Wɩɩsɛ dí sariya aá cɛ́rɛ́ nɛrɔ wuu wɩ́'aalɩ́ nɛ́
“ánáwa dí ɛ́llɛnɔŋhúóri,
amá bɛllɛ nyɩ́la nɛ́ nyíẽ́se.” 3 Ŋ há wommó yɩrɛ mɛ́, ɩ́ báá wa a rɩ́ɩ́wa sʋ́ɔ́lɛ́ wɩ́ɩ́ néé Ɩzɩrayɛl mí. 4 Woó! Óŋhiẽse wuu hiẽso mɩnɩ́ŋ nɛ́sɛ mɛ́ nɛ́, bio rɩ́ áná, ŋ nɛ́ tɩ́wɔ́ wuu bɛllɛ; nɛrɔ ná há a wɩ́bɔmɔ nɩ́ɩ́ sʋwɛ.
5 Rɩ́ɩ́ nɛrɔ nɛ́ ká nɩtáŋa, aá tʋ́ŋ yɛ́rɛ́ rɩ́ taŋá; 6 a wɩ saŋɛ́ dídí vʋ́ka namɩŋsa pallɛ nyúnni, a wɩ saŋɛ́ ɓɩɓáárɛ Ɩzɩrayɛl wɩŋsa. A wʋʋ́ kénninɔ́ŋɔ háálɔ kené pɛ́, a wɩ háálɔ há hoú tɩŋa tɛ́ŋ mɛ́, kené pɛ́; 7 Ʋ wʋʋ́ nɔ́ŋɔ kené yakɛ dídí, ʋ nɛ́ pi óŋ pa kiŋ mʋ́l mɛ́ ʋ kené aá ko, ʋ wa gá, a ja ɓɩdííli aá pá losu nɛrɔ, kaá pá nɛrɔ ná há wɩ gɛsuo kené gɛsuo; 8 ʋ wɩ nɛrɔ kɩŋ pá kaá sakɛ́ dɔwɛ nyii; ʋ wɩ wɩ́ɩ́ ná há tó yɛ́rɛ́ sɩɛrʋ zʋ, a wɩ gɩgɩra sariya dí nɩɛ pɛkɛ́. 9 Ʋʋ́ tɩ́ŋɩ́ŋ wɩ́bilé rɩ́rɩ́ŋ wɩ́máŋsɛ taŋá sɩɛrʋ: Ʋ ká nɩtáŋa nɛ́ ɛ́, ʋ sɩɛ́ sɩ́ ká mɩɩsɛ. Nyuutɩna Wɩɩsɛ nɛ́ bʋlɛ́ ɛ́
10 Amá, rɩɩ́ ɛ nɛrɔ nɛ́ kéŋ bio, rʋ́ʋ́ a nɩɓʋr, a zɔkɛ́ wɩ́ɛ́ nyáŋ oro, 11 a wʋ́ʋ́ áná wɩ́weré ná cese, ka tɩ́ŋ dídí vʋka namɩŋsa pallɛ nyúnni, a kanʋ́ nɔ́ŋɔ háálɔ pɛ́, 12 aá vɩ́rɛ nɩyaarɔ rɩ́ summo, aá ga nɩɛ ɓɩɛ, rʋ́ʋ́ kɩŋ nɛ́ŋ óŋ ʋ wa túŋ, aá ɓáárɛ venni, aá tʋ́ŋ wɩ́tɩɛnnɛ; 13 rʋ́ʋ́ puú óŋ kɩŋ nɛ́ŋ ʋʋ lá rɩ́ nyʋɔrɛ́ nɛ́. Nɛrɔ né duo sɩ́ ka waana? Aɩ́, ʋ wɩ mɩɩsɛ ka! Ʋ há tʋ́ŋ wɩ́tɩɛnnɛ nyáŋ sʋʋ nɛ́ kɔ́ʋ́ ker; ʋ cɛl sɩɛ́ mɩnʋ́ tɩɩ nyúú.
