Zerizalɛmɛ wɩ́bɔma wɩ́ɛ́
22
1 Nyuutɩna Wɩɩsɛ bʋ́lɩ́ŋ rɩ́ bʋ́lɛ: 2 «Zesi nɩbiino bio, sɩ́ hewɩ́ŋ fa, ká kanɩ́ŋ tɩɩ a dí Zerizalɛmɛ wɩ́állɛ ná sariya! Makɛ pɔʋ́ rʋ́ zɩ́mʋ́ wɩ́tɩɛnnɛ ná nʋɔ mɛ́. 3 Bʋl pɔʋ́ bʋ́lɛ: Noú ná ŋ é Nyuutɩna Wɩɩsɛ há sɛ́: Zerizalɛmɛ tɔ́ɔ́, ɩ nɩɛ ká nɩɓʋ́ʋ́ra dʋŋɔ́ nɛ́, a ɓaarɛ́ venni, tɔ́ɔ́ ná zʋ busunnu. 4 Ɩ maá veŋgulli a zʋ busunnu, a yiki nɩɛ ɓaá tʋ́ŋ nɩ́ɓʋ́ tʋtʋmɛ́! Ɛ wɩ́ɛ́, zɩ́ŋ rɩ́ há tʋ́ŋ ɛ, ŋ dɩɩsɩ́ tapʋla, rɩ́ tɛ́ŋ zɔkɩ́ báá wɩ bol! Ɛ nɛ́ tɛ́, duowa ná naŋá sɩ́ɛ́ mɛ́ ɩ sɩ́ dí nyɩɩsɛ, rɩ́ tɔ́nɛ ná naŋá nɩɛ lɔrɩ́ mʋmɔ́ŋ. 5 Ɩ báá wɩ pɩŋ kene, ɩ dɩmɩnɩ́ bɩrmɛ́ ɓɩlɔrɛ́, ɩ kile tɔ́nɛ nɩɛ, rɩ́ dɩbole tɔ́nɛ nɩɛ lɩlɔrɛ́. 6 «Ɩ tɔ́ɔ́ mɛ́, Ɩzɩrayɛl kuóre tɩŋwɔ́ tɩ́ŋ mɩ́, a ɓʋ́ʋ́sɛ nɩɛ. 7 Ɩ tɔ́ɔ́ mɛ́, bio wɩ áná rɩ́ maá zíl, ɓaá bɛ́ŋsɛ yúháála rɩ́ bisíŋsi; ká vɩ́rɛ nɩhʋɔrɔ aá dí aá bɛ́ŋsʋ́. 8 Ɓa wɩŋ wɩ́cʋɔlɩjaa ná pii makɛ óŋtaŋá, ká ŋ fɩɛlɛ́ tapʋlɛ ná má ɓa wʋʋ́ zíl. 9 Ɩ tɔ́ɔ́ mɛ́, nɩɛ (ká nɩɛ hé naŋá mɛ́) nyɛ́ nyɩɛrʋ aá heí naŋá nʋʋsɛ mɛ́, ɓa tɩŋ ɛ wɩ́ɛ́ mɛ́ aá ɓʋ́ʋ́sɛ naŋá. Ɩ nɩɛ tɩŋwɔ́ mɛ́ dí vʋka namɩŋsa ná ɓa há ɔsɛ pallɛ nyúnni. Ɓaá tʋ́ŋ nɩlaŋwɩ́ɛ́ (busunnu wɩ́ɛ́). 10 Ɩ nɩɛ naŋá keŋwó ánáwa háála pɩpɛɛ, aá ciki háála ɓa tɩŋa neé tɛ́ŋ mɛ́. 11 Naŋá kɛsɩ́wɔ́ kenninaŋá háála aá pɛ, ká naŋá má tʋtʋŋ nɩlaŋwɩ́ɛ́ rɩ́wɔ́ biháála, rɩ́wɔ́ nátolé. 