Nyuutɩna Wɩɩsɛ liŋó Baruki yɩr mɛ́
45
1 Zoziyasɛ bio Zʋwakimi há dí Ziida kuorí, ʋ bɩŋsɛ baná nyúú mí ní, Neriya bio Baruki pʋ́ŋsɛ wɩ́ɛ́ ná wuu Wɩɩsɛ wɩ́laabʋllɔ Zeremi fa há césé a pɔ́ʋ́ ʋ zesi ká pʋ́ŋsɛ, a hé kɛnɔ mɛ́. Ɛ́ tɛ́ŋ mɛ́ nɛ́, Zeremi sɩɛ́ bʋl Baruki rɩ́ a bʋlɛ́: 2 «Baruki, ná Nyuutɩna Wɩɩsɛ, Ɩzɩrayɛl Wɩɩsɛ há sʋ́ʋ́ ná, a pɛ́ɩ́. 3 Ɩ sɛ́: «Ŋ ká wɩhálá nɛ́ŋ rɛ́! Ŋ fáá hĩ́ĩ́ni rí fól wuu, ká Nyuutɩna Wɩɩsɛ báá súúríŋ sazɔkɔ́. Ŋ summi a pii bɔl, ká wɩ fɩ́ɛ́lá oro wuu kené!” 4 Ná wɩ́ɩ́ ná ɩ há sɩ́ bʋl pɔ́ʋ́: Ná Nyuutɩna Wɩɩsɛ há sʋ́ʋ́ ná:“Ŋ há sɔ́ omo ná, ʋ nɛ́ ŋ gígíri,
ŋ há cɔ́ŋsɛ omo ná, ʋ nɛ́ ŋ cúcúri;
ɛ́ nɛ́ ŋ sɩ́ tʋ́ŋ tɔ́ɔ́ ná wuu mí.
5 Kɛ́ɩ́ é jɩ́já wɩ́zeŋse?
Sɩ́wɔ́ hɩɛ̃nʋ!
Bee wɩ́ɛ́, wɩhála ná ŋ há sɩ́ hé
sɩ́ peri oŋhiẽsí wuu,
Nyuutɩna Wɩɩsɛ nɛ́ bʋl ɛ́.
Amá ŋ sɩ́ ló rɩ́ɩ́ ká mɩɩsɛ,
ráŋ ná wuu ɩ há sɩ́ mʋ́.”»