Nyuutɩna Wɩɩsɛ cɛ́ Zerizalɛmɛ mɛ́
2
1 Nyúbɔ́ŋ, Nyuutɩna cɔwɩɩlɔ́́ sɩɛrʋ, ʋ hé bino ɓɩzeno (ʋ ɔɔ tɔ́ biri cú) a tɔ́ háwéró Sɩɔŋ mɛ́!
Ʋ ɔ́ɔ́ Ɩzɩrayɛl wér
lɛ́ bána nyúú ɓal tíé.
Ʋ cɔwɩɩlɔ́́ kal
ʋ wʋ́ʋ́ naasɛ dɩsakɩ́ wɩ́ɛ́ bɩ́ɩ́nɛ.
2 Nyuutɩna líŋ (cáámɛ) Zakɔbɛ dunɩɛ dɩmɩnɛ́ wuu,
ʋ wɩ lóé rɩ óŋ káánɛ;
ʋ cɔwɩɩlɔ́́ sɩɛrʋ,
ʋ zɔ́kɛ háwéró Ziida zekɛ́rɛ́,
ʋ ɔ́ɔ́ ɓa ɓállɛ tíé;
ʋ zɔ́kɛ dɩ́tɩllɛ rɩ́rʋ́ sɩ́dííre.
3 Ʋ cɔ́wɩɩlɩzeno sɩɛrʋ,
ʋ bori Ɩzɩrayɛl nyɩla (dóé) tenni (ɓóŋɓóŋ);
Dɩŋdɔmɔ sɩ́ɛ́ mɛ́, ʋ kʋ́ʋ́rʋ́ nɛ́dú nɛ́sɛ;
Ʋ hé níŋzeno Zakɔbɛ dunɩɛ mɛ́
ʋ dídí cɔ́ɔ́ wuu.
4 Ʋ zɩ́nʋ́ túó anɛ dɩŋdɔmɔ,
ʋ ɓɔ́ʋ́ néduu nɛ́sɛ anɛ dɩŋdɔmɔ;
ʋ ɓʋ́ óŋ ná wuu rɩ́ sɩ́ɛ́ bélé há wéró;
Ʋ lóú cɔ́ɛ́ isó anɛ níŋ
háwéró Sɩɔŋ táŋtɛ ná nyúú.
5 Nyuutɩna Wɩɩsɛ kénú tɩɩ
anɛ dɩŋdɔmɔ nɛ́,
ʋ líŋ Ɩzɩrayɛl,
ʋ líŋú kuójɩɩsɛ;
ʋ zɔ́kʋ́ zekérɛ́;
ʋ zɔ́kʋ́ cémé dɩhɩ̃́;
Sɩɔŋ mɛ́, Nyuutɩna Wɩɩsɛ ɔ́ɔ́ ɓa sʋ́llɛ
cana díí ceme arɩ́ fɩ́ɛ́lɛ́ tápʋ́l mɛ́;
Ʋ cɔwɩɩlɩzeno ná sɩɛrʋ
ʋ pi kuóro arɩ́ vʋk'ɔɔsɔ yɩrɛ yɔ́ɔ́ nɛ́.
7 Nyuutɩna vɔ́ʋ́ koro tá,
ʋ vɔ́ʋ́ dɩmɩnɩ́ ná tá;
ʋ pi Sɩɔŋ kuójɩɩsɛ zeŋe
hé dɩŋdɔmɔ nɛ́sɛ mɛ́;
yɩrɛ kʋ́ɔ́lɛ́ ísí Nyuutɩna Wɩcʋɔlɩjɩzeno ná sɩɛrʋ
anɛ cana díí tápʋ́l!
8 Nyuutɩna Wɩɩsɛ fa vɔ́wɔ́
rʋ́ʋ́ zɔ́kɛ háwéró Sɩɔŋ zenaasɛ;
Ʋ tɩ́ɛ́nɛ ŋmɛ́ŋ,
ʋ nɛ́sɛ waá kʋ́ʋ́rɛ rʋ́ʋ́ nɛ́ wʋ́ɔ́ wuu zɔ́kɛ;
ʋ hé yúó pá zekɛ́rɛ́ arɩ́ zeŋe,
ɓa wuu ɓallɛ.
