17
1 Nyuutɩna Wɩɩsɛ bʋlɩ́ŋ rɩ́ bʋ́lɛ: 2 «Nɩbiino bio bʋ́l sikli a sʋɔ́lɛ sɩ́ŋsʋɔ́lɔ neé pá Ɩzɩrayɛl nɩɛ a bʋlɛ́. 3 Ɩ sɩ́ bʋlɛ́: Nyuutɩna Wɩɩsɛ sɛ́: Kiesí há zeno a ká kíŋkerugbéru kɔ́ʋ́ pʋsɛ má gbési a ŋmési ŋmésí. Fílo mʋ́ Libaŋ a bori sɛdɩrɛ tuu hile. 4 Ʋ bori tuu ná hile; a kaá mʋ́ yɛ́llɛ tɔ́ɔ́ oro mí a pii bíl róŋ. 5 Ká pi óŋduo ɛ́ tɔ́ɔ́ sɩɛrʋ,a kaá mʋ́ tá tíé ɓa há parɛ́ mɛ́.
Ʋ cɔ́ŋsʋ́ ráŋ,
a bɩrmɛ Viínyi tuu há fɛ fɩɩla,
a jɛrɛ́ sú dɩhɩ̃́ wuu.
Ʋ hillí wá a caasʋ́ rɩ́,
kɔ́ʋ́ nalʋrsi má zʋʋ́ mʋ́l.
Ʋ bɩrmɛ́ viínyi tuu,
a lɩ́sɛ hílwɩɛla,
arɩ́ hílzeŋse. 7 Amá, kiesí há zeno, a ká kíŋkeru há gbésó rɩ́ pʋ́kana. Ɛ́ Viínyi nalʋrsi fa zʋʋ́ tié mʋ́l rɩ́, a makɛ rʋ́ʋ́ nyii nɛ́ hóú mí. Ʋ hílli wá caasʋ́ rɩ́; a wa daarɛ tié ná mɛ́ ɓa fa há cɔ́ŋsʋ́. 8 Tíé ná há kéŋ kɔrɔ mɛ́ nɛ́ ɓa cɔ́ŋsʋ́, polo nʋɔ, a makɛ rʋ́ʋ́ lɩ́sɛ hílli, a nɔŋ. A makɛ rʋ́ʋ́ nɛ́ viínyi ná há wero. 9 Bʋlɛ́: Rɩ́ŋ é Nyuutɩna Wɩɩsɛ sɛ́: Tuu ná sɩ́ wuolli wá? Kiesí wa a rʋ́ʋ́ cónnú nalursi, ká rʋ́ʋ́ nɔnɔ zɛkɛ, a hɩ́l? Ʋ hílli wuu sɩ́ hɩ́l, ʋ sɩɛ́ to doézeno, ɛrá má nɩkana nɛ́ sɩ́ zɔkʋ́. 10 Ɓa cɔ́ŋsɛ viínyi ná é rí, ʋ sɩɛ́ sɩ́ bɛrɛ? Rɩ́ poo lɛ́ wɩɩsɛ dɩpomɩ rɩ́ɩ́ ko, ʋ wʋ́ʋ́ yik yó rʋ́ʋ́ hɩ́l ɓóŋ? Ʋ dɩ́cɔ́ŋsɛ (mʋ́kur) ná tɩɩ mɛ́, ʋ sɩ́ hɩ́l.»
Sɩŋsʋɔ́lɔ ná (mʋlɩ́sɔ́) mʋl há kɔʋ́ ná
11 Nyuutɩna Wɩɩsɛ bʋ́lɩŋ rɩ́ bʋlɛ́: 12 «Bɔsɛ nɩbɩɩlɛ duo né nɩɛ ná: Ɩ́ wɩ sɩ́ŋsʋɔlɔ ná mʋl ɛ̃. Bʋ́l pɔ́wɔ́ a bʋlɛ́: Ɩ́ ná Babɩlɔɔnɛ kuóro kuó yó dí Zerizalɛmɛ, ka ká kuóro arɩ́rʋ́ sɩdiire a ka mʋ́ Babɩlɔɔnɛ. 13 Ʋ lá sɩɛ́ ka kuóro jaa nɛrɔ nɛ́, ʋ rɩ́rʋ́ bil nʋtʋmɛ, nʋtʋmɛ́ ná há wa girí. Ʋ kɛsɛ tɔ́ɔ́ ná sɩ́dííre, 14 a makɛ rɩ́ dɩtɩ́llɛ ná sɩ́ dóé kánʋ, rɩ́ tɩ́llʋ́ tɩɩ. Ká rʋ́ʋ́ nʋtʋmɛ ná cɛ́. 15 Amá, ʋ vɔ́ʋ́ ká isi cɩ́nʋ́ mɛ́, a tʋ́ŋ nɩɛ Ezipiti mí rɩ́wɔ́ mʋ́ sʋ́l zɔ́nɛ rɩ́ soójiwa ɓɩkana rɩ́wɔ́ ko pɔ́ʋ́ mɛ́. Ʋ nyɛ́, ʋ sɩ́ wólli dí doé? Ʋ sɩ́ wólli? Ʋ nɛ́ŋ ná há tʋ́ŋ nyɛ́, sɩ́ wólli? Ʋ há zɔkɛ́ nʋtʋmɛ ná ʋ sɩ́ wólli lú lɛ́?
