Nyɩɛ́rʋ wɩ́laabʋlla wɩ́ɛ́
13
1 Nyuutɩna Wɩɩsɛ bʋlɩ́ŋ rɩ́ bʋlɛ́: 2 «Nɩbiino bio, bʋl pá Ɩzɩrayɛl wɩlaabʋlla ná haá bʋl wɩ́ɛ́ ɓa tɩɩ yɩrɛ mɛ́, ka bʋlɛ́ ŋ yɩ́rɛ mɛ́ nɛ́ ɓaa bʋl ɛ wɩ́ɛ́. Ɩ́ zesí Nyuutɩna Wɩɩsɛ wɩ́bʋlɛ́! 3 Ɛ́ nɛ́ Nyuutɩna Wɩɩsɛ sɛ́: Nyúbɔ́ŋ a pá wɩ́laabʋlla ná há ká nɩcʋʋlɛ, a tɩ́ŋwɔ́ tɩɩ sabɩɩna mɛ́ aá makɛ wɩ́muulɩnáálɛ, ka wɩ wɩ́ɩ́ wuu neé. 4 Ɩzɩrayɛl, ɩ wɩ́laabʋlla nɩhɛ̃ vasɛ há mɩ́ŋ jɩɓónni pɛksɛ nɛ́. 5 Ɓa vɔɔ rɩ́wɔ́ mʋ́ bɩrmɛ́ zekulewa ná, a sɔ zenaa a kɛrɛ Ɩzɩrayɛl mɛ́; a makɛ kal ná Nyuutɩna Wɩɩsɛ há sɩ́ duú cɔ́wɩɩlɔ rʋ́ʋ́ wolli cɛ́. 6 Ɓa wɩ́náálɛ kawɔ́ tɩɩ sabɩɩna wɩ́ɛ́ nɛ́, ka ɓa nʋɔ wɩ́bʋlɛ má a nyɩɛ́rʋ dʋŋɔ́. Ɓa há sɛ́: “Nyuutɩna Wɩɩsɛ nɛ́ sɛ́” Ka Nyuutɩna Wɩɩsɛ rá wʋɔ tʋ́mɛ́. Ɓaá bʋ́l nyɛ́, kaá yɩɛ́lɛ rʋ́ʋ́ nʋɔ su! 7 Ɩ́ wɩ́náálɛ toéwa tɩɩ sabɩɩna wɩ́ɛ́ nɛ́ rɛ́ɛ́? Ɩ́ wɩ nɩnyɩrsɛwɩ́ɛ́ dʋŋɔ́ nɩ́ɩ́ bʋ́l rɛ́ɛ́, ɩ́ há sɛ́: “Nyuutɩna Wɩɩsɛ nɛ́ sɛ́”, kaŋ wɩ wɩ́ɩ́ wuu bʋlɛ́? 8 Ɛ́ nɛ́ tɛ́, ŋ é Nyuutɩna Wɩɩsɛ sɛ́: Ɩ́ wɩ́bʋlɛ tó wɩ́táŋsɛ, ka ɩ́ wɩ́náálɛ má a nyɛ́wɩ́ɛ́ dʋŋɔ́, ɛ wɩ́ɛ́, ŋ rɩ́rɩ́wa mɩ́ŋ naŋá mɛ́.” Nyuutɩna Wɩɩsɛ nɛ́ sɛ́!9 «Ŋ nɛ́sɛ sɩ́ cɛ́ wɩlaabʋlla ná há píwó tɩɩ sabɩɩna wɩ́ɛ́ makɛ wɩ́náálɛ, kaa bʋl nyɛ́wɩ́ɛ́. Ŋ sɩ́ lɩsɩ́wɔ́ ŋ nɩɛ sɩɛrʋ, ŋ báá wa a rɩ́ŋ pʋ́ŋsɩ́wɔ́ yɩ́ra Ɩzɩrayɛl nɩɛ yɩ́ra sɩɛrʋ; rɩ́wɔ́ baá sɩ Ɩzɩrayɛl tíé zʋ. Ʋ ɛ́ nɛ́, rɩ́wɔ́ zɩ́ŋ rɩ́ŋ é nɛ́ ka Nyuutɩna Wɩɩsɛ.
