Hííne kɛnɔ
ʋ há wʋ́ʋ́ colle nʋɔ péré.
Cɩcʋɔ́ wuu, ʋ sawér foku ní (múŋsi, yieri, póŋ ní ).
Nyuutɩna Wɩɩsɛ, néí táŋa há zeno a mɔ́ ɛ́! (3.23)
Wɩcʋɔlɩjɩzeno sɩɛrʋ karmɛ́ tɛ́ŋ mɛ́, ɛ́ yɩɩla nɛ́ Zuwifiwa yɩ aá líísi Zerizalɛmɛ Wɩcʋɔlɩjɩzeno ná há zɔ́kɛ́ wɩ́ɛ́, bɩŋsɛ zɔ́mʋ́ɔ́ rɩ́ mɛɛ́sɩbaná arɩ́ balgo tɛ́ŋ mɛ́, rɩ Zeezi Kirisi fa há wɩ kúé.
Kɛnɔ sɩɛrʋ wɩ́ɛ́
Dʋŋdʋʋ̃́ sɩ́mɩɩrʋ yɩl: Zerizalɛmɛ vɛ́ɛ́ tɛ́ wɩ́ɛ́ sapíítir 1
Bʋllɛ nyúú mí sɩ́mɩɩrʋ yɩl: Nyuutɩna Wɩɩsɛ fa nɩhɩ̃́ dɩŋdɔmɔ nɛ́ sápítir 2
Botoro nyúú mí sɩ́mɩɩrʋ yɩl: Arɩ́ ɛ́ ná má wuu, yɩɛla há mɩnɔ́ sápítir 3
Baná nyúú mí sɩ́mɩɩrʋ yɩl: Zerizɛlɛmɛ zɔ́kɛ́ wɩ́ɛ́ sapíítir 4
Bɔ́mmʋ́ɔ́ nyúú mí sɩ́mɩɩrʋ yɩl: Nyuutɩna Wɩɩsɛ sawér sʋ́lɛ́ wɩ́ɛ́ sápítir 5
Zerizalɛmɛ nɩhɩ̃́ yúháálɔ ɓa há vɛ́ɛ́ tá nɛ́
1
1 Beewa (Nyúbɔ́ŋ)! Tɔ́zeno né dʋŋɔ nɛ́ kéné.
Ʋ bɩ́rmɛ yúháálɔ.
Ʋ é, duówa sɩɛrʋ, tɔ́zeno,
pʋ́rvɛ́ŋsɛwa hákuóro,
ʋ nɩ́ɩ́ tʋ́ŋ yótʋtʋ́mɛ́.
2 Tɩ́táŋ wuu, ʋ mɩŋ wííle mí,
ʋ tɛ́ŋbgɛllɛ fo rɩ́ sɩ́mɩɩrʋ.
Ʋ naŋnɔŋsɛ wuu fa há cóú sɩɛrʋ,
nɛ́ŋ toó aá bʋɔlʋ́;
ʋ nannɔŋsɛ wuu vɔ́ʋ́ tá,
ɓa nɛ́ kɔ́ʋ́ dɩŋdɔma mʋ́l né mí.
3 Ziida col yomí sɩɛrʋ, wɩ́hala púú,
ʋ caasɛ aá tʋ́ŋ tʋ́tʋ́ŋduóru;
ʋ mɩŋ duówa sɩɛrʋ,
ʋ wɩ fɩ́ɛ́lɛ́ kéné;
nɩɛ ná wuu fa haá kírú púú,
ʋ mɩ́ŋ sazɔkɔ́ sɩsɩɛnnʋwa.
4 Yúó ní
a pá ŋmɛ́ŋsɛ ná haá mʋ́ Sɩɔŋ,
bee wɩ́ɛ́, ɓa baá wɩ caŋsɛ díí céŋsi mʋ́.
Ʋ dánnʋʋsɛ wuu zɔ́kɔ́,
ʋ vʋk'ɔɔsa mɩ́ŋ hííne mí,
ʋ toopere ka sazɔkɔ́ namɩ́ŋsa nɛ́,
kɔ́ʋ́ tɩɩ sɩɛrʋ lʋ́ʋ́ tɩɩ.
5 Ʋ dɩŋdɔma dí dóé ʋ nyúú,
ʋ dɩŋdɔma é tɩ́wɔ́ tɩɩ.
Bee wɩ́ɛ́, Nyuutɩna Wɩɩsɛ nɛ́ hóú sazɔkɔ́ mɛ́,
ʋ wɩ́zɔkɛ́ há kánɔ́ wɩ́ɛ́.
