Veŋɓaarɔ mɩ́ŋ Wɩɩsɛ wɩcʋɔlɩjaa sɩɛrʋ (Wɩ́bɔma zʋ wɩ́cʋɔ́lɩjaa)
8
1 Bɩŋsɛ balgo nyúú mí, caŋsɛ balgo, ɛ cana tapʋlɛ bɔmmʋɔ kal, ŋ fa keníŋ jaa mɛ́, ká Ziida nɩhɩɛ̃sɛ ko ké lɛlíŋ, ɛ mɛ́ nɛ́ Nyuutɩna Wɩɩsɛ nɛsɛ tikíŋ mɛ́. 2 Ŋ belo, a ná: Omo há nɩhɛ̃́ nɩbííno. A pɔʋ́ nyúú mí ka kaa tuwú tɩŋa, wuu fa dé ka níŋ ní. Ka pɔ́ʋ́ tɩŋa mɛ́, ka kaa tuwí naasɛ, wuu fa deé tʋ́l a nɛ́ óŋcʋɔrɩ́ nɛ́. 3 Ʋ tɛ́rɛ omo há nɩhɛ̃́ nɩbiino nɛ́sɛ a ko kanɩ́ŋ nyúpʋna mɛ́. Ká wɩ́náálɔ sɩɛrʋ, Wɩɩsɛ sabɩɩna ko kanɩ́ŋ ɓɔ́ tié a kaa zɛ́ bána rɩ́. A kaníŋ kaa mʋ́ tuwi Zerizalɛmɛ mɛ́. Wɩ́cʋɔlijaa ná sɩɛrʋ dannʋɔ ná há caasɛ wɩɩsɛ dɩ́pomɩ́ nɛgʋɔ rɩ́; ɓa fa maá Wɩɩsɛ bánɔŋnni óŋ'máálɛ ráŋ, haá tʋ́ŋ bánɔŋnni. 4 Ɩzɩrayɛl Wɩɩsɛ píŋ ná fa míŋ róŋ, a nɛ̃ ŋ fa há lá sɩɛ́ nóú polo ná sɩɛrʋ ɛ́. 5 Ɛ́ nɛ́ ʋ bʋlɩ́ŋ rɩ́ bʋlɛ́: «Nɩbiino bio, ɓɔ́ɩ́ sɩ́ɛ́ bel wɩɩsɛ dɩpomɩ́ nɛgʋɔ rí.» Ɛ nɛ́ ŋ ɓɔ́ŋ sɩ́ɛ́ a bel wɩɩsɛ dɩpomɩ́ nɛgʋɔ rɩ́, a ná: Wɩ́cʋɔlɩjaa wɩɩsɛ dɩpomɩ́ nɛgʋɔ dannʋɔ ná mɛ́, rɩ́wɔ́ maá koro ráŋ. Ɛ bánɔŋnnɩ́ óŋ'máálɛ fa mɩ́ŋ dannʋɔ mɛ́. 6 Ʋ bʋlɩ́ŋ rɩ́ a bʋlɛ́: «Nɩbííno bio, ɩ ná wɩ́ɩ́ ná ɓa haá tʋ́mɛ́ rɛ́ɛ́? Ɩ ná Ɩzɩrayɛl nɩɛ tʋ́ŋtʋ́ŋlɔrɛ́ ná ɓa há tʋ́ŋ rɛ́ rɛ́ɛ́? A makɛ rɩ́ŋ baá sɩ́ jaa ná mɛ́ mɩnʋ́? Ɩ sɩɛ́ baá sɩ́ ná wɩ́lɔrɛ́ naŋá ɓa há ɛ́ɛ́.»7 Ʋ kenɩ́ŋ mʋ́ wɩ́cʋɔlɩjaa wuolo ná dannʋɔ mɛ́; ŋ beló: A ná zekúme fa keŋ bʋɔ. 8 Ɛ́ nɛ́ ʋ bʋlɩ́ŋ rɩ́ a bʋlɛ́: «Nɩbiino bio, ɓá zekume ná cɔ́rɛ́.» Ɛ́ nɛ́ ŋ ɓá zekúme ná cɔ́rɛ́, dɩ̃tɩŋdɩzʋɩ́ wurí. 9 Ʋ bʋlɩ́ŋ rɩ́ a bʋlɛ́: «Zʋ́ a bel ná wɩ́lɔrɛ́ naŋá ɓa haá mɩ́ŋ róŋ aá tʋ́ŋ.» 10 Ɛ nɛ́ ŋ zʋ́ a bel; a ná onni há nɩ́hɛ̃ títuure, rɩ́ balla duo wuu ní ɓa tuuro hé zeŋ ná mɛ́. Ɓa fa a onni há nɩ́ɛ́sɛ Ɩzɩrayɛl nɩɛ venni ná wuu máánɛ zeŋe ná wuu mí. 11 Ŋ ná Ɩzɩrayɛlɛ bɛlɛ nɩhɩɛ̃́sɛ mɛɛ́sɩ́botoro rí fí, rɩ́ Safaŋ bio Yazayahu mɩ́ŋ sɩsɩɛnnʋwa, a cɛ́ ɛ onni sɩ́ɛ́. Ɓa oro wuu fa keŋ tulaale kurupóóti ʋ nɛ́sɛ mɛ́; ɓa pi áŋsáŋsɛ hé nyíkɛ́ ɓa nyʋ́ɔsɛ lɛ́ zɩ́ bána. 12 Ʋ bʋlɩ́ŋ rɩ́ bʋlɛ́: «Nɩbiino bio, ɩ ná wɩ́ɛ́ ná Ɩzɩrayɛl nɩhɩɛ̃́sɛ haá tʋmɛ́ bino sɩɛrʋ, ɓa oro veno jɩɩsɛ mɛ́ rɛ́ɛ́? Ka sɩɛ́ bʋlɛ́: “Nyuutɩna Wɩɩsɛ wɩ́rá wuó ná; ʋ vɛɛ tɔ́ɔ́ ná tá.”» 13 Wɩɩsɛ bʋlɩ́ŋ rɩ́ bʋlɛ́: «Ɩ baá sɩ́ ná wɩ́lɔrɛ́ naŋá há bɔmɔ kɩ́ŋkaŋ ɓa há ɛɛ́.»
14 Ʋ kanɩ́ŋ mʋ́ wɩ́cʋɔlɩjaa dannʋɔ ná há mɩ́ŋ wɩɩsɛ dɩpomɩ́ nɛgʋɔ rɩ́. Róŋ ŋ ná háála há kené aá wii Tamuuzi mí. 15 Ɛ́ nɛ́ ʋ bʋlɩ́ŋ rɩ́ bʋlɛ́: «Nɩbiino bio, ɩ noú? Ɩ sɩɛ́ baá sɩ́ ná wɩ́lɔrɛ́ há lɔrɛ́ kɩllɛ nyáŋ ná kɩ́ŋkáŋ.» 16 Ʋ kenɩ́ŋ mʋ́ wɩ́cʋɔlɩjɩzeno wuolwie ná sɩɛrʋ. Wɩɩsɛ dɩmɩnɩ́ záwára ná, arɩ́ koro ná pɛkɛ ŋ ná báála há perí mʋɔ toó mɛrɛ́ rɩ́ bɔmmʋɔ. Ɓa píwó har tɛ́ Nyuutɩna Wɩɩsɛ Wɩ́cʋɔlɩjɩzeno ná, a ɓírmi ɓa sɩ́ɛ́ caasɛ wɩɩsɛ dɩpomɩ́ rɩ́, a ɓáárɛ wɩ́pomí. 17 Ɛ nɛ́ ʋ bʋlɩ́ŋ rɩ́ bʋlɛ́: «Ɩ noú nɩbiino bio? Ʋ cɛrɔ́ rɩ́ Ziida nɩɛ tʋ́ŋ wɩ́lɔrɛ́ ná ɓa haá tʋ́mɛ́ dɩhɩ̃ né rí? Ɓa ɔɔ bɔ́ŋbɔ́ŋ su tɔ́ɔ́ ná a baa aá zɔkɩ́ŋ mɛ́. 18 Ɛ nɛ́ tɛ́, ŋ má tɛ́ŋ nɛ́ peré ŋ sɩ́ tʋ́ŋ rɩ́ cɔwɩɩlzeno. Ŋ sɩ́ɛ́ tówó mí rɩ́ŋ fawɔ́ susú; ɓa cááse zeŋsi sɩ́ zʋ́ŋ dɩllɛ, amá ŋ wʋ́ɔ́ zesíwó.»