Wɩɩsɛ báá makʋ́ tɩɩ pá Ezekiyɛl
10
1 Ŋ há belé: Ŋ ná zaaró malɩ́kawa ná nyúnni mí; ʋ dahá safííri dɔwɩ́ há nɩhɛ̃́ kuóɓása nɛ́ mɩ́ŋ róŋ. 2 Ɛ́ nɛ́ Wɩɩsɛ bʋl báálɔ ná há su gepúwɩ́ɛ́liwie gɛrɔ ná rɩ́ a bʋlɛ́: «Isi zʋ́ malɩ́kawa ná sɩ́sɩɛ́nnɩ́wa ɓa naasɛ mʋ́l a pá níŋhala suí nɛ́ŋsa, a kaa lɛ́ bɩsɛ tá tɔ́ɔ́ ná sɩɛrʋ.» Ʋ há bʋl ɛ́, ŋ ná báálɔ ná ʋ iso zʋ ŋ sɩ́ɛ́ mɛ́.3 Báálɔ ná há mʋɛ́ zʋ́, malɩ́kawa ná fa mɩŋ wɩ́cʋɔlɩjɩzeno ná neduu ní, ka nyʋɔsɛ há nɩhɛ̃́ duóbásɛ isi tɔ́ɔ́ wuólwie ná mɛ́. 4 Nyuutɩna Wɩɩsɛ pɩ́ŋ ná lɛ́ malɩ́kawa ná mɛ́, a mʋ́ mɩ́ŋ wɩ́cʋɔlɩ́jɩzeno ná dannʋɔ ná mɛ́; ʋ pʋmmɔ zʋ́ caanɛ wuóllo ná wuu. Ka duóbásɛ má su wɩcʋɔlɩ́jaa ná. 5 Ɓa cɛ́ pʋmmɔ wɩcʋɔlɩ́jaa wuóllo ná sɩɛrʋ kaa nɛ̃́ malɩ́kawa ná kɩ́ŋkeru dɔmɛ́. Dɔmɛ́ ná nɩhɛ̃́ doé wuu tɩna Wɩɩsɛ lɩŋó dɔmɛ́ nɛ́. 6 Wɩɩsɛ bʋl báálɔ ná há su gepúwɩɛlɩ́wié gɛrɔ ná rɩ́ bʋlɛ́: Zʋ malɩ́kawa sɩsɩɛnnɛwa ɓa naasɛ mʋ́l a pá níŋhala. Ɛ́ tɛ́ŋ mɛ́ báálɔ ná fa cɛ́ naa ná láká nɛ́. 7 Ɛ́ nɛ́ malɩ́ka ná tɛrʋ́ nɛ́sɛ a pá níŋ ná há mɩnʋ́ rɩ́ nɔŋɔ́ ná pɛkɛ a su báálɔ ná há su gepúwɩɛlɩ́wié gɛrɔ ná nɛ́ŋsa. Báálɔ ná la kaá cól.
