Ɩzɩrayɛlɛ bɛlɛ mɔhɔ̃ rɩ́wɔ́ yó venni tá
14
1 Ɩzɩrayɛl nɩhɩɛ̃sɛ naŋá kóŋ dɩhɩ̃, a kenɩŋ sɩ́ɛ́ (láka). 2 Ɛ́ nɛ́ Nyuutɩna Wɩɩsɛ bʋlɩ́ŋ rɩ́ bʋlɛ́: 3 «Nɩbiino bio, nɩɛ nyáŋ venni mɩŋwɔ́ sɩɛnnɛ nɛ́. Ɓa hɩɛ̃nnɛ onni ná há yikwó aá hé bɔŋbɔŋ sɩɛrʋ. Ʋ nyɛ́ ná, ɓa sɩ wólli bɔsɩ́ŋ a zɩ́ŋ wɩ́ɩ́? 4 Ɛ́ wɩ́ɛ́, bʋl pɔ́wɔ́ bʋlɛ́: Rɩ́ŋ é Nyuutɩna Wɩɩsɛ sɛ́: Ɩzɩrayɛl nɛrɔ ná wuu há kéŋ venni ʋ sɩɛrʋ, ka hɩɛ̃nnɛ óŋ ná há yikú aá hé bɔ́ŋbɔ́ŋ sɩɛrʋ. Rʋ́ʋ́ nɛ́ ko ná wɩlaabʋllɔ rɩ sʋ́lɩ́ŋ é Nyuutɩna Wɩɩsɛ, ŋ sɩ́ zesú ka sɩ́wɔ́ káŋ ná belú. 5 A makɛ Ɩzɩrayɛl nɩɛ ná wuu sɩɛnnɛ fa há kɛ́kɩ́ŋ mɛ́, a tɩ́ŋwɔ́ venni ná wɩ́ɛ́, bɩrkóŋ rɩ́. 6 Ɛ́ nɛ́ tɛ́, bʋl pá Ɩzɩrayɛl nɩɛ a bʋlɛ́: Ná Nyuutɩna Wɩɩsɛ há sʋ́ʋ́ ná: Ɩ́ bɩrko, ɩ́ vɛɛwa venni ná tá, ɩ́ lɩ́sɩ́wa tɩɩ ɩ́ wɩ́tɩɛnnɛ ná wuu ɛɛ́ mɛ́.7 «Rɩɩ Ɩzɩrayɛl nɛrɔ, ɛrá má nɩhʋɔrɔ ná há ké Ɩzɩrayɛl mí, nɛ́ vɛ́ŋ é tá, ka ɓɩ́ɓáárɛ venni, rɩ́ puú sɩɛrʋ hé onni ná há yikú aá hé bɔŋbɔŋ ɛɛ mɛ́, ka isí ko ná wɩ́laabʋllɔ rʋ́ʋ́ bɔsɛ zɩmɩ́ŋ é Nyuutɩna Wɩɩsɛ cólle, ŋ tɩɩ nɛ́ sɩ́ makɩ́ŋ tɩɩ pɔ́ʋ́ rʋ́ zɩmɩ́ŋ. 8 Ŋ tɩɩ nɛ́ sɩ́ cɛ́ ɛ nɛrɔ mɛ́, rʋ́ʋ́ wɩɩla a malla pá Ɩzɩrayɛl nɩɛ ná naŋá, ká lɩ́sʋ́ ŋ nɩɛ sɩɛrʋ. Ɛ́ nɛ́ rɩ́ɩ́wa zɩ́ŋ rɩ́ŋ é nɛ́ ká Nyuutɩna Wɩɩsɛ.
9 «Rɩɩ wɩ́laabʋllɔ nɛ́ loé rʋ́ʋ́ nyɩ́sʋ́ rʋ́ʋ́ bʋl wɩ́ɩ́ pɔ́ʋ́ a tɔrʋ́ sɩɛrʋ. Ŋ é Nyuutɩna tɩɩ sɩ́ cɛ́ wɩlaabʋllɔ ná mɛ́, a tɩ́ŋɩ́ŋ doé mí a lɩsʋ́ Ɩzɩrayɛl mɛ́, ŋ nɩɛ sɩɛrʋ. 10 Wɩ́laabʋllɔ ná, arɩ́ nɛrɔ ná há ko bɔsʋ́, ɓa wuu sɩ́ ná bɛ́ŋsɛ a cɛ́rwɔ́ wɩnyɔ́rkɛ. Bee wɩ́ɛ́ ɓa wuu wɩ́'aalɩ́ ka bála. 11 A makɛ, rɩ́ Ɩzɩrayɛl nɩɛ sɩ́ŋ mɛ́ kɛkʋ́ rɩ́ɩ́ mʋ́ dɩ́boli, rɩ́ tɩ́ŋwɔ́ wɩ́tɩɛnnɛ mɛ́ rɩ́ zʋ busunnu sɩɛrʋ. Bee wɩ́ɛ́, ŋ sɩ́ ɔ́wɔ́ Wɩɩsɛ, ka rɩ́wɔ́ má áŋ bɛlɛ. Ŋ é Nyuutɩna Wɩɩsɛ nɛ́ bʋlɛ́.»
