Níŋ dí víínyi tuu (baka)
15
1 Nyuutɩna Wɩɩsɛ bʋ́lɩ́ŋ rɩ́ bʋlɛ́: 2 «Nɩbiino bio, ɩ bɩ́ɩ́nɔ rɩ́ viínyi tuu nɛ́ cɩ́có tunni ná naŋá mɛ́, ɛ́rá má ʋ hilli nɛ́ wer kʋkɔrɔ tuuni ná naŋá daasɛ rɩ́wɔ́ hilli? 3 Ɓa kenu daa aá bɩrmɛ́ bee rɩ́? Ɓa wó ka bɩrmɛ́ dacaksa aá sakɛ cɩksɛ (oŋkaatʋmɛ́) rɛ́ɛ́? 4 Ná viinyi ná nɛ́ ɓa pii marɛ níŋ: Ʋ nʋʋsɛ ná bɛllɛ wuu ní níŋ dí, a dí sɩsɩɛnnʋwa. Ʋ nyʋɔrɛ nɛ́ báá ka bee rɩ́? 5 Ʋ fa há duokó ʋ wɩ tʋ́ŋ wuu kéné, níŋ sɩɛ́ há duú nɛ́ ká rʋ́ʋ́ báá ká nyʋ́ɔ́rɛ?6 «Ɛ́ nɛ́ tɛ́ Nyuutɩna Wɩɩsɛ sɛ́: A nɛ́ ɛ ŋ há pi víínyi daa hé níŋ mí, ka tá kʋkɔrɔ tunni daasɛ. Ɛ́ wɩ́ɛ́, ŋ a rɩ́ŋ nyɩkɛ Zerizalɛmɛ nɩɛ ɛ nɛ́. 7 Ŋ sɩ́ bɩrɩ́ŋ sɩ́ɛ́ héwó mí. Ɓa bɩ́ɩ́nɔ rɩ́wɔ́ lɛ́ níŋ sɩɛrʋ, níŋ nɛ́ sɩɛ́ sɩ́ díwó. Ɛ́ nɛ́ rɩ́ɩ́wa zɩ́ŋ rɩ́ŋ nɛ́ ká Nyuutɩna Wɩɩsɛ, ŋ é nɛ́ bɩrɩ́ŋ sɩ́ɛ́ héwó mí. 8 A tɩ́ŋwɔ́ há wɩ cɩ́nɛ́ tɩkɩ́ŋ wɩ́ɛ́, ŋ sɩ́ a rɩ́ tɔ́ɔ́ né bɩrmɛ́ gɩrbétéké. Ŋ é Nyuutɩna Wɩɩsɛ nɛ́ bʋ́lɛ.»