Wɩɩsɛ cɛ́ Zerizalɛmɛ mɛ́
9
1 Ʋ cáási kɩ́ŋkáŋ héŋ dɩllɛ mɛ́ a bʋlɛ́: «Ɩ́ ko, tɔ́ɔ́ ná zɔkɛ́ peró; nɛ́ŋ wuu puú zɔkrʋ tokowi kanú nɛ́sɛ mɛ́.» 2 Ɛ mɛ́, ŋ ná báála balgo rɩ́wɔ́ tɩ́ŋ wɩ́cʋɔlɩjɩzeno dannʋzeno ná há caasɛ wɩɩsɛ dɩpomɩ́ nɛgʋɔ rɩ́ cɔ́ɔ́ aá ko. Ɓa oro wuu fa kenú zɔkrʋ tokowí ʋ nɛ́sɛ mɛ́. Nɛrɔ nɔ́ŋɔ má fa mɩŋwɔ́ sɩɛrʋ a sú gepúwɩɛlɩ́wie gɛrɔ, kɔʋ́ tɩŋá báltɛ ka onni ɓa há kené aá pʋ́ŋsɛ. Ɓa ko cɛ́ kɔmɔ koro ná laka. 3 Ɩzɩrayɛl Wɩɩsɛ píŋ ná isí malɩ́kawa ná nyúú, a mʋ́ tuwi jaa ná dánnʋɔ. Ɛ́ nɛ́ ʋ yɩ́rɛ báálɔ ná há su gepúwɩ́ɛ́liwie gɛrɔ, a vɔwɛ omo ɓa há kené aá pʋ́ŋsɛ ʋ tɩ́ŋa báltɛ mɛ́. 4 Nyuutɩna Wɩɩsɛ bʋlʋ́ rɩ́ bʋlɛ́: «Isi zʋ tɔ́ɔ́ ná sɩsɩɛnnʋwa, Zerizalɛmɛ sɩɛrʋ; nɩɛ mɩŋ róŋ, a caasɛ mɩŋ wiile rɩ́ hɩ̃ɩ̃ne mí, a tɩ́ŋ wɩ́lɔrɛ́ ná ɓa haá tʋ́ŋ tɔ́ɔ́ sɩɛrʋ; a pi malla héwó tulli mí.» 5 Kaŋ nɛ̃ rʋ́ʋ́ bʋ́l wɩ́ɛ́ nɩɛ ná naŋá rɩ́ «Ɩ́ tɩŋʋ́ mɛ́ a ɓʋ́ʋ́sɛ tɔ́ɔ́ ná nɩɛ. Ɩ́ sɩ́ɩ́ há né nɛ́ŋ ná wuu ɩ́ sɩ́ susu fa, a sɩ́ oro wuu ló. 6 Ɩ́ ɓʋ́ʋ́sɛ nɩ́hɩɛ̃́sɛ rɩ́ heŋbiwafɛllɛ rɩ́ tolé rɩ́ heŋbiisi arɩ́ háála wuu mɩɛmɩɛ. Amá nɩɛ ná há keŋ malla ɓa tulli mí, ɩ́ sɩ́wɔ́ oro wuu mí tɩkʋ́. Ɩ́ lá sɩ́ɛ́ pul ɓʋ́ʋ́sɛ nɩɛ ná há mɩŋ Wɩɩsɛ dɩmɩnɩ́ ná.» Ɛ́ nɛ́ ɓa pul ɓʋ́ʋ́sɛ nɩ́hɩɛ̃́sɛ ná fa há mɩŋ jaa ná sɩ́ɛ́.7 Ʋ bʋ́lwɔ́ rɩ́ bʋlɛ́: «Ɩ́ a rɩ́ jaa ná zʋ busunnu, a ɓʋ́ʋ́sɛ nɩɛ jɛrɛ sú wuólli ná wuu, ɩ́ mʋ́!» Ɛ́ nɛ́ ɓa mʋ́ a ɓʋ́ʋ́sɛ tɔ́ɔ́ ná nɩɛ. 8 Amá, tɛ́ŋ ná mɛ́ ɓa há mɩŋ nɩɛ ná ɓʋ́ʋ́sɛ mɛ́, ŋ dʋŋɔ́ nɛ́ fa cɩnɛ́; ɛ nɛ́ ŋ ɓál kaníŋ sɩ́ɛ́ cú tíé ká cáási bʋlɛ́ «Woó, Nyuutɩna Wɩɩsɛ, ɩ sɩ́ saŋ ɓʋ́ʋ́sɛ Ɩzɩrayɛl nɩkáána ná tenní a tɩ́ŋɩ́ cɔ́wɩɩlzeno ná ɩ há ja rɩ́ɩ́ pii a Zerizalɛmɛ mɛ́?» 9 Ʋ bʋlɩ́ŋ rɩ́ bʋlɛ́: «Ɩzɩrayɛlɛ arɩ́ Ziida nɩɛ wɩ́bɔmɔ zeno a duki nɛ́sɛ. Ɓa tʋ́ŋ bɔŋbɔŋ a bɩsɛ cɛ́l su tɔ́ɔ́ ná. Bee wɩ́ɛ́ ɓa sɛ́: Nyuutɩna Wɩɩsɛ vɛ tɔ́ɔ́ ná tá, ʋ báá wɩ wɩ́ɩ́ ná ʋ sɩɛrʋ.” 10 Ɛ́ wɩ́ɛ́, ŋ sɩ́ɛ́ báá tówó mí rɩ́ŋ fawɔ́ susu. Amá ŋ sɩ́ a rɩ́wɔ́ cɩ́ɩ́nɩ́wɔ́ mala ná cɩka zíŋ.» 11 Ká, báálɔ ná há su gepúwɩ́ɛ́liwie gɛrɔ, a vɔwɛ omo ɓa há kené aá pʋ́ŋsɛ báltɛ mɛ́, ko bilú nʋɔ a bʋlɛ́: «Ŋ ɔɔ ná ɩ fa há páŋ nʋɔ rɩ́ŋ a.»