Zerizalɛmɛ nɩhɩ̃ dáŋsáŋkɔsɔ nɛ́ \ vikɔsɔ nɛ́
24
1 Ɓa há kɛsɩ́wɔ́ mʋ yomí, bɩŋsɛ nɛmɛ nyúú mɩ́, caŋsɛ fí nyúú mɩ́, tapʋ́lɛ fi kal; Nyuutɩna Wɩɩsɛ bʋlɩ́ŋ rɩ́ bʋlɛ́: 2 Báálɔ bio, pʋ́ŋsɛ zaa tapʋl né a bíl. Bee wɩ́ɛ́, zaa tapʋl nɛ́ Babɩlɔŋnɛ kuóro púl a yó Zerizalɛmɛ. 3 Sʋɔlɛ sɩ́ŋsʋɔlɔ né a páŋ jamáŋ dɩlhɔtɩɩna ná, a bʋlwɔ́ rɩ́ bʋlɛ́ rɩ́ŋ é Nyuutɩna Wɩɩsɛ sɛ́: “Pi dáŋsáŋɛ (vie) a cɔ́ dáwʋ́ɔ́ mɛ́, a a nyii hé. 4 Conni namɩɛ ná, naŋdawa, vaamɔ, rɩ́ huɩ̃, a bonni heŋgbele ná wuu há keŋ namɩɛ a hé róŋ. 5 Ɓʋ́ piẽŋso, a connú namɩɛ, a bonni heŋgbele ná wuu; a piwó wuu hé dáŋsáŋá mɛ́ a cɔ́. Hé nɩŋ, a makɛ rɩ́ heŋgbele ná wuu bɛ́ perí werí. 6 Oó, ŋ é Nyuutɩna Wɩɩsɛ sɛ́: Nyúbɔŋ a pá nɩɓʋ́ʋ́ra tɔ́ɔ́!, ʋ nɩhɛ̃ dáŋsáŋkɔsɔ (Vikɔsɔ ) nɛ́, nɛ́ŋ báá há wʋ́ʋ́ wuó bɩrmɛ́ nɛ́. Kuorí namɩɛ ná dáŋsáŋá ná mɛ́, naŋda naŋdawa, ká sɩ́ tʋɔsɛ́ aá lɩ́sɛ balá baláwa. 7 Cɛ́l bɩsɛ tɔ́ɔ́ ná mɛ́, bʋ́ɩ́ daha, ɓa pii ɓáŋ, ká nɛ́ŋ toó rʋʋ pá kuŋkuŋlo tɔ́wɔ́ mɛ́. 8 Ɛ cɛ́l há bɩsɛ bʋ́ɩ́ ná daha,óŋ wɩ́wɔ́ mɛ́ tɔ́ɔ́,
ká rɩ́wɔ́ buŋse zɛ yákɩŋ mɛ́,
ɛ nɛ́ sɩɛ́ rɩ́ŋ díŋ cɔwɩɩlɔ́ tɛŋbuoro. 9 Ɛ nɛ́ tɛ́, Nyuutɩna Wɩɩsɛ sɛ́: Nyúbɔŋ a pá tɔ́ɔ́ ná haá bɩsɛ cɛ́l, bee wɩ́ɛ́, ŋ sɩ́ nyɩ́kɛ ɛ tɔ́ɔ́ nɩŋ! 10 Ɩ sɩ́ ja dagúlli kíŋkáŋ a hé nɩŋ, a cɩ́ róŋ mɩ́ ja ɓɩɛra a hé namɩɛ ná mɛ́, a cɔ́. Ɩ sɩ́ cɔ́ rʋ́ bɛ́ perí werí rɩ́ heŋgbele ná dí nɩŋ físi. 11 Ɛ har mɛ́, ló rɩ́ dáŋsáŋwuóli ná cɔ́ dáwʋ́ɔ́ ná mɛ́, rɩ́ nɩŋ ná a rʋ́ fɛ́l werí. A makɛ rɩ́ dáŋsáŋá ná kɔmɔ ná rɩ́rʋ́ wííló ná wuu mɩ́ɛ́rɛ nɩŋ ná mɛ́. 12 Amá, ɛ ná wuu ɩ há sɩ́ a ká yɔɔ! Bee wɩ́ɛ́, nɩŋ ná lʋmɔ wa wúóli a rɩ́ dáŋsáŋa wííló ná mɩ́ɛ́rɛ. 13 Zerizalɛmɛ, ɩ nɩlaŋwɩ́ɛ́ ná ɔɔ ɩ zʋ́ busunnu. Ŋ fa jɛɩ́ busunnu mʋ́ʋ́rɛ, amá ɩ wɩ saŋɛ́ páŋ. Ɛ wɩ́ɛ́, mʋ́l neé mɩ́ ŋ cɔwɩɩlɔ́ mɛ́ nɛ́, ŋ sɩ́ mʋ́ʋ́rɩ́ busunnu. 14 Ŋ é Nyuutɩna Wɩɩsɛ nɛ́ bʋlɛ́, ɛ nɛ́ sɩ́ tʋ́ŋ. Ŋ wa fa susu, ŋ wa a rɩ́ŋ bɩrsɛ sabɩɩna ná ŋ há lɩsɛ rɩ́ŋ tʋ́ŋ, ŋ wa rɩ́ŋ bʋl fa ɩ́ɔ̃́. Ŋ sɩ́ bɛ́ŋsɩ́ a cɛrɩ́ wɩ́állɛ ná ɩ há tʋmɛ́. Ŋ é Nyuutɩna Wɩɩsɛ nɛ́ sɛ́.»