14 Amá rɩ́ nɛrɔ kéŋ bio, rɩɩ bio ná tɩɩ sɩ́ɩ́ noú áná rʋ́ʋ́ tʋ́ŋ wɩ́bɔma ná wuu, ka taŋá bɛllɛ pi a wɩ áná ná cese. 15 A wɩ saŋɛ́ aá dí vʋka namɩŋsa pallɛ nyúnni, a wɩ Ɩzɩrayɛl wɩŋsa ná ɓáárɛ; a wʋʋ́ kénninɔ́ŋɔ háálɔ kené pɛ́; 16 a wɩ nɩɛ vɩ́r dídí, rʋ́ʋ́ kɩŋ nɛ́ŋ óŋ ʋ wa lá rɩ́ dɔwɛ nyii, aá wa ga. Ʋʋ́ pá nɛrɔ ná há wɩ kené aá dí ɓɩdiili, ka nɛrɔ ná má há wɩ gɛrɔ kené ʋʋ́ pɔ́ʋ́ má; 17 Ʋ wɩ gɩragɩra sariya di, rʋ́ʋ́ pi óŋ kɩŋ nɛ́ŋ, ʋ wɩ dɔwɛ nyíí sakɛ. Ʋ saŋɔ́ aá tɩ́ŋɩ́ŋ wɩ́máŋsɛ rɩ́rɩ́ŋ wɩ́bilé ná: Ɛ́ wɩ́ɛ́, nɛrɔ né duo, ʋ áná wɩ́bɔma ná wʋʋ́ mɩɩsɛ wuó lɩsɛ. Ʋ sɩ́ ná waana. 18 Ʋ áná nɛ́ gɩrmɛ́ nɩɛ, ʋ nɛ́ gɛɛ, a walmʋ́ kénninaŋa; ɛ wɩ́ɛ́, ʋ nɛ́ sɩ́ sʋwɛ a tɩ́ŋʋ́ tɩɩ wɩ́nyɔ́rkɛ ná wɩ́ɛ́.
19 Ɛ́ nɛ́ ɩ́ sɛ́: "Bee rɩ́ tɛ́ áná ná wɩ́bɔma ná wɩɩla wɩ bio ná peri? Bio ná há saŋɛ́ tʋ́ŋ yɛ́rɛ́ rɩ́ taŋá, a wɩŋ wɩ́bilé vɛ ka tɩ́ŋwɔ́; ɛ́ nɛ́ máŋsɛ rʋ́ʋ́ sɩ́ ká mɩɩsɛ. 20 Nɛrɔ ná há a wɩ́bɔmɔ nɩ́ɩ́ sʋwɛ. Bɛlɛ wɩ́wɔ́ ánáwa wɩbɔma sʋʋ wó laa sʋwɛ, ánáwa má wɩ́wɔ́ bɛlɛ wɩ́bɔma sʋʋ wó laa sʋwɛ. Nɩtaŋá nɩtaŋnnɛ nɛ́ sɩ ɔʋ́ ker, ká rɩ́ sahɔɔtɩɩnɔ sahɔɔ wɩ́ɛ́ nɛ́ ɔ́ʋ́ má ker.