12 Ɩ tɔ́ɔ́ mɛ́, nɩɛ mɩŋ róŋ a pi meewie yɔwɛ nɩɛ ɓaá tʋŋ nɩɓʋ́, naŋá piwó meewié kíŋ nɩɛ kaa lá rɩ́ dɔwɛ nyii, ká naŋá má vɩ́rɩ́wɔ́ maábinaŋá a ká ɓɩɛ. Ɓá tʋ́ŋ nyáŋ wuu, a sʋ́llɩ́ŋ é Nyuutɩna Wɩɩsɛ wɩ́ɛ́ sólósóló. 13 «Ɛ wɩ́ɛ́, Zerizalɛmɛ nɩɛ, ŋ dú nɛ́sɛ aá pɛɩ́wa, ɩ nɩɓʋ́ rɩ́rɩ́ nɩlaŋwɩ́ɛ́ ná ɩ há tʋmɛ́ wɩ́ɛ́. 14 Rɩ́ŋ nɛ́ ise cɛ́ rɩ́ŋ díŋ cɔɛ́wɩɩlɔ ɩ́ nyúú, ɩ́ sɩ́ wolli cɛ tɩkɛ>> Ŋ é Nyuutɩna Wɩɩsɛ nɛ́ bʋ́lɛ, ŋ sɩ́ ɔɔ ná ŋ há sɛ́. 15 Ŋ sɩ́ kiríwa rɩ́ɩ́wa pɩsɛ zʋ duhʋɔra sɩɛrʋ tɔ́hʋɔra mɛ́, a makɛ rɩ́ɩ́wa nɩláŋwɩ́ɛ́ wɩ́ɛ́ ná nyɔɛ́wa nyúú mɩ́. 16 Duowa ná naŋá sɩ́ɛ́ mɛ́, ɩ́ báá wɩ pɩ́ŋ ká. Nyɛ nɛ́ ɩ́ sɩ́ zɩ́ŋ rɩ́ŋ é nɛ́ ká Nyuutɩna Wɩɩsɛ.» 17 Nyuutɩna Wɩɩsɛ bʋ́lɩ́ŋ rɩ́ bʋ́lɛ: 18 «Nɩbiino bio, Ɩzɩrayɛl nɩɛ nɩhɛ̃ warɛ nɛ́. Ɓa nɩhɛ̃ meewi rɩ́ kɔmɔ rɩ́ ɩtɛŋ rɩ́ hɔɔ arɩ́ pʋlɔŋ ɓa há pii hé cefure mí ní. 19 Ɛ nɛ́ tɛ́, ŋ é Nyuutɩna Wɩɩsɛ sɛ́: Ɩ́ dé nɛ̃ warɛ há keŋ busunnu nɩ́, ɛ wɩ́ɛ́, ŋ sɩ́ heíwa wuu naŋá mɛ́ Zerizalɛmɛ mɩ́. 20 A nɛ́ ɓa há hé meewi, rɩ́ kɔmɔ, rɩ́ hɔɔ, rɩ́ pʋlɔŋ, arɩ́ etɛ́ŋ cafuro mɩ́ ɛ́, a cewi ɓa lúŋ mɩ́ɛ́rɛ. Ɛ wɩ́ɛ́, ŋ cɔɛ́wɩɩlɔ sɩɛrʋ, ŋ sɩ́ heíwa naŋá a cewíwa rɩ́ nɩŋ rɩ́ɩ́wa mɩ́ɛ́rɛ! 21 Zerizalɛmɛ tɩɩ mɛ́ nɛ́, ŋ sɩ́ heíwa naŋá mɛ́, a a rɩ́ŋ cɔɛ́wɩɩlɔ há nɛ̃ nɩŋ tuwíwa nyúú a mɩ́ɛ́rɛ, a nɛ́ nɩŋ há mɩ́ɛ́rɛ kɔmɔ ɛ́. 22 Ŋ sɩ́ mɩ́ɛ́rɩ́wa a nɛ̃́ ɓa há pi meewi hé nɩŋ mɩ́ mɩ́ɛ́rɛ ɛ. Ʋ nyɛ nɛ́, ɩ́ sɩ́ zɩ́ŋ rɩ́ŋ é Nyuutɩna Wɩɩsɛ cɔwɩɩlɔ́ nɛ́ tuwíwa nyúú.» 23 Nyuutɩna Wɩɩsɛ báá bʋ́lɩ́ŋ rɩ́ bʋ́lɛ: 24 «Ɩ é báálɔ bio, bʋl pá Ɩzɩrayɛl nɩɛ. Ɩ́ nɩhɛ̃́ tié há hílɛ nɛ́, duóŋ wɩ róŋ kué ŋ cɔwɩɩlɔ́ tɛ́ŋ mɛ́. 