Ezekɩɛl wiile wɩ́ɛ́
15 Nyuutɩna Wɩɩsɛ bʋlɩ́ŋ rɩ́ bʋlɛ: 16 «Báálɔ bio, ɩ nɩcólli sɩ́ sʋwɛ a úrí mɩ́; taŋá pɔʋ́, rɩ́ sɩ́ hɩ̃ɩ̃nʋ́, a sɩ́ wii bɩsɛ sɩmɩɩrʋ ʋ wɩ́ɛ́. 17 Kanɩ́ tɩɩ werí a sɩ́ sazɔkɔ a, a sɩ́ wii. Taŋá pí nyúballɔ bɛ́ɩ́ nyúú, a hé natɔɔsɛ a nɛ ɩ há valɛ aá a ɛ. Sɩɩ́ sɩ́ɛ́ tɔ́ʋ́ rɩ́ pɛnɛ́, a sɩ́ yúó ɓɩdííle dí. 18 Tápʋl ná cɩ́cʋɔ́ ŋ rɩ́ jamáŋ céŋ naŋá, ʋ gbaanɛ nɛ́ ŋ háálɔ sʋwɛ. Ʋ tɔ́ɔ́ ɓɩɛna há pʋlɛ, ŋ tɩ́ŋ wɩ́ɛ́ ná wuu Nyuutɩna Wɩɩsɛ fa há makɛ páŋ. 19 Ɛ nɛ́ nɩɛ ko bɔsɩ́ŋ rɩ́ŋ lɩsɛ wɩ́ɩ́ ná mʋ́l pɔ́wɔ́. ŋɔ 20 Ŋ bʋl pɔ́wɔ́ a bʋlɛ́: «Ɩ́ ná Nyuutɩna Wɩɩsɛ há sʋʋ ná a páŋ, 21 rɩ́ŋ bʋl pɛɩ́wa Ɩzɩrayɛl nɩɛ, a bʋlɛ: Ŋ dɩmɩnɩ́ ná ɩ́ há kene aá nyʋkɛ, ʋ nɛ́ ɛɩ́wa satɔrɔ rɩ́rɩ́wa doé dɩhɩ̃; ŋ sɩ́ ló rʋ́ʋ́ zʋ busunnu. Ká ɩ́ heŋbolli ná, rɩ́rɩ́wa tolé ná há mɩ́ŋ Zerizalɛmɛ mɛ́, ŋ a rɩ́wɔ́ ɓʋ́ʋ́sɩ́wɔ́. 22 Ɩ́ má mɔhɔ̃ rɩ́ɩ́wa kanɩ́wa tɩɩ a nɛ́ Ezekɩɛl nɛ́. Ɩ́ wɩ pɛnɛ́wa pa tɔ́ɩ́wa sɩ́ɛ́ mɛ́, a wɩ yúó ɓɩdííle dí. 23 Ká tɔ́ɩ́wa nyúnni rɩ́ nyúballɛ, a heíwa natɔɔsɛ. Ɩ́ sɩ́ yúó wi, a sɩ́ sazɔkɔ a. Taŋá ɩ́ zɩ́ŋ, rɩ́ɩ́wa sɩ́ gɩrɛ ná wɩɩla werí ɩ́ tɩɩ pɛkɛ, a tɩ́ŋ ɩ́ wɩ́zɔkɛ ná wɩ́ɛ́. 24 Ezekɩɛl wɩ́állɛ ná sɩ́ a malla a pɛɩ́wa. Rɩ́ ɛ wɩ́ɛ́ nʋɔ nɛ́ sué, ɩ́ má sɩ́ tʋ́ŋ a nɛ́ ɛ ná Ezekɩɛl há tʋmɛ́. Ʋ nyɛ́, ɩ́ sɩ́ zɩ́ŋ rɩ́ŋ nɛ́ ká Nyuutɩna Wɩɩsɛ." 25 «Ɩ é báálɔ bio zesi: Kal rɩ́ kué, ŋ jaa ná há káwɔ́ dɩyuóli, a awɔ́ nyʋ́kɔ omo, ɓa píwó yɩɛ́la huó mɩ́. Ŋ sɩ́ lɔʋ́, ká ɓa láwɔ́ heŋbolli rɩ́ɩ́wɔ́ tolé ná má rɩ́wɔ́ gúlwó mɩ́. 26 Ɛ kal, nɛrɔ ná há sɩ́ lú lɛ́ sʋʋ nɛ́sɛ mɛ́, nɛ́ sɩ́ ko pɛɩ́ báárɛ. 27 Ɛ tapʋl tɩɩ ɩ nʋɔ sɩ́ wurí, rɩ́ pi wɩ́bʋl bʋl pá nɛrɔ ná há sɩ́ luú lɛ́ sʋʋ nɛ́sɛ. Ɩ nɛ́ sɩ́ a malla a pá Ɩzɩrayɛl nɩɛ ná. A makɛ rɩ́wɔ́ zɩ́ŋ rɩ́ŋ nɛ́ ká Nyuutɩna Wɩɩsɛ.»