Ezekiyɛl lá sɩ́ɛ́ bʋl yomi wɩ́ɛ́
12
2 «Nɩbiino bio, ɩ ké nɩvaalɛ (nɩbɩɩlɛ) sɩɛrʋ nɛ́! Ɓa keŋ sɩ́ɛ́, ka wɩ ráŋ ná, a ka dɩllɛ ka wɩ wɩ́ɩ́ nɛ̃, bee wɩ́ɛ́, ɓa ka dɩlhɔtɩɩna duo ní. 3 Ɛ́ wɩ́ɛ́, ɩ é nɩbiino bio, ɩ sɩ́ isi wɔhɔ mɛ́, a pɛɩ́ cɩksɛ a hé naŋá mɛ́ a nɛ́ lal nɩkiri, ka rɩ́ nɩɛ wuu bibelí. Ɩ sɩ́ lɩɩ́ tɔ́ɔ́ ná mɛ́, nɩɛ wuu sɩ́ɛ́ mɛ́, a fá mʋ́ dɩhuó. Rɩ́ gbé, ɓa sɩ́ zɩŋ rɩ́wɔ́ ká nɩvaalɛ (nɩbɩɩlɛ) duo ní. 4 Wɔhɔ, ɩ sɩ́ pɛɩ́ cɩksɛ hé naŋá mɛ́, a ka lɩɩ́ jaa mɛ́ ka rɩ́ nɩɛ wuu bibelí. Ʋ gbaanɛ, rɩ́ páwɔ́ ka lɛ́ tɔ́ɔ́ ná mɛ́, nɩɛ wuu sɩ́ɛ́, a nɛ́ lalnɩkiri há pɔʋ́ cɩksɛ aá fá. 5 Ɓa sɩ bibelɩ́, ká rɩ́ɩ́ cɔ́rɛ zeŋ ná, ka pɛɩ́ cɩksɛ tɩ́ŋ róŋ lɛ́. 6 Bɩno mɛ́, ɓa sɩ bibelɩ́ ká rɩ́ɩ́ páwɔ́ baasɩ́ vapara mɛ́ a kaá lɛ́. Ɩ ko lɩɩ́ mɛ́, ɩ sɩ́ ja pɛnɛ tɔ́ɩ́ sɩ́ɛ́ mɛ́, rɩ́ há bel tɔ́ɔ́ ná. Bee wɩ́ɛ́, ɩ mɩ́ nɛ́, ŋ a rɩ́ŋ tɩ́ŋ bʋl pá Ɩzɩrayɛl nɩɛ, rɩ́wɔ́ zɩ́ŋ wɩ́ɩ́ ná há kué.» 7 Ɛ́ nɛ́ ŋ tʋ́ŋ wɩ́ɛ́ ná Nyuutɩna Wɩɩsɛ fa há bʋlɛ́ páŋ: Ŋ ísó wɔhɔ a páŋ cɩ́ksɛ hé naŋá mɛ́, a nɛ́ lalnɩkiri há pɔ́ʋ́ cɩ́ksɛ rʋ́ʋ́ fá. Ʋ gbaanɛ bino sɩɛrʋ ŋ cɔ́rɛ zeŋ ná, a píŋ lɔkɔ cɩ́ɩ́nɛ́ a tɩ́ŋ róŋ lɩɩ cól, ka nɩɛ bibelí. 8 Ʋ cɩ́cʋɔ́, Nyuutɩna Wɩɩsɛ bʋ́lɩ́ŋ rɩ́ bʋ́lɛ: 9 «Nɩbiino bio, Ɩzɩrayɛl duo né nɩɛ há ka nɩvaalɛ (nɩbɩɩlɛ) duo sɩ́ bɔsɩ́ a bʋlɛ́: “Beewa rɛ́, ɩ ɩ'a nyɛ? 10 Bʋl pɔ́wɔ́ bʋ́lɛ: “Nyuutɩna Wɩɩsɛ gáásɛ wɩ́ɛ́ kuóro ná há mɩŋ Zerizalɛmɛ mɛ́, rɩ́ Ɩzɩrayɛl nɩɛ ná wuu há mɩ́ŋ róŋ nyúú.” 11 Bʋl pɔ́wɔ́, ŋ tʋ́ŋ nyɛ́ rɩ́ɩ́wa zɩ́mɩ́wɔ́ tɩɩ kánɛ́ nɛ́, ŋ há sʋʋ ná ɛ nɛ́ sɩ́ perwó. Bee wɩ́ɛ́ ɓa sɩ́ kɛsɩ́wa kaá mʋ́ yomí. 12 Ɓa tɔ́ɔ́ kuóro sɩ́ pɔ́ʋ́ cɩ́ksɛ láálʋ́ vapara mɛ́, bino mí a lɩ tɩ́ŋ zeŋ ná ɓa há ɓɛɛ cɔ́rɛ a fá. Pɛnɛ nɛ́ ʋ sɩ́ pi tɔ́ʋ́ sɩ́ɛ́ mɛ́, a makɛ rʋ́ʋ́ há ná tɔ́ɔ́ ná. 13 Ɛ́ nɛ́ tɛ́, ŋ é Nyuutɩna Wɩɩsɛ sɩ́ hé bará kanʋ́, rɩ́wɔ́ kanʋ mʋ́ Kaldeɛŋwa tɔ́ɔ́ Babɩlɔɔnɛ. Ʋ sɩ́ sʋwɛ rʋ́ʋ́ sɩ́ɩ́ wɩ tɔ́ɔ́ ná né. 14 Ʋ kile nɩɛ, ʋ sóójiwa ná há pɔ́ʋ́ mɛ́ arɩ́rʋ́ lalyoore, ŋ sɩ́ kiríwó rɩ́ tókowí rɩ́wɔ́ pɩsɛ zʋ dunie kíŋkersi baná ná mɛ́. 15 Ɛ́ nɛ́ rɩ́wɔ́ zɩ́ŋ rɩ́ŋ nɛ́ ká Nyuutɩna Wɩɩsɛ, ŋ há sɩ́ kirwó rɩ́wɔ́ fá zʋ́ dɩtɩ́llɛ rɩ́ tɔ́nɛ sɩɛrʋ. 16 Amá, ŋ sɩ́ pɔ́ɔ́ nɩɛ mʋɔ mɛ́ rɩ́ lal rɩ́ losu arɩ́ pɔ́ʋlɩ́ táárɩ́ sɩ́wɔ́ ɓʋ́ʋ́sʋ́: A makɛ rɩ́ŋ cesi pá duowa ná sɩɛrʋ ɓa há sɩ́ mʋ́ʋ́ mɩ́ŋ ɓa wɩ́tɩɛnnɛ ná wuu ɓa há ɛɛ. Ɛ́ nɛ́ ɓa zɩ́ŋ rɩ́ŋ nɛ́ ká Nyuutɩna Wɩɩsɛ.»17 Nyuutɩna Wɩɩsɛ bʋlɩ́ŋ rɩ́ bʋlɛ́: 18 «Nɩbiino bio, ɩ sɩ́ díí ɓɩdííli kaá cél, a nyɔ́ɛ́ nyii vaklɛ rɩ́ hĩĩne sɩɛrʋ. 19 Ɩ sɩ bʋl pá tɔ́ɔ́ ná nɩɛ a bʋlɛ́: Ná Nyuutɩna Wɩɩsɛ há sʋ́ʋ́ ná, ɩ́ é Zerizalɛmɛ nɩɛ ná há mɩŋ Ɩzɩrayɛl tíé mí: Ɩ́ sɩ́ diíwa ɓɩ́dííle walmɛ́ mɛ́, kaá nyɔɛ́wa nyɔɔ́lɔ wiile rɩ́ vaklɛ sɩɛrʋ. Bee wɩ́ɛ́, tɔ́ɔ́ ná rɩ́ onni ná wuu há mɩ́ŋ róŋ sɩ́ ɓal zɔkrʋ sɩɛrʋ, a tɩ́ŋ nɩɛ ná há mɩ́ŋ bɩbátʋtʋmɛ́ ná wɩ́ɛ́. 20 Tɔ́nɛ ná nɩɛ há mɩŋ róŋ sɩ́ bɩrmɛ́ tɔ́wuólli ká rɩ́ tɔ́ɔ́ ná a gɩrbétéké. Ɛ́ mɛ́ nɛ́ sɩɛ́ rɩ́ɩ́wa zɩ́ŋ rɩ́ŋ nɛ́ ká Nyuutɩna Wɩɩsɛ.»