9 Ʋ ná dánʋ́ʋ́sɛ mʋ́ʋ́rɔ́ zʋ tíé,
ʋ bónníwó bóryakɛ, a zɔ́kwɔ́.
Ʋ kuóro rɩ́rʋ́ sɩ́dííre (minísiwa) mɩ́ŋ duhʋɔra nɛ́sɛ mɛ́;
wɩ́bilí báá toó,
ʋ wɩ́laabʋlla má wɩ Nyuutɩna wɩ́naalɛ́ náá ná.
10 Háwéró Sɩɔŋ nɩhɩ́ɛ̃́sɛ ké tíé, a síkli;
ɓa pá kúŋkulo a yoo tɔ́wɔ́ nyúnni mí,
ɓa pi bɔ́tɔ́ bɩ́rmɛ hávɔ́wɩ́ (a su yúwííri gɛnnɛ);
Zerizalɛmɛ tolé cúríwó nyúnni tíé.
11 Ŋ sɩ́ɛ́ sɩ́mɩ́ɩ́rʋ tenno,
ŋ sɩɛrʋ zɔ́kɔ́,
ŋ baa wɩ yɩɛla kéné (ŋ yɩɛla tá tíé)
zɔ́krʋ ná há pérí háwéró, ŋ nɩɛ wɩ́ɛ́,
bee wɩ́ɛ́, heŋbíísi rɩ́ bipʋllɛ
nɩ́ɩ́ sʋsɛ tɔ́ɔ́ dɩjɛ́lɛ́ mɛ́.
12 Ɓa bɔ́sɩ́wɔ́ maáwa a bʋ́lɛ́:
«Ɓɩdííli arɩ́ dɩvɛ́ŋ mɩ́ŋ nɛ́ɛ́?»
Ká ɓa sʋsʋsɛ́ anɛ nɩpɩrɛ́
tɔ́ɔ́ dɩjɛ́lɛ́ mɛ́,
ɓa maáwa baŋcɩ́llɛ daha.
13 Beé rí ŋ baá sɩ́ bʋ́l pɛ́ɩ́?
Zerizalɛmɛ; áŋ rɛ́ ŋ sɩ́ píí máŋsɛ?
Ɩ rɩ́ áŋ rɛ́ mɔ́ náŋá,
Sɩɔŋ ná há wéró, bʋ́ɔ́lɛ́ órí rí, rɩ́ŋ píí bʋ́ɔ́lɩ́?
Bee wɩ́ɛ́, ɩ zɔ́krʋ zéŋ anɛ mʋʋ:
áŋ rɛ́ wóí aá váárɛ?
14 Ɩ wɩ́laabʋlla há bʋlwɔ́ ná a pɛ́ɩ́,
ɓa ká nyɛ́nnɛ arɩ́ wɩ́nyɔ́ɔ́wa.
Ɓa wɩ́ɩ́ wɩ́zɔkɩ́ ná makɛ a pɛ́ɩ́,
a makɛ rɩ́wɔ́ fa ɔ́sɩ́ wɩ́kánɩ́ pɛ́ɩ́;
Ɓa wɩ́naalɛ́ ná ká nyɛ́nnɛ arɩ́ nɩnyɩ́sɛ wɩ́ɛ́ a pɛ́ɩ́.
15 Nɩdáárɛ ná wuu bɩ́bɛ́l (ŋmɩ́ŋmɔ́wɛ) nɛ́ŋsa ɩ wɩ́ɛ́,
aá cáásɩ́, aá viki nyúnni
Zerizalɛmɛ ná há wéró wɩ́ɛ́:
Tɔ́ɔ́ ná ɓa haá yɩrɛ
«Wér césó» «dúníé (tíé) wuu satɔrɔ́» nɛ́ nyɛ́?»