Wɩ́ɩ́ tó aá kɛ́rɛ Wɩɩsɛ mɛ́ rʋ́ʋ́ sɛ́ saríya dí
12 Nyuutɩna Wɩɩsɛ bʋ́lɩ́ŋ rɩ́ bʋlɛ́: 13 «Nɩbiino bio zesi: Rɩ́ tɔ́ɔ́ nɔ́ŋɔ nɩɛ nɛ́ ɔɔ zɔkɩ́ŋ mɛ́ a tʋ́ŋ wɩ́tɔ́k; ŋ sɩ́ cɩ́ŋwɔ́ mɛ́ rɩ́ ɓɩdiile sɩ́ mɩnʋ́ ka rɩ́ losú zʋ tɔ́ɔ́ ná, ká rɩ́ tókowí ɓʋ́ʋ́sɛ báála arɩ́ pʋsɛ. 14 ka rɩ́ nɩ́taŋnɛ nyáŋ botoro Nowe rɩ́ Danɩɛl arɩ́ Zɔɔbɛ má tɩɩ nɛ́ có rɩ́wɔ́ mɩ́ŋ tɔ́ɔ́ ná sɩɛrʋ má, ɓa dʋŋɔ́ nɛ́ sɩ́ wólli lu lɛ́, a tɩ́ŋwɔ́ nɩtaŋnɛ ná wɩ́ɛ́. Ŋ é Nyuutɩna Wɩɩsɛ nɛ́ bʋ́lɛ.
15 Ká, rɩ́ kaadíhuorúwa nɛ́ rɩ́ŋ tʋ́ŋ tɔ́ɔ́ ná sɩɛrʋ rɩ́wɔ́ ɓʋ́ʋ́sʋ́ bɛlɛ, ká rʋ́ʋ́ bɩrmɛ́ gɩrbétéké, nɛ́ŋ báá wɩ ráŋ tɩ́ŋɛ́ aá daarɛ, a tɩ́ŋ kaadíhuorúwa ná wɩ́ɛ́, 16 rɩ́ nɩɛ nyáŋ botoro dʋŋɔ́ má tɩɩ nɛ́ mɩ́ŋ ɛ tɔ́ɔ́ sɩɛrʋ, ŋ ŋmɩ́ɛ́sɔ́ ŋ há wommo yɩr mɛ́ ɓa wa wólli láwɔ́ heŋbólli rɩ́wɔ́ tollé tá, ʋ nɛ́ tówó dʋŋɔ́; ká rɩ́ tɔ́ɔ́ ná bɩrmɛ́ gɩrbétéké. Ŋ é Nyuutɩna Wɩɩsɛ nɛ́ bʋlɛ́.
17 «Ɛrá má, rɩ́ŋ nɛ́ ɛɛ rɩ́ lal ko zɔkɛ tɔ́ɔ́ ná, a ɓʋ́ʋ́sʋ́ nɩɛ arɩ́rʋ́ pʋsɛ wuu. 18 Ɛ́ tɔ́ɔ́ sɩɛrʋ, rɩ́ nɩɛ nyáŋ botoro nɛ́ mɩ́ŋ róŋ, ŋ ŋmɩ́ɛ́sɩ́ŋ yɩr mɛ́ ɓa wa wólli láwɔ́ heŋbólli rɩ́wɔ́ tollé tá, ʋ nɛ́ tówó dʋŋɔ́. Ŋ é Nyuutɩna Wɩɩsɛ nɛ́ bʋlɛ́.
19 «Ɛ́rá má, ŋ cɔwɩɩlɩ́zeno sɩɛrʋ, rɩ́ŋ nɛ́ tʋ́ŋ pʋɔlɩ́daarɩ́ tɔ́ɔ́ ná mɛ́, rʋ́ʋ́ ɓʋ́ʋ́sɛ tɔ́ɔ́ ná báála arɩ́rʋ́ pʋsɛ. 20 Ɛ́ tɔ́ɔ́ sɩɛrʋ, rɩ́ Nowe rɩ́ Danɩɛl arɩ́ Zɔɔbɛ má tɩɩ nɛ́ mɩŋ róŋ, ŋ ŋmɩ́ɛ́sɩ́ŋ yɩr mɛ́, ɓa wólli láwɔ́ heŋbólli rɩ́wɔ́ tolé tá. Amá ɓa dʋŋɔ́ nɛ́ sɩ́ ná laatɛ a tɩ́ŋwɔ́ nɩtaŋnɛ ná wɩ́ɛ́. Ŋ é Nyuutɩna Wɩɩsɛ nɛ́ bʋlɛ́
21 Bee wɩ́ɛ́, Nyuutɩna Wɩɩsɛ sɛ́: Rɩ́ŋ nɛ́ tɩ́ŋ wɩɩhálawa baná nyáŋ mɛ́, lal rɩ́ losu rɩ́ kaadíhuorúwa arɩ́ pʋɔlɩ́taarɩ mɛ́ rɩ́ bɛ́ŋsɛ Zerizalɛmɛ nɩɛ, a ɓʋ́ʋ́sɩ́wɔ́ rɩ́wɔ́ pʋsɛ, 22 báála rɩ́ háála mʋɔ sɩ́ káánɛ tɔ́ɔ́ ná mɛ́. Nowó nɩ́ɩ́ kúéwa rɩ́. Ɩ́ sɩ́ kɩ́ɛ́lɩ́wɔ́ mala rɩ́wɔ́ wɩ́'állɛ rɩ́ɩ́wa baŋcɩ́lɛ pɔrɛ mʋɔ; a mʋ́ tɩ́ɩ́nɛ wɩɩlawa ná ŋ há pié bɛ́ŋsɛ Zerizalɛmɛ. 23 Ɓa mala rɩ́wɔ́ wɩ́'állɛ sɩ́ bʋ́ɔ́lɩ́wa. Ɛ́ nɛ́ rɩ́ɩ́wa zɩ́ŋ, rʋ́ʋ́ to yɔ́ɔ́ ŋ pi nyɛ́ tʋ́ŋ tɔ́ɔ́ ná mɛ́. Ŋ é Nyuutɩna Wɩɩsɛ nɛ́ bʋlɛ́.»