16 Ŋ é Nyuutɩna Wɩɩsɛ há wommó yɩr mɛ́, ŋ nɛ́ bʋ́lɛ pɛɩ́wa, kuóro ná sɩ́ sʋwɛ tɔ́ɔ́ ná mɛ́ ʋ nyuutɩna há bilú rʋ́ʋ́ dí kuóri. Ʋ há vɛ rʋ́ʋ́ zíl nʋtʋmɛ ná ká zɔkʋ́ wɩ́ɛ́. Babɩlɔŋnɛ tɩɩ mɛ́ nɛ́ ʋ sɩ́ sʋwɛ. Nyuutɩna Wɩɩsɛ nɛ́ bʋlɛ́. 17 Ezipiti kuóro soójiwa doé há mɔhɛ̃ ɛ́ wuu, ʋ nɩɛ kaŋ há mɔhɛ̃ ɛ́ wuu ʋ wa wólli lɔ́ʋ́ tá lal ná yoé tɛ́ŋ mɛ́. Ɓa há sɩ ɓá yɩl ɓɩzeno, a kúr tɛ́ŋ tɩɛkɛ zeŋ mí a tɩ́ŋ róŋ a ɓʋ́ʋ́sɛ nɩkáná. 18 Kuóro ná wʋ́ʋ́ nʋɔ wɩ́bʋ́lɛ har cɩ́nɛ, ka zɔkɛ nʋtʋmɛ ná ɓa há bile pá naŋá. Ʋ fa saŋɔ́, ká bɩrɛ tʋ́ŋ wɩ́nyɔ́rkɛ nyáŋ wuu: Ʋ sɩɛ́ wa cɛ́rɛ́ pɔ́ʋ́.
19 Ɛ nɛ́ tɛ́, Nyuutɩna Wɩɩsɛ sɛ́: Ŋ há wommó yɩr mɛ́, ʋ há zɔkɛ nʋtʋmɛ ná fa mɩnɩ́ŋ ŋ rɩ́rʋ́ pɛkɛ, ɛ wɩ́ɛ́ ŋ sɩ́ a rɩ́ ɛ́ wɩ́ɛ́ bɩrduú tɩɩ. 20 Ŋ sɩ́ yóŋ fiile, a kanʋ́ ŋ bara sɩɛrʋ, a kaá mʋ́ Babɩlɔɔnɛ. Róŋ ní ŋ sɩ́ bɛ́ŋsʋ́, ʋ nɩcɩ́tɩ́ktoó ná ʋ há pié tʋmɩ́ŋ mɛ́. 21 Ɓa sɩ́ ɓʋ́ʋ́sʋ́ lalyóóríbibará lal mɛ́, ka rɩ́ nɩkáánɛ ná fá pɩsɛ zʋ dunié kíŋkersi baná ná mɛ́. Ʋ nyɛ́ nɛ́, rɩ́ɩ́wa zɩ́ŋ rɩ́ŋ é Nyuutɩna Wɩɩsɛ nɛ́ bʋlɛ́.»
Nyuutɩna Wɩɩsɛ nʋtállɛ wɩ́ɛ́
22 «Noú ná Nyuutɩna Wɩɩsɛ há sɛ́: Ŋ tɩɩ sɩ́ bori sɛdrɛ tuu híle nʋɔ tenné a kánʋ́ mʋ́ cɔ́ŋsɛ paalɔ há ise lékílékí nyúú. 23 Ŋ sɩ́ kanú mʋ́ cɔ́ŋsɛ Ɩzɩrayɛl paalɔ ná há ise nyúú. Ʋ sɩ́ ká hílli a nɔŋ nɔnɔ, a bɩrmɛ́ sɛdɩrɛ tuu ná há wéró. Diíwiisi rɩ́wɔ́ duo wuu sɩ́ ko cɛ́wɔ́ dɛllɛ ʋ hílli mí, kaá pɛ aá fɩɛ́lʋ́ fɩɛ́l mɛ́. 24 Ɛ́ nɛ́, rɩ́ baka tunni wuu zɩ́ŋ, rɩ́ŋ nɛ́ ká Nyuutɩna Wɩɩsɛ. Ŋŋ́ a tuzesi ɓallɛ, ká tuwɩɛ́la wɩ́wá. Ŋŋ́ nɩ́ɩ́ a tulaarɛ wuu híl, ká a tuhílɛ bɩrtɔ́wɛ paarʋ́. Ŋ é Nyuutɩna Wɩɩsɛ nɛ́ bʋ́lɛ, ʋ ná ŋ há bʋ́lɛ ʋʋ́ nɩ́ɩ́ cɩ́nɛ́.»