10 Bee wɩ́ɛ́, ɓaá nyɩ́sɛ (tɛ́lɩ́ŋ) nɩɛ a bʋlɛ́: Tɛ́ŋfɩ́ɛ́l! ka tɛ́ŋfɩ́ɛ́l mʋɔ wuu tó. Ɓa tʋtʋmɩ́ nɛ́ ka rɩ́wɔ́ pi gudɩrɔŋ a mʋɔlɛ tɔ́zekɛrɛ ná ŋ nɩɛ há sɔɛ́ mɛ́. 11 Ɛ́ wɩ́ɛ́, bʋl pá nɩɛ ná há mʋɔlɛ zeŋ ná rɩ́ gudɩrɔŋ ná, rʋ́ʋ́ sɩ́ ɓal. Duóŋ zeno nɛ́ sɩ́ ko, rɩ́ duódɔwʋɔ ɓalɛ, rɩ́ poo lú. 12 Rɩ zeŋ ná lɩɩ ɓal, rɩ́ nɩɛ sɩɛ́ bɔsɩ́wa a bʋ́lɛ: Gudɩrɔŋ pii mʋɔlɛ́ zeŋ ná nyʋɔrɛ mɩ́ŋ nɛ́ɛ́? 13 Ɛ́ nɛ́ tɛ́, Nyuutɩna Wɩɩsɛ sɛ́: Ŋ cɔɛ́wɩɩlɔ sɩɛrʋ nɛ́, ŋ sɩ́ tʋ́ŋ pozeŋse, ŋ cɔ́wɩɩlɔ sɩɛrʋ ŋ sɩ́ tʋ́ŋ duóŋ zeŋsi, ka rɩ́ŋ cɔ́wɩɩlzeno sɩɛrʋ rɩ́ŋ tʋ́ŋ duódɔwʋɔ, rɩ́wɔ́ ko zɔ́kɩ́wa. 14 Zeŋ ná ɩ́ há mʋɔlɛ́ rɩ́ gudɩrɔŋ, ŋ sɩ́ yɛ́rkʋ́ a tuwi yakɛ tié rɩ́ ka rʋ́ʋ́ mukur nyɩ́ɩ́sɛ. Ɛ́ zeŋ sɩ ɓal ká rɩ́ɩ́wa tɩɩ sʋsɛ. Ʋ ɛ́ nɛ́ sɩɛ́ rɩ́ɩ́wa zɩ́ŋ rɩ́ŋ é nɛ́ ka Nyuutɩna Wɩɩsɛ. 15 Ŋ sɩ́ díŋ cɔwɩɩlɔ a mʋ perú nʋɔ, a yɛ́rkɛ zeŋ ná, ka cɛ́ nɩɛ ná há pi gudɩrɔŋ mʋɔlʋ́. Ŋ sɩ́ bʋ́l pɛɩ́wa bʋlɛ́: “Zeŋ yɛ́rkɔ́! Nɩɛ baá toó rɩ́wɔ́ mʋɔ́lʋ́! 16 Ɩzɩrayɛl wɩ́laabʋlla ná fa há muule haá ná Zerizalɛmɛ nyúú wɩ́ɛ́ báá tó. Ɓa wɩ́múúlináálɛ sɩɛrʋ, ɓa fa sɛ́. “Tɛ́ŋfɩ́ɛ́l dʋŋɔ́, ká tɛ́ŋfɩ́ɛ́l mʋɔ wuu toó.”» Nyuutɩna Wɩɩsɛ nɛ́ sɛ́.