8 Malɩ́kawa ná kíŋkeru ná mʋʋla omo há nɩhɛ̃́ nibiino nɛ́sɛ nɛ́ ko lɩ nyɩɩsɛ róŋ. 9 Ŋ há belé: Ŋ ná naasɛ baná, malɩ́kawa ná oro wuu láká naa balá nɛ́ róŋ. Ɛ́ naasɛ faá tʋ́l dɔwɩ́wero tʋ́lɛ nɛ́. 10 Naasɛ ná baná wuu fa nɩhɛ̃́ naŋá. Ka ʋ nɩhɛ̃́ ɓa há pi oro wuu lɛsʋ́ nɔ́ŋɔ sɩɛrʋ. 11 Ɓa wó neduu rɩ́ nɛgʋɔ ɛrá má sɩ́ɛ́ rɩ́ har va aá mʋ́, ɓa wó dɩhɛ̃́ wuu va aá mʋ́ ka wɩ cʋrɛ. 12 Malɩ́kawa tɛ́ŋ wuu mí. Ɓa daguŋsi rɩ́ nɛ́ŋsa rɩ́ kíŋkeru arɩ́wɔ́ naasɛ ná baná wuu; sɩ́ɛ́ fa cɔ́wɔ́ wuu mí ní. 13 Ɛ́ nɛ́ ka ŋ nɛ̃́ ɓa pá naasɛ ná baná yɩ́rɛ “Povilmo”. 14 Malɩ́kawa ná oro wuu fa keŋ sɩ́ɛ́ baná nɛ́: Dʋ́ŋdʋʋ̃́ mɩ́nɔ keŋ malɩka sɩ́ɛ́ nɛ́, bʋllɛ mɩ́nɔ sɩ́ɛ́ ka nɩbiino sɩ́ɛ́ nɛ́, botoro nyúú mɩ́nɔ sɩ́ɛ́ má nɩhɛ̃ kɩ́ŋkáná sɩ́ɛ́, ka baná nyúú mɩ́nɔ má sɩ́ɛ́ a kiési sɩ́ɛ́. 15 Ŋ ná malɩ́kawa ná ɓa iso zɛ́ bána rɩ́. Ɓa rɩ́ óŋhiẽ́se ná ŋ fa há neé Kebarɛ fuo nʋɔ nɛ́ nɩhɛ̃́ naŋá. 16 Malɩ́kawa ná nɩ́ɩ́ valɛ́, naasɛ ná má tɩ́ŋwɔ́ mɛ́ nɛ́ aá va. Ka rɩ́wɔ́ nɛ́ kéŋwó kíŋkeru jɛrɛ rɩ́wɔ́ isi fil, naasɛ ná cɔ́wɔ́ mɛ́. 17 Rɩ́ malɩ́kawa nɛ́ cɩ́nɛ́, naasɛ ná má cɛ́. Rɩ́ ɓa nɛ́ iso fil zɛ́ bána rɩ́, naasɛ ná há cɔ́wɔ́ mɛ́. Bee wɩ́ɛ́, óŋhiẽ́se ná sabɩɩna (hiẽso) fa mɩ́ŋwɔ́ tɩɩ mɛ́ nɛ́.
Nyuutɩna Wɩɩsɛ vɛ wɩcʋɔlɩ́jaa ná tá
18 Nyuutɩna Wɩɩsɛ pɩ́ŋ lɛ́ wɩ́cʋɔlɩ́jaa ná dannʋɔ mɛ́, a mʋ́ tuwi malɩ́kawa ná dahá. 19 Ɛ́ nɛ́ malɩ́kawa keŋwó kíŋkeru a fil zɛ́ bána rɩ́, ka ɓa naasɛ má tɩ́ŋwɔ́ mɛ́. (omo sɩ́ fil zɛ bána ka rʋ́ʋ́ naasɛ káánɛ tíé? Bɔsɛ́). Ɓa iso mʋ́ tuwi wɩcʋɔlɩ́jaa ná dannʋɔ ná haá caasɛ wɩɩsɛ dɩpomɩ́ rɩ́ cɔ́ɔ́ nɛ́. Ɩzɩrayɛl Wɩɩsɛ píŋ ná nɛ́ faá tʋlwɔ́ wuu mí. 20 Kebarɛ fuo nʋɔ, ɛ óŋhiẽ́se ní ŋ fa ná ɓa mɩ́ŋ Ɩzɩrayɛl Wɩɩsɛ naasɛ mʋ́l. Ɛ nɛ́ sɩɛ́, ŋ zɩ́ŋ rɩ́ malɩ́kawa nɛ́. 21 Ɛ́ malɩkawa oro wuu fa keŋ sɩ́ɛ́ baná, kíŋkeru baná, arɩ́ nɛ́ŋsa há nɩhɛ̃́ nɩbiine nɛ́sɛ ɓa kíŋkeru ná mʋ́ʋ́la. 22 Ɓa sɩ́ɛ́ fa nɩhɛ̃́ óŋhɩẽ́se ná ŋ fa há neé Kebarɛ fuo nʋɔ nɛ́ sɩ́ɛ́ nɛ́. Ɓa nɩɩsɔ fa nɛ̃ ɛ́ nɛ́. Ɓa oro wuu fa belwó sɩ́ɛ́ terke nɩ́ aá va.