Nyuutɩna há sʋ́ʋ́ ná nɛ́ sɩ́ tʋ́ŋ
21 Nyuutɩna Wɩɩsɛ bʋ́lɩ́ŋ rɩ́ bʋlɛ́: 22 «Ɩ é nɩbiino bio, bee sɩŋsʋɔlɔ rɛ́ ɓa sʋɔlɔ aá pá Ɩzɩrayɛl tɔ́ɔ́ ná nyɛ́?: “Ɓa há sɛ tɛ́ŋ deero ka wɩ́muulɩnáálɛ oro wuu nʋɔ há wɩ sué”? 23 Ɛ́ wɩ́ɛ́, bʋl pɔ́wɔ́ bʋlɛ́: Ná Nyuutɩna Wɩɩsɛ há sʋʋ ná: Ŋ sɩ́ a rɩ́wɔ́ báá sɩ́ sɩ́ŋsʋɔ́lɔ né sʋɔ́lɔ Ɩzɩrayɛl tié mí. Amá taŋá bʋl pɔ́wɔ́ bʋlɛ́: “Rɩ́wɔ́ zɩ́ŋ rɩ́ tɛ́ŋ báá wɩ ból, ka rɩ́ŋ a rɩ́ wɩ́náálɛ ná oro wuu nʋɔ sú.” 24 Nɛŋ báá wʋɔ́ a rʋ́ʋ́ puú tɩɩ wɩ́náálɛ ɛrá má a bʋl nyɛ́ wɩ́ɛ́ tɛl nɩɛ Ɩzɩrayɛl mí. 25 Ŋ é Nyuutɩna Wɩɩsɛ, ŋ há bʋlʋ́ ná wuu, ɛ wɩ́ɩ́ wa dáánɛ ká tʋ́ŋ. Nɩbɩɩlɛ (nɩvaalɛ) duo nɩɛ, ɩ́ tɛ́ŋ mɛ́ nɛ́, rɩ́ŋ a wɩ́ɛ́ ná ŋ fa há bʋlɛ́ nʋɔ su. Ŋ é Nyuutɩna Wɩɩsɛ nɛ́ sɛ́.»
26 Nyuutɩna Wɩɩsɛ báá bʋlɩ́ŋ rɩ́ bʋlɛ́: 27 «Nɩbiino bio, ná Ɩzɩrayɛl nɩɛ há bʋlʋ́ ná: Ɓa sɛ́ báálɔ né wɩ́náálɛ ná tóó mʋ́l neé mɩ́ wɩ́ɩ́, ʋ bʋ́l tɛ́ŋ há kúé wɩ́ɛ́ nɛ́. 28 Ɛ́ nɛ́ tɛ́ bʋl pɔ́wɔ́ a bʋlɛ́: Ná Nyuutɩna Wɩɩsɛ há sʋ́ʋ́ ná: Ŋ wɩ́bʋlɛ́ ná oro wuu nʋɔ suí báá wa dáánɛ, ŋ há sʋʋ́ ná nɛ́ sɩ́ tʋ́ŋ. Ŋ é Nyuutɩna Wɩɩsɛ nɛ́ bʋ́lɛ.»