Wɩ́laabʋlla ná há tʋ́ŋ vʋrɩ́ wɩ́ɛ́
17 «Ɩ é nɩbiino bio, bʋ́l pá Ɩzɩrayɛl háála ná há sɩ́ ɓa lá Wɩɩsɛ nʋɔ wɩ́ɛ́ aá bʋl, kaá tɩ́ŋwɔ́ tɩɩ sabɩɩnɛ nɛ́. Bʋ́l pɔ́wɔ́ bʋlɛ́. 18 Ɩ sɩ́ bʋlɛ́: Nyuutɩna Wɩɩsɛ sɛ́: Nyúbɔ́ŋ a pɛɩ́wa! Ɩ́ nɩɛ ná há luki nénípɩrsɛ, a sɔ nyúballwɩ́ɛ́la, arɩ́ nyúballzeŋsi aa yɔwɛ́ nɩɛ, wɩɩla sɩ́ diíwa. Ɩ́ tʋ́ŋ nyɛ́ aa zɔkɩ́ŋ nɩɛ ná hɩẽso, ka é duo ké tɛ́ŋfɩ́ɛ́l mɛ́. 19 A tɩ́ŋɩ́wa nʋɔ ɓɩdiili wɩ́ɛ́; ɔrzɛ gumi rɩ́ dɩpɛ́ŋwie wɩ́ɛ́, ɩ́ nyɛ́ nyɩɛ́rʋ a muurɩ́ŋ yɩrɛ ŋ nɩɛ ná sɩ́ɛ́. Nɩɛ ná há a wɩ́ɛ́ a cɛ́rɛ sʋʋ, ɩ́ bɩrɛ lówó ní, kaá ɓʋ́ʋ́sɛ nɩɛ ná há wɩ wɩ́ɩ́ wuu ɛ́. Ɩ́ nyɛ́ nyɩɛ́rʋ́ a tɛ́lɩ́ŋ nɩɛ. 20 Ɛ́ nɛ́ tɛ́, ŋ é Nyuutɩna Wɩɩsɛ sɛ́: Ŋ sɩ́ cɔ́nnɛ pɛ́nɛwa ná ɩ́ há kené tɔ́wɔ́ sɩ́ɛ́ mɛ́ kaá zɔkɛ nɩɛ hiẽso. Ŋ sɩ́ cɔ́nníwɔ́ ká lá nɩɛ ná ɩ́ há kɛ́sɛ tá rɩ́wɔ́ tɩ́llɩwɔ́ tɩɩ. 21 Ŋ sɩ́ cɔ́nníwa pɛnɛwa ná, ká láŋ nɩɛ tá ɩ́ nɛ́sɛ mɛ́, rɩ́wɔ́ báá sɩɩ́wa nɛ́sɛ nɩɛ a. Ɛ́ nɛ́ sɩɛ́ rɩ́ɩ́wa zɩ́ŋ rɩ́ŋ é nɛ́ ká Nyuutɩna Wɩɩsɛ. 22 Bee wɩ́ɛ́, ɩ́ nyɩɛ́rʋ́ wɩ́bʋlɛ viŋsi nɩyɛrɛ sɩɛrʋ, ká ŋ é fa wɩ ɛɛ́ rʋ́ʋ́ sɩɛrʋ viŋsi. Kaá duori sahɔtɩɩnɔ naasɛ bɔ́ŋbɔ́ŋ ɛɛ́ mɛ́, a tɛlʋ́ ʋ báá wa ja rʋ́ʋ́ tɔ́ʋ́ malbɔmɔ ká ná waana. 23 A tɩ́ŋ ɛ mɛ́, ɩ́ báá wa a rɩ́ɩ́wa ká sɩ́ɛ́ a múúli aá ná wɩ́ɛ́, ká rɩ́ɩ́wa báá sɩ́ wólli bʋl nyɛ́wɩ́ɛ́. Ŋ sɩ́ láŋ nɩɛ tá ɩ́ nɛ́sɛ mɛ́. Ɛ́ nɛ́ sɩɛ́, rɩ́ɩ́wa zɩ́ŋ rɩ́ŋ nɛ́ ká Nyuutɩna Wɩɩsɛ.»