Ɩ́ ja weri
21«Rɩ sahɔɔtɩɩnɔ nɛ́ vɛ wɩ́bɔma ná wuu ʋ há ɛ́ɛ́, ka tɩ́ŋɩ́ŋ wɩ́bilé a tʋ́ŋ yɛ́rɛ́ rɩ́ taŋá; ʋ sɩ́ ná waana, ʋ wa sʋwɛ. 22 Ɓa sɩ́ sʋ́llʋ́ tesié kéké wɩ́ɛ́ ná wuu, ka a rʋ́ ná waana a tɩ́ŋ táŋa ná ʋ há ɛɛ wɩ́ɛ́. 23 Ɩ́ bɩɩnɔ rɩ́ nɩbɔmɔ sʋʋ tɔrɩ́ŋ sɩɛrʋ rɩ́ yaa? Ŋ cólle nɩ́ ká rɩ́ sahɔɔtɩɩnɔ bɩrsɛ ŋmɔ́nɔ a ná waana. Ŋ é Nyuutɩna Wɩɩsɛ nɛ́ bʋlɛ́. 24 Amá, rɩ nɩtaŋá nɛ́ vɛ wer ɛɛ, ka bɩrɛ puú sɩ́ɛ́ hé bɔŋbɔŋ ɛɛ mɛ́, a nɛ́ sahɔɔtɩɩnɔ; ɩ́ bɩɩnɔ rʋ́ʋ́ sɩ́ tʋ́ŋwɔ́ ká ná waana? Aɩ́ ʋ wɩ waana wuó ná! Ŋ báá wʋʋ́ wɩ́were ná wɩ́ɛ́ liisi. Ʋ sɩɛ́ sɩ́ sʋwɛ, a tɩ́ŋʋ́ wɩ́bɔma ná wɩ́ɛ́. 25 Amá ɩ́ sɛ́: “Nyuutɩna ɓɩɛ tó róŋ (ɓɩɛ wɩ́weri)! Ɩzɩrayɛl nɩɛ ɩ́ zésí: Ɩ́ wɩ sɛ́ rɩ́ŋ ɓɩɛ nɛ́ tó ráŋ? Ká ɩ́ sʋ́lɔ rɩ́ɩ́wa wɩ́'aalɛ nɛ́ wɩ cɛ́rɛ́. 26 Rɩ nɩtaŋá nɛ́ vɛ táŋa ɛɛ ká tʋ́ŋ bɔŋbɔŋ sʋwɛ, ʋ bɔŋbɔŋ nɛ́ ɓʋ́ʋ́. 27 Amá, rɩ sahɔɔtɩɩnɔ nɛ́ vɔ́ʋ́ sahɔɔ wɩ́ɛ́ ʋ fa haá ɛ́ɛ́ tá, ka tʋ́ŋ yɛ́rɛ́ rɩ́ taŋá, ʋ sɩ́ ná waana. 28 Rʋ́ʋ́ nɛ́ ɩɔ̃́ rʋ́ a zɔkɛ, a sáŋ bɩrsɛ mala, ʋ báá wa sʋwɛ, ʋ sɩ́ ná waana. 29 Amá ɩ́ é Ɩzɩrayɛl nɩɛ ɩ́ sɛ́: “Nyuutɩna Wɩɩsɛ ɓɩɛ wɩ weri (ɓɩɛ tó róŋ)!” Ɛ wɩ́ɛ́, Ɩzɩrayɛl nɩɛ ɩ́ kɩ́ɛ́lɔ ŋ é ɓɩɛ nɛ́ tó ráŋ? Ɩ́ ɓɩɛ nɛ́ sɩɛ́ tó ráŋ. 30 Ɛ́ nɛ́ tɛ́ Ɩzɩrayɛl nɩɛ, ŋ sɩ́ dí nɛ́ŋ wuu sariya a cɛrʋ́ wɩ́'aalɩ́. ŋ é Nyuutɩna Wɩɩsɛ nɛ́ bʋ́lɛ. Ɛ wɩ́ɛ́, nɛrɔ wuu bɩrsɛ mala, a tá bɔŋbɔŋ ná wuu ʋ fa há ɛɛ, a makɛ rɩ́ nagbámɔ wɩ́ɩ́ báá sɩ́ɩ́wa pɛkɛ mɩnʋ́. 31 Ɩ́ tɛɩ́wa bɩɩlɛ wɩ́'allɛ ná, ka ja baŋcɩfɛlɔ rɩ́ sabɩŋfɛlɔ pɛɩ́wa tɩɩ. Ɩzɩrayɛl nɩɛ, bee rɩ́ tɛ́ ɩ́ cóllí sʋʋ nɛ́? 32 Ŋ wɩ́jaalɩ́ rá tó nɛrɔ sʋʋ, ɩ́ bɩrɛ ko a ná waana. Ŋ é Nyuutɩna Wɩɩsɛ nɛ́ bʋlɛ́!»s