16 Ɩ dɩ́ŋdɔma wuu wúríwó nʋʋsɛ cɩ́nɩ́ mɛ́,
Ɓa cáásó rɩ́ sazɔkɔ́, a cáámɩ́wɔ́ nyɩla,
ká bʋlɛ́:«Á liŋú!.
Tápʋ́l ná á fa háá dɛ́llɛ́ nɛ́ ɓɩ́ɛ́ná ɛ́,
á pérú, nóú ní!»
17 Nyuutɩna Wɩɩsɛ tʋ́mʋ́ fa há bɩ́ɩ́nʋ́ ná,
ʋ lóú ʋ wɩ́bʋlɩ́ ná nʋɔ sú,
ʋ fa há bɩ́ɩ́nʋ́ ná fól wuu:
ʋ zɔ́kɛ zɔ́krʋ, ʋ wɩ óŋ lɩ́sɛ tá;
ʋ ɔ́ɔ́ dɩŋdɔmɔ mɔ́mɩ́,
ʋ kéní dɩŋdɔma yɩla ɓɔ́ (dí dóé).
18 Ɓa sɩɛnnɛ (Zerizalɛmɛ nɩɛ) cáásó hé Nyuutɩna mɛ́.
Háwéró Sɩɔŋ zenaa, ló rɩ́ɩ́ sɩ́mɩ́ɩ́rʋ pal
anɛ polcʋɔrɛ́ nyii, wɔhɔ arɩ́ tɩ́táŋ.
Sɩ́ fɩ́ɛ́la já,
sɩ́ ló rɩ́ɩ́ sɩ́mɩ́ɩ́rʋ káásɛ!
19 Ísí sɩ́ɛ́ birebire tɛ́ŋ mɛ́, a cáási!
wúrí sɩɛrʋ anɛ nyii Nyuutɩna sɩ́ɛ́.
Césí sɩɛrʋ wɩ́ɛ́ wuu
Ɓɔ́ɩ́ nɛ́ŋsa cáásʋ́
ɩ bɛlɛ ná háá sʋsɛ losú
ŋmɛ́ŋcaksɛwa wuu mí
(hiẽso) laatɛ́ wɩ́ɛ́.
20 Nyuutɩna Wɩɩsɛ, bel ná
nɛ́ŋ ná ɩ há a nyɛ!
Ʋ mɔhɔ̃́ rɩ́ háála dí bɛlɛ ná ɓa tɩɩ há lʋ́lɛ́,
heŋbiwíísi ná há cáásɛ cóllíwó rí?
Rɩ́wɔ́ ɓʋ́ʋ́sɛ vʋ́k'ɔɔsa arɩ́ wɩ́laabʋlla
Nyuutɩna dɩmɩnɩ́ mɛ́ rɛ́?
21 Nɩpʋɔsɛ́ arɩ́ nɩhɩ́ɛ̃́sɛ ɓállɔ́
pɛ́ ŋmɛ́ŋcaksɛwa mɛ́;
tókowí ɓʋ́ʋ́sɩ́ŋ
tolé arɩ́ŋ heŋbólli;
tápʋ́l ná ɩ cɔ́ɛ́ há wɩ́ɛ́, ɩ ɓʋ́ɔ́,
ɩ ɓʋ́ɔ́ (kɔ́rkɔ́), ɩ wɩ nɛ́ŋ lɩ́sɛ tá.
22 Cɔ́ɔ́ wuu mí, ɩ yɩ́rɛ nɩɛ ná há hé héwíŋ aá páŋ,
anɛ cana díí kal.
Nyuutɩna Wɩɩsɛ cɔwɩɩlɔ́́ tápʋ́l,
nɩfori toó, nɩkáánɛ toó.
Nɩɛ ná ŋ fa há dɩ́ɛ́sɛ, a cóllíwó,
ŋ dɩŋɔmɔ ɓʋ́ʋ́sɩ́wɔ́.