Dɩŋdɔmɔ yíkú bɛlɛ
ɓa col yomí sɩɛrʋ.
6 Háwéró háwérí wuu ténnó;
Ʋ sɩ́dííre (minísiwa) bɩ́rmɛ wɩ́ɛ́máwa,
ɓɩdííli wuu toó rɩ́wɔ́ dí,
ɓa wɩ dóé má kéné,
kaá mʋ́ naŋballɔ sɩ́ɛ́.
7 Zerizalɛmɛ bɩ́rɔ́ líísú tɩɩ,
ʋ sazɔkɔ́ tápʋlɛ́ rɩ́rʋ́ fa há ká nɩbaarɩ́ wɩ́ɛ́,
arɩ́ oŋwéré ná wuu ʋ díé fa há kéné wɩ́ɛ́.
Ʋ nɩɛ há zʋ́ dɩŋdɔmɔ nɛ́sɛ,
ká nɛ́ŋ tó aá fɔ́ʋ́ búŋse,
ʋ dɩŋdɔma nóú,
a mɔ́mʋ́ ʋ há nyɩ́ɩ́kɛ wɩ́ɛ́.
8 Zerizalɛmɛ tʋ́ŋ wɩ́bɔma ɓɩkaná (púló),
ɛ́ nɛ́ tɛ ʋ bɩ́rmɛ kʋɔrɛ;
nɩɛ ná fa haá píŋsú nyínyákʋ́,
ɓa há nóú tɛŋɓɩla.
Ʋ tɩɩ híhííni
ká bɩ́rmʋ́ har.
9 Ʋ busunnú mɩ́nʋ́ gɛrɔ mɛ́.
ʋ wʋ́ʋ́ cíé wɩ́ɛ́ bɩ́ɩ́nɛ.
Ʋ ɓalɔ́, ɓal ná há wɩ wúó máŋsɛ,
ká nɛ́ŋ toó aá bʋ́ɔ́lʋ́.
Nyuutɩna, náŋ wɩ́hala,
bee wɩ́ɛ́, dɩŋdɔmɔ dí dóé.»
10 Dɩŋdɔmɔ tɛ́rʋ́ nɛ́sɛ
a lá óŋwéré ná wuu ʋ fa há kéne:
Zerialɛmɛ (ʋ) ná nɩhʋɔra ná,
ɩ fa há pɔ́ɛ́ rɩ́wɔ́ sɩ́ɩ́ púl sɩɛrʋ zʋ,
ʋ dɩmɩnɩ́ mɛ́.
11 Ʋ nɩɛ wuu ní hííne,
aá já ɓɩdííli.
Ɓa píwó oŋwéré wuu ní tɛ
ɓɩdííli mʋ́l,
a makɛ rɩ́wɔ́ ka mɩɩsɛ.
Zerizalɛmɛ sɛ́: «Nyuutɩna Wɩɩsɛ, bel ná,
ɓa háá nʋ́ɔ́sɩ́ŋ ɛ́.»
12 Rɩ nyɛ́ sɩ́ɩ́wa pérú, ɩ́ é nɩɛ ná wuu há pííwa ŋmɛ́nɔ aá daarɛ.
Ɩ́ kɩ́ɛ́lɛ a ná, wɩ́hala rɩ mɩ́nɛ́ a nɩ́ɛ́sɩ́ŋ (mɔ́ŋ) wɩ́hala né;
a mɔ́ŋ bɛ́ŋsɛ́ ná ɓa há ɛ́ɛ́ ŋ dí!
Nyuutɩna cɔ́wɩɩlɩzeno kal nɛ́
ʋ bɛ́ŋsɩ́ŋ ɛ́.
13 Ʋ tá níŋ ʋ lɛ́ bána nyúú
a tuwi zʋ́ŋ heŋgbele;
ʋ nʋ́ɔ́sɩ́wɔ́,
Ʋ hé bara ŋ naasɛ mʋ́l,
ʋ pɔ́sɩ́ŋ hé har;
Ʋ lóú zɔ́krʋ péríŋ,
ŋ mɩ́ŋ wɩɩla mɛ́ tɛ́ŋ wuu mí.
14 Ʋ nɛ́sɛ nɛ́ vɔ́wɩ́ŋ wɩ́bɔma baŋdabáásɩ́;
ɓa gúlli náŋá mɛ́;
ɓa zɩ́nɔ́ yakɩ́ŋ líŋɓóro mí.
Ʋ ɔ́ɔ́ ŋ dóé wɩ́ dɩbalá cɩ́nɛ́,
Nyuutɩna píŋ hé nɛ́ŋsa ná sɩɛrʋ,
ŋ wɩ dóé kéné ɓa rɩ́ nɛ́.
