʋɔlɩ́ (petuu). Nyɛ́ nɛ́, rɩ́ɩ́wa sɩɛ́ zɩ́ŋ rɩ́ŋ nɛ́ ká Nyuutɩna Wɩɩsɛ. 6 «Noú ná, ŋ é Nyuutɩna Wɩɩsɛ há sɛ́: Tɛ́ŋ ná mɛ́ Ɩzɩrayɛl fa há mɩŋ wɩɩlawa mɛ́, ɩ́ faa jʋɔsɛ rɛ́, a wɩ́ŋ jamáŋ ná susu fɛɛ ká bel guóníwó, a múúríwó. 7 Ɛ wɩ́ɛ́, ɩ́ sɩ́ zɩmɩ́ŋ doé mʋɔ́sɔ. Ŋ sɩ́ a rɩ́ duhʋɔra ko yó diíwa, ká píésíwa ɓɩɛ wuu ká cól. Ŋ sɩ́ zɔkíwa rɩ́ɩ́wa duo yʋksɛ tié nyúú, a báá sɩ́ tɔ́ɔ́ kanʋ́. Ɛ nɛ́, rɩ́ɩ́wa zɩ́ŋ rɩ́ŋ nɛ́ ká Nyuutɩna Wɩɩsɛ.»
Wɩɩlawa ná há sɩ́ pú Mʋwabɛ nɩɛ wɩ́ɛ́
8 «Noú ná, ŋ é Nyuutɩna Wɩɩsɛ há bʋlɛ́ aá pá Mʋwabɛ nɩɛ: Mʋwabɛ nɩɛ, ɩ́ sɛ́ Ziida nɩɛ má wɩ́ duowa ná naŋá mɛ́ cɩ́có. 9 Ɛ wɩ́ɛ́, ŋ sɩ́ zɔkɛ tɔ́nɛ ná wuu há kíl Mʋwabɛ, ŋ sɩ́ zɔkwɔ́ balá baláwa, a lɛ́ zɔkɛ ɓa sɩɛrʋ tɔ́ɔ́ weré, Bɛtɛ-Yesimɔtɛ, Baalɛ-Mɛyɔŋ, arɩ́ Kiriyatayimi. 10 Ká rɩ́ nɩ́gʋ́ɔ́rɛ há lɛ́ wɩɩsɛ dɩpomɩ́ ko yó dí Mʋwabɛ. Ɓa sɩ́ yó dí Mʋwabɛ nɩɛ a ɓʋ́ʋ́sɩ́wɔ́ rɩ́ nɛŋ báá sɩ́wɔ́ yɩrɛ yɩrʋ́ tié nyúú, a nɛ́ ɛ ɓa há tʋ́ŋ Amɔŋ bɛlɛ. 11 Nyɛ́ nɛ́ ŋ sɩ́ bɛ́ŋsɛ Mʋwabɛ nɩɛ rɩ́wɔ́ zɩmɩ́ŋ yɛ́rɛ́ há mɔ ɛ ná. Ʋ ɛ, ɓa sɩ́ zɩ́ŋ rɩ́ŋ nɛ́ ká Nyuutɩna Wɩɩsɛ.»
Wɩɩlawa ná há sɩ́ perí Edoŋ nɩɛ wɩ́ɛ́
12 «Nyuutɩna Wɩɩsɛ sɛ́: Edoŋ nɩɛ a zɔkɩ́ŋ mɛ́, ɓa há píwó tɛ́ŋbuoro dí Ziida nɩɛ mɛ́. 13 Ɛ wɩ́ɛ́, ŋ é Nyuutɩna Wɩɩsɛ nɛ́ bʋlɛ́, Edoŋ nɩɛ sɩ́ zɩmɩ́ŋ doé mʋɔsɔ. Ŋ sɩ́ ɓʋ́ʋ́sʋ́ tɔ́ɔ́ báála rɩ́rʋ́ pʋsɛ wuu, ká rɩ́ tɔ́ɔ́ ná bɩrmɛ́ tɔ́ɓóó. A dé pɔ́ Temaŋ tɔ́ɔ́ mɛ́, ká kaa mʋ́ yakɛ Dedaŋ tɔ́ɔ́ mɛ́, lal sɩ́ ɓʋ́ʋ́sɩ́wɔ́ nɩɛ wuu. 14 Ŋ sɩ́ tɩ́ŋɩ́ŋ jamáŋ Ɩzɩrayɛl mɛ́, a díŋ tɛ́ŋbuoro Edoŋ nɩɛ nyúú. Ɩzɩrayɛl nɩɛ sɩ́ bɛ́ŋsɩ́wɔ́ werí, a nɛ́ ŋ cɔwɩɩlɔ́ sɩɛrʋ ŋ há bɛ́ŋsɛ nɩɛ ná haá a zɔkɩ́ŋ mɛ́ ɛ. Ŋ é Nyuutɩna Wɩɩsɛ nɛ́ bʋlɛ́.»
Wɩɩlawa ná há sɩ́ pú Filisiti nɩɛ wɩ́ɛ́
15 «Ná, ŋ é Nyuutɩna Wɩɩsɛ há sʋʋ ná: Filisiti nɩɛ, ɩ́ há cáásɛ dí cɔwɩɩlɔ́ tɛ́ŋbuoro ɩ́ dɩŋdɔbɩnɛwa ná nyúú; a ɓʋ́ʋ́sɩ́wɔ́ wuu tenni. 16 Ɛ wɩ́ɛ́, ŋ é Nyuutɩna Wɩɩsɛ sɛ́: Ɓa sɩ́ zɩmɩ́ŋ doé mʋɔsɔ́. Ŋ sɩ́ ɓʋ́ʋ́sɩ́wɔ́ nɩɛ ná wuu há ké mʋʋ nʋɔ, a lɛ́ Kafitɔrɛ. 17 Tɛŋbuóro wɩɩlawa ná ŋ há sɩ́ pii tʋ́ŋwɔ́ mɛ́; sɩ́ a ɓɩduo kíŋkaŋ ɓa nyúú. Ʋ nyɛ́ nɛ́, rɩ́wɔ́ zɩ́ŋ rɩ́ŋ nɛ́ ká Nyuutɩna Wɩɩsɛ.»