25 Ɩ kuóre má nɩhɛ̃́ baka kíŋkánáwa há ciki ballɔ a ká cɔ́nnɛ ɛ. Ɓa ɓʋ́ʋ́sɛ báála ká nyúháála sú tɔ́ɔ́, a vɩ́rɩ́ nɩɛ ɓa kuóri súúri kɩ́ŋkáŋ. 26 Ɓa vʋk'ɔɔsa wɩŋ kíŋse ná zíl, a wɩ́ŋ wɩ́cʋɔ́lɩjaa ná bú ʋ káŋ tɩ́llɛ. Ɓa wɩ omo ná há káŋ tɩllɛ rɩ́ omo ná há tóŋ tɩllɛ ɛ̃ naŋá mɛ́. Ɓa bɛllɛ lɩ́sɛ rɩ́wɔ́ vɛ́ŋ fɩɛlɛ́ tapʋl ná; ɓa wɩ zɩmɛ́ kene rɩ́wɔ́ makɛ nɩɛ rɩ́wɔ́ zɩ́ŋ omo ná há paarɛ rɩ́ omo ná há keŋ busunnu; ká nɩɛ múmúríŋ yɩr. 27 Ʋ jamáŋ sɩdiire dé nɛ́ baka kaadíhuorúwa há ciki ballɔ ɛ nɛ́. Ɓa ɓʋ́ʋ́sɛ nɩɛ ká láwɔ́ ɓɩɛ tɩllɛ, ɓa kuóri ɔsɛ aá suúri werí. 28 Ɓa wɩ́laabʋlla nʋɔ wɩ́bʋlɛ ká nɩnyɩsɛ wɩ́ɛ́ dʋŋɔ, ɓa taŋá tɔ́ɔ́, a nɛ́ ɓa há mʋɔlɛ zeŋ bʋɔnnɛ tɔ́ɔ́ rɩ́ gudɩrɔŋ ɛ. Ɓa wɩ́muulínáálɛ káwɔ́ tɩɩ nyúú wɩ́ɛ́, ká ɓa nʋɔ wɩ́bʋlɛ má a nyɩɛ́rʋ dʋŋɔ. Ɓaá bʋlɛ́ rɩ́ŋ é sɛ́; ká ŋ é Nyuutɩna Wɩɩsɛ wɩ sɛ́ wɩ́ɩ́ wuu. 29 Tɔ́ɔ́ ná sɩɛrʋ nɩɛ wɩ bú naŋá kene. Nɩɛ ga naŋá ɓɩɛ, a nʋɔsɛ yaarɩ́tɩɩna rɩ́ nɛ́murtɩɩná aa va, ká vorí nʋhʋɔrɔ ker aá dí. 30 Ɛ wɩ́ɛ́, ŋ belwó sɩɛrʋ aá ja nɛŋ, há sɩ́ isi kanɩ́ŋ neɓíŋ mɩ́, a sʋ́llɩ́ŋ tɔ́ɔ́ ná yɩrɛ mɛ́ rɩ́ŋ sʋʋ zɔkʋ́. Amá nyúbɔŋ ŋ wɩ tɩná né. 31 Ɛ nɛ́ tɛ́, ŋ cɔwɩɩlɔ́ nɩŋ tuwíwó nyúú, a ɓʋ́ʋ́sɩ́wɔ́ wuu tenni. Ŋ ɔɔ ɓa ná wɩɩla cerwɔ́ wɩ́állɛ ná wuu ɓa há pié tʋmɩ́ŋ mɛ́. Ŋ é Nyuutɩna Wɩɩsɛ nɛ́ bʋ́lɛ.»