Zeremi 47

Nyuutɩna Wɩɩsɛ há bʋ́l wɩ́ɛ́ ná cɛ́ Filisiti nɩɛ mɛ́

1 Ná Nyuutɩna Wɩɩsɛ há sʋ́ʋ́ ná a pá Filisiti nɩɛ a tɩ́ŋʋ́ wɩ́laabʋllɔ Zeremi mí, rɩ Faarɔŋ fa ha wɩ kúé yo Gaza.

2 Ná Nyuutɩna Wɩɩsɛ há sʋ́ʋ́ ná:

Nyikaná nɛ́ gíré lɛ wɩɩsɛ dɩpomí nɛ́gʋɔ rɩ́ aá ko,

a bɩrmɛ polcʋɔrɛ́ ná nyipoo há kéŋ dóé,

ʋ nyii sɩ́ dí tɔ́ɔ́, arɩ́ óŋ ná wuu há mɩ́nʋ́ sɩɛrʋ,

tɔ́nɛ arɩ́wɔ́ nɩɛ.

Nɩɛ wuu níí búŋse,

Tɔ́ɔ́ nɩɛ wuu níí cáásé.

3 Ɓa nɛ́ záksɛ nacɩ́ksɛ dɔ́mɛ tíé nyúú,

lalyóórítorkówa dɔ́mɛ,

ɓa naasɛ dɔ́mɛ.

Ánáwa sʋ́llɛ bɛlɛ wɩ́ɛ́,

sazɔkɔ́ há nɩ́ɩ́sɩ́wɔ́ wɩ́ɛ́.

4 Zɔ́krʋ tápʋl nɩ́ɩ́ kúé,

rʋ́ʋ́ zɔkɛ Filisiti nɩɛ wuu,

rʋ́ʋ́ zɔkɛ Tiiri arɩ́ Sɩɩdɔŋ

nɩkáánɛ ná wuu há wówó la aá tá.

Bee wɩ́ɛ́, Nyuutɩna Wɩɩsɛ sɩ́ zɔkɛ Filisiti nɩɛ wuu,

arɩ́ Kafɩtɔɔrɛ tɔ́ɔ́ ná mʋʋ há kílú, nɩkáánɛ má.

5 Gaza mɛ́, nɩɛ nyunni píéró.

Asɩkalɔŋ mɛ́, nɛ́ŋ waá dɔŋ,

Ɩ́ é polo sɩɛrʋ nɩkáánɛ,

tɛ́ŋ beé mí rí, rɩ́ɩ́wa tɛ́ɩ́wa tɛŋkɛnnɛ kʋsɛ́?

6 Nyúbɔ́ŋ! Nyuutɩna Wɩɩsɛ tókowí,

tɛ́ŋ béé mí rɩ́ɩ́ fɩɛlɛ>>

Zʋ́ɩ́ kúó sɩɛrʋ,

kánɩ́ tɩɩ, cɛ́ cɩ́m.”

7 Ɛ́ rɛ́ mɛ́ rɛ́ sɩɛ́, rʋ́ʋ́ fɩɛlɛ?

Nyuutɩna Wɩɩsɛ pɔ́ʋ́ ŋmɛ́nɔ,

rʋ́ʋ́ cɛ́ Asɩkalɔŋ arɩ́ mʋʋ nʋɔ nɩɛ mɛ́.» Ráŋ nɛ́ Nyuutɩna Wɩɩsɛ kánʋ́ sii ná cáásɛ.