15 Nyuutɩna kiri lalyóóribɩbara ná wuu
fa há mɩ́nɩ́ŋ rɩ́.
Ʋ yɩrɛ ceme cɩ́nɩ́ŋ mɛ́,
rʋ́ʋ́ tɩ́ksɩ́ŋ (gɛ́rɩ́ŋ) nɩpʋɔsɛ́.
Nyuutɩna tɩ́ksɛ háwéró Ziida viínyinɔmɔ mɛ́.
16 Ɓa wɩ́ɛ́ nɛ́ wíwí;
sɩ́mɩɩrʋ súŋ sɩ́ɛ́.
Bee wɩ́ɛ́, nɛ́ŋ háá bʋ́ɔ́lɩ́ŋ,
háá duórɩ́ŋ naasɛ (ɛ́ɛ́ rɩ́ŋ bɩrka mɩɩsɛ) dɩhɩ̃́ boló,
Ŋ bɛlɛ mɩ́ŋ sazɔkɔ́ mɛ́,
bee wɩ́ɛ́, dɩŋdɔmɔ dóé kɩ́wɔ́.
17 Sɩɔŋ tɛ́rʋ́ nɛ́ŋsa,
ká nɛ́ŋ toó aá bʋ́ɔ́lʋ́;
Nyuutɩna ɔ́ɔ́ Ɩzɩrayɛl kénnináŋa
ná há kílú cɩ́nʋ́ mɛ́;
Zerizalɛmɛ bɩ́rmɛ kʋ́ɔ́rɛ (óŋyɔ́ɔ́)
ɓa (dɩŋdɔma) sɩɛrʋ.
18 Nyuutɩna Wɩɩsɛ nɛ́ kéŋ táŋa,
beé wɩ́ɛ́, ŋ nɛ́ fa vɔ́ʋ́ nʋɔ wɩ́ɛ́.
Ɩ́ é nɩɛ wuu, ŋŋ́ sʋ́lɩ́wa, ɩ́ zesi,
a náŋ wɩ́hala há mɔ́ ɛ́!
Ŋ toopéré arɩ́rɩ́ŋ haŋpʋɔla
col yomí sɩɛrʋ.
19 Ŋ yɩr nɩɛ ná fa há cóŋ wɩ́ɛ́,
amá ɓa nyɩ́sɩ́ŋ.
Ŋ vʋk'ɔɔsa arɩ́rɩ́ŋ nɩɛ ná háá cáánɩ́ŋ
má sʋsɛ tɔ́ɔ́ sɩɛrʋ,
tɛ́ŋ ná mɛ́ ɓa fa haa já ɓɩdííle
rɩ́wɔ́ dí hiẽsi.
20 Nyuutɩnna Wɩɩsɛ, bélíŋ sazɔkɔ́,
ŋ tɛŋ wuu níí wáásɛ,
ŋ sɩɛrʋ wuu ní vúkme,
bee wɩ́ɛ́, ŋ cáásɔ́ vɔ́ʋ́ nʋɔ.
Ŋmɛ́ŋsɛ sɩɛrʋ,
tókowí ɓʋ́ŋ bɛlɛ,
jaa sɩɛrʋ, sʋʋ nɛ́.
21 Ɓa nɩ́ŋ (cɛ́mɛ́):
amá nɛ́ŋ tó aá bʋ́ɔ́lɩ́ŋ;
Ŋ dɩŋdɔma wuu ní nɩ́ŋ wɩ́hala ná wɩ́ɛ́,
a jʋ́ɔ́sɛ, bee wɩ́ɛ́, ɩ nɛ́ tʋ́ŋ ɛ́;
ɩ ɔ́ɔ́ tápʋ́l ná fa há bʋ́lʋ́ wɩ́ɛ́ pʋ́l,
sɩɛ́ a rɩ́wɔ́ nɩ́ɛ́sɩ́ŋ!
22 Rɩ́ bɔ́ŋbɔ́ŋ ná ɓa há ɛ́ɛ́ nyɩ́ɩ́sɩ́ sɩ́ɛ́ mɛ́.
anɛ ɛ́ ɩ há bɛ́ŋsɩ́ŋ
Ɩ há áŋ ɛ́, ɔ́wɔ́ má ɛ́,
a tɩ́ŋɩ́ŋ wɩ́zɔkɛ́ ná wuu wɩ́ɛ́.
Bee wɩ́ɛ́, ŋ hííne zéŋ,
ŋ (sɩɛrʋ) mɩ́ŋ wɩ́hala mɛ́.